Yeremiya
30 Yeremiya wa tambula ondaka ya tunda ku Yehova yokuti: 2 “Ca popia Yehova Suku ya Isareli ceci hati: ‘Soneha velivulu limue olondaka viosi ndu ku sapuila. 3 Momo “tala! oloneke vi kasi oku iya,” oco Yehova a popia, “eci ndi kongolola omanu vange olomandekua okuti, Isareli kuenda Yuda,”+ oco Yehova a popia kuenda ndi ka va nena vali vofeka nda eca ku vakukululu yavo kuenje ovo va ka yi piñala vali.”’”+
4 Evi ovio olondaka Yehova a sapuila ku Isareli kuenda ku Yuda.
5 Ca popia Yehova ceci hati:
“Tua yeva ovileñi viesakalalo;
Kuli lika ocinjoko, ka kuli ombembua.
6 Lingi ohenda, puli nda ulume o pondola oku cita.
Momo lie ovipala viosi via honguela?
7 Avoyo we! Momo eteke liaco li linga usumba.*+
Ka kuli eteke lia lisoka lalio,
Otembo yimue yohali ku Yakoba.
Pole, eye o ka popeliwa kotembo yaco.”
8 “Keteke liaco,” oco Yehova ukualohoka a popia, “ndi ka teya okanga yi kasi kosingo yove kuenda ndi ka tepa ovikolo* viove volonepa vivali; kuenje ovingendeleyi ka vi ko* lingisa vali upika wavio. 9 Omanu vange va ka vumba Yehova Suku yavo kuenda Daviti soma yavo, una ame ndi ka va katuila.”+
10 “Kuenje ove, okuenje wange Yakoba, ku ka kuate usumba,” oco Yehova a popia,
“Kuenda ku ka yokoke, A Isareli.+
Momo ame ndi ka ku yovola oku upisa kupãla
Kuenda ocitumbulukila cove, oku upisa kofeka yumandekua wavo.+
Yakoba o ka tiuka kuenda o ka tula utima okuti ka sakalala,
Lomue o ka va lingisa usumba.”+
11 “Momo ame ñasi love,” oco Yehova a popia, “oco ndu ku yovole.
12 Momo ca popia Yehova ceci hati:
“Epute liove ka li kuete esaku.+
Olio ka li kuete esaku.
13 Ka kuli laumue o livondelelako ocitangi cove,
Ka kuli lacimue ci sakula epute liove.
Ka kuli onjila yoku ku sakula.
14 Vakuacisola cove vosi va ku ivala.+
Ovo ka va ku sandiliya vali.
Momo nda ku veta ndeci unyãli umue a veta,+
Leyambulo liomunu umue ongangala,
Omo lieko liove linene kuenda akandu ove alua.+
15 Momo lie o litetelela omo liepute liove?
Evalo liove ka li kayi!
Omo lieko liove linene kuenda akandu ove alua+
Oco nda ku lingila ovina evi.
Vosi vana va ku punda, va ka pundiwavo,
Kuenda ame ndi ka eca vosi va ku punda ku vakuakupunda.”+
17 “Pole, ndi ka tumbulula uhayele wove kuenda ndi ka kayisa apute ove,”+ oco Yehova a popia,
“Ndaño va ku tukula okuti wa nyehũiwa poku popia hati:
‘Siono, una okuti, lomue u sandiliya.’”+
18 Ca popia Yehova ceci hati:
“Ñasi oku ongolola olomandekua violombalaka via Yakoba,+
Kuenda ndi ka kuatela ohenda olotavernakulu viaye.
Olupale lu ka tumbuluiwa kilu liomunda yalio,+
Kuenda osapalalo yi kuete ociteyuilo, yi ka talama apa ya kala ale.
19 Ovo va ka eca muẽle olopandu kuenda va ka kaluka lonjolela.+
Ame ndi ka va vokiya kuenda ovo ka va ka tepuluka;+
Ndi ka va luisa,*
Kuenje ovo ka va ka kala vatito ketendelo.+
20 Omãla vaye va ka kala ndeci va kala ale kosimbu,
Kuenda kovaso yange ohongele yaye yi ka kolapo.+
Ndi ka yambula vosi vana vo talisa ohali.+
21 Ombiali yaye yi ka kala umue pokati komanu vaye muẽle,
Kuenda pokati kaye pa ka tunda ombiali yaye.
Kuenje ame ndi ko nena ocipepi kuenda eye o ka amela kokuange.”
“Momo nda hacoko, helie o lukuta* oku amela kokuange?” oco Yehova a popia.
22 “Kuenje ene vu ka linga omanu vange+ kuenda ame ndi ka linga Suku yene.”+
23 Tali! Ehunguhungu limue liofela lia Yehova li ka wenguka lonyeño,+
Okuti, ocipepe cimue ci nyõla ci sikila kutue wolondingaĩvi.
24 Onyeño yalua ya Yehova ka yi ka tiukila konyima
Toke eci eye a ci linga loku tẽlisa ovisimĩlo viutima waye.+
Konepa ya sulako yoloneke, vu ka kuata elomboloko liaco.+