2 Va Korindo
5 Omo tua kũlĩha okuti onjo yetu ilu lieve okuti ombalaka yilo yi laika oku nyõliwa, tu kuete onjo ya tungiwa la Suku, onjo yaco ka ya tungiwile lovaka, oyo yi kasi kilu otembo ka yi pui. 2 Omo okuti vonjo yaco tu leña leña, tu livela calua oku tungila yimue kilu, 3 okuti eci tu iñilamo, ka tu sangiwa epõlola. 4 Kuenje etu tu kasi vombalaka yilo, tu leña leña omo tua lemẽlelua, momo ka tu yongola oku lula ombalaka yaco nduwalo pole, tu yongola oku tambula onjo kilu, okuti eci ci fa fa ci taka vomuenyo. 5 Suku eye wa tu pongiyila omuenyo waco, una wa tu ĩha espiritu sandu. Poku ci linga wa likuminya oku tu ĩha asumũlũho a laikele oku iya.
6 Otembo yosi tua kolela kuenda tua kũlĩha okuti osimbu tu kuete onjo yetu vetimba, tu kasi ocipãla la Ñala, 7 momo tu endaila vekolelo, haloku kolelako ovina vi letiwe. 8 Tua kolela kuenda tu yongola oku kala ocipãla letimba, okuti tu tungila onjo yetu kumue la Ñala. 9 Omo liaco, ci kale okuti tu tungila onjo kumue laye, ale tu kala ocipãla laye, ocimãho cetu oku taviwa laye. 10 Momo vosi tu laika oku molẽha komangu yekanga ya Kristu, okuti omunu lomunu o tambula ndomo ci likuata lovilinga viaye osimbu a kala vetimba, ci kale eci ciwa, ale ceci cĩvi.
11 Omo tua kũlĩha okuti tu sukila oku sumbila Ñala, tu amamako oku tavisa omanu, okuti tu kũlĩhĩwa ciwa la Suku. Ndi lavoka okuti lenevo wa tu kũlĩhi ciwa vovitima viene. 12 Ka tu lilekisa vali kokuene nda etu velie, pole, tu u vetiyi oku lipanda mekonda lietu, okuti vu tẽla oku tambulula vana va lipandela eposo lioketimba, pole, ka va lipandela eci ci kasi vutima. 13 Momo nda tua linga ayui, tua ci lingila Suku; nda tua linga vakualondunge, tu ci lingila ene. 14 Momo ocisola ca Kristu ci tu vetiya, omo eci oco tua sima, okuti omunu umosi o fila omanu vosi. 15 Kuenje eye wa fila vosi oco okuti vana va kasi lomuenyo ka va lisanjuisa ovo muẽle, te oku sanjuisa una wa va fila kuenje wa pinduiwa.
16 Oku upisa cilo, ka tu tendi vakuetu lemolẽho liavo lioketimba. Ndaño tua tendele Kristu lemolẽho liaye lioketimba, cilo ka tu u tendi vali ndoco. 17 Nda umue o kasi vu Kristu, o linga ociluvo cokaliye; puãi ovina viosimbu via pita; kuenje ovina viosi vi linga viokaliye. 18 Ovina viosi vi tunda ku Suku, una o linalisa letu mekonda lia Kristu kuenda wa tu ĩha upange woku inalisa, 19 ci lomboloka okuti Suku vu Kristu wa inalisa oluali kokuaye, ka tendele akandu omanu loku va pisa lao kuenje eye wa tu kundika esapulo lioku inalisa.
20 Omo liaco, tulomunga vonduko ya Kristu, ndeci Suku a linga epingilo mekonda lietu. Omo okuti tulomunga vonduko ya Kristu, tu pinga tuti: “Linalisi la Suku.” 21 Omunu ka kũlĩhĩle ekandu, Suku wo lingisa ekandu mekonda lietu, okuti vokuaye tu linga vakuesunga kovaso a Suku.