Isaya
29 “Ngongo yo Ariyele,* o Ariyele olupale luna Daviti a tungila ocilombo!+
Luamameko unyamo lunyamo;
Ovipito viamameko+ oku lingiwa.
2 Ame ndi ka nena ohali vo Ariyele,+
Kuenda mu ka kala oku lila loku lisiõsiõla,+
Kuenje kokuange oyo yi ka kala ndiko liutala wa Suku.+
3 Ndi ka tunga ocilombo ci ku ñuala kolonele viosi,
Kuenda ndi ka ku ñuala ocingonja loviti via songoloka
Loku ku votuila ocimbaka cimue coku ku katukila.+
4 Ove o ka kutisiwa osõi;
O ka vangula oku upisila posi,
Kuenda eci ove o popia ci ka tuvikiwa loneketela.
Ondaka yove yi ka tundilila posi+
Ndondaka yukuakuvangula lolondele,
Kuenda olondaka viove vi ka tundila voneketela ndoku loñola.
5 Owiñi wovanyãli* vove, u ka kala ndombundu,+
Owiñi wa vana va linga usumba, u ka kala ndinene vi ambatiwa lofela.+
Kuenda ovina viaco, vi ka pita lonjanga vocipikipiki.+
6 Yehova ukualohoka o ka ku teyuila
Locilemĩlo, locilemawe kuenda lonjuela yalua,
Lofela, lehunguhungu kuenda lulienge wondalu yi nyõla.”+
7 Kuenje owiñi wo kolofeka viosi una u linga uyaki lo Ariyele+
Okuti vosi vana va yi katukila luyaki,
Vana va yi katukila lomakina yoku linga uyaki,
Kuenda vana va kokela ohali kokuayo,
Va ka linga ndonjoi okuti, ocinjonde cuteke.
8 Ocili, ci ka kala ndomunu umue o kuete onjala o lota okuti, o kasi oku lia,
Pole, o pasuka lonjala,
Kuenda ndomunu umue o kuete enyona o lota okuti, o kasi oku nyua,
Pole, o pasuka okuti wa kava kuenda o kasi lenyona.
Eci oco ci ka pita lowiñi wolofeka viosi
Una u linga uyaki woku katukila Omunda Siono.+
Ovo va kolua, pole, halovinyuko;
Va kasi oku yengenga, pole, ka va koluele omo liovina vi koluisa.
10 Momo Yehova wa kapa otulo tualua vokuene;+
Eye wa yika ovaso ene, avaprofeto,+
Kuenda wa sikĩlĩla ovitue viene a vakuavinjonde.+
11 Kokuene ovinjonde viosi vi linga ndolondaka vielivulu limue lia yikiwa.+ Eci va lieca ku umue o tẽla oku tanga loku u sapuila vati: “Linga ohenda tanga eci lolukandi,” eye o tambulula hati: “Si pondola oku ci linga, momo lia yikiwa.” 12 Kuenda eci va eca elivulu liaco komunu umue ka tẽla oku tanga loku u sapuila vati: “Linga ohenda tanga eci,” eye o ka popia hati: “Si tẽla oku tanga.”
13 Yehova hati: “Omanu ava vamela kokuange lovimẽla viavo
Kuenda va ndi sumbila lika lovimẽla viavo,+
Pole, ovitima viavo vi kasi ocipãla lame;
Kuenda efendelo va eca kokuange li tiamisiwila kovihandeleko viomanu vina va longisiwa.+
14 Omo liaco, ame Una o ka linga vali ovina vi komõhisa komanu ava,+
Ku pita ovina vi komõhisa olonjanja vialua;
Kuenda olondunge viomanu vavo vakualondunge, vi ka takata,
Kuenda elomboloko liomanu vavo vakualondunge, li ka selekiwa.”+
15 Ngongo ya vana va linga cosi oco va limbike eci va kasi oku sokiya kovaso a Yehova.+
Ovilinga viavo vi lingiwila vovitumãlo via tekãva,
Kuenda va popia vati: “Helie o tu lete?
Kuenda helie wa kũlĩha eci tu kasi oku linga?”+
16 Ene vu pengisa ovina!*
Anga hẽ ukuakutalavaya lotuma o pondola oku sokisiwa lotuma?+
Anga hẽ ocina ca pangiwa ci pondola oku popia lu wa ci panga hati:
“Eye ka mangele”?+
Anga hẽ eci ca pangiwa ci pondola oku popia lu wa ci panga hati:
“Eye ka kuete elomboloko lalimue”?+
17 Ndopo muẽle o Levanone yi pongoluiwa ocumbo coviti viapako,+
Kuenda ocumbo coviti viapako ci ka tendiwa ndusenge.+
18 Keteke liaco, ocisitatũi ci ka yeva olondaka vielivulu,
Kuenda ovaso olomeke ka a ka mola vali owelema loku tekãva.+
19 Ambombe va ka sanjukila calua Yehova,
Kuenda olohukũi pokati komanu vi ka sanjukila Una o Kola wa Isareli.+
20 Momo ongangala ka yi ka kalako vali,
Ukuakulitunula ka ka kalako vali,
Kuenda vosi vana va lavulula oco va linge eci cĩvi va ka kunduiwa,+
21 Vana va vangula uhembi oco va lundile vakuavo,
Haivo va kapela onjanjo ku una o sombisa* vakuavo pombundi yolupale,+
Kuenje lolondaka ka vi kuete esilivilo, va likala esunga kukuesunga.+
22 Omo liaco, eci oco Yehova una wa popela Avirahama,+ a sapuila onjo ya Yakoba hati:
23 Momo eci eye a mola omãla vaye,
Okuti upange wovaka ange, pokati kaye,+
Ovo va ka sumbila onduko yange;
Ocili muẽle, va ka sumbila Una o Kola wa Yakoba,
Kuenda ovo va ka sumbila Suku yo Isareli.+
24 Vana va kuete ovisimĩlo ka via sungulukile va ka kuata elomboloko,
Kuenda vana va liyeya, va ka tava kepindiso.”