8-ПАРЧӘ
Мәсиһниң келиши
ДАНИЯЛ ПӘЙҒӘМБӘР бәшарәт берип, 500 жилдин көпирәк вақит өткәндин кейин Худаниң пәриштиси Җәбраил Давут падишаниң әвлатлиридин бири болған Мәрийәм исимлиқ бир қизға көрүнди. Җәбраил қизға: «Салам саңа, илтипатқа муйәссәр болған қиз! Йәһва Худа сениң билән!»— дәп ейтти (Луқа 1:28). Амма Мәрийәм чөчүп қорқуп кәтти. Җәбраил немә мәхсәттә шундақ салам бәргән?
Пәриштә Җәбраил Мәрийәмниң Мәсиһни туғудиғанлиғи һәққидә униңға хәвәр йәткүзгән
Җәбраил: «Әй Мәрийәм қорқмиғин, чүнки сән Худаниң нәзирдә илтипат таптиң. Мана, сән һамилдар болуп, бир оғул туғисән вә исмини Әйса қойисән... Йәһва Худа униңға атиси Давутниң тәхтини бериду... униң падишалиғиниң чеки болмайду»,— дәп Мәрийәмгә чүшәндүргән (Луқа 1:30—33, ЙД). Бу нәқәдәр хошал қиларлиқ хәвәр, һә! Узун жиллар күткән «нәсил», йәни Мәсиһни Мәрийәм туғқан еди!
Кейинки жили Әйса Бәйтләһәмдә туғулди. Шу күни бир пәриштә шу йәрдики падичиларға: «Қорқмаңлар, мән силәргә... чәксиз хошаллиққа чөмдүридиған хәвәрни елип кәлдим. Бүгүн Давутниң шәһиридә силәр үчүн бир қутқазғучи һәзрити Мәсиһ туғулди»,— деди (Луқа 2:10, 11, ЙД). Кейин Әйсаниң аилисидикиләр Насирә шәһиригә қайтти вә у шу йәрдә чоң болди.
Әйса дәл милади 29-жилида Мәсиһ сүпитидә мәйданға келип, Худаниң пәйғәмбәрлик хизмитини қилишқа башлиди. У шу чағда тәхминән оттуз яшта еди (Луқа 3:23). Нурғун кишиләр униң Пәрвәрдигар тәрипидин әвәтилгәнлигини көрүп йәткән. Улар: «Аримизда улуқ пәйғәмбәр пәйда болди!»,— дейишкән еди (Луқа 7:16, 17). Бирақ Әйса Мәсиһ немә үгәткән?
Әйса пәйғәмбәр кишиләргә Худани сөйүп, Униңға ибадәт қилишни үгәткән: У: «Худайимиз болған Йәһва — йеганә Йәһвадур. Худайиң Йәһвани пүтүн қәлбиң, пүтүн җениң, пүтүн зеһниң вә пүтүн күчүң билән сөйгин»,— дәп җакалиған (Марк 12:29, 30, ЙД). У йәнә: «Сениң Худайиң Йәһвағила ибадәт қилғин һәм пәқәт Униңғила муқәддәс хизмәтни атқурғин»,— дегән еди (Луқа 4:8).
Әйса пәйғәмбәр кишиләрни бир-бирини сөйүшкә үндигән: Башқиларни өзүңни сөйгәндәк сөй, дәп үгәткән Әйса (Марк 12:31). Һәм у: «Башқиларниң силәргә қандақ муамилә қилишини халисаңлар, силәрму уларға шундақ муамилә қилиңлар. Чүнки Тәврат қануни вә пәйғәмбәрниң тәлимлири будур»,— дегән (Мәтта 7:12, ЙД).
Әйса Мәсиһ қизғинлиқ билән Худа Падишалиғи һәққидә кишиләргә вәз ейтқан: У: «Мән Худаниң Падишалиғи һәққидики хуш хәвәрни башқа шәһәрләрдиму җакалишим керәк, чүнки мән мошу иш үчүн әвәтилдим»,— дегән еди (Луқа 4:43). Немә үчүн Худа Падишалиғи шунчә муһим?
Муқәддәс Язмилар Худа Падишалиғи болса, йәр йүзи үстидин һөкүмранлиқ жүргүзидиған асмандики һөкүмәт дәп тәлим бериду. Мәсиһ сүпитидә кәлгән Әйса Падишалиқниң Худа тәрипидин тәйинләнгән Падишасидур. Даниял пәйғәмбәр Худаниң асманда Мәсиһкә «һөкүмранлиқ, улуқлуқ вә падишалиқ» бәргәнлигини алдин көргән еди (Даниял 7:14, ЙД). Шу Падишалиқ җәннәтни пүткүл йәр йүзигә кәңәйтип, Худаниң хизмәтчилирини мәңгүлүк һаятлиқ билән мукапатлайду. Буниңдинму қалтис хуш хәвәр барму?!