Va Roma
7 A vamanji, (ñasi oku vangula la vana va kũlĩha ocihandeleko) ka wa kũlĩhĩli okuti Ocihandeleko ci viala lika komunu osimbu a kasi lomuenyo? 2 Ukãi ohueli wa kutiwa kulume waye Locihandeleko osimbu a kasi lomuenyo; pole nda ulume waye wa fa, eye wa yovuiwa kocihandeleko culume waye. 3 Pole, nda eye wa kuela ulume ukuavo osimbu ulume waye a kasi lomuenyo, o tukuiwa okuti ukuakahokolo. Puãi nda ulume waye wa fa, eye wa yovuiwa kocihandeleko culume waye kuenje ka tukuiwa ukuakahokolo nda wa kuela ulume ukuavo.
4 Ene a vamanji, wa fivo Kocihandeleko omo lietimba lia Kristu okuti vu linga vaye, una wa pinduiwa kuava va fa, okuti tu imila Suku apako. 5 Eci tua endaile loloñeyi vietimba, olonjongole vĩvi via situluiwa Locihandeleko via talavayele vatimba* etu oco tu imi epako li tuala koku fa. 6 Pole, cilo tua yovuiwa Kocihandeleko, momo tua fa kueci ca tu kutile, hamomoko lioku pokola Kocihandeleko, puãi tuapika omo espiritu lia tu vetiya oku pokola.
7 Oco puãi nye tu popia? Ocihandeleko hẽ ekandu? Hacoko! Nda ka ca kaile Ocihandeleko, ame nda sia kũlĩhĩle ekandu. Ndeci, nda sia kũlĩhĩlevo oku livela nda Ocihandeleko ka ca popele citi: “Ku ka livele.” 8 Omo ekandu lia likuatisa locihandeleko lia ñokela ovipululu viosi, momo nda ka ca kaile ocihandeleko, nda ekandu lia fa. 9 Ocili, eci ka kua kaile ocihandeleko, nda kala lomuenyo. Pole, eci ocihandeleko ceya ekandu lia kala vali lomuenyo, puãi ame nda fa. 10 Kuenje ocihandeleko ca sokele oku ndi songuila komuenyo, ca ndi songuila koku fa. 11 Omo ekandu lia li kuatisa locihandeleko, lia ndi yapuisa kuenje lia njipa laco. 12 Oco Ocihandeleko ci kola, cesunga kuenda ciwa.
13 Anga oku linga eci ciwa ci ñokela oku fa? Hacoko! Pole, ekandu lia ndi ponda. Omo liocina cimue ciwa, ekandu lia nena oku fa oco ku situluiwe eci ci lomboloka ekandu. Kuenje ocihandeleko ca situlula okuti, ekandu lĩvi. 14 Tua kũlĩha okuti Ocihandeleko catiamẽla ku Suku, pole, ame nda tiamẽla ketimba lia landisiwa kekandu. 15 Sia kũlĩhĩle eci ñasi oku linga. Momo eci njongola oku linga si ci lingi, pole, eci nda suvuka oco ndinga. 16 Nda eci si yongola oku linga oco ndinga, ndi tava okuti Ocihandeleko ca sunguluka. 17 Oco hameko vali ñasi oku ci linga, te ekandu li kasi vokati kange. 18 Nda kũlĩha okuti vetimba liange ka muli eci ciwa; momo ñuete onjongole yoku linga eci ciwa, pole, si kuete uloño woku ci linga. 19 Momo eci ciwa njongola oku linga si ci lingi, pole, cĩvi si yongola oku linga oco ndinga. 20 Cilo nda ndi linga eci si yongola hameko vali ñasi oku ci linga, te ekandu li kasi vokuange.
21 Oco nda sanga ocihandeleko eci vokuange okuti: Eci ndi yongola oku linga eci ciwa, cĩvi ceci. 22 Vutima wange ndi sanjukila ocihandeleko ca Suku, 23 puãi ndete ocihandeleko cikuavo vetimba* liange ci liyaka locihandeleko cutima wange, okuti ci ndi tuala kupika wocihandeleko cekandu vetimba* liange. 24 Ngongo yange we! Helie o popela etimba liange koku fa oku? 25 Ngeca olopandu ku Suku vonduko ya Yesu Kristu Ñala yetu! Vutima wange ndupika wocihandeleko ca Suku, puãi letimba liange ndupika wocihandeleko cekandu.