Esekiele
12 Ondaka ya Yehova yeya vali kokuange yiti: 2 “A mõlomunu, ove o kasi pokati komanu va sina. Ovo va kuete ovaso oku vanja, pole, ka va lete, va kuete ovatũi oku yeva, pole, ka va yevite,+ momo ovo omanu vamue va sina.+ 3 Catiamẽla kokuove, a mõlomunu, pongiya ovikuata viove oco wende kumandekua. Noke, kuende kumandekua vokuenda kutanya osimbu ovo va luluvala. Kuende kumandekua poku tunda konjo yove oku enda kocitumãlo cikuavo osimbu ovo va kasi oku luluvala. Pamue ovo va ka ci limbuka ndaño okuti, omanu vamue va sina. 4 Ambata ovikuata viove poku enda kumandekua vokuenda kutanya osimbu ovo va kasi oku luluvala kuenda koñolosi, osimbu va kasi oku luluvala, o sukila oku tunda ndomunu o kasi oku ambatiwa kumandekua.+
5 “Osimbu ovo va kasi oku luluvala, tombola epangu limue vocimano conjo yove kuenda pita pepangu liaco poku ambata ovikuata viove.+ 6 Osimbu ovo va kasi oku lavulula, kapa ovikuata viove kapepe kuenda vi tundisila posamua vowelema. Sitika ocipala cove oco ku ka vanje posi, momo ñasi oku ku lingisa ondimbukiso konjo ya Isareli.”+
7 Nda linga muẽle ndeci nda handelekiwa. Vokuenda kutanya nda tundisa ovikuata viange ndovikuata viomunu enda kumandekua kuenda koñolosi nda tombola epangu vocimano conjo leka liange. Kuenje eci kua tekãva, nda tikula ovikuata viange yu nda vi ambatela kapepe kovaso yavo.
8 Komẽle ondaka ya Yehova yeya vali kokuange yiti: 9 “A mõlomunu, onjo ya Isareli okuti, omanu va sina ka va ku pulile hẽ vati: ‘Nye o kasi oku linga?’ 10 Va sapuila ndoco: ‘Ca popia Ñala Tõlo Yehova ceci hati: “Oluiya olu, luatiamẽla kasongui+ vo Yerusalãi kuenda konjo yosi ya Isareli yi kasi volupale.”’
11 “Popia hoti: ‘Ame ndi ndimbukiso yimue kokuene.+ Ndeci nda linga, oco ci ka lingiwa kokuavo. Ovo va ka ambatiwa kumandekua.+ 12 Usongui o kasi pokati kavo, o ka ambatela ovikuata viaye kapepe kuenda o ka tundila vowelema. Eye o ka tombola epangu limue vocimano colupale loku tundisila ovikuata viaye pepangu liaco.+ Eye o ka sitika ocipala caye oco ka ka vanje posi.’ 13 Ndi ka nyanyumũila owanda wange kilu liaye kuenje eye o ka kuatiwa lowanda wange.+ Noke ndi ko wambata ko Bavulono, kofeka ya va Kaldea, pole, eye ka ka ci mola kuenda oko a ka fila.+ 14 Vosi vana va kasi konele yaye, oloñuatisi viaye kuenda asualali vaye, ndi ka va sanduila kolonepa viosi;+ kuenda ndi ka pola osipata oco ndi va landule.+ 15 Ovo va ka limbuka okuti, ame ndi Yehova eci ndi ka va sanduila pokati kolofeka loku va sanduila pokati kovaimbo. 16 Pole, ndi ka popela vamue pokati kavo kosipata, konjala, kefengi oco va sapule ovina viatiamẽla kovilinga viavo viumbondo pokati kolofeka vina ovo va ka enda; kuenje va ka kũlĩha okuti, ame ndi Yehova.”
17 Ondaka ya Yehova yeya vali kokuange yiti: 18 “A mõlomunu, o sukila oku lia ombolo yove loku luluma kuenda oku nyua ovava ove lohele kuenda lesakalalo.+ 19 Sapuila omanu vo vofeka hati: ‘Ca popia Ñala Tõlo Yehova kolonungi vio Yerusalãi, vofeka ya Isareli ceci hati: “Ovo va ka lia ombolo yavo lesakalalo kuenda oku nyua ovava avo locinjoko,+ momo ofeka yavo yosi yi ka siala alunda omo liungangala wa vosi va tungamo.+ 20 Alupale a tungiwa a ka linga alunda+ kuenda ofeka yi ka kala ekalasoko kuenje vu ka kũlĩha okuti, ame ndi Yehova.”’”+
21 Ondaka ya Yehova yeya vali kokuange yiti: 22 “A mõlomunu, vo Isareli vu kuete hẽ olusapo luokuti: ‘Oloneke vi pita kuenda ovinjonde viosi ka vi kuata esilivilo’?+ 23 Omo liaco, va sapuila okuti ca popia Ñala Tõlo Yehova ceci hati: “Ndi ka imũla olusapo olu kuenda ka lu ka tukuiwa vali vo Isareli.”’ Pole, va sapuila hati: ‘Oloneke vi kasi ocipepi+ kuenda ovinjonde viosi vi ka tẽlisiwa.’ 24 Momo ka ku ka kala vali ocinjonde lacimue cesanda ndaño oku tãha kuombambe* vonjo ya Isareli.+ 25 ‘“Momo ame ndi Yehova, ame ndi ka popia. Ondaka yosi mopia, yi ka tẽlisiwa okuti ka yi cilua.+ Koloneke viene,+ Amanu va sina, ame ndi ka popia ondaka kuenda ndi yi tẽlisa,” oco Ñala Tõlo Yehova a popia.’”
26 Ondaka ya Yehova yeya vali kokuange yiti: 27 “A mõlomunu eci oco omanu* va Isareli va kasi oku popia vati: ‘Ocinjonde eye a mola ci ka tẽlisiwa vokuenda kuotembo yalua kuenda eye o kasi oku imba owanji watiamẽla kovaso yoloneke.’+ 28 Omo liaco, va sapuila hoti: ‘Ca popia Ñala Tõlo Yehova ceci hati: “‘Layimue ondaka yange yi ka cilua; cosi ndi popia ci ka tẽlisiwa,’ oco Ñala Tõlo Yehova a popia.”’”