45-تەتقىق ماقالىسى
4-ناخشا خۇدا ئالدىدا ياخشى نام-ئاتاق تىكلەش
خۇدانىڭ سادىق خىزمەتچىلىرىدىن ئۆگىنەيلى
«دانالىق ياشانغانلاردا، پەم-پاراسەت ئۇزۇن ئۆمۈر كۆرگەنلەردە ئەمەسمۇ؟».—ئايۇپ 12:12.
مەركىزى ئىدىيە
يەھۋا خۇداغا بويسۇنساق، ئۇ بىزنى ھازىر بەرىكەتلەپ قالماي، كېلەچەكتە مەڭگۈ ھاياتقا ئېرىشتۈرىدۇ.
1. بىز ياشانغانلاردىن نېمىنى ئۆگىنەلەيمىز؟
بىز ھەممىمىز ھاياتىمىزدا مۇھىم قارارلارنى چىقارغاندا، مەسلىھەتلەرگە مۇھتاج بولىمىز. بىزگە ئاقساقاللار ياكى ئىمان-ئېتىقادتا پىشىپ يېتىلگەن ئېتىقادچىلار شۇنداق مەسلىھەتلەرنى بېرەلەيدۇ. ئۇلارنىڭ يېشى بىزدىن چوڭ بولسا، ئۇلارنىڭ كۆز قاراشلىرىنىڭ ۋاقتى ئۆتكەن، بۈگۈنكى كۈنگە ماس كەلمەيدۇ دەپ ئويلىماسلىقىمىز كېرەك. ئۇلار بىزگە قارىغاندا بۇ دۇنيانىڭ ئىشلىرىنى كۆپرەك كۆرگەچ، ئۇلارنىڭ توپلىغان تەجرىبىسى، ئىلىم-ھېكمىتى ۋە پەم-پاراسىتى مول.—ئايۇپ 12:12.
2. بۇ ماقالىدە نېمىلەرنى مۇھاكىمە قىلىمىز؟
2 قەدىمقى زاماندا يەھۋا ئۆز خەلقى يېتەكلەش ۋە ئۇلارغا ئىلھام-مەدەت بېرىش ئۈچۈن ئۆزىنىڭ سادىق ياشانغان خىزمەتچىلىرىنى قوللانغان. شۇلاردىن مۇسا پەيغەمبەر، داۋۇت پادىشاھ ۋە ئەلچى يۇھاننانىڭ مىساللىرىنى كۆرۈپ باقايلى. ئۇلار ئوخشاش بولمىغان دەۋردە ياشىغان ۋە پەرقلىق ۋەزىيەتلەرنى باشتىن كەچۈرگەن. ئۇلار ئۆمرىنىڭ ئاخىرقى مەزگىلىگە كەلگەندە، ياشلارغا بەزى دانا نەسىھەتلەرنى بەرگەن. ئۇلارنىڭ شۇ نەسىھەت سۆزلىرى يەھۋا خۇداغا بويسۇنۇشنىڭ ئىنتايىن مۇھىملىقىنى تەكىتلىگەن. شۇ پايدىلىق نەسىھەت سۆزلىرىدىن ئۆگىنىشىمىز ئۈچۈن يەھۋا شۇ سادىق خىزمەتچىلەرنىڭ سۆزلىرىنى مۇقەددەس كىتابقا يازدۇرغان. مەيلى بىز ياش ياكى ياشانغان بولايلى، ئاشۇ نەسىھەت سۆزلىرىدىن مۇھىم ھەقىقەتلەرنى ئۆگىنەلەيمىز (رىملىقلار 15:4؛ 2-تىموت. 3:16). بۇ ماقالىدە شۇ سادىق خىزمەتچىلەرنىڭ ئېيتقان ئاخىرقى سۆزلىرىنى ئوقۇپ، ئۇلاردىن نېمىلەرنى ئۆگىنەلەيدىغانلىقىمىزنى مۇھاكىمە قىلىمىز.
«ئۆمرۈڭلارنى ئۇزۇن قىلىدۇ»
3. مۇسا خۇداغا ۋە ئۇنىڭ خەلقىگە خىزمەت قىلىش ئۈچۈن قانداق خىزمەتلەرنى قىلغان؟
3 مۇسا پەيغەمبەر ئۆمۈر بويى يەھۋاغا سادىق خىزمەت قىلىشقا پۈتۈن كۈچى بىلەن تىرىشقان. ئۇ پەيغەمبەر، سوتچى، يېتەكچى، تارىخچى بولۇپ خىزمەت قىلغاچ، ھاياتىدا مول تەجرىبىلەرنى توپلىغان. مۇسا ئىسرائىل خەلقىنى مىسىردىكى قۇللىقىدىن قۇتۇلدۇرۇپ چىققاندا، يەھۋانىڭ كۆرسەتكەن نۇرغۇن مۆجىزىلىرىنى ئۆز كۆزى بىلەن كۆرگەن. يەھۋا مۇقەددەس كىتابنىڭ دەسلەپكى بەش كىتابىنى، زەبۇر 90-بابنى، بەلكىم 91-بابنى يازدۇرۇش ئۈچۈن مۇسا پەيغەمبەرنى ئىشلەتكەن. ئۇنىڭدىن باشقا، ئېھتىمال ئايۇپ كىتابىنى ھەم مۇسا پەيغەمبەرنىڭ يازغان.
4. مۇسا ئۆلۈشتىن ئاۋۋال كىملەرگە نەسىھەت قىلغان ۋە نېمە ئۈچۈن؟
4 مۇسا 120 ياش ئۆمۈر كۆرۈپ، ئۆلۈپ كېتىشتىن سەل ئاۋۋال، پۈتكۈل ئىسرائىل خەلقىنى يىغىپ، ئۇلارغا يەھۋانىڭ ئۆتمۈشتە ئۆزلىرىگە نېمە قىلغانلىقىنى ئەسلىتىپ ئۆتكەن. ئۇلار ئۇنىڭ سۆزىنى قۇلاق سېلىپ ئاڭلىغان. ئۇلارنىڭ ئارىسىدىكى بەزىلەر ئۆز كۆزلىرى بىلەن يەھۋانىڭ كۆرسەتكەن مۆجىزىلىرىنى ۋە ئۇنىڭ مىسىرلىقلارنى قانداق جازالىغانلىقىنى كۆرگەن (چىق. 7:3، 4). كېيىنرەك، يەھۋا قىزىل دېڭىزنىڭ سۈيىنى ئوتتۇرىدىن ئىككى بۆلۈنگەندە، ئىسرائىل خەلقى دېڭىزنىڭ ئوتتۇرىسىدىن كېسىپ ئۆتكەنلىكىنى ۋە مىسىر قوشۇنلىرىنىڭ دېڭىز سۈيىدە غەرق قىلىنغانلىقىنىمۇ ئۆز كۆزلىرى بىلەن كۆرگەن (چىق. 14:29–31). چۆل باياۋاندا يۈرگەندە، ئۇلار يەھۋا خۇدانىڭ ئۆزلىرىنى خەۋپ-خەتەردىن ساقلاپ، قىلغان غەمخورلۇقىنى باشتىن كەچۈرگەن (تەكرار. قا 8:3، 4). مانا ئەمدى ئۇلار يەھۋا ۋەدە قىلغان زېمىنغا كىرىش ئالدىدا تۇرغاندا، مۇسا ئەڭ ئاخىرقى قېتىم ئۇلارغا ئىلھام-مەدەت بەرمەكچى بولغان ئىدىa.
5. تەكرار قانۇن 30:19، 20-ئايەتلەرگە ئاساسلانغاندا، مۇسا ئىسرائىل خەلقىگە كېلەچىكى ھەققىدە نېمە دېگەن؟
5 مۇسا نېمە دېگەن؟ (تەكرار قانۇن 30:19، 20-نى ئوقۇڭ). ئۇ ئىسرائىل خەلقىگە گۈزەل كېلەچەك كۈتۈپ تۇرغانلىقىنى؛ يەھۋانىڭ ئۇلارنى بەرىكەتلەپ، ۋەدە قىلىنغان زېمىنغا ئېرىشتۈرىدىغانلىقىنى ۋە ئۇلار ئاشۇ مەنزىرىسى گۈزەل، تۇپرىقى مۇنبەت مول ھوسۇللۇق زېمىندا ئۇزۇن ئۆمۈر كۆرىدىغانلىقىنى ئېيتقان. مۇسا ئۇلارغا ئۇ زېمىننى شۇنداق تەسۋىرلىگەن: «ئۇ يەردە سەن قورمىغان گۈزەل شەھەرلەر بار؛ سەن ئۆزۈڭ توپلىمىغان تۈرلۈك ياخشى نەسىلەرگە تولغان ئۆيلەر بار؛ سەن كولىمىغان قۇدۇقلار بار؛ سەن بەرپا قىلمىغان ئۈزۈمزارلىق ۋە زەيتۇنلۇق باغلار بار».—تەكرار. قا 6:10، 11.
6. نېمە ئۈچۈن ئىسرائىل خەلقى بۇ زېمىندىن ئەسىرلىككە ئېلىپ كېتىلدى؟
6 بىراق، مۇسا ئۇلارغا مۇھىم بىر نەرسىنى ئەسكەرتكەن ئىدى. ئەنە شۇ مۇنبەت زېمىندا داۋاملىق ياشاپ قالماقچى بولسا، چوقۇم يەھۋانىڭ بۇيرۇقلىرىغا بويسۇنۇشى لازىملىقىنى ئېيتقان. مۇسا پەيغەمبەر ئىسرائىل خەلقىنى يەھۋا خۇداغا بويسۇنۇپ، ئۇنىڭغا سادىق بولۇپ قېلىش ئارقىلىق «ھاياتلىقنى تاللاشقا» دەۋەت قىلغان. ئەمما، ئىسرائىللار يەھۋا خۇدانىڭ بۇيرۇقلىرىغا بويسۇنمىغان. شۇنىڭ بىلەن، يەھۋانىڭ ھىمايە قىلىشىدىن ئايرىپ قالغان. شۇنىڭ بىلەن، خۇدا ئاسسۇرىيىلىكلەرنىڭ، كېيىنرەك بابىلونلۇقلارنىڭ ئىسرائىللارنىڭ زېمىنىنى ئىشغال قىلىپ، پۇقرالىرىنى ئەسىرلىككە ئېلىپ كېتىشىگە يول قويغان.—2-پادىشاھ. 17:6–8، 13، 14؛ 2-تارىخ. 36:15–17، 20.
7. مۇسانىڭ سۆزلىرىدىن نېمىنى ئۆگىنىمىز؟ (رەسىمگە ھەم قاراڭ).
7 بىز بۇنىڭدىن قانداق ساۋاق ئالىمىز؟ پەقەت يەھۋا خۇداغا بويسۇنساق، مەڭگۈ ياشىيالايمىز. ئۆتمۈشتە ۋەدە قىلىنغان زېمىننىڭ بوسۇغىسىدا تۇرغان ئىسرائىللارغا ئوخشاش، بۈگۈنكى كۈندە بىزمۇ خۇدا ۋەدە قىلغان يېڭى دۇنياغا كىرىش ئالدىدا تۇرىمىز. پات-يېقىندا يەر يۈزى جەننەتكە ئايلىنىدۇ (يەشايا 35:1؛ لۇقا 23:43). ئىبلىس ۋە ئۇنىڭ جىنلىرى بولمايدۇ (ۋەھىي. 20:2، 3). ئىنسانلارنى ھەق خۇدا يەھۋادىن يىراقلاشتۇرىدىغان ساختا دىنلار بولمايدۇ (ۋەھىي. 17:16). ئەمدى ئۆز پۇقرالىرىنى ئىزىپ، زۇلۇم قىلىدىغان ھۆكۈمەتلەر بولمايدۇ (ۋەھىي. 19:19، 20). يەھۋا ھېچكىمنىڭ جەننەتتە قالايمىقانچىلىق پەيدا قىلىشىغا يول قويمايدۇ (زەبۇر 37:10، 11). بارلىق ئىنسانلار يەھۋانىڭ ھەققانىي ئۆلچەملىرىگە ماس ياشاپ، ئىناق-ئىتتىپاقلىق ئىچىدە ھايات كەچۈرىدۇ. شۇنداق قىلىپ، ئۇلار بىر-بىرىگە سۆيگۈ-مۇھەببەت كۆرسىتىپ، ئۆزئارا بىر-بىرىگە ئىشىنىدۇ (يەشايا 11:9). بىزنى نېمە دېگەن گۈزەل ھايات كۈتۈپ تۇرماقتا،-ھە! بۇنىڭدىن باشقا، پەقەت يەھۋا خۇداغا بويسۇنساق، كەلگۈسى يەر يۈزى جەننەتتە ئەبەدىل-ئەبەد، مەڭگۈ ھايات كەچۈرىمىز.—زەبۇر 37:29؛ يۇھاننا 3:16.
يەھۋاغا بويسۇنساق، جەننەتتە يۈز ياكى مىڭ يىل ئەمەس، بەلكى مەڭگۈ ھايات كەچۈرىمىز (7-ئابزاسقا قاراڭ)
8. مەڭگۈ ياشاش ئۈمىدى ياتئەل خەلقى ئارىسىدا ۋەز ئېيتقۇچى بولۇپ خىزمەت قىلىدىغان بىر بۇرادەرگە قانداق ياردەم بەردى؟ (يەھۇدا 20، 21)
8 بىز يەھۋانىڭ ۋەدىسى توغرىسىدا چوڭقۇر مۇلاھىزە قىلساق، قانداقلا سىناقلارغا دۇچ كەلمەيلى، ئۇنىڭغا سادىق قېلىشقا تىرىشىمىز (يەھۇدا 20، 21-نى ئوقۇڭ). ئۇنىڭدىن باشقا، شۇ ئۈمىد بىزنىڭ ئاجىزلىقلىرىمىزغا قارشى كۈرەش قىلىشىمىزغا كۈچ بېرىدۇ. ئۇزۇن يىللار ياتئەل خەلقى ئارىسىدا ۋەز ئېيتقۇچى بولۇپ ئافرىقىدا خىزمەت قىلغان بىر بۇرادەر ئۆز ئاجىزلىقىغا قارشى كۈرەش قىلغان. ئۇ مۇنداق دەيدۇ: «يەھۋا خۇداغا بويسۇنماي تۇرۇپ، يەر يۈزى جەننەتتە مەڭگۈ ياشىيالمايدىغانلىقىمنى ئېنىق چۈشىنىپ يەتتىم. بۇ مېنىڭ قىيىنچىلىقلارغا قارشى داۋاملىق كۈرەش قىلىشىمغا ۋە يەھۋاغا بۇ توغرۇلۇق قىزغىن دۇئا قىلىشىمغا ياردەم بەردى. ئاخىرىدا يەھۋانىڭ ياردىمى بىلەن ئۆز ئاجىزلىقلىرىمنى يېڭەلىدىم».
ئىشلىرىڭ ئوڭۇشلۇق بولىدۇ
9. داۋۇت پادىشاھ قانداق سىناقلارنى باشتىن كەچۈرگەن؟
9 داۋۇت خۇدانىڭ خەلقىگە پادىشاھلىق قىلغان. ئۇ يەنە سازەندە، شائىر، جەڭچى ۋە پەيغەمبەر بولغان. ئۇ تالاي سىناقلارنى باشتىن كەچۈرگەن. ھەسەتخور پادىشاھ سائۇل ئۇنى ئۆلتۈرمەكچى بولغاچقا، ئۇ نۇرغۇن يىل قېچىپ يۈرۈشكە مەجبۇر بولغان. داۋۇت پادىشاھلىق تەختىدە ئولتۇرغاندىن كېيىن، ئوغلى ئابشالوم ئاتىسىنىڭ تەختىنى تارتىۋالماقچى بولغاندا، يەنە ئامالسىز قېچىپ يۈرگەن. گەرچە داۋۇت نۇرغۇنلىغان قىيىنچىلىقلارنى باشتىن كەچۈرگەن، ھەتتا ئېغىر خاتالىقلارنى ئۆتكۈزگەن بولسىمۇ، ئۇ ئۆمرىنىڭ ئاخىرىغىچە يەھۋا خۇداغا سادىق بولۇپ قالغان. يەھۋا داۋۇت پادىشاھنى «كۆڭلۈمگە ياقىدىغان بىر ئادەم» دېگەن. شۇڭا، داۋۇت پادىشاھنىڭ دانا مەسلىھەتلىرىگە قۇلاق سېلىش بەك مۇھىم.—ئەلچى. 13:22؛ 1-پادىشاھ. 15:5.
10. نېمە ئۈچۈن داۋۇت ئوغلى سۇلايمانغا مەسلىھەت بەرگەن؟
10 مەسىلەن، داۋۇتنىڭ ئوغلى سۇلايمانغا بەرگەن نەسىھىتىنى كۆرۈپ باقايلى. يەھۋا سۇلايماننى تەخت ۋارىسى بولۇشقا ۋە پاك ئىبادەتنى ئىلگىرى سۈرۈش ئۈچۈن ئىبادەتخانا سېلىشقا تاللىغان ئىدى (1-تارىخ. 22:5). بىراق، سۇلايمان بۇ ۋەزىپىنى ئورۇنداشتا قىيىنچىلىقلارغا دۇچ كېلەتتى. شۇڭا، داۋۇت پادىشاھ ئوغلى سۇلايمانغا مەسلىھەت بەرگەن.
11. 1-پادىشاھلار 2:2، 3-ئايەتلەردە، داۋۇت سۇلايمانغا نېمە دېگەن ۋە سۇلايمان شۇ سۆزلەرگە قۇلاق سالغاندا، نېمە ئىش بولغان؟
11 داۋۇت پادىشاھ نېمە دېگەن؟ (1-پادىشاھلار 2:2، 3-نى ئوقۇڭ). داۋۇت ئوغلى سۇلايمانغا پەقەت يەھۋاغا بويسۇنسا، ئۇنىڭ ئىشلىرى بىر ئۆمۈر ئوڭۇشلۇق بولىدىغانلىقىنى ئېيتقان. كېيىن، نۇرغۇن يىللار سۇلايماننىڭ ئىشلىرى ھەقىقەتەن ئوڭۇشلۇق بولغان (1-تارىخ. 29:23–25). ئۇ ئىنتايىن ھەيۋەتلىك ئىبادەتخانىنى سالغان ۋە مۇقەددەس كىتابنىڭ بىرنەچچە يازمىلىرىنى يازغان. ئۇ دانالىقى ۋە بايلىقى بىلەن ھەممىگە تونۇلۇپ، نامى خەلقلەر ئارىسىدا مەشھۇر بولغان (1-پادىشاھ. 4:34). ئەمما، داۋۇت پادىشاھ ئوغلى سۇلايمانغا پەقەت يەھۋاغا بويسۇنسا، ئۇنىڭ ئىشلىرى ئوڭۇشلۇق بولىدىغانلىقىنى چۈشەندۈرگەنىدى. ئەپسۇسكى، سۇلايمان پادىشاھ ياشانغاندا ساختا ئىلاھلارغا چوقۇنۇشقا باشلىغان. شۇنداق قىلىپ، سۇلايمان يەھۋانىڭ رەھىم-شەپقىتىدىن ئۇنىڭدىن كېلىدىغان دانالىقتىن ئايرىلىپ قېلىپ، ئىسرائىل خەلقىگە مېھرىبانلىق ۋە ئادالەت بىلەن ھۆكۈمرانلىق قىلالمايدىغان بولۇپ كەتكەن.—1-پادىشاھ. 11:9، 10؛ 12:4.
داۋۇت پادىشاھ ئوغلى سۇلايمانغا ئېيتقان ئاخىرقى سۆزلىرىدىن كۆرگىنىمىزدەك، ئەگەر يەھۋا خۇداغا بويسۇنساق، ئۇ بىزگە توغرا قارار چىقىرىشىمىز ئۈچۈن دانالىق بېرىدۇ (11، 12-ئابزاسلارغا قاراڭ)b
12. داۋۇت پادىشاھنىڭ سۆزىدىن نېمىنى ئۆگىنىمىز؟
12 بىز بۇنىڭدىن قانداق ساۋاق ئالىمىز؟ يەھۋاغا بويسۇنساق، ئىشلىرىمىز ئوڭۇشلۇق بولىدۇ (زەبۇر 1:1–3). ئەلۋەتتە، يەھۋا بىزنى سۇلايمانغا ئوخشاش بايلىق ۋە شان-شۆھرەت ئىگە قىلىش توغرۇلۇق ۋەدە بەرمىگەن. بىراق، پەقەت خۇداغا بويسۇنساق، ئۇ توغرا قارارلارنى چىقىرىشىمىز ئۈچۈن بىزگە دانالىق ۋە كۆرسەتمە بېرىدۇ (پەند. نە 2:6، 7؛ ياقۇپ 1:5). ئۇنىڭ پرىنسىپلىرى بىزگە ئىش ئورنى، بىلىم ئېلىش، كۆڭۈل ئېچىش، پۇل قارىتا توغرا كۆز قاراشتا بولۇپ، دانا قارارلارنى چىقىرىشىمىزغا ياردەم بېرىدۇ. ئەگەر خۇدادىن كەلگەن مەسلىھەتلەرگە قۇلاق سېلىپ ياشىساق، ئۇنىڭ بىلەن بولغان دوستلىقىمىزنى ساقلاپ، مەڭگۈلۈك ھاياتقا ئېرىشەلەيمىز (پەند. نە 2:10، 11). ئۇندىن باشقا، ياخشى دوستلارنى تاپالايمىز ۋە ئائىلىمىزدىكىلەر بىلەن بەخت ئىچىدە خۇشال-خۇرام تۇرمۇش كەچۈرىمىز.
13. كارمېن ھاياتىدا ئەڭ توغرا قارار چىقىرىشىغا نېمە ياردەم بەرگەن؟
13 موزامبىكتا ياشايدىغان كارمېن ھاياتىدا مۇۋەپپەقىيەت قازىنىشى ئۈچۈن ئالىي مەكتەپتە بىلىم ئېلىش زۆرۈر دەپ ئويلىغان. شۇڭا، ئۇ ئۇنىۋېرسىتېتقا چۈشۈپ، بىناكارلىق كەسپىدە ئوقۇشقا باشلىغان. ئۇ بۇ كەسىپنى ئىنتايىن ياخشى كۆرگەن. ئۇ مۇنداق دەيدۇ: «مەن بۇ كەسىپتە ئوقۇش ئۈچۈن كۆپ زېھنى كۈچۈم ۋە ۋاقتىمنى سەرپ قىلدىم. مەن ھەر كۈنى ئەتىگەن سائەت يەتتە يېرىمدىن باشلاپ، كەچقۇرۇن سائەت ئالتىگىچە مەكتەپتە بولاتتىم. شۇڭا، مېنىڭ جامائەت يىغىلىشلىرىغا بېرىشىم قىيىن بولدى. ۋاقىتنىڭ ئۆتۈشىگە ئەگىشىپ، يەھۋادىن يىراقلىشىپ كەتتىم. مەن شۇنى چۈشىنىپ يەتتىمكى، مەن ئىككى خوجايىنغا تەڭ خىزمەت قىلىۋاتاتتىم» (مەتتا 6:24). ئۇ بۇ توغرۇلۇق يەھۋاغا دۇئا قىلىپ، بىزنىڭ نەشىرى ماتېرىياللىرىمىزنى ئوقۇپ ئىزدەنگەن. ئۇ يەنە: «ئاقساقاللار ۋە ئاپام ماڭا ناھايىتى ياخشى مەسلىھەت بەرگەندىن كېيىن، مەن ئوقۇشتىن ۋاز كېچىپ، تولۇق ۋاقىت يەھۋاغا خىزمەت قىلىشنى قارار قىلدىم. بۇ ھاياتىمدا چىقارغان ئەڭ ئاقىلانە قارار، مەن ھەرگىز پۇشايمان قىلمايمەن».
14. مۇسا ۋە داۋۇت ۋەسىيەت سۆزلىرىدە قانداق ئوخشاشلىق بار؟
14 مۇسا پەيغەمبەر بىلەن داۋۇت پادىشاھ يەھۋا خۇدانى سۆيگەن ۋە ئۇنىڭغا بويسۇنۇشنىڭ ئىنتايىن مۇھىملىقىنى چوڭقۇر چۈشىنىپ يەتكەن. ئۇلار ئاخىرقى ۋەسىيەت سۆزىدە، باشقىلارنى ئۆزلىرىدىن ئۈلگە ئېلىپ، خۇداغا سادىق بولۇپ قېلىشقا دەۋەت قىلغان. مۇسا پەيغەمبەر بىلەن داۋۇت پادىشاھ يەھۋانى تاشلاپ كېتىشنىڭ ئاقىۋىتى ھەققىدە ئاگاھلاندۇرۇپ، شۇنداق كىشىلەرنىڭ خۇدا بىلەن بولغان دوستلۇقى بۇزۇلۇپ، ئۇنىڭ بەرىكەتلىرىدىن ئايرىلىپ قالىدىغانلىقىنى ئېيتقان. ئۇلارنىڭ نەسىھەت سۆزلىرى بۈگۈنكى كۈندە بىز ئۈچۈنمۇ زور ئەھمىيەتكە ئىگە. ئۇلاردىن نەچچە يۈز يىللار كېيىن ياشىغان خۇدانىڭ باشقا بىر خىزمەتچىسىمۇ يەھۋاغا سادىق بولۇپ قېلىشنىڭ ناھايىتى مۇھىملىقىنى چۈشەندۈرگەن.
خۇشاللىققا ئېرىشىمىز
15. ئەلچى يۇھاننا ھاياتىدا نېمىلەرنى باشتىن كەچۈرگەن؟
15 ئەلچى يۇھاننا ئەيسا مەسىھ بەك ياخشى كۆرگەن ئەلچى ئىدى (مەتتا 10:2؛ يۇھاننا 19:26). ئۇ ئەيسا مەسىھ بىلەن بىرلىكتە خۇش خەۋەر يەتكۈزگەن ۋە نۇرغۇن مۆجىزىلەرنى ئۆز كۆزى بىلەن كۆرگەن. ئۇ ئەيساغا سادىق بولغان. ئەيسا مەسىھ ئۆلتۈرۈلگەندە، يۇھاننا ئۇ يەردە بولغان. ئۇ تىرىلدۈرۈلگەندە ھەم ئۇنى كۆرگەن. ئەلچى يۇھاننا 1-ئەسىردىكى مەسىھ ئەگەشكۈچىلىرى جامائىتىنىڭ گۈللىنىشىگە گۇۋاھچى بولغان. دەسلەپتە ئۇلار ئازغىنە بىر توپ كىشىلەر ئىدى، كېيىنرەك «ئاسمان ئاستىدىكى بارچە ئىنسانلار ئارىسىدا ۋەز» قىلىدىغان توپ-توپ جامائەتلەر قۇرۇلغان.—كولوسى. 1:23.
16. ئەلچى يۇھاننانىڭ خېتى كىملەرگە ئىلھام بەرگەن؟
16 ئەلچى يۇھاننا ياشىنىپ، ئۆمرىنىڭ ئاخىرىقى مەزگىلىدە، خۇدانىڭ ئىلھاملاندۇرۇشى بىلەن كىشىنى ئەيمەندۈرىدىغان ئەيسا مەسىھتىن كەلگەن ۋەھىينى قەلەمگە ئېلىش شان-شەرىپىگە مۇيەسسەر بولغان (ۋەھىي. 1:1). ئۇ يەنە يۇھاننا بايان قىلغان خۇش خەۋەر ۋە ئۈچ پارچە خەتنى يازغان. ئۇ ئۈچىنچى خېتىنى ئۆز ئوغلىدەك سۆيگەن گايۇس ئىسىملىك ئېتىقادچىغا يازغان (3-يۇھاننا 1). يۇھاننا گايۇستىن باشقا يەنە نۇرغۇنلىغان قېرىنداشلارنى ئۆز پەرزەنتلىرىدەك ياخشى كۆرگەن. ئۇنىڭ گايۇسقا خېتى قەدىمقى زاماندىكى مەسىھ ئەگەشكۈچىلىرىنى ئىلھاملاندۇرغاندەك، بۈگۈنكى كۈندە بىزنىمۇ ئىلھاملاندۇرىدۇ.
17. يۇھاننانىڭ 3-خېتى 4-ئايەتكە ئاساسلانغاندا، نېمە يۇھاننانى ئىنتايىن خۇشال قىلغان؟
17 ئەلچى يۇھاننا نېمىلەرنى يازغان؟ (3-يۇھاننا 4-نى ئوقۇڭ). ئۇ ئېتىقادچى قېرىنداشلارنىڭ خۇداغا بويسۇنغانلىقىنى كۆرۈپ، ئۆزىنىڭ ئىنتايىن خۇشال بولغانلىقىنى يازغان. شۇ ۋاقىتتا، بەزى ئادەملەر ساختا تەلىماتلارنى تارقىتىپ، جامائەتتە بۆلگۈنچىلىكنىڭ پەيدا بولۇشىغا سەۋەبچى بولغان. بىراق، باشقىلار داۋاملىق «ھەقىقەت يولىدا» ماڭغان. ئۇلار يەھۋا خۇداغا بويسۇنۇپ، «ئەمرلىرىگە ئەمەل قىلىپ» ياشىغان (2-يۇھاننا 4، 6). بۇ سادىق مەسىھ ئەگەشكۈچىلىرى پەقەت ئەلچى يۇھاننانى خۇشال قىلىپ قالماي، يەھۋا خۇدانىمۇ خۇرسەن قىلغان ئىدى.—پەند. نە 27:11.
18. يۇھاننانىڭ سۆزلىرىدىن نېمىگە ئۆگىنىمىز؟
18 بىز بۇنىڭدىن قانداق ساۋاق ئالىمىز؟ يەھۋاغا سادىق بولۇش خۇشاللىققا ئېرىشتۇرىدۇ (1-يۇھاننا 5:3). مەسىلەن، بىز يەھۋا خۇدانى خۇشال قىلساق، ئۆزىمىزمۇ خۇشال بولىمىز. خۇدايىمىز بىزنىڭ ئازدۇرۇلۇشلارغا قارشى تۇرۇپ، ھەقىقەت يولىدا مېڭىۋاتقانلىقىمىزنى كۆرگەندە، ئۇنىڭ كۆڭلى خۇرسەن بولىدۇ (پەند. نە 23:15). ئاسماندىكى پەرىشتىلەرمۇ شاد-خۇرام بولىدۇ (لۇقا 15:10). ئۇنىڭدىن باشقا، ئېتىقادچى قېرىنداشلار بىر-بىرىمىزنىڭ سىناقلارغا، ئازدۇرۇلۇشلارغا قارشى تۇرۇپ، ساداقەتمەنلىكنى ساقلاۋاتقانلىقىمىزنى كۆرگەندە، ناھايىتى خۇشال بولىمىز (2-سالونىكا. 1:4). ئاخىرىدا، پات ئارىدا شەيتاننىڭ بۇ دۇنياسى يوق قىلىنغاندا، يەھۋاغا سادىق قېلىشنى تاللىغانلىقىمىز ئۈچۈن شاد-خۇرام بولىمىز.
19. رېيچېل ئىسىملىك قېرىنداش باشقىلارغا ھەقىقەتنى ئۆگىتىش توغرۇلۇق نېمە دەيدۇ؟ (رەسىمگە ھەم قاراڭ).
19 باشقىلارغا يەھۋا توغرۇلۇق ھەقىقەتنى ئۆگەتكەندە، بەك خۇشال بولىمىز. دومىنىكا جۇمھۇرىيىتىدە ياشايدىغان رېيچېل ئىسىملىك قېرىندىشىمىز باشقىلارنىڭ ھەق خۇدانى تونۇشىغا ياردەم بېرىشنى زور شان-شەرەپ قارايدۇ. ئۇ بىرنەچچە كىشىنىڭ يەھۋاغا ئۆزىنى بېغىشلاپ چۆمۈلدۈرۈلۈشتىن ئۆتۈشكە ياردەم بەرگەن. رېيچېل مۇنداق دەيدۇ: «ئۇلارنىڭ ئاستا-ئاستا يەھۋا خۇدانى چىن قەلبىدىن سۆيۈشنى ئۆگىنىپ، ئۇنىڭغا تايىنىپ ياشاشنى باشلىغانلىقى ۋە ھاياتىدا ئۆزگۈرۈشلەرنى قىلغانلىقىنى كۆرۈپ قەلبىم سۆز بىلەن تەسۋىرلىگۈسىز شاد-خۇراملىققا تولدى. قەلبىمدىكى بۇ خۇشاللىق ئۇلارغا تەلىم بېرىش ئۈچۈن كۆرسەتكەن تىرىشچانلىقىم ۋە بەرگەن قۇربانلىقلىرىمدىن كۆپ ئەھمىيەتلىكتۇر».
بىز باشقىلارغا يەھۋا خۇدانى سۆيۈش ۋە ئۇنىڭغا بويسۇنۇش توغرۇلۇق بىلىم بەرگىنىمىزدە، ناھايىتى خۇشال بولىمىز (19-ئابزاسقا قاراڭ)
ئاشۇ سادىق كىشىلەرنىڭ ۋەسىيەت سۆزلىرىگە قۇلاق سالايلى
20. مۇسا پەيغەمبەر، داۋۇت پادىشاھ ۋە ئەلچى يۇھاننا بىلەن بىزلەرنىڭ قانداق ئوخشاش تەرەپلىرىمىز بار؟
20 مۇسا پەيغەمبەر، داۋۇت پادىشاھ ۋە ئەلچى يۇھاننا قەدىمقى زاماندا ياشىغان. ئۇلار بىزدىن كۆپ پەرقلىق ھايات كەچۈرگەن. شۇنداقتىمۇ، ئۇلارنىڭ بۈگۈنكى كۈندە ياشاۋاتقان بىزلەر بىلەن ئوخشاش تەرەپلىرى بەك كۆپ. بىز ھەممىمىز ئوخشاش پەقەت بىر ھەق خۇدا يەھۋاغا ئىبادەت قىلىمىز، ئۇنىڭغا دۇئا قىلىپ، ئۇنىڭدىن ياردەم ۋە كۆرسەتمىلەرنى سورايمىز. يەھۋا ئۆزىگە بويسۇنغانلارنى مول بەرىكەتلەيدىغانلىقىغا بىزنىڭمۇ ئىشەنچىمىز كامىل.
21. مۇسا پەيغەمبەر، داۋۇت پادىشاھ، ئەلچى يۇھاننانىڭ ۋەسىيەت سۆزلىرىگە قۇلاق سالساق، قانداق مۇكاپاتلارغا ئېرىشىمىز؟
21 دېمەك، خۇدانىڭ ئاشۇ سادىق خىزمەتچىلىرىنىڭ ۋەسىيەت سۆزلىرىگە قۇلاق سېلىپ، يەھۋاغا بويسۇنايلى. شۇندىلا، مەيلى نېمە قىلىشىمىزدىن قەتئىينەزەر، ئىشلىرىمىز ئوڭۇشلۇق بولىدۇ ۋە مەڭگۈ ھاياتلىققا ئېرىشىپ، ئەبەدىل-ئەبەد ياشايمىز (تەكرار. قا 30:20). ئاسماندىكى مېھىر-شەپقەتلىك ئاتىمىزنى مەمنۇن قىلغانلىقىمىز ئۈچۈن بىزمۇ خۇشال بولىمىز. ئۇ كېلەچەكتە بىزنى خىيالىمىزغا كەلتۈرەلمەيدىغان شەكىلدە ئاجايىپ بەرىكەتلەر بىلەن مۇكاپاتلايدۇ.—ئەفەس. 3:20.
154-ناخشا ئاخىرغىچە بەرداشلىق بېرىمىز
a يەھۋا خۇدا قىزىل دېڭىزدا كۆرسەتكەن مۆجىزىلەرنى كۆرگەن نۇرغۇن ئىسرائىللار ۋەدە قىلىنغان زېمىنغا كىرەلمىگەن (سانلار 14:22، 23). سەۋەبى، يەھۋا بارچە 20 ياشقا تولغان ۋە ئۇنىڭدىن چوڭ ياشتىكى كىشىلەرنىڭ چۆل-باياۋاندا ئۆلۈپ كېتىدىغانلىقىنى ئېيتقان (سانلار 14:29). ئەمما، بارلىق 20 ياشتىن كىچىكلەر، يەشۇئا، كالېب ۋە لاۋىي قەبىلىسى ئىئوردان دەرياسىدىن ئۆتۈپ، قانان زېمىنىغا كىرىپ، يەھۋانىڭ ۋەدىلىرىنىڭ ئەمەلگە ئاشقانلىقىنى كۆرگەن.—تەكرار. قا 1:24–40.
b 11-بەتتىكى: سول تەرەپ: داۋۇت پادىشاھ ئوغلى سۇلايمانغا ئاخىرقى ۋەسىيەت سۆزىنى ئېيتىۋاتىدۇ. ئوڭ تەرەپ: ئېتىقادچى قېرىنداشلار پىدائىي ۋەز ئېيتقۇچىلارنى تەربىيىلەش مەكتىپىدە بىلىم ئېلىۋاتىدۇ.