Isaya
31 Ngongo ya vana va lokila Kegito oku ka sanda ekuatiso,+
Vana va kolela kolokavalu,+
Va kolela kakãlu uyaki omo okuti alua,
Kuenda kolokavalu* viuyaki omo okuti via pama.
Pole, ovo ka va sandiliya Una o Kola wa Isareli,
Kuenda ovo ka va sandi Yehova.
2 Pole, eye ukualondungevo kuenda o ka nena eyambulo,
Kuenje eye o ka tẽlisa olondaka viaye.
Eye o ka katukila vakuanjo yolondingaĩvi
Kuenda o ka katukila vana va kuatisa ava va linga ovina vĩvi.+
3 Va Egito ka va sokisiwa la Suku, ovo omanu vaño;
Olokavalu viavo ositu, hespirituko.+
Eci Yehova a kolõla eka liaye,
Wosi una o ka eca ekuatiso o ka lilondoka,
Kuenda wosi una o ka kuatisiwa o ka kupuka;
Vosi yavo va ka fa votembo yimuamue.
4 Momo, Yehova wa ndi sapuila hati:
“Ndeci ohosi, ohosi yimue yumalẽhe ya pama* yi komẽla kilu liocinyama ca kuatiwa,
Eci ocimunga cimue cangombo ci kovongiwa pamosi kovaso yalio,
Kuenda oyo ka yi kuata usumba omo liondaka yavo
Ndaño oku yokokela onjuela yavo,
Cimuamue haico okuti, Yehova ukualohoka o ka loka oco a yakeleko
Omunda Siono kuenda owulu walio.
5 Ndeci onjila yimue yi palãlela vilu, Yehova ukualohoka o ka teyuila o Yerusalãi.+
Eye o ka yi teyuila kuenda o ka yi popela.
Eye o ka yi supisapo kuenda o ka yi yovola.”
6 “Tiuki ku Una ene wa sinĩli calua, Amanu va Isareli.+ 7 Keteke liaco, omunu lomunu o ka nyehũla olosuku viaye viopalata ka vi kuete esilivilo kuenda olosuku viaye viulu ka vi kuete esilivilo vina ene wa pangi lovaka ene muẽle, poku linga ekandu.
8 Kuenje u Asuria o ka kupuka omo liosipata okuti, hayomunuko;
Kuenda osipata yimue okuti hayomunuko, yu kolia.+
Eye o ka tila omo liosipata,
Kuenda akuenje vaye va ka kisikiwa oku linga upange wa tĩla.
9 Esenje liaye li ka imũha omo liusumba,
Kuenda olombuale viaye vi ka kuata usumba omo liombueti yondimbukiso,” oco Yehova a popia,
Okuti ocinyi* caye ci kasi vo Siono kuenda ofolono yaye yi kasi vo Yerusalãi.