ESERA

1 Kunyamo watete wa Soma Kuro+ wo ko Persia, oco ku tẽlisiwe ondaka ya Yehova ya vanguiwa pocakati ca Yeremiya,+ Yehova wa vetiya espiritu lia Soma Kuro wo ko Persia oco a imbe oluiya lumue kuviali waye wosi luna eye a sonehavo+ poku popia hati:

2 “Ca popia Soma Kuro wo ko Persia ceci hati: ‘Yehova Suku yovailu wa eca kokuange ovosoma osi o kilu lieve+ kuenda wa nyĩha ocikele coku u tungila onjo yimue ko Yerusalãi+ yina yi kasi ko Yuda. 3 Helie pokati kene wa tiamẽla komanu vaye? Suku yaye a kale laye kuenda eye a lamanele ko Yerusalãi, yina yi kasi ko Yuda kuenje a tumbulule onjo ya Yehova Suku ya Isareli okuti Suku yocili, onjo yina ya kala ko Yerusalãi.* 4 Wosi una wa tunga ndocingendeleyi,+ kuosi eye a kasi, omanu va lisungue* laye vo kuatise poku eca kokuaye ulu, opalata, ovikuata kuenda ovinyama kumue locilumba ceciwa lutima wosi konjo ya Suku yocili,+ ya kala ko Yerusalãi.’”

5 Kuenje asongui volonjo via va isia via Yuda kuenda via Benjamini kumue lovitunda kuenda va Lewi okuti, vosi vana va vetiyiwa lespiritu lia Suku yocili, va lipongiya oco va ende oku ka tumbulula onjo ya Yehova, ya kala ko Yerusalãi. 6 Vosi vana va lisunguile lavo va va kuatisa poku va ĩha* ovikuata viopalata kuenda viulu, ovikuata vikuavo, ovinyama kuenda ovina via velapo okuti, ovilumba vi eciwa lutima wosi, ka via tendiwile.

7 Soma Kuro wa tumavo oku eca kokuavo ovikuata viosi vionjo ya Yehova vina Nevukandesa o pile ko Yerusalãi kuenje wa vi kapele vonjo ya suku yaye.+ 8 Soma Kuro wo ko Persia wa handeleka oco ovikuata viaco vi tatiwe la Mitiredata usoleki wolombongo, una wa kuata ocikele coku vi tenda loku vi eca ku Sesebacare*+ usongui wo Yuda.

9 Ulala wovikuata viaco wowu: 30 kakualu wulu, 1.000 kakualu opalata, 29 kovikuata vikuavo, 10 30 kotuatiyela tulu, 410 kotuatiyela tuopalata kuenda 1.000 kovikuata vikuavo. 11 Ovikuata viosi viulu levi viopalata, via tẽla 5.400. Sesebacare wa nena ovikuata viaco viosi eci vana vambatiwile kumandekua+ va tunda ko Bavulono oku enda ko Yerusalãi.

2 Ava ovo va kala omanu vo voluvumba* vana va tunda kumandekua+ okuti, vana Soma Nevukandesa wo ko Bavulono ambatele kumandekua ko Bavulono+ okuti, noke va tiukila ko Yerusalãi lo ko Yuda, omunu lomunu volupale luaye muẽle.+ 2 Ovo veya la Seruvavele,+ la Yesiua,+ la Nehemiya, la Seraya, la Releya, la Mordekai, la Bilisiana, la Misipare, la Bigivai, la Rehumu kuenda Baana.

Vetendelo lialume va Isareli mua kongelele:+ 3 omãla va Parosi, 2.172; 4 omãla va Sefatiya, 372; 5 omãla va Ara,+ 775; 6 omãla va Pahati-Moavi,+ pokati komãla va Yesiua kuenda va Yoava, 2.812; 7 omãla va Elami,+ 1.254; 8 omãla va Satu,+ 945; 9 omãla va Sakai, 760; 10 omãla va Bani, 642; 11 omãla va Bevai, 623; 12 omãla va Asigadi, 1.222; 13 omãla va Adonikama, 666; 14 omãla va Bigivai, 2.056; 15 omãla va Adini, 454; 16 omãla va Atere okuti, va kala ovitumbulukila via Hesekiya, 98; 17 omãla va Besai, 323; 18 omãla va Yora, 112; 19 omãla va Hasiumi,+ 223; 20 omãla va Gibare, 95; 21 omãla va Beteleme, 123; 22 alume vo ko Netofa, 56; 23 alume vo ko Anatote,+ 128; 24 omãla va Asimawete, 42; 25 omãla va Kiriyata-Yeari, va Kefira kuenda va Berote, 743; 26 omãla va Rama+ kuenda va Geva,+ 621; 27 alume vo ko Mikimasa, 122; 28 alume vo ko Betele kuenda vo ko Hai,+ 223; 29 omãla va Nevo,+ 52; 30 omãla va Magabisi, 156; 31 omãla va Elami ukuavo, 1.254; 32 omãla va Harimi, 320; 33 omãla va Lode, va Hadida kuenda va Ono, 725; 34 omãla va Yeriko, 345; 35 omãla va Senaa, 3.630.

36 Ovitunda:+ omãla va Yedaya+ vakuepata lia Yesiua,+ 973; 37 omãla va Imere,+ 1.052; 38 omãla va Pasihuri,+ 1.247; 39 omãla va Harimi,+ 1.017.

40 Va Lewi:+ omãla va Yesiua kuenda va Kadimiyele,+ umue pokati komãla va Hodaya, 74. 41 Olonjimbi:+ omãla va Asafe,+ 128. 42 Omãla va vakualombundi:+ omãla va Sialume, omãla va Atere, omãla va Talimoni,+ omãla va Akuve,+ omãla va Hatita omãla va Siovai, vosi yavo, 139.

43 Vakuakutata onembele:*+ omãla va Siha, omãla va Hasiufa, omãla va Tabaote, 44 omãla va Kerosi, omãla va Siaha, omãla va Padone, 45 omãla va Levana, omãla va Hagava, omãla va Akuve, 46 omãla va Hogave, omãla va Sialimai, omãla va Hanana, 47 omãla va Gidele, omãla va Gahara, omãla va Raya, 48 omãla va Recini, omãla va Nekoda, omãla va Gasama, 49 omãla va Usa, omãla va Paseha, omãla va Besai, 50 omãla va Asena, omãla va Meunimi, omãla va Nefusimi, 51 omãla va Bakibuku, omãla va Hakufa, omãla va Harihuri, 52 omãla va Basiluti, omãla va Mehida, omãla va Harisia, 53 omãla va Barikosi, omãla va Sisera, omãla va Tema, 54 omãla va Neciya kuenda omãla va Hatifa.

55 Omãla vapika va Salomone: omãla va Sotai, omãla va Soferete, omãla va Peluda,+ 56 omãla va Yaala, omãla va Darikone, omãla va Gidele, 57 omãla va Sefatiya, omãla va Hatile, omãla va Pokerete-Hasebayimi, omãla va Ami.

58 Vosi vakuakutata onembele* kuenda omãla vapika va Salomone va kala 392.

59 Kuenje ava ovo va lamana oku upisa ko Telemela, ko Teleharisia, ko Keruvi, ko Adone kuenda ko Imere, pole, ka va tẽlele oku kũlĩhĩsa olonjo via va isiavo kuenda usitue wavo, nda va kala va Isareli ale sio:+ 60 omãla va Delaya, omãla va Toviya, omãla va Nekoda, 652. 61 Kuenje pomãla vovitunda: omãla va Hobaya, omãla va Hakosi,+ omãla va Barisilai, una wa kuela ukãi umue pokati komãla vakãi va Barisilai+ u Gileada haeye wa tukuiwa londuko yepata liaco. 62 Ovo va sandiliya olonduko viavo, pokati kolonduko viapata osi, pole, ovo ka va vi sangele kuenje vopiwa ovikele vioku kala ovitunda.*+ 63 Nguluvulu* wa va sapuila okuti, ka citava oku lia kovina vi kola koku kola,+ toke eci ku kala ocitunda cimue okuti, ci konomuisa o Urimi lo Tumimi.+

64 Etendelo liomanu vosi va kala vekongelo lia soka 42.360,+ 65 vetendelo liaco, ka mua kongelele apika valume lava vakãi va soka 7.337; kua kalavo 200 kolonjimbi vialume kuenda olonjimbi viakãi. 66 Olokavalu viavo via soka 736, olomula viavo via soka 245, 67 olongamelo viavo via soka 435, ovimbulu viavo via soka 6.720.

68 Eci va pitĩla konjo ya Yehova ko Yerusalãi, vamue pokati kasongui volonjo via va isia, va eca olombanjaile vioku kuatisa kupange+ wonjo ya Suku yocili, oco yi tumbuluiwe pocitumãlo caco.+ 69 Ndomo ci likuata lovokuasi avo, ovo va eca vohondo yoku seleka ukuasi wupange ci soka 61.000 kolodracma* viulu, 5.000 kolomina* viopalata+ kuenda 100 kovowalo a lepa ovitunda. 70 Kuenje ovitunda, la va Lewi, la vamue pokati komanu, lolonjimbi, la vakualombundi kuenda vakuakutata onembele,* va tunga valupale avo kuenda va Isareli* vosi vakuavo va tunga valupale avo.+

3 Eci osãi yepanduvali+ ya pitĩla kuenda va Isareli* va kala valupale avo, ovo va liongoluila pamosi lutima umuamue ko Yerusalãi. 2 Yesiua+ omõla a Yehocadaka kuenda ovitunda vikuavo, la Seruvavele+ omõla a Sialitiyele+ kuenda vamanjaye, va katuka kuenje va tunga utala wa Suku ya Isareli, oco va lumbileko ovilumba vioku pia elisi ndomo ca sonehiwa Vocihandeleko ca eciwile ku Mose+ ukuenje wa Suku yocili.

3 Ovo va tumbulula utala pocitumãlo calio ndaño okuti, va kuatela usumba olofeka via va ñualele+ kuenje va fetika oku eca ovilumba vioku pia elisi ku Yehova kocitumãlo caco okuti, ovilumba vioku pia elisi viomẽle kuenda vioñolosi.+ 4 Noke ovo va linga Ocipito Colosinge* ndomo ca sonehiwa,+ eteke leteke va enda oku eca etendelo lia sokiyiwa liovilumba vioku pia elisi via enda oku kisikiwa eteke leteke.+ 5 Kuenje va eca ovilumba vioku pia elisi+ via enda oku eciwa olonjanja viosi kuenda ovilumba vi eciwa koku molẽha kuosãi yokaliye,+ lovipito viosi vi kola via sokiyiwa+ via Yehova, oku kongelamo ovilumba vina via eciwa lomanu vosi okuti, va vi eca lutima wosi+ ku Yehova. 6 Oku upisa keteke liatete liosãi yepanduvali,+ ovo va fetika oku eca ovilumba vioku pia elisi ku Yehova ndaño okuti, ociseveto conembele ya Yehova ka ca kapiwile handi.

7 Ovo va eca olombongo ku vakuakuteta ovawe+ kuenda kolomesele,+ okulia, ovinyua, lulela ku va Sidono kuenda ku va Turo omo lioku nena avaya osedru poku pita vokalunga oku tunda ko Levanone oku enda ko Yopa+ ndomo ci likuata locihandeleko ca eciwile kokuavo vonduko ya Soma Kuro wo ko Persia.+

8 Kunyamo wavali eci va pitĩla konjo ya Suku yocili ko Yerusalãi, kosãi yavali, Seruvavele omõla a Sialitiyele la Yesiua omõla a Yehocadaka kuenda vamanjavo vosi, ovitunda, va Lewi kuenda omanu vosi vana va tunda kumandekua oku iya ko Yerusalãi,+ va fetika upange; ovo va nõla va Lewi va kuata 20 kanyamo lava va pitahãlamo oco va linge asongui vupange wonjo ya Yehova. 9 Omo liaco, Yesiua, omãla vaye kuenda vamanjaye la Kadimiyele lomãla vaye vana va kala omãla va Yuda, va likongela oco va songuile vana va kala oku linga upange vonjo ya Suku yocili, kumue lomãla va Henadada,+ lomãla vavo kuenda vamanjavo va Lewi.

10 Eci vakuakutunga va kapa ociseveto conembele ya Yehova,+ ovitunda vina via wala uwalo wutunda, lalumbeta+ kuenda va Lewi, omãla va Asafe lolosimbalu, va votoka oco va sivaye Yehova ndomo ci likuata lolonumbi via Soma Daviti wo ko Isareli.+ 11 Kuenje ovo va fetika oku sivaya+ loku eca olopandu ku Yehova poku imba ocisungo, “momo eye uwa; ocisola caye ka ci pongoloka ku va Isareli ci kala otembo ka yi pui.”+ Noke omanu vosi va fetika oku kaluka lolukandi poku sivaya Yehova, momo kua kapiwa ociseveto conjo ya Yehova. 12 Valua pokati kovitunda la va Lewi kuenda asongui volonjo via va isia okuti, alume akulu vana va muile onjo ya tungiwile kosimbu,+ va fetika oku lila lolukandi eci va mola oku kapiwa kuociseveto conjo yaco osimbu okuti, vakuavo va kaluka lolukandi omo liesanju.+ 13 Omo liaco, omanu ka va ponduile oku tepisa ocileñi cesanju locileñi coku lila, momo omanu va kala oku kaloka lolukandi okuti, ocileñi cavo ca kala oku yevalela kupãla.

4 Eci ovanyãli va Yuda la va Benjamini+ va yeva okuti, vana va tiuka kumandekua+ va kasi oku tumbulula onembele ya Yehova Suku ya Isareli, 2 vepuluvi liaco, va enda ku Seruvavele kuenda kasongui volonjo via va isia kuenje va va sapuila vati: “Eceleli okuti tu tunga kumue lene; momo ndeci ene, etu tu fendelavo* Suku yene+ kuenda tua siatavo oku eca ocilumba kokuaye tunde koloneke via Soma Esarihadono+ wo ko Asuria una wa tu nena kulo.”+ 3 Pole, Seruvavele kuenda Yesiua lonepa yikuavo yasongui volonjo via va isia vo ko Isareli va va sapuila vati: “Ka citava okuti vu panga onepa koku tunga onjo ya Suku yetu,+ etu lika tu tunga onjo ya Yehova Suku ya Isareli, ndeci Soma Kuro wo ko Persia a tu handelekele.”+

4 Noke omanu vo vofeka vamamako oku sumuisa* omanu vo ko Yuda loku va vetiya oku liwekapo oku tunga.+ 5 Ovo va enda oku pañinya olondunguli oco vi tateke esokiyo liavo+ oloneke viosi via Soma Kuro wo ko Persia, toke kuviali wa Soma Dariu+ wo ko Persia. 6 Kefetiko liuviali wa Ahasuero, ovo va soneha uvangi umue wuhembi watiamẽla kolonungi vio ko Yuda kuenda vio ko Yerusalãi. 7 Kuenje koloneke via Soma Aretasesete wo ko Persia, Bisilama, Mitiredata, Tavele kuenda onepa yikuavo yakamba vaye, va sonehela soma Aretasesete; Ovo va pongolola ukanda kelimi lio Aramaiku+ poku kuama ololetala* vio Aramaiku.

8 * Rehumu epalanga lia velapo kuenda Simisiai ukuavisonehua, va soneha ukanda umue woku popia lavĩ o Yerusalãi ku Soma Aretasesete lolondaka vi kuãimo viokuti: 9 (Ukanda waco wa tunda ku Rehumu epalanga lia velapo la Simisiai ukuavisonehua kuenda akamba vavo vosi, olonganji, olonguluvulu, asonehi, omanu vo ko Ereke,+ va Bavulono, olonungi vio ko Susana+ okuti va Elami,+ 10 kuenda onepa yikuavo yolofeka vina Asinapore wa kemãla haeye wa sumbiwa ambata kumandekua kuenda wa tunga valupale o ko Samaria+ lo konepa yikuavo yimbo li kasi kutakelo wo Ferati,* kuenda cilo 11 eyi oyo okopia yimue yukanda ovo va tuma kokuaye.)

“Ku Soma Aretasesete oku upisa kakuenje vove, alume vo vimbo li kasi kutakelo wo Ferati,* kuenda cilo 12 ci kũlĩhĩwe la soma okuti, va Yudea vana va tunda kokuove oku iya kokuetu, va pitĩla ko Yerusalãi. Ovo va kasi oku tumbulula olupale luesino haluo luevĩho kuenda va kasi oku malusula ovimbaka+ loku semũlũla oviseveto. 13 Kaliye eci ci kũlĩhĩwe la soma okuti, nda olupale olu lua tumbuluiwa kuenda ovimbaka vialio via malusuiwa, ovo ka va ka feta elisimu+ kuenda ovina vikuavo kuenje eci ci ka nena ovitangi kohondo yoku seleka ovokuasi violosoma. 14 Omo okuti tua siata oku lia omongua wo kelombe* kuenda ka ca sungulukile kokuetu oku mola onjongole ya soma oku tatekiwa, tua tuma esapulo eli oco li kũlĩhĩwe la soma, 15 oco ku lingiwe ekonomuiso lielivulu liovolandu a vakukululu yove.+ Ove o ka sanga velivulu liovolandu kuenda o ka limbuka okuti, olupale olu luesino kuenda lu koka ovitangi kolosoma kuenda kaluvumba* kuenje tunde kosimbu volupale luaco mua kala vana va vetiya ungangala. Eli olio esunga lieci olupale olu lua nyõliwila.+ 16 Tu kasi oku sapuila soma okuti, nda olupale olu lua tumbuluiwa kuenda ovimbaka vialio via malusuiwa, ove ku ka tẽla vali oku tumĩla* imbo li kasi kutakelo wo Ferati.”*+

17 Soma wa tuma ondaka ku Rehumu epalanga lia velapo la Simisiai ukuavisonehua kuenda kakamba vavo vana va kala ko Samaria lo konepa yikuavo yimbo li kasi kutakelo wo Ferati* yiti:

“Kalungi! 18 ukanda una wa tumi kokuetu wa tangiwa* ciwa kovaso yange. 19 Nda handeleka akuenje vange oku linga ekonomuiso limue kuenda kua limbukiwa okuti, tunde kosimbu olupale olu, lua siata oku katukila olosoma loku vi ñualẽlapo kuenda mua siata oku kala esino.+ 20 Kua kala olosoma via pama ko Yerusalãi vina via vialele imbo liosi li kasi kutakelo wo Ferati,* kuna va enda oku feta elisimu kuenda ovina vikuavo. 21 Cilo, handeleki oco alume ava va liwekepo oku talavaya okuti, olupale ka lu tumbuluiwa toke eci ngeca ocihandeleko. 22 Kuati utate okuti, vu kapako ovina viatiamẽla kondaka eyi oco okuti, onjongole ya soma ka yi tatekiwa vali.”+

23 Noke eci kua tangiwa okopia yukanda wa Soma Aretasesete kovaso a Rehumu la Simisiai ukuavisonehua kuenda akamba vavo vepuluvi liaco, va enda ko Yerusalãi ku va Yudea kuenje lundululu, va tateka upange wavo. 24 Noke upange wonjo ya Suku, yina yi kasi ko Yerusalãi wa tatekiwa; kuenda wamamako oku tatekiwa toke kunyamo wavali wuviali wa Dariu wo ko Persia.+

5 Noke uprofeto Hagai+ kuenda Sakariya+ onekulu ya Ido,+ va imbila owanji va Yuda vana va kala ko Yudea kuenda ko Yerusalãi vonduko ya Suku ya Isareli una wa kala lavo. 2 Kuenje Seruvavele+ omõla a Sialitiyele la Yesiua+ omõla a Yehocadaka, va fetika oku tumbulula onjo ya Suku+ yina ya kala ko Yerusalãi; kuenje ovaprofeto va Suku va kala lavo kuenda va va kuatisa.+ 3 Kotembo yaco, Tatenai nguluvulu yimbo li kasi kutakelo wo Ferati* kuenda Setare-Bosenai kumue lakamba vavo, va enda kokuavo loku va pula vati: “Helie wa ku handeleki oku tunga onjo eyi loku malusula upange waco?”* 4 Kuenje ovo va va pula vati: “Olonduko vialume va kasi oku linga upange owu velie?” 5 Pole, Suku wa kala oku lavulula* akulu va va Yudea+ kuenda ovo ka va tẽlele oku va tateka toke eci kua tumiwa esapulo ku Dariu kuenje ukanda umue wa tumiwa vali kokuaye catiamẽla kondaka yaco.

6 Eyi oyo okopia yukanda una Tatenai nguluvulu yimbo li kasi kutakelo wo Ferati kuenda Setare-Bosenai kumue lakamba vaye, olonguluvulu vio vimbo li kasi kutakelo wo Ferati, va tuma ku Soma Dariu; 7 Ovo va tuma esapulo kokuaye kuenda eci va soneha ceci:

“Ku soma Dariu:

“Ombembua yi kale love! 8 Ci kũlĩhĩwe la soma okuti, tua endele koluvumba* luo Yuda konjo ya Suku unene kuenda oyo yi kasi oku tungiwa lovawe anene, a kasi kocitumãlo caco kuenda avaya a kasi oku kapiwa vovimano. Omanu va kasi oku linga upange waco lombili yalua kuenda owo u kasi oku amamako omo lialikolisilo avo. 9 Kuenje tua pula kakulu vavo hati: ‘Helie wa ku handeleki oku tunga onjo eyi loku malusula upange waco?’*+ 10 Tua pulavo olonduko viavo oco tu ku vi sapuile okuti, tu soneha olonduko vialume vaco va kasi oku songola.

11 “Etambululo va eca kokuetu lieli hati: ‘Etu tuakuenje va Suku yovailu kuenda yo posi kuenje tu kasi oku tumbulula onjo yina ya tungiwile vokuenda kuanyamo alua yina ya tungiwa kuenda ya malusuiwa losoma yimue yo ko Isareli.+ 12 Omo liaco, omo okuti va isietu va wengula onyeño ya Suku yo kovailu,+ eye wa va eca peka lia Nevukandesa+ wo ko Bavulono u Kaldea una wa nyõla onjo eyi+ kuenda wambata omanu kumandekua ko Bavulono.+ 13 Pole, kunyamo watete wa Kuro soma yo Bavulono, Soma Kuro wa eca ocihandeleko coku tumbulula onjo yaco ya Suku.+ 14 Handi vali, Soma Kuro wopa vonembele yo Bavulono ovikuata viopalata kuenda viulu vionjo ya Suku vina Nevukandesa o pile vonembele ko Yerusalãi kuenje wa vi ambatele konembele yo Bavulono.+ Ovio via eciwa kulume umue o tukuiwa hati, Sesebacare*+ una Kuro a nõlele oco a kale nguluvulu.+ 15 Kuro wo sapuila hati: “Ambata ovikuata evi. Kuende, ka vi kape vonembele ko Yerusalãi kuenda ecelela okuti, onjo ya Suku yi tumbuluiwa pocitumãlo calio.”+ 16 Noke Sesebacare weya kuenda wa kapa oviseveto vionjo ya Suku yocili,+ yina yi kasi ko Yerusalãi; oyo yi kasi oku tungiwa tunde kotembo yaco toke etaili, pole, oyo ka ya malusuiwile handi.’+

17 “Nda ca sunguluka ku soma, ku lingiwe ekonomuiso limue vohondo yoku soleka ukuasi wa soma yi kasi ko Bavulono oco ku kũlĩhĩsiwe nda Soma Kuro wa eca ocihandeleko coku tumbulula onjo ya Suku ko Yerusalãi;+ kuenda onjila soma a nõlapo yatiamẽla kondaka yaco, yi tumiwe kokuetu.”

6 Soma Dariu wa tumbika ocihandeleko kuenda ovo va linga ekonomuiso voviseleko* muna mua enda oku selekiwa ovokuasi o ko Bavulono. 2 Kuenje ociña cimue ca sangiwa kelombe lio ko Akimeta voluvumba* luo Media kuenda mua sonehiwile ulandu wokuti:

3 “Kunyamo watete wuviali wa Soma Kuro, Soma Kuro wa eca ocihandeleko catiamẽla konjo ya Suku ko Yerusalãi cokuti:+ ‘Onjo yi tumbuluiwe oco yi linge ocitumãlo coku ecela ovilumba kuenda oviseveto vialio vi kapiwe pocitumãlo calio; oku lepa kualio ku soke 60 kovikeya,* upati walio u soke 60 kovikeya,+ 4 lolondunda vitatu viovawe anene kuenda ondunda yavaya;+ kuenje olombongo viaco vi ka fetiwa lonjo ya soma.+ 5 Handi vali, ovikuata viulu kuenda viopalata vionjo ya Suku, vina Nevukandesa opile vonembele ya kala ko Yerusalãi loku vi tuala ko Bavulono,+ vi tiuwiyiwe oco ovio vi kapiwe pocitumãlo calio vonembele ko Yerusalãi kuenda vi solekiwe vonjo ya Suku.’+

6 “Omo liaco, cilo a Tatenai, anguluvulu yimbo li kasi kutakelo wo Ferati,* a Setare-Bosenai kuenda akamba vove, lolonguluvulu vi sulemo vio vimbo li kasi kutakelo wo Ferati,+ kali ocipãla locitumãlo caco. 7 Ko ka tateki upange wonjo ya Suku. Nguluvulu ya va Yudea kuenda akulu va va Yudea va ka tumbulula onjo ya Suku pocitumãlo calio muẽle. 8 Handi vali, ndi kasi oku tumbika ocihandeleko cimue catiamẽla kovina vu sukila oku linga, oco akulu ava va va Yudea va tumbulule onjo ya Suku: Olombongo vi tunda vohondo yoku soleka ukuasi wa soma,+ levi vi tunda kelisimu liongoluiwa kimbo li kasi kutakelo wo Ferati,* olombongo viaco, vi eciwe lonjanga kalume ava, oco upange wavo ka u ka tatekiwe.+ 9 Kuenje ovina viosi vi sukiliwa ndeci: olongombe,+ ovitupi violomeme,+ olomeme,+ vi eciwe ndocilumba coku pia elisi ku Suku yo kilu, oku kongelamo otiliku,+ omongua,+ ovinyu+ kuenda ulela+ ndomo ovaprofeto vana va kasi ko Yerusalãi va handelekele, ovio vi amamako oku eciwa kokuavo eteke leteke, 10 oco okuti, ovo vamamako oku eca ovilumba vi sanjuisa Suku yovailu loku likutililako omuenyo wa soma kuenda omãla vaye.+ 11 Nda tumbikavo ocihandeleko cimue cokuti nda umue o ci tomba, konjo yaye ku upiwe uti umue kuenda eye o ka katuiwa loku patekiwa kuti waco kuenje onjo yaye yi ka linga okalete kowiñi* omo liekandu liaco. 12 Kuenje Suku una wa ecelela okuti onduko yaye yamamako oku kalamo,+ a nyõle osoma yosi kuenda omanu va votola eka oco ka va ka pokole kocihandeleko eci haivo va nyõla onjo ya Suku yi kasi ko Yerusalãi. Ame ndu Dariu, ngeca ocihandeleko eci. Oco, ci kapiweko lonjanga.”

13 Noke Tatenai nguluvulu yimbo li kasi kutakelo wo Ferati,* la Setare-Bosenai+ kuenda akamba vavo, va linga lonjanga ovina viosi Soma Dariu a handelekele. 14 Kuenje akulu va va Yudea vamamako oku tunga kuenda oku lekisa ombili,+ poku vetiyiwa locitumasuku ca Hagai+ kuenda cuprofeto Sakariya+ onekulu ya Ido; ovo va mala oku tunga ndomo ca handelekiwile la Suku yo Isareli+ kuenda ocihandeleko ca Kuro+ la Dariu+ kumue la Soma Aretasesete+ wo ko Persia. 15 Ovo va mala oku tunga onjo keteke liatatu liosãi ya Adara* kunyamo wepandu wuviali wa Soma Dariu.

16 Noke va Isareli, ovitunda, va Lewi+ kuenda vakuavo vana va kala kumosi kumandekua va tumbika onjo yaco ya Suku lesanju. 17 Kuenje koku tumbikiwa kuonjo ya Suku, va nena 100 kolongombe, 200 kovitupi violomeme, 400 kotulomeme kuenda 12 kovitupi violohombo ndocilumba cekandu co Isareli, ndomo ci likuata lovikoti via va Isareli.+ 18 Noke va nõla ovitunda ndomo ci likuata lovimunga viavo kuenda va Lewi ndomo ci likuata lovimunga viavo, oco va linge upange wonjo ya Suku vo Yerusalãi,+ ndomo ca sonehiwa velivulu lia Mose.+

19 Kuenje vana va tiuka kumandekua, va linga ocipito co Paskoa keteke 14 liosãi yatete.+ 20 Ovitunda la va Lewi vosi, va liyelisa, momo vosi yavo va liyelisa ovo muẽle;+ ovo va pondela vosi va tunda kumandekua, ovitunda vikuavo kuenda ovo muẽle ocilumba co Paskoa. 21 Kuenje va Isareli vana va tiuka kumandekua va lia ocilumba caco, kumue lomanu vosi va likongelele kokuavo haivo va litepele kevĩho liomanu vakuavo va kala vofeka, oco va fendele* Yehova Suku ya Isareli.+ 22 Handi vali, ovo va sanjukila oku linga Ocipito Colombolo ka vi Kuete Etumbisa+ vokuenda kuoloneke epanduvali, momo Yehova wa ecelela okuti, ovo va kuata esanju kuenda wa ecelelavo okuti, utima wa Soma yo Asuria u lekisa ohenda kokuavo,+ oco a va kuatise* kupange wonjo ya Suku yocili, Suku ya Isareli.

7 Noke liovina viaco, vokuenda kuviali wa Soma Aretasesete+ wo ko Persia, Esera*+ wa tiukila. Eye wa kala omõla a Seraya,+ omõla a Asariya, omõla a Hilikiya,+ 2 omõla a Sialume, omõla a Sadoke, omõla a Ahituva, 3 omõla a Amariya, omõla a Asariya,+ omõla a Merayote, 4 omõla a Serahiya, omõla a Usi, omõla a Buki, 5 omõla a Avisiwa, omõla a Finehase,+ omõla a Eleasara,+ omõla a Arone,+ ocitunda ca velapo. 6 Esera wa tunda ko Bavulono. Eye wa kala umue ukuavisonehua wa kũlĩhĩle ciwa* Ocihandeleko ca Mose,+ cina Yehova Suku ya va Isareli a ecele. Soma wa eca cosi eye a pingile, momo eka lia Yehova Suku yaye lia kala laye.

7 Vamue pokati ka va Isareli, ovitunda, va Lewi,+ olonjimbi,+ vakualombundi+ kuenda vakuakutata onembele,*+ va lamanela ko Yerusalãi kunyamo wepanduvali wuviali wa Soma Aretasesete. 8 Kuenje Esera weya ko Yerusalãi kosãi yatãlo, kunyamo wepanduvali wa soma. 9 Keteke liatete liosãi yatete, eye wa fetika ungende woku tunda ko Bavulono kuenje wa pitĩla vo Yerusalãi keteke liatete liosãi yatãlo, momo eka liwa lia Suku yaye lia kala laye.+ 10 Esera wa pongiya utima waye oco a kũlĩhĩse Ocihandeleko ca Yehova kuenda oku ci kapako+ loku longisa ovisila loviholo vialio vo Isareli.+

11 Eyi oyo okopia yukanda Soma Aretasesete a eca ku Esera ocitunda kuenda ukuavisonehua haeye wa loñoloha koku lilongisa* ovihandeleko via Yehova kuenda oviholo viaye ko Isareli:

12 * “Aretasesete+ soma yolosoma, ku Esera ocitunda haeye ukuavisonehua Viocihandeleko ca Suku yovailu: Ombembua ya lipua yi kale love. Kuenje cilo, 13 nda tumbika ocihandeleko cimue poku ecelela okuti, vosi va kasi vuviali wange vana va tiamẽla ku va Isareli kuenda ovitunda viavo la va Lewi okuti, va yongola oku enda love ko Yerusalãi, va ende.+ 14 Momo ove o kasi oku tumiwa la soma lolondunguli viaye epanduvali, oco o kũlĩhĩse nda Ocihandeleko ca Suku yove, cina ci kasi love,* ci kasi oku tẽlisiwa ko Yuda kuenda ko Yerusalãi, 15 kuenda ambata opalata lulu vina soma lolondunguli viaye va eca lutima wosi ku Suku ya va Isareli, una wa tunga ko Yerusalãi, 16 kumue lopalata yosi kuenda ulu vina wa tambula* voluvumba* luosi luo Bavulono kumue lolombanjaile vina omanu kuenda ovitunda va eca lutima wosi konjo ya Suku yavo yina yi kasi ko Yerusalãi.+ 17 Kuenje lolombongo viaco, landa lonjanga olongombe,+ ovitupi violomeme,+ otulomeme,+ ovilumba violomema+ kuenda ovilumba vioku nyua+ kuenje o vi eca kutala wonjo ya Suku yove vo Yerusalãi.

18 “Cosi ca sunguluka kokuove kuenda ku vamanjove oku ci linga, citava oku ci linga lonepa ya supapo yopalata kuenda yulu ndomo ci likuata locipango ca Suku yove. 19 Kuenje ovikuata viosi vi eciwa kokuove oco vi linge upange vonjo ya Suku yove, o sukila oku vi ecela kovaso a Suku ko Yerusalãi.+ 20 Ovina viosi vikuavo vi sukiliwa vonjo ya Suku yove vina o sukila oku eca, o ka vi feta lolombongo vi tunda vohondo yoku seleka ukuasi wa soma.+

21 “Ame ndi Soma Aretasesete, nda tumbika ocihandeleko cimue ku vosi vakuakulava ovokuasi vio vimbo li kasi kutakelo wo Ferati* okuti, ovina viosi ocitunda Esera+ haeye ukuavisonehua Wocihandeleko ca Suku yovailu a pinga kokuene, vi lingiwe lonjanga, 22 okuti ka ci pitahãla 100 kolotalendo* viopalata, 100 kolokoru* viotiliku, 100 kolombatu* viovinyu,+ 100 kolombatu viulela+ kuenda omongua+ walua. 23 Ovina viosi Suku yovailu a handeleka, vi lingiwe lombili vonjo ya Suku yovailu+ oco okuti, onyeño ka yi wengukila uviali wa soma kumue lomãla vaye.+ 24 Kuenje ene wa handelekiwi okuti, ka citava oku pinga elisimu+ lovina vikuavo kovitunda viosi kuenda ku va Lewi, kolonjimbi,+ ku vakualombundi, ku vakuakutata onembele*+ kuenda kolonãlavayi vionjo yaco ya Suku.

25 “Ove u Esera, talavaya lukũlĩhĩso Suku a eca kokuove, nõla oloñuatisi violonganji kuenda olonganji oco vi sombise omanu vosi vo vimbo li kasi kutakelo wo Ferati,* vosi va kũlĩha ovihandeleko via Suku yove; kuenda vu sukila oku longisa omunu wosi ka vi kũlĩhĩle.+ 26 Kuenje omunu wosi ka pokola Kocihandeleko ca Suku yove kuenda kocihandeleko ca soma, o sukila oku sombisiwa loku yambuiwa ci kaile loku fa, ale lekangiso, pamue oku feta etevo ale oku kapiwa vokayike.”

27 Yehova Suku ya vakukululu yetu a sivayiwe, una wa kapa vutima wa soma onjongole yoku posuisa onjo ya Yehova yina yi kasi ko Yerusalãi!+ 28 Kuenje eye wa lekisa ocisola caye ka ci pongoloka kokuange kovaso a soma+ kuenda kolondunguli+ viaye lo kolombuale viosi via velapo via soma. Omo okuti, eka lia Yehova Suku yange lia kala lame, nda lekisa utõi* kuenje ndongolola alume* asongui vo ko Isareli oco va ende lame.

8 Ava va kala asongui volonjo via va isiavo kuenda ulala wepata lepata wa vana va tunda lame ko Bavulono vokuenda kuviali wa Soma Aretasesete vava:+ 2 pomãla va Finehase,+ Gerisiomo; pomãla va Itamare,+ Daniele; pomãla va Daviti, Hatusi; 3 pomãla va Sekaniya, pomãla va Parosi, Sakariya kuenda kumue laye 150 kalume va sonehiwa vulala; 4 pomãla va Pahati-Moavi,+ Eliyoenai omõla a Serahiya kuenda kumue laye 200 kalume; 5 pomãla va Satu,+ Sekaniya omõla a Yahasiele kuenda kumue laye 300 kalume; 6 pomãla va Adini,+ Evede omõla a Yonatão kuenda kumue laye 50 kalume; 7 pomãla va Elami,+ Yesiaya omõla a Ataliya kuenda kumue laye 70 kalume; 8 pomãla va Sefatiya,+ Sevadiya omõla a Mingeli kuenda kumue laye 80 kalume; 9 pomãla va Yoava, Ovadiya omõla a Yehiyele kuenda kumue laye 218 kalume; 10 pomãla va Bani, Selomiti omõla a Yosifeya kuenda kumue laye 160 kalume; 11 pomãla va Bevai,+ Sakariya omõla a Bevai kuenda kumue laye 28 kalume; 12 pomãla va Asigadi,+ Yohanana omõla a Hakatana kuenda kumue laye 110 kalume; 13 pomãla va Adonikama+ vana va sulako oku tiuka, olonduko viavo vievi: Elifelete, Yeyele la Semaya kuenda kumue lavo 60 kalume; 14 pomãla va Bigivai,+ Utai la Sakuri kuenda kumue lavo 70 kalume.

15 Ame nda vongoluila ocipepi lolui lu loña ko Ahava+ kuenje tua tungilako ovilombo oloneke vitatu. Pole, eci nda konomuisa omanu kuenda ovitunda, sia sangelepo u Lewi laumue. 16 Omo liaco, nda tuma oku vilikiya Eliyesere, Ariyele, Semaya, Elinatana, Yarivi, Elinatana, Natana, Sakariya la Mesiulama va kala alume asongui kuenda Yoyarivi la Elinatana, vana va kala alongisi. 17 Kuenje nda eca kokuavo ocihandeleko catiamẽla ku Ido usongui wocitumãlo ci tukuiwa hati, Kasifeya. Nda popia lavo oco va sapuile Ido kuenda vamanjaye vakuakutata onembele* ya kala ko Kasifeya, oco va nene kokuetu vakuakuvumba vonjo ya Suku yetu. 18 Omo okuti eka liwa lia Suku yetu lia kala letu, ovo va nena ulume umue wa loñolõha pokati komãla va Mahili+ onekulu ya Lewi omõla a Isareli ndeci, Sereviya+ lomãla vaye kuenda vamanjaye okuti, 18 kalume; 19 la Hasiaviya kumue la Yesiaya u Merari,+ la vamanjaye kuenda omãla vaye okuti, 20 kalume. 20 Kuenje kua kala 220 ya vakuakutata onembele,* vana Daviti kumue lolombuale va eca oco va kuatise va Lewi kupange wavo okuti, vosi vana va tukuiwa kolonduko.

21 Noke nda imba oluiya woku likandangiya oku lia ocipepi lolui Ahava, oco tu liketisi etu muẽle kovaso a Suku yetu loku pinga kokuaye olonumbi vioku tu songuila vungende wetu, etu kumue lomãla vetu kuenda ovikuata vietu viosi. 22 Nda kuata osõi yoku pinga ku soma asualali lalume vakuakuendela kotuvalu oco va tu teyuile kovanyãli vetu vonjila, momo tua sapuila soma hati: “Eka liwa lia Suku yetu li kasi ku vosi vana vo sanda,+ pole, ongusu kuenda onyeño yaye yi kasi la vosi vana vo yanduluka.”+ 23 Omo liaco, tua likandangiya oku lia kuenda tua pinga ku Suku yetu catiamẽla kondaka yaco kuenje eye wa yeva epingilo lietu.+

24 Ame nda tepisa 12 pokati kasongui vovitunda ndeci, Sereviya la Hasiaviya+ kuenda eci ci soka ekũi pokati ka vamanjavo. 25 Kuenje nda va pesalisila opalata, lulu kuenda ovikuata okuti, olombanjaile vina soma lolondunguli viaye, olombuale viaye la va Isareli vosi vana va kalako va ecele konjo ya Suku yetu.+ 26 Noke lioku pesalisa, nda eca kokuavo 650 kolotalendo* viopalata, 100 kovikuata viopalata via kuata olondando 2 violotalendo, 100 kolotalendo viulu, 27 20 kotuatiyela tulu okuti ondando yalio, yi soka 1.000 kolodariku* kuenda ovikuata 2 viosipi ya fina, yi nina ndevala li kusuka, via posoka ndulu wa fina.

28 Noke nda va sapuila hati: “Ene vu kola ku Yehova+ kuenda ovikuata vi kola kuenje opalata lulu ovio ovilumba vi eciwa lutima wosi ku Yehova Suku ya vakukululu yene. 29 Vi seleki lutate toke eci vu vi pesalisa kovaso yasongui ovitunda kuenda ya va Lewi lolombuale violonjo via va isia via Isareli ko Yerusalãi,+ volohondo* vionjo ya Yehova.” 30 Kuenje ovitunda la va Lewi va tikula opalata lulu kuenda ovikuata via pesalisiwa, oco ovo va vi ambate ko Yerusalãi konjo ya Suku yetu.

31 Oku sulako, tua tunda kolui Ahava+ keteke 12 yosãi yatete+ oku enda ko Yerusalãi kuenda eka lia Suku yetu, lia kala letu kuenje eye wa tu popela peka liovanyãli vetu kuenda ku vakuakulavekela vonutula. 32 Kuenje tua pitĩla ko Yerusalãi+ kuenda tua kalamo oloneke vitatu. 33 Kuenje keteke liakuãla, tua pesalisa opalata lulu kuenda ovikuata vionjo ya Suku yetu+ kuenje tua vi eca ku Meremoti+ ocitunda omõla a Uriya kuenda kumue laye kua kala Eleasara omõla a Finehase kuenje kumue lavo kua kala, va Lewi okuti Yosavada+ omõla a Yesiua la Noadiya omõla a Binui.+ 34 Ovina viosi via tendiwa kuenda via pesalisiwa kuenje ocilemo cavio cosi ca sonehiwa. 35 Vana va tunda kumandekua okuti, va tiuka kumandekua, va eca ovilumba vioku pia elisi ku Suku ya Isareli okuti, 12 kolongombe+ ko Isareli yosi, 96 kovitupi violomeme,+ 77 kovitupi viotulomeme kuenda 12 kovitupi violohombo+ ndocilumba cekandu; cosi ca eciwa ndocilumba coku pia elisi ku Yehova.+

36 Noke tua eca ovihandeleko via soma+ kapalanga* va soma kuenda kolonguluvulu vio kimbo li kasi kutakelo wo Ferati*+ kuenje ovo va kuatisa omanu kuenda onjo ya Suku yocili.+

9 Eci ovina viaco via lingiwa, olombuale vieya kokuange loku popia viti: “Omanu ava va Isareli lovitunda kuenda va Lewi ka va litepele lomanu vo kolofeka via lisunguile lavo lo kovituwa viavo vĩvi,+ via va Kanana, via va Hiti, via va Perisi, via va Yevusi, via va Amoni, via va Moavi, via va Egito+ kuenda via va Amori.+ 2 Ovo va tikula vamue pokati komãla vavo vakãi oco va linge akãi vavo muẽle kuenda vomãla vavo valume.+ Kaliye ovo okuti ocitumbulukila*+ ci kola, va litenga lomanu volofeka vi lisungue lavo.+ Olombuale kuenda va kalei kolombiali, ovo va piãlelepo vali koku linga ovilinga viaco vĩvi.”

3 Eci nda yeva ovina viaco, nda tola pokati uwalo wange kuenda ocikutu cange ka ci kuete ovoko loku tukũla esinga limue kutue wange lolonjele viange kuenje nda tumãla omo liesumuo lialua. 4 Noke vosi vana va kapeleko* olondaka via Suku ya Isareli, va liongoluila kokuange omo liovina vĩvi viomanu va tunda kumandekua, osimbu nda kala oku tumãla omo liesumuo lialua toke koñolosi kelivala lioku eca ocilumba colomema.+

5 Eci elivala lioku eca ocilumba colomema+ koñolosi lia pitĩla, nda votoka apa nda tumãlele omo liesumuo, luwalo wange kuenda ocikutu cange ka ci kuete ovoko ca toka kuenje nda kekama kolongolo kuenda nda votuila ovaka ange ku Yehova Suku yange. 6 Kuenje nda popia hati: “A Suku yange, nda sakalala kuenda ndi kuete osõi yoku votuila ocipala cange kokuove a Suku yange, momo akandu etu a livokiya toke kovitue vietu kuenda eko lietu lia livokiya toke kovailu.+ 7 Tunde koloneke via vakukululu yetu toke etaili, eko lietu lia linga linene;+ kuenda omo liakandu etu, etu, olosoma vietu kuenda ovitunda vietu, tua eciwa peka liolosoma violofeka, kosipata,+ kumandekua,+ koku pundiwa+ kuenda kesepu, ndomo ci letiwe etaili.+ 8 Pole, cilo vokatembo kamue Yehova Suku yetu wa lekisa ohenda kokuetu poku ecelela okuti, vamue va supulukapo poku tu ĩha ocitumãlo cimue ca koka vocitumãlo caye ci kola,+ oco ovaso etu a nine, A Suku yetu kuenda oco o tu ĩhe ekavuluko kupika wetu. 9 Ndaño okuti tuapika,+ Suku yetu ka tu yandulukile kupika wetu; pole, wa lekisa ocisola caye ka ci pongoloka kokuetu kovaso yolosoma vio ko Persia,+ oco a tu ĩhe ekavuluko okuti, tu tunga onjo ya Suku+ loku tumbulula ovimbaka vialio kuenda oku tu ĩha ocimbaka cimue* covawe ko Yuda kuenda ko Yerusalãi.

10 “Pole, cilo, nye tu popia a Suku yetu, noke liovina evi? Momo tua yanduluka ovihandeleko viove, 11 vina wa tu ĩha vonduko yakuenje vove ovaprofeto poku popia hati: ‘Ofeka vu kasi oku enda oku ka tambula, ofeka yimue ya vĩha omo lievĩho liomanu volofeka vi lisungue layo, omo liovilinga viavo via vĩha. Ovo va yi yukisa levĩho liavo oku upisa kefetikilo toke kesulilo.+ 12 Omo liaco, ko ka eci omãla vene vakãi komãla vavo valume, ndaño oku tava omãla vavo vakãi oku va eca komãla vene valume;+ kuenda lalimue eteke ko ka sandi ombembua ale ekalo liavo liwa,+ oco vu pami kuenda oku lia ovina viwa vio vofeka loku yi tambula oco yi linge yomãla vene otembo ka yi pui.’ 13 Kuenje noke liovina viaco viosi via pita letu, omo liovilinga vietu vĩvi kuenda eko lietu linene, ove, A Suku yetu, kua tu tatele ndomo ci likuata lakulueya etu+ kuenda wa ecelela okuti, vamue pokati ketu tu kasi palo tu puluka,+ 14 anga hẽ tu lueya vali ovihandeleko viove kuenda oku kuela* lomanu vana va linga ovina viaco vĩvi?+ Nda oco, nda kua lekisile hẽ onyeño kokuetu oco o tu nyõle elisi okuti lomue o supapo ale oku puluka? 15 A Yehova Suku ya Isareli, ove ukuesunga,+ momo tua puluka nda vana va supapo toke etaili. Tu kasi palo kovaso ove omo lieko lietu, momo ka citava oku talama kovaso ove noke liovina viosi tua linga.”+

10 Osimbu Esera a kala oku likutilila+ loku likekembela, oku lila kuenda oku petamẽla kovaso yonjo ya Suku yocili, ocimunga cimue cinene calume, lakãi kuenda omãla vo ko Isareli va liongoluila kokuaye, momo omanu va kala oku lila calua. 2 Noke Sekaniya omõla a Yehiyele+ umue pokati komãla va Elami+ wa sapuila Esera hati: “Ka tua pokuile ku Suku yetu poku kuela* akãi vakualofeka pokati komanu volofeka via tu ñuala.+ Ndaño lovina viaco, handi kuli elavoko ku Isareli. 3 Cilo, tu lingi ocisila cimue la Suku yetu,+ oco tu tundisi akãi vosi kuenda omãla vavo ndomo ci likuata lonumbi ya Yehova kuenda ya vana va kapako* ocihandeleko ca Suku yetu.+ Tu lingi ndomo ci likuata locihandeleko. 4 Katuka, momo ocitangi eci ci kasi peka liove kuenda etu tu kasi love. Pama kuenda linga upange.”

5 Kuenje Esera wa votoka kuenda wa lingisa asongui vovitunda, va Lewi kuenda o Isareli yosi oco va linge ocisila cimue loku tẽlisa eci ca popiwile.+ Omo liaco, ovo va linga ocisila cimue. 6 Esera wa tunda kovaso yonjo ya Suku yocili kuenje wa enda vohondo* ya Yehohanana omõla a Eliasivi. Ndaño okuti wa endele vohondo yaco, eye ka lile ombolo ndaño oku nyua ovava, momo wa sumuĩle calua omo liekambo liekolelo liomanu va tunda kumandekua.+

7 Noke va imba oluiya lumue ko Yuda kuenda ko Yerusalãi oco okuti, vosi vana va kala kumandekua va liongoluila ko Yerusalãi; 8 kuenje ndomo ci likuata lonjila ya nõliwa lolombuale kuenda akulu, omunu wosi keyile vokuenda kuoloneke vitatu, o tambuiwa ovina viaye viosi kuenda o tundisiwa vekongelo liomanu va tiuka kumandekua.+ 9 Omo liaco, vokuenda kuoloneke vitatu okuti, keteke 20 liosãi yaco yecea, alume vosi vo ko Yuda kuenda vo ko Benjamini va liongoluila ko Yerusalãi. Omanu vosi va tumãlele puvelo wonjo ya Suku yocili, loku luluma omo liocitangi caco kuenda omo liombela yalua.

10 Kuenje Esera ocitunda wa votoka kuenda wa va sapuila hati: “Ene wa lekisi ekambo liekolelo poku kuela akãi vakualofeka+ kuenda wa vokiyi keko lio Isareli. 11 Kaliye likekembeli ku Yehova Suku ya vakukululu yene kuenda lingi ocipango caye. Litepi lomanu volofeka vu lisungue lavio kuenda lakãi ava vakualofeka.”+ 12 Noke, ekongelo liosi lia tambulula lolukandi liti: “Eci ocikele cetu oku linga muẽle ndomo wa popia. 13 Omo liaco, kulo kuli omanu valua kuenda yilo otembo yombela. Ka citava okuti omanu va kala posamua kuenda ocitangi caco ka ci ka tetuluiwa veteke limosi ale voloneke vivali, momo etu tua lekisa esino lialua catiamẽla kocitangi eci. 14 Omo liaco, linga ohenda, ecelela okuti olombuale vietu vi songuila ekongelo liosi;+ kuenje vosi va kasi valupale etu okuti va kuela akãi vakualofeka, veye keteke limue lia sokiyiwa kumue lakulu kuenda lolonganji violupale lolupale toke eci tu tulumũla onyeño ya Suku yetu ya wenguka omo liocitangi eci.”

15 Noke, Yonatão omõla a Asahele la Yahasiya omõla a Tikiva, ka va tavele kondaka yaco kuenda va kuatisiwa la va Lewi okuti, Mesiulama la Siabetai.+ 16 Pole, vana va tiuka kumandekua va linga ndomo ca sokiyiwa; kuenje Esera ocitunda kumue lasongui vapata olonjo via va isiavo, vosi va tukuiwa kolonduko, va liongoluila pokolika keteke liatete liosãi yekũi oco va kũlĩhĩse ocitangi caco; 17 kuenje keteke liatete liosãi yatete, va mala oku potolola ocitangi caco lalume vosi vana va kuelele akãi vo kolofeka vikuavo. 18 Kuenje kua limbukiwa okuti vamue pokati komãla vovitunda va kuelele akãi vakualofeka vikuavo:+ pomãla va Yesiua,+ omõla a Yehocadaka kuenda vamanjaye, Maaseya, Eliyesere, Yarivi kuenda Gedaliya. 19 Pole, ovo va likuminya* oku tuma akãi vavo oco va ende kuenda omo okuti ovo va kuata eko, va sukilile oku eca okameme kopiwa vocunda omo lieko liavo.+

20 Pomãla va Imere,+ pa kala Hanani kuenda Sevadiya; 21 kuenda pomãla va Harimi:+ Maaseya, Eliya, Semaya, Yehiyele kuenda Usiya; 22 pomãla va Pasihuri:+ Elioenai, Maaseya, Isameli, Netanele, Yosavada kuenda Eleasa. 23 Ku va Lewi kua kala Yosavada, Simei, Kelaya (okuti, Kelita), Petahiya, Yuda kuenda Eliyesere; 24 kuenda polonjimbi: Eliasivi; ku vakualombundi, Sialume, Teleme kuenda Uri.

25 Ku va Isareli, pomãla va Parosi+ pa kala Ramiya, Isiya, Malikiya, Miyamine, Eleasara, Malikiya kuenda Benaya; 26 kuenda pomãla va Elami:+ Mataniya, Sakariya, Yehiyele,+ Avidi, Yeremote kuenda Eliya; 27 pomãla va Satu:+ Elioenai, Eliasivi, Mataniya, Yeremote, Savada kuenda Asisa; 28 pomãla va Bevai:+ Yehohanana, Hananiya, Sabai kuenda Aletai; 29 pomãla va Bani: Mesiulama, Maluke, Adaya, Yasiuvu, Sieli kuenda Yeremote; 30 pomãla va Pahati-Moava:+ Adana, Kelale, Benaya, Maaseya, Mataniya, Becalele, Binui kuenda Manase; 31 pomãla va Harimi:+ Eliyesere, Isiya, Malikiya,+ Semaya, Siemone, 32 Benjamini, Maluke kuenda Semariya; 33 pomãla va Hasiumi:+ Matenai, Matata, Savada, Elifelete, Yeremai, Manase kuenda Simei; 34 pomãla va Bani: Maadi, Amirama, Uele, 35 Benaya, Bediya, Celuhi, 36 Baniya, Meremoti, Eliasivi, 37 Mataniya, Matenai kuenda Yahasu; 38 pomãla va Binui: Simei, 39 Selemiya, Natana, Adaya, 40 Makenadebai, Siasai, Siaraya, 41 Asariele, Selemiya, Semariya, 42 Sialume, Amariya kuenda Yosefe; 43 pomãla va Nevo: Yeyele, Matitiya, Savada, Sebina, Yadai Yoeli kuenda Benaya. 44 Vosi ava va kuelele akãi vakualofeka vikuavo+ kuenje va tuma akãi vavo lomãla vavo oku enda.+