Va Roma
11 Kuenje nda pula siti, anga Suku wa yanduluka omanu vaye? Hacoko! Momo lamevo ndu Isareli, ndukuacitumbulukila* ca Avirahama, nda tunda kepata lia Benjamini. 2 Suku ka yandulukile omanu vaye, vana eye a tava tete. Ka wa kũlĩhĩli eci ocisonehua ci popia catiamẽla ku Eliya, eci a likutilila ku Suku catiamẽla ku va Isareli? 3 “A Yehova, ovo va ponda ovaprofeto vove, va nyõla ovotala ove, ame lika nda supapo kuenda cilo va yongola oku njupa omuenyo wange.” 4 Pole, Suku wo tambulula ndati? “Nda lisilapo 7.000 komanu okuti ka va kekamẽlele Baale.” 5 Handi vali, koloneke vilo kua siala ocisupe okuti ca nõliwa lohenda ya piãla. 6 Nda oku nõliwa kuaco kua lingiwa lohenda ya piãla, ci lekisa okuti ka ca nõliwilile lovilinga; momo nda hacoko, ohenda ya piãla nda ka ya lingile vali ohenda ya piãla.
7 Oco hẽ, nye tu popia? Ovina va Isareli va sandiliya, ka va vi sangele, pole, vana va nõliwa la Suku va vi sanga. Vakuavo va likala oku yevelela, 8 ndeci ca sonehiwa citi: “Suku wa ecelela okuti ovitima viavo vi pekela kuenda ka va moli lovaso avo, ndaño oku yeva lovatũi, toke koloneke vilo.” 9 Daviti wa popiavo hati: “Omesa yavo yi linga onjanjo kokuavo, ulivi, ocilondokua kuenda efetuluinyo. 10 Ovaso avo a kale vowelema okuti ka va tẽla oku mola kuenda oviongo viavo vi petame ño hũ.”
11 Kuenje ndi pula siti, Ovo hẽ ka va lilondoka kuenda ka va kupuka? Sio! Pole, omo lioku lueya ocihandeleko kuli epopelo komanu vakualofeka, loku va muisa ukuse. 12 Nda oku lueya kuavo ocihandeleko loku tepuluka kuavo ci lomboloka asumũlũho komanu vakualofeka, handi ku kala vali asumũlũho alua omo lietendelo liavo lialua!
13 Cilo ndi vangula lene vumanu vakualofeka. “Omo okuti ndupostolo wa vakualofeka, ndi kemainya* upange wange, 14 oco ndi tale nda ndi kokisa esepa komanu* vange loku popela vamue pokati kavo. 15 Momo nda oku va inasi ci lomboloka oku linalisa loluali, nye ci lomboloka oku tambuiwa kuavo, nda hakutundako koku fa hã ha veya komuenyo? 16 Nda apako atete okuti onepa yosema, a kola, osema yosi ya tamiwa layovo yi kola; kuenda nda olombombo vi kola, ovianja viaco laviovo vi kola.
17 Pole, Suku wa teya ovianja vimue kuenda ndaño vucanja coliveira yovusenge, eye wo tokeki kuti waco kuenje vu kuatisiwavo lolombombo viayo violiveira, 18 ko ka lipandeli* ovianja. Nda wa vi lipandeli,* ivaluki okuti heneko weci ongusu kolumbombo, pole, olumbombo oluo lu wĩhi ongusu. 19 O popia huti: “Ovianja via teyiwa oco ndi tokekiwe kokualio.” 20 Eci ocili! Momo omo liekambo liavo liekolelo va teyiwa, pole, ove wa talamisua omo liekolelo. Ku ka lipande, ci kuatela usumba. 21 Nda Suku ka ecelele okuti ovianja viocili vi amamako, ka ka ecelelavo okuti ove amamako. 22 Limbuka ohenda ya Suku kuenda oku kãla kuaye. Ku vana va kupuka kuli oku kãla, pole, kokuove kuli ohenda ya Suku, nda wa amamako vohenda yaye; nda hacoko o tetiwavo. 23 Ovo nda va amamako oku lekisa ekolelo, va tokekisuako, momo Suku o kuete unene woku va tokekisako vali. 24 Momo nda wa tetiwa kuti woliveira wovusenge kuenda wa tokekiwa lãvi kuti woliveira wocili, ovianja viocili vi tokekiwa vali kuti wavio woliveira!
25 A vamanji njongola okuti vu kũlĩha eci catiamẽla kelumbu eli li kola, oco ka vu ka lilekisi okuti wakualondunge kovaso ene muẽle: Onepa yo Isareli yi tĩlisa ovitima viavo toke eci etendelo lialua liomanu vakualofeka li suapo, 26 kuenda va Isareli vosi va popeliwa. Ndeci ca sonehiwa citi: “Onjovoli* yi tunda ko Siono kuenda yi linga okuti ocitumbulukila ca Yakoba ci siapo ovilinga viavo vĩvi. 27 Kuenje eci oco ocisila cange lavo, eci ndi vopa akandu avo.” 28 Ovo ovanyali va Suku, momo va likala olondaka viwa kuenda ene wa kuatisiwi lavio; pole, omo liohuminyo Suku a linga la vakukululu yavo, eye wa nõla vamue pokati kavo oco va linge akamba vaye. 29 Momo ocali ca Suku kuenda ekovongo liaye, ovina ka vi pongoloka. 30 Ndeci wa sinilili Suku, pole, wa sangi ohenda omo liokusina kuavo, 31 cilo ovo va sinila okuti ohenda yo lingiwi lavovo va muilako ohenda. 32 Suku ecelela okuti omanu vosi va linga apika vesino, oco eye a lekise ohenda komanu vosi.
33 Ukuasi, lolondunge, lukũlĩhĩso wa Suku via longa cimue! Oku tetulula kuaye ka ku kũlĩhĩsua kuenda olonjila viaye ka vi moñoluiwa! 34 “Helie wa kũlĩha ovisimĩlo via Yehova, ale helie wa linga ondunguli yaye?” 35 Pamue, “helie wa eca tete ocina cimue ku Suku, okuti eye u ci tiuwila?” 36 Momo ovina viosi vi tunda kokuaye kuenje kokuaye oko ku kasilili ovina viosi. Ulamba weciwe kokuaye otembo yenda hũ. Amene.