Esekiele
11 Espiritu limue lia njelula kuenda lia ngambata pombundi yonele yutundilo yonembele ya Yehova, ombundi yamba ovaso kutundilo.+ Poku iñilila kuombundi nda muilapo 25 kalume kuenda pokati kavo pa kala Yasaniya omõla a Asure kuenda Pelatiya omõla a Benaya okuti, olombuale viomanu.+ 2 Noke Suku wa ndi sapuila hati: “A mõlomunu, ava ovo alume vana va sokiya oku linga eci cĩvi kuenda va eca elungulo ka lia sungulukile* volupale olu. 3 Ovo va popia vati: ‘Yilo hẽ hatemboko yoku tunga olonjo?+ Olupale* ombia* yimue yoku telekela+ kuenda etu, tusitu.’
4 “Omo liaco, va imbila owanji. Imba owanji, a mõlomunu.”+
5 Noke espiritu lia Yehova lia mbuila+ kuenda Suku wa ndi sapuila hati: “Popia hati: ‘Eci oco Yehova a popia hati: “Eci vu kasi oku popia ca sunguluka, anjo ya Isareli kuenda ame nda kũlĩha ovina vi tunda kovisimĩlo viene. 6 Ene wa koki olofa viomanu valua volupale olu kuenda wa yukisi olokololo vialio lovivimbi.”’”+ 7 “Omo liaco, ca popia Ñala Tõlo Yehova ceci hati: ‘Ovivimbi vina wa sanduili volupale, ovio ositu kuenda olupale oluo ombia.+ Pole, ene muẽle vu kopiwa volupale luaco.’”
8 “‘Ene vu kuetele usumba osipata+ kuenda ndi ka vu katukili losipata,’ oco Ñala Tõlo Yehova a popia. 9 ‘Ame ndi ko vupi volupale kuenda ndu ko weci peka liovingendeleyi kuenda ame ndi vu kangisi.+ 10 Ene vu ka kupuka omo liosipata.+ Ame ndi ka vu sombisili kongave ya Isareli+ kuenda vu ka kũlĩha okuti, ame ndi Yehova.+ 11 Olupale ka lu ka kala ombia yimue kokuene kuenda ene ka vu ka kala ositu vombia yaco; ndi ka vu sombisili kongave ya Isareli, 12 kuenje vu ka kũlĩha okuti, ame ndi Yehova. Momo ene ka wa endeleli voviholo viange kuenda ka wa kapeliko asombiso ange,+ pole, ene wa lingi ndeci olofeka vio ñuali via siata oku sombisa.’”+
13 Eci nda mala oku imba owanji, Pelatiya omõla a Benaya wa fa kuenje nda petamisa ocipala cange posi kuenda nda kaluka lolukandi siti: “Avoyo we! A Ñala Tõlo Yehova! Anga hẽ ove o nyõla ovisupe via va Isareli?”+
14 Ondaka ya Yehova yeya vali kokuange yiti: 15 “A mõlomunu, ku vamanjove vana pokati ka vamanjove va kuete omoko yoku yovola kuenda onjo yosi ya Isareli vana olonungi vio Yerusalãi via va sapuila viti: ‘Kali ocipãla la Yehova. Ofeka eyi yetu; oyo ya eciwa kokuetu ndocipiñalo.’ 16 Omo liaco, popia hati: ‘Ca popia Ñala Tõlo Yehova ceci hati: “Ndaño okuti ame nda va tuma ocipãla pokati kolofeka kuenda oku va sanduila pokati kovaimbo,+ votembo yimue yitito ame ndi ka kala ocitumãlo ci kola kokuavo kovaimbo ana ovo va enda.”’+
17 “Omo liaco, popia okuti: ‘Ca popia Ñala Tõlo Yehova ceci hati: “Ndi ka vu ongololi pokati komanu kuenda ndi ka vu kongeli pokati kolofeka vina wa sanduiwili kuenje ndi ka eca kokuene ofeka ya Isareli.+ 18 Kuenje ovo va ka tiukilamo kuenda va ka tundisa vofeka yaco ovina via vĩha lovilinga viumbondo.+ 19 Ndi ka eca kokuavo utima umuamue*+ kuenda ame ndi ka kapa vokuavo espiritu liokaliye;+ kuenje ndi kopa vatimba avo utima wewe+ loku va ĩha utima wositu,*+ 20 oco ovo va endele volonumbi viange kuenda oku kapako asombiso ange loku pokola kokuavio. Kuenje ovo va ka linga omanu vange kuenda ame ndi ka kala Suku yavo.”’
21 “‘“Pole, ku vana okuti ovitima viavo via nõlapo oku amamako oku linga ovina vĩvi kuenda ovilinga viumbondo, ndi ka nena ovitangi viovilinga viavo okuti vi kupukila kovitue viavo,” oco Ñala Tõlo Yehova a popia.’”
22 Va keruvi va votola avava avo kuenda alola a kala ocipepi lavo+ kuenje ulamba wa Suku ya Isareli wa kala kilu liavo.+ 23 Noke ulamba wa Yehova+ wa tunda volupale kuenda wa talama kilu liomunda yi kasi kutundilo wolupale.+ 24 Noke espiritu limue lia ñatula vocinjonde cimue nda kuata pocakati cespiritu lia Suku kuenje lia ndi nena komanu va kala kumandekua ko Kaldea. Noke ocinjonde nda kuata ca nunda. 25 Kuenje nda fetika oku sapuila omanu va kala kumandekua ovina viosi Yehova a ndi lekisa.