13-تەتقىق ماقالىسى
22-ناخشا يەھۋا مېنىڭ پادىچىمدۇر
يەھۋانىڭ قولى قىسقا ئەمەس
«يەھۋانىڭ قولى شۇنداق قىسقىمۇ؟».—سانلار 11:23.
مەركىزى ئىدىيە
بۇ ماقالە يەھۋانىڭ جەزمەن ئېھتىياجلىرىمىزنى تەمىنلەپ بېرىدىغانلىقىغا بولغان ئىشەنچىمىزنى كۈچەيتىدۇ.
1. مۇسا ئىسرائىللارنى مىسىردىن ئېلىپ چىققاندا، نېمە ئۇنىڭ يەھۋاغا تايانغانلىقى كۆرسەتكەن؟
ئىبرانىيلار يېزىلغان خەتتە ئىمان-ئېتىقادنىڭ ئۈلگىلىرى سۈپىتىدە كۆپلىگەن ئادەملەرنىڭ ئىسىملىرى تىلغا ئېلىنغان. ئۇلارنىڭ بىرى — مۇسا پەيغەمبەر (ئىبرانىي. 3:2–5؛ 11:23–25). ئىسرائىللارنى مىسىردىن ئېلىپ چىققاندا، مۇسا ئۆزىنىڭ كۈچلۈك ئىمان-ئېتىقادىنى كۆرسەتكەن. ئۇ فىرئەۋن ۋە ئۇنىڭ قوشۇنلىرىدىن قورقماي، يەھۋا تايىنىپ، ئىسرائىللارنى قىزىل دېڭىزدىن ئۆتكۈزۈپ، كېيىن چۆل-باياۋاندا يېتەكلەپ يۈرگەن (ئىبرانىي. 11:27–29). كۆپۈنچە ئىسرائىللار يەھۋانىڭ ئۇلارغا غەمخورلۇق قىلالايدىغانلىقىدىن گۇمانلانغان بولسىمۇ، مۇسا پەيغەمبەر داۋاملىق ئۆز خۇداسىغا ئىشەنگەن. يەھۋا مۇسانىڭ ئىشەنچىسىنى يەردە قويمىغان، ئۇ مۆجىزە ئارقىلىق چۆل-باياۋاندا ئىسرائىللارنى سۇ ۋە يېمەكلىكلەر بىلەن تەمىنلەپ تۇرغانa.—چىق. 15:22–25؛ زەبۇر 78:23–25.
2. نېمە ئۈچۈن خۇدا مۇسادىن: «يەھۋانىڭ قولى قىسقىمۇ؟»،— دەپ سورىغان؟ (سانلار 11:21–23)
2 مىسىردىن چىقىپ تەخمىنەن بىر يىلدىن كېيىن، مۇسا يەھۋانىڭ ئىسرائىللارنى گۆش بىلەن تەمىنلەش ۋەدىسىنى ئورۇنلايدىغانلىقىدىن گۇمانلىنىشقا باشلىغان. چۈنكى، مۇسا شۇ چاغدا يەھۋانىڭ چۆل-باياۋاندا مىليونلىغان ئىسرائىللارنى قانداق قىلىپ گۆش بىلەن تەمىنلەيدىغانلىقىنى تەسەۋۋۇر قىلالمىغان ئىدى. شۇنىڭ بىلەن، يەھۋا ئۇنىڭدىن: «يەھۋانىڭ قولى قىسقىمۇ؟»— دەپ سورىغان (سانلار 11:21–23-نى ئوقۇڭ). بۇ يەردىكى «يەھۋانىڭ قولى» دېگەن ئىبارە، ئۇنىڭ مۇقەددەس روھىنى كۆرسىتىدۇ، ياراتقۇچى ئاشۇ كۈچنى ئىشلىتىپ ئۆز ئىرادىسىنى ئەمەلگە ئاشۇرىدۇ. باشقىچە ئېيتقاندا، يەھۋا مۇسادىن مۇنداق سورىغان: «سېنىڭچە، ئېغىزىمدىن چىقارغان سۆزۈمنى ئورۇنداشقا مېنىڭ كۈچۈم يەتمەسمۇ؟».
3. نېمە ئۈچۈن مۇسا ۋە ئىسرائىللار باشتىن كەچۈرگەن ئىشلار چوڭقۇر ئويلىنىش بىز ئۈچۈن مۇھىم؟
3 ياراتقۇچى يەھۋا سىزنى ۋە ئائىلىڭىزنى يىمەك-ئىچمەك ۋە كىيىم-كېچەك بىلەن تەمىنلەپ بېرىشىدىن غەم-ئەندىشە قىلغان چاغلىرىڭىز بولغانمۇ؟ مەيلى قانداق بولسۇن، مۇسا پەيغەمبەر ۋە ئىسرائىللارنىڭ نېمە ئۈچۈن يەھۋادىن گۇمانلانغانلىقىنى تەپسىلىيرەك كۆرۈپ چىقايلى. ئۇنىڭدىن باشقا، يەھۋانىڭ قولى قىسقا ئەمەسلىكىگە كۈچلۈك ئىشەنچ باغلىشىمىزغا ياردەم بېرىدىغان مۇقەددەس كىتابتىكى بەزى پرىنسىپلارنى مۇھاكىمە قىلايلى.
مۇسادىن ۋە ئىسرائىللاردىن ساۋاق ئالايلى
4. نېمە ئۈچۈن ئىسرائىللار يەھۋانىڭ ئۇلارنىڭ ئېھتىياجلىرىنى تەمىنلەپ بېرەلەيدىغانلىقىدىن گۇمانلانغان؟
4 ئىسرائىللار مىسىردىن چىققاندا، نۇرغۇن يات مىللەتلەردىن بولغان كىشىلەرمۇ ئۇلارغا قوشۇلۇپ چىققان. ۋەدە قىلىنغان زېمىنغا بېرىش ئۈچۈن ئۇلار بىر مەزگىل چۆل-باياۋاندا يۈرگەن (چىق. 12:38؛ تەكرار. قا 8:15). بۇ بىر توپ يات مىللەت كىشىلىرى كۈندە ماننا يەپ، زېرىكىپ نارازى بولۇشقان. نەتىجىدە كۆپلىگەن ئىسرائىللار ئۇلارنىڭ تەسىرىگە ئۇچراپ، نارازىلىق بىلدۈرۈشكەن (سانلار 11:4–6). ئۇلار مىسىردا يېگەن تاماقلىرىنى سېغىنىشقا باشلىغان. خەلق غودۇڭىشىپ، مۇساغا شىكايەت قىلىۋەرگەچكە، بەلكىم ئۇ خەلققە سورىغان نەرسىنى تېپىپ بېرىشنى ئۆزىنىڭ مەجبۇرىيىتى دەپ قارىغان بولسا كېرەك.—سانلار 11:13، 14.
5، 6. يات مىللەتلەردىن بولغان ئادەملەرنىڭ ئىسرائىللارغا تەسىر قىلغانلىقىدىن قانداق ساۋاق ئالالايمىز؟
5 يات مىللەتلەردىن چىققان ئادەملەر يەھۋانىڭ ئۇلارغا قىلغان ياخشىلىقلىرىنى قەدىرلىمىگەن ۋە ئىسرائىللارمۇ ئۇلارنىڭ يامان تەسىرىگە ئۇچرىغان. بۈگۈنكى كۈندە، شۈكۈر-قانائەت قىلىپ مىننەتدارلىق بىلدۈرۈشنى بىلمەيدىغان ئادەملەرنىڭ ئارىسىدا يۈرسەك، بىزمۇ يەھۋانىڭ تەمىنلەپ بەرگەنلىرىگە شۈكۈر-قانائەت قىلماي، ئۆتمۈشتىكى ھاياتىمىزنى سېغىنىشقا ياكى باشقىلارغا ھەسەت قىلىشقا باشلىشىمىز مۇمكىن. ئەمما، ھەرقانداق ۋەزىيەتتە شۈكۈر-قانائەت قىلىشنى بىلسەك، چوقۇم خۇشال-خۇرام ياشايمىز.
6 ئىسرائىللار يەھۋانىڭ ۋەدىسىنى ئېسىدە تۇتۇشى كېرەكتى. ئۇلار ۋەدە قىلىنغان زېمىنغا كەلگەندە، ھەممە نەرسىسى تەلتۆكۈس باياشات تۇرمۇش كەچۈرەتتى. لېكىن، بۇ سۆزلەر چۆل-باياۋاندا يۈرگەندە ئەمەس، بەلكى ۋەدە قىلىنغان زېمىنغا كىرگەندە ئەمەلگە ئاشۇرۇلاتتى. بىزمۇ دىققىتىمىزنى بۇ دۇنيادا ھازىر ئېرىشەلمەيدىغان نەرسىلەرگە ئەمەس، يېڭى دۇنيادا يەھۋا بىزنى ئېرىشتۈرۈشنى ۋەدە قىلغان مول بەرىكەتلەرگە قارىتايلى. ئۇنىڭدىن باشقا، ئىمان بىلەن يەھۋاغا تايىنىپ ياشاش ئۈچۈن ئاشۇ ۋەدىلەرگە بولغان ئىشەنچىمىزنى كۈچەيتىدىغان ئايەتلەر توغرىسىدا چوڭقۇر ئويلىنايلى.
7. نېمە ئۈچۈن يەھۋانىڭ قولى قىسقا ئەمەسلىكىگە ئىشەنسەك بولىدۇ؟
7 «يەھۋانىڭ قولى قىسقىمۇ؟». خۇدا نېمە ئۈچۈن شۇنداق سوئالنى سورىغان؟ چۈنكى، ئۇ مۇسانىڭ ئىككى نەرسە توغرىسىدا ئويلىنىشىغا ياردەم بەرمەكچى بولغان: (1) ئۇنىڭ كۈچ-قۇدرىتى چەكسىز؛(2) خىزمەتچىلىرى مەيلى قەيەردە بولسۇن، خۇدا ئۇلارغا ياردەم بېرەلەيدۇ. شۇڭا، ئىسرائىللار قاقاس چۆل-باياۋاندا يۈرسىمۇ، خۇدا ئۇلارنى گۆش بىلەن تەمىنلەپ بېرەلەيتتى. يەھۋا ئۆز خىزمەتچىلىرى قەيەردە بولمىسۇن، «كۈچ-قۇدرەتلىك قولى ۋە سۇزۇلغان بىلىكى بىلەن» ئۇلارغا ياردەم بېرەلەيدىغانلىقىنى كۆرسەتكەن (زەبۇر 136:11، 12). شۇڭا، مەيلى قانداق قىيىنچىلىققا دۇچ كەلمەيلى، يەھۋانىڭ قولىنى سوزۇپ، بىزگە ياردەم بېرەلەيدىغانلىقىدىن گۇمان قىلمايلى.—زەبۇر 138:6، 7.
8. ئىسرائىللارغا ئوخشاش خاتالىق ئۆتكۈزۈشتىن ساقلىنىش ئۈچۈن نېمە قىلالايمىز؟ (رەسىمگە ھەم قاراڭ).
8 كۆپ ئۆتمەي، يەھۋا ۋەدە بەرگەندەك، ئۆز خەلقىگە نۇرغۇن بۆدۈنىلەرنى ئەۋەتكەن. لېكىن، ئىسرائىللار خۇدانىڭ بۇ مۆجىزىسىگە رەھمەت ئېيتمىغان. ھەتتا نۇرغۇن كىشىلەر كېچە-كۈندۈز توختىماي بۆدۈنىلەرنى تۇتۇشقا كىرىشىپ، ئاچكۆزلۈك قىلىشقان. يەھۋا «نەپسى يامان» خەلققە غەزەپلىنىپ، ئۇلارنى جازالىغان (سانلار 11:31–34). بۇ ۋەقەدىن قانداق ساۋاق ئالالايمىز؟ مەيلى باي ياكى گاداي بولايلى، ئاچكۆزلۈك تۇزىغىغا چۈشۈپ قېلىشتىن ساقلىنىشىمىز كېرەك. ھەربىرىمىز ياراتقۇچىمىز يەھۋا ۋە مەسىھ ئەيسا بىلەن دوستلۇقىمىزنى كۈچەيتىش ئارقىلىق بايلىقىمىزنى ئاسماندا توپلىشىمىز لازىم. شۇنداق قىلساق، يەھۋانىڭ بىزنىڭ ئېھتىياجىمىزنى تەمىنلەپ بېرىدىغانلىقىغا قەتئىي ئىشىنىمىز.—مەتتا 6:19، 20؛ لۇقا 16:9.
خۇدا ئىسرائىل خەلقىگە گۆش بەرگەندە، ئۇلار قانداق روھنى كۆرسەتتى ۋە بىز بۇنىڭدىن قانداق ساۋاق ئالالايمىز؟ (8-ئابزاسقا قاراڭ)
9. نېمە ئۈچۈن يەھۋا بىزنى قوللاپ-قۇۋۋەتلەيدىغانلىقىغا ئىشىنەلەيمىز؟
9 بۈگۈنكى كۈندىمۇ يەھۋا قولىنى سوزۇپ، ئۆز خىزمەتچىلىرىگە ياردەم بېرىدۇر. بۇ ھاياتىمىزدا ھېچقانداق ئىقتىسادى قىيىنچىلىق بولمايدىغانلىقىنى، قوسىقىمىز ئەسلا ئاچ قالمايدىغانلىقىنى بىلدۈرەمدۇb؟! ياق. لېكىن، خۇدايىمىز بىزنى ھەرگىزمۇ تاشلىمايدۇ. قانداق قىيىنچىلىقلارنى باشتىن كەچۈرمەيلى، ئۇ بىزگە يار-يۆلەك بولۇپ، كۈچ-مەدەت بېرىدۇ. تۆۋەندىكى ئىككى ۋەزىيەتتە: (1) ئىقتىسادى قىيىنچىلىققا دۇچ كەلگەندە، (2) قېرىغاندا قىينىلىپ قېلىشتىن غەم قىلغاندا، يەھۋانىڭ كۈچ-قۇدرەتلىك قولىنى سوزۇپ، بىزنىڭ ئېھتىياجىمىزنى قامدايدىغانلىقىغا ئىشىنىدىغانلىقىمىزنى قانداق كۆرسىتەلەيمىز.
ئىقتىسادى قىيىنچىلىققا دۇچ كەلگەندە
10. بىز قانداق ئىقتىسادىي قىيىنچىلىقلارغا دۇچ كېلىشىمىز مۇمكىن؟
10 زامان ئاخىرى يېقىنلاشقانسېرى، دۇنيانىڭ ئىقتىسادىي ئەھۋالى تېخىمۇ ناچارلىشىپ كېتىدۇ. سىياسىي ئۆزگىرىشلەر، قوراللىق توقۇنۇشلار، تەبىئىي ئاپەتلەر ياكى يېڭى يۇقۇملۇق كېسەللەرنىڭ پەيدا بولۇشى سەۋەبلىك ئىش ئورنىمىز، مال-مۈلكىمىز ياكى ئۆيۈمىزدىن ئايرىلىپ قېلىشىمىز مۇمكىن. بەلكىم، جان بېقىش ئۈچۈن يېڭى ئىش تېپىشقا ياكى ئائىلىمىز بىلەن باشقا يەرگە كۆچۈپ كېتىشكە مەجبۇر بولىمىز. شۇنداق ۋەزىيەتتە چىقارغان قارارلىرىمىز يەھۋاغا تايىنىدىغانلىقىمىزنى قانداق كۆرسىتىدۇ؟
11. ئىقتىسادىي قىيىنچىلىققا دۇچ كەلگەندە، نېمە قىلساق بولىدۇ؟ (لۇقا 12:29–31)
11 غەم-ئەندىشىلىرىڭىزنى ياراتقۇچى يەھۋاغا ئېيتىپ بېرىڭ، بۇ بەك مۇھىم ۋە سىزگە كۆپ ياردەم بېرىدۇ (پەند ن. 16:3). ئۆز ۋەزىيىتىڭىز توغرۇلۇق غەم-ئەندىشە قىلىشتىن ساقلىنىش ئۈچۈن، خۇدادىن توغرا قارار چىقىرىش ۋە كۆڭۈل خاتىرجەملىكىگە ئېرىشىش ئۈچۈن دانالىق سوراڭ (لۇقا 12:29–31-نى ئوقۇڭ). بارىغا شۈكۈر قانائەت قىلىپ ياشاش ئۈچۈن ياردەم سوراپ دۇئا قىلىڭ (1-تىموت. 6:7، 8). بۇنىڭدىن باشقا، نەشرى ماتېرىياللىرىمىزدىن ئىقتىسادىي قىيىنچىلىقلارنى ھەل قىلىش توغرۇلۇق مەلۇمات ئىزدەڭ. jw.org تور بېكىتىدىكى مۇشۇ ماۋزۇ توغرىسىدىكى فىلىملەر ۋە ماقالىلەر كۆپلىگەن كىشىلەرگە ياردەم بەرگەن.
12. ئائىلىنى بېقىش ئۈچۈن ئىشقا كىرمەكچى بولغاندا، قانداق سوئاللار ئۈستىدە ئويلىنىش دانا قارار چىقىرىشىمىزغا ياردەم بېرەلەيدۇ؟
12 بەزىلەر ئائىلىسىدىن ئايرىلىپ، يىراق بىر يەرگە ئىشلەش ئۈچۈن كېتىپ قالىدۇ. بىراق، شۇنداق قىلغانلارنىڭ نۇرغۇنلىرى ئەخمىقانە قارار چىقارغانلىقىنى تونۇپ يەتكەن. شۇڭا، بىرەر ئىشقا كىرىشتىن ئاۋۋال، پەقەت مائاشىنى ئەمەس، ئۇنىڭ يەھۋا بىلەن بولغان مۇناسىۋىتىڭىزگە قانداق تەسىر قىلىدىغانلىقىنىمۇ نەزەر ئېلىپ ئويلىنىپ كۆرۈڭ (لۇقا 14:28). مەسىلەن، «يىراق يەرگە بېرىپ ئىشلىسەم، بۇ ئەر-ئايال ئىككىمىز ئايرىلىپ، باشقا-باشقا يەردە تۇرساق، نىكاھىمىزغا قانداق تەسىر قىلىدۇ؟ يىغىلىشلارغا بارالايمەنمۇ؟ ۋەز خىزمەتكە چىقالايمەنمۇ؟ ئېتىقادچى قېرىنداشلاردىن يىراقلىشىپ كېتىمەنمۇ؟». بالىلىرىڭىز بار بولسا، «بالىلىرىمنىڭ يېنىدا بولمىسام، ئۇلارنى ‹يەھۋانىڭ تەلىم-تەربىيىسى ۋە نەسىھىتى بىلەن تەربىيىلەڭلار› دېگەن سۆزلەرگە ئەمەل قىلالايمەنمۇ؟» دېگەن سوئاللار ئۈستىدە ئويلىنىپ كۆرۈشىڭىز كېرەك (ئەفەس. 6:4). مۇقەددەس كىتابتىكى پرىنسىپلارغا ئەمەل قىلمايدىغان ئۇرۇق-تۇغقانلار ۋە دوستلارنىڭ ئېيتقانلىرى بويىچە ئەمەس، خۇدانىڭ ئېيتقىنى بويىچە قارار چىقىرىڭc. مەسىلەن، ئاسىيادا ياشايدىغان تونى ئىسىملىك بۇرادەر بىرنەچچە قېتىم چەتئەلدە ئىشلەشكە چاقىرىلغان. لېكىن، ئۇ دۇئا قىلىپ، ئايالى بىلەن مەسلىھەتلەشكەندىن كېيىن بۇ تەكلىپنى رەت قىلىپ، بۇنىڭ ئورنىغا ئائىلىدە چىقىملارنى ئازايتىشنى قارار قىلغان. تونى مۇنداق دەيدۇ: «شۇنداق قارار چىقارغاچقا، بىرنەچچە ئادەمنىڭ يەھۋانى تونۇشىغا ياردەم بېرەلىدىم. بالىلىرىمىزمۇ يەھۋا خۇدانى ئىنتايىن ياخشى كۆرىدۇ. بىز مەتتا 6:33-ئايەتتىكى سۆزلەرگە ئەمەل قىلساق، يەھۋانىڭ بىزگە دائىم غەمخورلۇق قىلىدىغانلىقىنى چۈشەندۇق».
قېرىغاندا قىينىلىپ قېلىشتىن غەم قىلغاندا
13. ياشانغان ۋاقتىمىزدا مۇھتاجلىقتا قالماسلىق ئۈچۈن ھازىر نېمە قىلالايمىز؟
13 ياشانغاندا ئۆزۈمنى قانداق باقىمەن دەپ ئەنسىرىشىمىز مۇمكىن. بىز بۇ مەسىلىدىمۇ يەھۋاغا تايىنىدىغانلىقىمىزنى كۆرسىتەلەيمىز. مۇقەددەس كىتاب بىزنى تىرىشىپ ئىشلەپ، ئالدىنئالا كېلەچەكنىڭ غېمىنى قىلىپ قويۇشقا دەۋەت قىلىدۇ (پەند ن. 6:6–11). شۇڭلاشقا، شارائىتىمىز مۇمكىنچىلىك بەرسە، ئازراق پۇل يىغىپ قويساق ياخشى. چۈنكى، پۇل بىزگە مەلۇم دەرىجىدە ھىمايە بولۇپ، كۆڭلىڭىز خاتىرجەم بولۇشىغا ياردەم بېرىدۇ (ۋەز 7:12). بىراق، پۇل تېپىش ھاياتىمىزدىكى ئەڭ مۇھىم ئىش بولۇپ كېتىشتىن پەخەس بولۇشىمىز كېرەك.
14. ئىبرانىيلار 13:5-ئايەتتىكى سۆزلەر كېلەچەكنىڭ غېمىنى قىلغاندا، تەڭپۇڭ كۆز قاراشنى ساقلاشقا قانداق ياردەم بېرىدۇ؟
14 ئەيسا مىسال كەلتۈرۈپ، مال-دۇنيا توپلاشنىڭ ئەخمەقلىق ئىكەنلىكىنى كۆرسەتكەن (لۇقا 12:16–21). بىز ئەتە نېمە بولىدىغانلىقىنى، بېشىمىزغا قانداق كۈن كېلىدىغانلىقىنى بىلمەيمىز (پەند ن. 23:4، 5؛ ياقۇپ 4:13–15). ئەيسا ئېيتقاندەك، ئۇنىڭغا ئەگەشكەنلەرنىڭ ھەممىسى مال-مۈلكىدىن ۋاز كېچىشكە تەييار بولۇشى كېرەك (لۇقا 14:33). يەھۇدىيىدە ياشىغان بىرىنچى ئەسىردىكى مەسىھ ئەگەشكۈچىلىرى بارلىق مال-مۈلكىدىن ۋاز كېچىشكە تەييار بولغان (ئىبرانىي. 10:34). بۈگۈنكى كۈندىمۇ نۇرغۇن قېرىنداشلىرىمىز ھېچقانداق سىياسىي پارتىيىنى قوللىمىغاچقا، مال-مۈلكىدىن ياكى ئىشى ئورنىدىن ئايرىلىپ قالغان (ۋەھىي. 13:16، 17). ئۇلار يەھۋانىڭ «سەندىن ئەسلا ئايرىلمايمەن، سېنى ھەرگىز تاشلىمايمەن» دېگەن ۋەدىسىگە قەتئىي ئىشەنگەن (ئىبرانىيلار 13:5-نى ئوقۇڭ). ئەلۋەتتە، ياشىنىپ قالغاندا تۇرمۇشىمىزنى قامداشقا قۇربىتىمىز يېتىشى ئۈچۈن ھازىر قولىمىزدىن كېلىشىچە كېلەچەك ئۈچۈن تەييارلىق قىلىمىز. لېكىن، كۈتۈلمىگەن ئىش يۈز بەرسە، يەھۋانىڭ بىزگە غەمخورلۇق قىلىدىغانلىقىغا قەتئىي ئىشىنىمىز.
15. خۇدا تايىنىدىغان ئاتا-ئانىلار بالىلاردىن نېمىنى كۈتۈشى ۋە نېمىنى كۈتمەسلىكى كېرەك؟ (رەسىمگە ھەم قاراڭ).
15 بەزى مەدەنىيەتلەردە ئەر-ئاياللار ياشانغاندا بىزنى باقىدۇ دەپ بالىلىق بولۇپ، پەرزەنتلەرنى تەربىيىلەيدۇ. لېكىن، مۇقەددەس كىتابتا يېزىلغاندەك، بالىلار ئاتا-ئانىسىنى ئەمەس، ئاتا-ئانىلار بالىلىرىنى قامدىشى كېرەك (2-كورىنت. 12:14). ئەلۋەتتە، ئاتا-ئانىلار ياشانغان ۋاقىتتا ياردەمگە مۇھتاج بولۇشى مۇمكىن ۋە نۇرغۇن بالىلار ئاتا-ئانىلىرىغا خۇشاللىق بىلەن ياردەم بېرىدۇ (1-تىموت. 5:4). بىراق، يەھۋاغا تايىنىدىغان ئاتا-ئانىلار شۇنى ئېنىق بىلىدۇكى، ھەقىقىي خۇشاللىق كېلەچەكتە چوڭ قىلغان پەرزەنتلىرىنىڭ ئۇلارنىڭ ھالىدىن خەۋەر ئالغانلىقىدىن ئەمەس، بەلكى ئۇلارنىڭ يەھۋانىڭ خىزمەتچىلىرى بولغانلىقىنى كۆرۈشتىن كېلىدۇ.—3-يۇھاننا 4.
يەھۋاغا تايانغان ئەر-ئاياللار قارار قىلغاندا، مۇقەددەس كىتابتىكى پرىنسىپلارنى نەزەرگە ئالىدۇ (15-ئابزاسقا قاراڭ)d
16. كېلەچەكتە بالىلار ئۆز جېنىنى ئۆزىنى بېقىشقا تەييار بولۇشى ئۈچۈن ئاتا-ئانىلار نېمە قىلالايدۇ؟ (ئەفەسلىكلەر 4:28)
16 بالىلىرىڭىزغا چوڭ بولغاندا ئۆز تۇرمۇشىنى قانداق قامداشنى ئۆگەتكەندە، ئۆزىڭىز ئۈلگە بولۇپ، ئۇلارنىڭ يەھۋاغا تايىنىشنى ئۆگىنىشىگە ياردەم بېرىڭ. بالىلىرىڭىزغا كىچىكىدىن باشلاپ، تىرىشىپ ئىشلەشنىڭ بەك مۇھىملىقىنى كۆرۈپ يېتىشىگە ياردەم قىلىڭ (پەند ن. 29:21؛ ئەفەسلىكلەر 4:28-نى ئوقۇڭ). يېشىنىڭ چوڭىيىشىغا قارىتا، ئۇلارنىڭ مەكتەپتە ياخشى ئوقۇشىغا ياردەم بېرىڭ. بالىلىرىڭلار مەكتەپنى پۈتتۈرگەندىن كېيىن، قانداق كەسپى بىلىم ئېلىش ۋە ئۇنى قانداق ئىشلىتىشنى قانداق قارار قىلماقچى بولغاندا، ئاتا-ئانىلار، سىلەر ئىزدىنىپ تەتقىق قىلىپ، مۇقەددەس كىتاب پرىنسىپلىرىنى ئەمەل قوللىنىپ، بالىلىرىڭلارنىڭ دانا قارار چىقىرىشىغا ياردەم بېرىڭلار. شۇ چاغدا، بالىلىرىڭلار كېلەچەكتە ئۆز جېنىنى ئۆزى باقالايدۇ ۋە قىزغىن ۋەز قىلالايدۇ، ھەتتا پىدائىي ۋەز ئېيتقۇچى بولۇپ خىزمەت قىلالايدۇ.
17. نېمىگە قەتئىي ئىشىنەلەيمىز؟
17 يەھۋانىڭ سادىق خىزمەتچىلىرى شۇنىڭغا قەتئىي ئىشىنىدۇكى: ياراتقۇچى خۇدا ئۇلارنىڭ ماددىي ئېھتىياجلىرىنى تەمىنلەپ بېرىشكە تامامەن قادىردۇر ۋە شۇنداق قىلىشقا ھەرقاچان تەييار. بۇ دۇنيانىڭ ئاخىرى يېقىنلاشقانسېرى، يەھۋاغا بولغان ئىشەنچىمىز تېخىمۇ كۆپ سىناقلارغا دۇچ كېلىدۇ. مەيلى قانداق ئىشلار يۈز بېرىشىدىن قەتئىينەزەر، يەھۋانىڭ بىزگە ھەردائىم غەمخورلۇق قىلىپ، ئېھتىياجىمىزنى قامدايدىغانلىقىغا قەتئىي ئىشىنەيلى. يەھۋا ھەممىگە قادىر قولىنى ۋە بىلىكىنى سوزۇپ ياردەم بېرىدۇ. چۈنكى، ياراتقۇچىمىز يەھۋانىڭ قولى قىسقا ئەمەس!
49-ناخشا يەھۋا بىزنىڭ پاناھگاھىمىز
a «كۈزىتىش مۇنارى» 2023-يىل، ئۆكتەبىر سانىدىكى «ئوقۇرمەنلەرنىڭ سوئاللىرى» دېگەن سەھىپىگە قاراڭ.
b «كۈزىتىش مۇنارى» (باشقا تىلدا) 2014-يىل، 15-سېنتەبىر سانىدىكى «ئوقۇرمەنلەرنىڭ سوئاللىرى» دېگەن سەھىپىگە قاراڭ.
c «بارىغا قانائەت قىلىڭلار» ناملىق فىلىمنى كۆرۈڭ.
d رەسىمدە: يەھۋاغا تايانغان ئەر-ئايال قىزى ۋە كۈيۈئوغلى بىلەن سۆزلىشىۋاتىدۇ. قىزى يولدىشى بىلەن بىللە يىغىلىش زالىنىڭ قۇرۇلۇش ئىشىغا قاتنىشىۋاتىدۇ.