Va Roma
8 Kuenje vana va kasi vomunga kumue la Kristu Yesu ka va kuete eko. 2 Momo ocihandeleko cespiritu cina ceca omuenyo vu Kristu Yesu ca ku yovola kocihandeleko cekandu kuenda coku fa. 3 Eci Ocihandeleko ka ca tẽlele oku linga omo lioku hongua kuetimba, Suku wa ci linga poku tuma Omõlaye okuti o kala ndomanu vakuakandu, loku malako ekandu. Kuenje wa pisa ekandu vetimba, 4 okuti tu tẽlisa esunga lia kisikiwa Vocihandeleko okuti ka tu endela vetimba, te lespiritu. 5 Momo vosi va tiamisila omuenyo ketimba va tiamisila ovitima viavo kovina vietimba, puãi ava va ambata omuenyo u litava lespiritu, kovina viespiritu. 6 Oku tiamisila utima ketimba ci lomboloka oku fa, pole, oku tiamisila utima kespiritu ci lomboloka omuenyo kuenda ombembua; 7 oku tiamisila utima ketimba ci lomboloka oku kala unyali wa Suku, momo ka u pokola kocihandeleko ca Suku, omo ka wu ci tẽla. 8 Handi vali, vana va tiamisila utima ketimba ka va tẽla oku sanjuisa Suku.
9 Puãi ene ka vu endela vetimba, te vespiritu nda espiritu lia Suku li kasi vokuene. Pole, nda umue ka kuete espiritu lia Kristu, omunu waco ka tiamẽlele kokuaye. 10 Nda ene vu kasi vomunga kumue la Kristu, etimba lia fa mekonda liekandu, puãi espiritu omuenyo omo liesunga. 11 Nda espiritu lia Suku lina lia pindula Kristu Yesu li kasi lene, Suku o linga okuti atimba ene a fa fa, a kala vali lomuenyo.
12 A vamanji, etu puãi ka tua kisikiwile oku pokola ketimba loku tẽlisa oloñeyi vialio; 13 nda vu pokola koloñeyi vietimba, vu fa; pole, nda wipayi ovilinga vietimba lespiritu, vu kala lomuenyo. 14 Momo vosi va songuiwa lespiritu lia Suku, omãla va Suku. 15 Momo espiritu lia Suku ka lia tu kokele oku linga apika okuti tu kuata vali usumba, puãi omo liespiritu liaco tu tendiwa ndomãla kuenda espiritu li tu vetiya oku vilikiya hati, “Aba,* a Tate!” 16 Espiritu lia Suku limba uvangi lespiritu lietu okuti tumãla va Suku. 17 Oco puãi, nda tumãla, tu vakapiñalavo—okuti vakapiñala va Suku, pole, tu kapiñala kumue la Kristu—nda tu talela kumue ohali loku muisua kumue ulamba.
18 Momo ame nda limbuka okuti ohali yotembo yilo hacimueko oku yi sokisa lulamba u kasi oku situluiwa kokuetu. 19 Momo oviluvo vi kasi oku talamẽla loku lavoka oku situluiwa kuomãla va Suku. 20 Momo oviluvo via tiamisua kuveke halocipango cavioko, te locipango cu wa vi tiamisilako, omo lielavoko 21 liokuti, oviluvo viaco vi ka yovuiwa kupika wetimba li nyõleha okuti vi kuata eyovo liulamba womãla va Suku. 22 Momo tua kũlĩha okuti oviluvo viosi vi lisiõsũila kumosi kuenda vi talela kumosi ohali toke cilo. 23 Havioko lika, letuvo tua mãha apako atete, okuti espiritu, etu muẽle tu leña leña vutima osimbu tu lavoka oku tendiwa ndomãla, loku yovuiwa katimba etu omo liocisembi. 24 Eci Suku a tu popela kekandu, tua tambula elavoko liaco. Pole, nda omunu o lete ale ocina cimue, o sukila hẽ oku lavoka vali ocina caco? 25 Puãi nda tu lavoka eci ka tu lete, tu ci talamẽla lepandi.
26 Cimuamue haico, olonjanja vimue omo lioku hongua kuetu; ka tu tẽla oku tukula ovina tu sukila vohutililo. Pole, espiritu li tu pingilako loku leña leña, ndaño ka ci popiwa. 27 Puãi Suku una o konomuisa ovitima viosi, wa kũlĩha eci ci kasi oku popiwa omo liunene waye. Momo eye o kuatisa olosandu, ndomo ci likuata locipango caye.
28 Tua kũlĩha okuti Suku wa panga okuti oviluvo viaye vi talavayela pamosi loku kuatisa vana va sole Suku, haivo va kovongiwila ocipango caye; 29 momo ku vana eye a tava tunde kefetikilo, wa ecelelavo okuti va kala esetahãlo Liomõlaye, una okuti o linga uveli wa vamanjaye valua. 30 Pole, vana eye a tava tunde kefetikilo wa va kovongavo; kuenda vana eye a kovonga o va tenda okuti vakuesunga. Kuenje vana eye a tenda okuti vakuesunga ovo a muisa ulamba.
31 Nye tu popia catiamẽla kovina evi? Nda Suku o kasi letu, helie o tu katukila? 32 Una okuti ka likalele oku eca Omõlaye kokuetu vosi, momo lie eye ka tu ĩhilavo ovina viosi kumue laye? 33 Helie o vetela evelo ava va nõliwa la Suku? Suku Eye wa va tenda okuti vakuesunga. 34 Helie o va pisa? Kristu Yesu una wa fa haeye wa pinduiwa, o kasi kondio ya Suku kuenda o tu livondelelako.
35 Nye ci pondola oku tu tepa kocisola ca Kristu? Ohali, ongongo, elambalalo, onjala, epẽle, ohele ale osipata? 36 Ndeci ca sonehiwa citi: “Mekonda liove tu pondiwila eteke liosi; haetu tu tendiwa ndomeme ya loña kepondelo.” 37 Pole, kovina viosi evi tu kasi oku yula omo lia una wa tu sola. 38 Omo liaco, nda kolela okuti ndaño oku fa, ndaño omuenyo, ndaño ovangelo, olombiali pamue ovina via cilo, ale ovina vi laika oku iya, ndaño ovonene, 39 ndaño ovina viokilu, ale ovina vioposi, ndaño ociluvo cikuavo, lacimue ci tẽla oku tu tepa kocisola ca Suku ci kasi vu Kristu Yesu Ñala yetu.