UKANDA KU VA HEVERU
1 Suku kosimbu wa enda oku vangula la vakukululu yetu pocakati covaprofeto olonjanja vialua kuenda volonjila via litepa.+ 2 Koloneke vilo via sulako, eye wa vangula letu pocakati Comõlaye,+ una eye a nõla kapiñala kovina viosi,+ haeye una okuti, pocakati caye wa lulika oluali.*+ 3 Eye esetahãlo liulamba wa Suku,+ haeye ocindekaise ca suapo cekalo Liaye+ kuenda o tata ovina viosi londaka yunene waye. Kuenje noke yoku yelisa akandu etu,+ wa tumãla kondio ya Suku kilu.+ 4 Kuenje eye weya oku velapo ovangelo+ kuenda onduko a piñala ya velapo okuti, olonduko viavo vi sule.+
5 Ndeci, helie pokati kovangelo Suku a sapuilile hati: “Ove wumõlange; etaili nda linga isiove”?+ Kuenda vali hati: “Ame ndi ka linga isiaye kuenda eye o ka linga omõlange”?+ 6 Pole, eci a nena vali voluali Nuñulu yaye,+ Suku wa popia hati: “Ovangelo vosi va Suku vo kekamẽle.”
7 Handi vali, Suku wa tukula eci catiamẽla kovangelo hati: “Eye o lingisa ovangelo vaye aspiritu kuenda o lingisa olondingupange+ viaye* ulienge wondalu.”+ 8 Pole, poku tukula eci catiamẽla Komõla eye wa popia hati: “Suku eye ocalo cove+ otembo ka yi pui kuenda epangati Liusoma wove, epangati limue lia suñama.* 9 Ove wa sola esunga kuenda wa suvuka evĩho. Eli olio esunga lieci Suku, Suku yove a ku wavekela calua+ lulela wesanju okuti, olosoma vikuavo vi sule.”+ 10 Kuenda hati: “A Ñala, kefetikilo wa tumbika oviseveto vio kilu lieve kuenda ovailu ovopange ovaka ove. 11 Ovio vi ka nyõleha, pole, ove o kamamako otembo ka yi pui; kuenda ovio viosi vi ka pua nduwalo umue, 12 kuenje o ka vi muña ndocikutu cimue, ale nduwalo kuenda ovio vi ka pongoluiwa. Pole, ove lalimue eteke o pongoloka kuenda anyamo ove lalimue eteke a ka sulila.”+
13 Pole, helie pokati kovangelo Suku a sapuilile hati: “Tumãla kondio yange, toke eci ndi kapa ovanyãli vove ndociliatelo colomãhi viove”?+ 14 Vosi yavo haviluvoko hẽ viespiritu oco va linge upange u kola,*+ haivo va tumiwa oku vumba vana va ka piñala eyovo?
2 Eli olio esunga lieci ca tu sesamẽlela oku yevelela lutate kovina tu yeva+ oco okuti, lalimue eteke tu yapuisiwa.+ 2 Momo nda ondaka ya sapuiwa lovangelo+ ya linga ocili kuenje wosi wa linga ekandu lomunu wa sina va tambula eyambulo lia lisoka lesunga,+ 3 etu hẽ tu puluka ndati nda tu nyehũla eyovo lia piãla?+ Momo olio lia sapuiwa tete pocakati ca Ñala yetu+ kuenda ava vo yeva va tu sapuila eci catiamẽla kokualio, 4 osimbu okuti, Suku wa likongela koku eca uvangi lolondimbukiso, lovikomo,* lovilinga viñi viñi vinene+ kuenda lespiritu sandu lia eciwa ndomo ci likuata locipango caye.+
5 Momo Suku ka kapele ovangelo oco va viale ilu lieve li laika oku iya+ lina tu kasi oku popia. 6 Pole, Vocisonehua cimue ombangi yimue ya popia hati: “Omunu hẽ nye okuti ove amamako oku u sokolola, ale omõla womunu hẽ nye okuti ove u tata?+ 7 Ove wo lingisa okuti, ongusu yaye ka yi lui calua ndeyi yovangelo; ove wo futisa lulamba, lesumbilo kuenda wo vialeka kovopange ovaka ove. 8 Ovina viosi ove wa vi pokuisila vemẽhi liolomãhi viaye.”+ Poku pokuisa ovina viosi kokuaye,+ Suku ka sile cimue okuti, ka ci pokuisile kokuaye.+ Cilo, handi ka tu lete ovina viosi via pokuisa vokuaye.+ 9 Pole, tu lete okuti, Yesu una okuti ongusu yaye ka ya kaile yalua ndeyi yovangelo,+ cilo wa futisua lulamba lesumbilo, omo a talisiwa ohali yoku fa+ okuti, omo liohenda ya piãla ya Suku eye wa fila omanu vosi.+
10 Momo ca sungulukile okuti Suku una okuti, ovina viosi vi kasiko mekonda liaye, poku muisa ulamba omãla valua,+ wa ecelela okuti, Usongui wa Velapo weyovo liavo+ o talisiwa ohali.+ 11 Ci kaile una o kolisa la vana va kolisiwa,+ vosi yavo va tunda ku isia umuamue,+ eli olio esunga lieci Yesu ka kuatelele osõi yoku va tukula hati, vamanjaye,+ 12 ndeci eye a popia hati: “Ndi ka sapula onduko yove ku vamanjange; ndi ka ku sivayela pokati kekongelo lovisungo.”+ 13 Handi vali hati: “Ndi ka kolela kokuaye.”+ Kuenda vali hati: “Tala! ame, kumue lomãla vana Yehova* a nyĩha.”+
14 Kuenje omo okuti “omãla” va kuete osonde letimba, eye layevo wa linga ukuasonde kuenda ukuetimba+ okuti, omo liolofa viaye o nyõla una o kuete unene woku koka olofa+ okuti, Eliapu,+ 15 kuenje eye o pondola oku yovola vosi vana va kala apika vokuenda kuomuenyo wavo wosi omo liusumba woku fa.+ 16 Momo eye ka kasi oku kuatisa ovangelo, puãi o kasi oku kuatisa ocitumbulukila* ca Avirahama.+ 17 Omo liaco, eye wa sukilile oku kala nda “vamanjaye” kovina viosi+ okuti, o linga ocitunda cinene ukuahenda, haeye wa koleliwa kovina viatiamẽla ku Suku, oco a ece ocilumba+ coku tuvika akandu omanu.+ 18 Omo okuti, eye muẽle wa talisiwa ohali eci a nyikiwa,+ o pondola oku kuatisavo vana va kasi oku nyikiwa.+
3 Omo liaco, a vamanji va kola, haene watiamẽli kekovongo* lio kilu,+ sokololi upostolo haeye ocitunda cinene una tua limbuka okuti, Yesu.+ 2 Eye wa kala ukuacili ku Una wo nõla,+ ndeci Mose a kalavo ukuacili vonjo yosi ya Suku.+ 3 Eye* o tendiwa okuti o sesamẽla ulamba walua+ okuti, Mose ci sule, momo una o tunga onjo yimue wa sumbiwa calua okuti, onjo yaco ci sule. 4 Ocili okuti, onjo yosi ya tungiwa la umue, pole, Ululiki wovina viosi Suku. 5 Mose wa vumba ndukuenje umue ukuacili vonjo yosi ya Suku, nduvangi wovina via laikele oku sapuiwa noke, 6 pole, Kristu Ndomõla+ a Suku wa kala ukuacili poku tata onjo ya isiaye. Etu tunjo ya Suku+ nda tu kakatela kutõi wetu woku vangula kuenda kelavoko lietu lina tu sanjukila toke kesulilo.
7 Kuenje ndeci espiritu sandu li popia hati,+ “Etaili nda wa yeveleli kondaka yaye, 8 ko ka tĩlisi ovitima viene ndeci kepuluvi eci wa wenguli onyeño yange kuenda ndeci keteke lioseteko vekalasoko,+ 9 kuna vakukululu yene va ndi seteka ndaño okuti, va mola ovopange ange vokuenda kueci ci soka 40 kanyamo.+ 10 Eli olio esunga lieci nda temẽlele ocitumbulukila caco kuenje nda popia siti: ‘Otembo yosi va yapuka vovitima viavo kuenda ka va kũlĩhĩle olonjila viange.’ 11 Omo liaco, nda lisila vonyeño yange siti: ‘Ka va ka iñila vepuyuko liange.’”+
12 A vamanji lunguki okuti, lomue pokati kene omo liusumba o kuata utima wa vĩha haiwo ka u kuete ekolelo, poku tinduka ku Suku o kasi lomuenyo;+ 13 pole, amamiko oku li pamisa pokati eteke leteke osimbu citava oku tukula hati, “Etaili,”+ oco lomue pokati kene ka ka tĩlise utima waye poku yapuisiwa lunene wekandu. 14 Momo cilo tu kuata lika onepa* ku Kristu nda toke kesulilo tua kakatela kekolelo tua kuatele kefetikilo.+ 15 Ndeci ca popiwa citi, “Etaili nda wa yeveleli kondaka yaye, ko ka tĩlisi ovitima viene ndeci kepuluvi eci wa wenguli onyeño yange.”+
16 Velie va yeva kuenje handi va wengula onyeño yaye? Havosiko hẽ vana va tundile Kegito okuti, va songuiwile la Mose?+ 17 Velie Suku a temẽlele vokuenda kueci ci soka 40 kanyamo?+ Havanako hẽ va linga ekandu okuti, va fila vekalasoko?+ 18 Velie vali eye a lisingile okuti, ka va iñila vepuyuko liaye? Havanako hẽ va lekisa esino? 19 Kuenje tua limbuka okuti, ovo ka va iñilile omo liekambo liekolelo.+
4 Omo okuti kua kamba ohuminyo yoku iñila vepuyuko liaye, tu lunguki* sanga omo liusumba umue pokati kene o tendiwa okuti, ka sesamẽla epuyuko liaco.+ 2 Momo letuvo+ tua yeva olondaka viwa ndeci ovo; pole, ondaka va yeva ka ya va kuatisile, momo ovo ka va kuatele ekolelo ndeli liava va pokola. 3 Etu tu kuete ekolelo, tu iñila vepuyuko ndeci eye a popia hati: “Omo liaco, nda lisila vonyeño yange siti: ‘Ka va ka iñila vepuyuko liange,’”+ ndaño okuti wa malusula ovopange aye tunde koku sevetiwa kuoluali.+ 4 Momo Vocisonehua cimue eye wa popia eci catiamẽla keteke liepanduvali hati: “Keteke liepanduvali Suku wa puyuka kovopange aye osi,”+ 5 kuenda vali wa popia hati: “Ka va ka iñila vepuyuko liange.”+
6 Omo okuti kua kamba vamue oco va iñile vepuyuko liaco kuenda vana va yeva tete olondaka viwa ka va iñilile omo liesino,+ 7 eye o sokiya vali eteke limue eci pa pita otembo yalua vosamo ya Daviti poku popia hati, “Etaili”; ndeci ca popiwa ale hati, “Etaili nda wa yeveleli kondaka yaye, ko ka tĩlisi ovitima viene.”+ 8 Momo nda Yehosua+ wa va songuilile vocitumãlo cepuyuko, Suku nda ka popele noke eteke likuavo. 9 Omo liaco, handi kua kamba esambata limue liepuyuko komanu va Suku.+ 10 Momo ulume wa iñila vepuyuko lia Suku, wa puyukavo kupange waye, ndeci Suku a puyuka kupange waye.+
11 Tu likolisiliko oco tu iñili vepuyuko liaco okuti, lomue o kuama ongangu yaco yesino.+ 12 Momo ondaka ya Suku yi kasi lomuenyo kuenda yi kuete unene,+ oyo ya tua calua okuti osipata ya tua olonele vivali+ yi sule, yi tepisa eci omunu a tuwa kilu leci a tuwa vokati kuenda asokoluilo lupuma, haiyo yi tẽla oku limbuka ovisimĩlo lolonjongole viutima. 13 Kovaso a Suku ka kuli ociluvo okuti ca salamisua+ pole, ovina viosi kokuaye via situluiwa haivio vi letiwe la una okuti, o ka tu sombisa.+
14 Omo okuti tu kuete ocitunda cinene ca velapo haico ca iñila kovailu okuti Yesu Omõla a Suku,+ tu amamiko oku sapula ekolelo lietu liatiamẽla kokuaye.+ 15 Momo ka tu kuete ocitunda cinene okuti ka ca kapeleko oku hongua kuetu,+ pole, tu kuete cimue ca setekiwa kovina viosi ndetu, pole, ka ci kuete ekandu.+ 16 Omo liaco, tu ameli kocalo cohenda ya piãla lutõi woku vangula,+ oco tu tambule ocali kuenda oku sanga ohenda ya piãla eci tu sukila ekuatiso.
5 Momo ocitunda cosi cinene ci tunda pokati komanu, ca nõliwila oku va lingila upange wa Suku+ okuti, ceca olombanjaile kuenda ovilumba vioku lumbila akandu.+ 2 Eye o tẽla oku kuatela ocikembe* vakuanumbi kuenda vakuakulueya,* momo eye muẽle o liyakavo lehonguo liaye, 3 omo liaco, eye o sukilavo oku eca ovilumba omo liakandu aye muẽle ndeci a lingila omanu vakuavo.+
4 Lomue o li kapa esumbilo liaco eye muẽle, pole, o li tambula lika eci a nõliwa la Suku, ndeci Arone a nõliwilevo.+ 5 Kristu layevo ka li sivayele eye muẽle+ omo lioku kala ocitunda cinene, pole, wa sivayiwa la Una wa popia eci catiamẽla kokuaye hati: “Ove wumõlange; etaili nda linga Isiove.”+ 6 Ndeci eye a popiavo konepa yikuavo hati: “Ove wucitunda otembo ka yi pui ndeci Melikisedeke.”+
7 Eci Kristu a kala palo posi* wa linga alombelo lapingilo ku Una o tẽla oku u popela kolofa, loku lila kualua kuenda asuẽlẽla+ kuenje olohutililo viaye via yeviwa omo wa sumbila Suku. 8 Ndaño wa kala omõla, wa lilongisa epokolo omo liohali a talisiwa.+ 9 Kuenje noke yoku kanguiwa,+ wa linga usongui weyovo ka li pui lia vosi va pokola kokuaye,+ 10 momo eye wa nõliwa la Suku oco a linge ocitunda cinene ndeci Melikisedeke.+
11 Tu kuete ovina vialua vioku vangula viatiamẽla kokuaye kuenda ca tĩla oku vi lombolola momo wa lingi ovisitatũi koku yeva kuene. 12 Ndaño okuti cilo* wa lingi alongisi, pole, vu sukila okuti umue o vu longisi vali ovina viefetikilo+ violondaka vi kola via Suku kuenda handi vu sukila asenjele okuti, okulia kua kõla hakoko. 13 Momo wosi amamako oku litekula lasenjele, ka kũlĩhĩle ondaka yesunga, momo eye omõla.+ 14 Pole, okulia kua kõla kuakulu vana okuti, omo lioku pindisa olondunge* viavo va tẽla oku tepisa pokati keci ciwa leci cĩvi.
6 Omo okuti cilo tua siapo alongiso+ atete atiamẽla ku Kristu, tu amamiko oku kula,+ hakusevetako vali ociseveto ndeci, oku likekembela kovilinga viaño,* kuenda ekolelo ku Suku, 2 elongiso liatiamẽla kapapatiso a litepa, oku kapa ovaka,+ epinduko liava va fa+ kuenda esombiso ka li pui. 3 Eci oco tu ka linga nda Suku wa ecelela.
4 Momo catiamẽla ku vana va tambula ocinyi,+ haivo va seteka ale ombanjaile yo kilu kuenda va tambula espiritu sandu, 5 haivo va seteka ondaka yiwa ya Suku, lovonene oluali lu laika oku iya,* 6 pole, va yapuka+ kuenje ka ci tẽliwa vali ovo oku likekembela, momo va valela vali Omõla a Suku kuti kuenda vo pembuila kovaso omanu.+ 7 Momo osi yi tambula asumũlũho a tunda ku Suku eci yi nyua ovava ombela a loka loka kuenje ima ovikũla vi kuatisa vana va vi lima. 8 Pole, nda yima ocambanda lolosongo, yi linga ocipembe kuenje yi laika oku siñaliwa kuenda esulilo liayo oku yi timĩha.
9 Pole, kokuene, a vamanji wa soliwi, ndaño tu popia ndomo, tua kolela kovina via velapo okuti, vina viatiamẽla keyovo. 10 Momo Suku hokuanyako okuti ivalako upange wene, locisola wa lekisi konduko yaye+ koku vumba olosandu, loku amamako oku va vumba. 11 Pole, etu tu yongola okuti, omunu lomunu pokati kene o lekisa ombili yimuamue okuti, vu kolela kelavoko+ toke kesulilo,+ 12 oco okuti ka vu lingi vakuawesi,+ pole, vu kala olosetukuli via vana okuti, omo liekolelo kuenda epandi va piñala olohuminyo.
13 Momo eci Suku a linga ohuminyo yaye ku Avirahama, omo okuti ka kua kaile umue wa velapo a lisingila, wa lisinga eye muẽle,+ 14 poku popia hati: “Ndi ka ku sumũlũisa muẽle kuenda ndi ka ku luisa muẽle.”+ 15 Kuenje Avirahama noke yoku lekisa epandi, wa tambula ohuminyo yaco. 16 Momo omanu va lisinga, va lisingila umue wa velapo kuenje kolonamalãla viavo viosi, oku lisinga oko ku eca uvangi wokuti eci va kasi oku vangula, ocili.+ 17 Cimuamue haico okuti, eci Suku a sokiya oku lekisa ku vakapiñala kohuminyo okuti ocipango* caye ka ci pongoloka, wa ci likuminya*+ loku lisinga, 18 oco okuti, omo liovina vivali ka vi pongoloka vina okuti ka citava okuti Suku o kemba,+ etu tua tilila vocitililo, tu pamisiwa levetiyo oco tu kakatele kelavoko lia tu kapiwila kovaso. 19 Tu kuete elavoko+ liaco ndonjundo kovimuenyo vietu, lina lia kolapo hailio lia pama kuenda olio li iñila vokati kongumbo,+ 20 muna Yesu+ a tu pitila kovaso ndusongui, haeye wa linga ocitunda cinene ndeci Melikisedeke otembo ka yi pui.+
7 Momo Melikisedeke soma yo Salemi, ocitunda ca Suku Fũ, wa lisanga la Avirahama una wa kala oku tiuka koku kundula olosoma, yu wo sumũlũisa,+ 2 kuenje Avirahama wa eca* kokuaye onepa yekũi yovina viosi. Tete onduko yaye yi lomboloka okuti “Soma Yesunga” kuenda noke soma yo Salemi okuti, “Soma Yombembua.” 3 Ka kuatele isia ndaño ina, ale ocikoti cepata, ka kuatele efetikilo lioloneke pamue esulilo liomuenyo, pole, lonjila eyi eye wa linga Ndomõla a Suku, haeye o kala ocitunda otembo yosi.*+
4 Limbuki unene ulume waco a kuata, una Avirahama utue wepata,* a ĩha onepa yekũi viovina via velapo a pundile.+ 5 Ocili okuti, ndomo ca lekisiwa Vocihandeleko, omãla va Lewi+ vana va tambula ocikele cupange wutunda, va handelekiwile oku kongola onepa yekũi komanu+ okuti, ku vamanjavo, ndaño va kala ovitumbulukila* via Avirahama. 6 Pole, ulume waco okuti ka tundile kocikoti cepata liavo, wa tambula ku Avirahama onepa yekũi kuenda wa sumũlũisa una wa kuatele olohuminyo.+ 7 Cilo ka ci patãliwa okuti, una o sule o sumũlũisiwa lu wa velapo. 8 Konepa yimue, alume va kasi oku fa ovo va tambula onepa yekũi, pole, konepa yikuavo, una o tambula imbiwa uvangi wokuti o kasi lomuenyo.+ 9 Citava oku popiwa okuti ndaño Lewi, una wa tambula onepa yekũi, wa feta onepa yekũi pocakati ca Avirahama, 10 momo eye handi wa kala ocitumbulukila* ca laikele oku iya ca kukululu yaye eci Melikisedeke a lisanga laye.+
11 Nda oku lipua ku iya lutunda wa Lewi+ (omo ca kala Ocihandeleko omanu va tambula), momo lie kua sukiliwile vali oku iya ocitunda cikuavo ndeci Melikisedeke+ okuti, ndeci Arone hacoko? 12 Momo nda ku lingiwa epongoloko liutunda, ci sukilavo oku pongolola Ocihandeleko.+ 13 Momo ulume okuti oko ovina evi vi tukuiwila, wa tunda kocikoti cikuavo cina okuti, lomue wa vumbile ale kutala.+ 14 Momo ocili okuti, Ñala yetu wa tunda kocikoti ca Yuda+ pole, Mose ka la popia cimue ci lekisa okuti, ovitunda vi tunda kocikoti caco.
15 Eci ci lomboloka vali ciwa eci ku iya ocitunda+ cikuavo ndeci Melikisedeke,+ 16 okuti ka ca lingile ocitunda ndomo ci likuata locihandeleko cina ca tamba kepata a tunda,* pole, te lunene womuenyo umue ka u nyõleha.+ 17 Momo co wimbiwila uvangi wokuti: “Ove wucitunda otembo ka yi pui ndeci Melikisedeke.”+
18 Ocihandeleko cosimbu ca kapiwa ponele omo ca hongua kuenda ka ci kuete esilivilo.+ 19 Momo Ocihandeleko ka ca lingile okuti cimue ci lipua,+ pole, Suku wa tu ĩha elavoko lia velapo+ kuenda pocakati calio tu pondola oku amela ku Suku.+ 20 Handi vali, omo okuti Suku wa lisinga eci a tumbika Yesu ndocitunda, 21 (omo kuli alume okuti va linga ovitunda, pole, ka kua kaile oku likuminya loku lisinga, puãi, eye wa linga ocitunda omo lioku lisinga kumue kuatiamẽla kokuaye kua lingiwa la Una wa popia hati: “Yehova* wa lisinga kuenda eye ka ka pongolola ocisimĩlo caye cokuti,* ‘Ove wucitunda otembo ka yi pui’”),+ 22 Yesu wa linga ohuminyo* yocisila ca velapo.+ 23 Handi vali, valua va sukilile oku linga ovitunda omo lioku piñala,+ momo olofa via va tateka oku amamako, 24 pole, omo okuti Yesu o kasi lomuenyo otembo ka yi pui,+ utunda waye ka u kuete kapiñala. 25 Kuenje eye o tẽla oku popela olumue vana va likutilila ku Suku vonduko yaye. Eye o tẽla oku va popela, momo eye olonjanja viosi o kasi lomuenyo oco a pinge ku Suku okuti o va kuatisa.+
26 Omo liaco, ca tu sungulukila oku kuata ocitunda caco cinene okuti ukuesunga, wa pua eko, wa pua etondelo,+ wa litepa la vakuakandu kuenda wa kemãlisua kilu liovailu.+ 27 Eye wa litepa lovitunda viaco vinene, eye ka sukila oku eca ovilumba eteke leteke+ okuti, tete o lumbila akandu aye muẽle, noke omanu,+ momo eci wa ci linga poku li lumba onjanja yimosi lika eci a lieca eye muẽle ndocilumba. Kuenje ocilumba caye ci kuatisa omanu otembo ka yi pui.+ 28 Momo ndomo ca lekisiwa Vocihandeleko, alume va nõliwile ndovitunda vinene va honguele,+ pole, ondaka yohuminyo+ loku lisinga okuti, yeya noke Yocihandeleko, ya nõla Omõla, una wa kanguiwa+ otembo ka yi pui.
8 Cilo etosi lia velapo tu kasi oku popia lieli liokuti: Tu kuete ocitunda cinene ca lisoka leci+ kuenda eye wa tumãla kondio yocalo ca Suku kovailu,+ 2 okuti ukuakuvumba* kocitumãlo ci kola+ kuenda kombalaka yocili, yina Yehova* a tunga okuti, omunu hayeko. 3 Momo ocitunda cinene cosi ci nõliwila oku eca olombanjaile lovilumba; kuenje ca sesamẽlele okuti, omunu waco o kuatavo cimue coku lumba.+ 4 Nda eye wa kaile kilu lieve, nda ka lingile ocitunda,+ momo kuli ale ovitunda vikuavo via siata oku eca ovilumba ndomo ci likuata Locihandeleko. 5 Omanu vaco va lingainga upange u kola woku eca ovilumba ndocindekaise kuenda ulembo+ wovina vio kilu;+ ndeci Mose a linga eci a laikele oku tunga ombalaka okuti, wa tambula onumbi ya Suku: Momo Eye wa popia hati: “Kũlĩhĩsa okuti o linga ovina viosi loloseteko vialio vina via lekisiwa kokuove komunda.”+ 6 Pole, cilo Yesu wa tambula upange* umue wa velapo, momo wa lingavo mitakati+ yocisila ca velapo,+ cina ca sevetiwa kolohuminyo via velapo.+
7 Nda ocisila catete ca puile eko, ocisila cavali nda ka ca sukiliwile.+ 8 Momo eye wa sanga eko komanu eci a popia hati: “‘Tali! Oloneke vi kasi oku iya,’ oco Yehova* a popia ‘eci ndi ka linga ocisila cimue cokaliye lonjo ya Isareli kuenda onjo ya Yuda. 9 Oco, ka ci ka kala ndocisila cina nda linga la vakukululu yavo keteke nda kuata peka liavo poku vopa vofeka Yegito,+ momo ka va kakatele kocisila cange kuenje nda liwekapo oku va tata,’ oco Yehova* a popia.
10 “‘Momo eci oco ocisila ndi ka linga lonjo ya Isareli noke yoloneke viaco, oco Yehova* a popia. ‘Ndi ka kapa ovihandeleko viange vovisimĩlo viavo kuenda ndi ka vi soneha vovitima viavo.+ Kuenje ndi ka linga Suku yavo kuenda ovo va ka linga omanu vange.+
11 “‘Kuenje ovo ka va ka longisa vali onungi lukuavo kuenda omunu lomunu oku longisa manjaye hati: “Kũlĩha Yehova!”* Momo vosi yavo va ka ndi kũlĩha, oku upisa kutito toke kunene pokati kavo. 12 Momo ndi ka ecela ovilinga viavo vĩvi kuenda si ka ivaluka vali akandu avo.’”+
13 Eci eye a popia okuti “ocisila cokaliye,” wa lekisa okuti, ocisila catete ca pita.+ Kaliye eci ci kasi oku pita loku kuka, pa kamba naito oco ci takate.+
9 Catiamẽla kocisila catete, oco ca kala lovihandeleko vioku linga upange u kola kuenda ocitumãlo+ caco ci kola kilu lieve. 2 Momo ohondo yatete yombalaka ya tungiwa, mua kala ociyekelo colondiyelo,+ omesa, olombolo via tumbikiwa;*+ kuenda ohondo yaco ya tukuiwile okuti, Ocitumãlo ci Kola.+ 3 Pole, konyima yongumbo yavali+ kua kala ohondo yombalaka yi tukuiwa hati, Ohondo yi Kola Koku Kola.+ 4 Vocitumãlo caco mua kala ociyukilo culu,+ ocikasia covisila+ ca lañiwa lulu+ kolonele viosi okuti, vokati kaco mua kala esanga liulu mua kapiwa omana,+ kumue lombueti ya Arone yina ya yovele+ kuenda avaya+ ocisila; 5 kuenje kilu liaco kua kala va keruvi vakuolamba va sikĩlĩlile ocitumãlo coku linalisa.*+ Yilo hayoko otembo yoku lombolola ovina evi viosi.
6 Noke yoku tunga ndoco ovina viaco, ovitunda vi iñila olonjanja viosi vohondo yatete yombalaka oco vi linge upange u kola;+ 7 pole, ocitunda cinene ci iñila lika liaye vohondo yavali+ yombalaka onjanja yimosi vunyamo, puãi wa sukilile oku ambata osonde+ yoku lumbila akandu aye muẽle+ kuenda akandu omanu+ va lingila vonumbi. 8 Kuenje espiritu sandu li lekisa ciwa okuti, onjila yi tuala kocitumãlo ci kola handi ka ya situluiwile osimbu ombalaka yatete yi tãi.+ 9 Ombalaka yaco ocindekaise coloneke vilo+ kuenda ndomo ci likuata leliangiliyo liaco, ku eciwa olombanjaile ale ovilumba.+ Pole, ndaño ndoco, eci ka ci lingisa okuti omunu o fendela Suku o kuata owanji uwa wutima.+ 10 Ovio viatiamẽla lika kovilia, kovinyua kuenda kolonjila vialua vioku yelisa*+ omanu kuenda ovina. Ovio via kala ovihandeleko viatiamẽla ketimba+ kuenda via kisikiwile toke kotembo ya sokiyiwa oco ovina vi kale ciwa.
11 Omo liaco, eci Kristu eya ndocitunda cinene covina viwa via pita ale, eye wa iñila vombalaka yinene haiyo ya lipua calua okuti, ka ya tungiwile lovaka kuenda ka yi pangi onepa kovina via palo posi. 12 Eye ka iñilile vocitumãlo ci kola losonde yolohombo kuenda yolonãle, te losonde yaye muẽle+ onjanja yimosi lika kuenda wa tu sangelako eyovo ka li pui.+ 13 Momo nda okuti osonde yolohombo,+ yolongombe kuenda etiko liolonema* lina lia enda oku nyĩliwa komanu va vĩhisua ya enda oku va lingisa okuti va yela kovaso a Suku,+ 14 osonde ya Kristu+ hẽ siti ya velapo calua, una okuti, pocakati cespiritu limue ka li pui wa lieca ku Suku okuti wa pua eko, o ka yelisa owanji wutima wetu kovilinga viaño+ oco tu lingile upange u kola Suku o kasi lomuenyo?+
15 Eli olio esunga lieci eye a lingila mitakati yocisila cokaliye+ okuti, omo kueya oku fa ku nena eyovo liavo omo liocisembi+ cakandu atiamẽla kocisila catete, vana va kovongiwa va tambula ohuminyo yocipiñalo ka ci pui.+ 16 Momo posi pali ocisila cimue, ci sukila okuti omunu wa linga ocisila caco o fa, 17 momo ocisila ci kuata lika esilivilo lolofa, momo osimbu omunu wa linga ocisila caco a kasi lomuenyo, ocisila caco ka ci kuata esilivilo. 18 Omo liaco, ocisila catete ca kuata lika esilivilo* omo liosonde. 19 Eci Mose a sapuila omanu vosi olonumbi viosi Viocihandeleko, wa kuata osonde yolonãle kuenda yolohombo, ovava, lovonya a kusuka, lohisopu kuenje wa nyĩla elivulu* kuenda omanu vosi, 20 yu wa popia hati: “Eyi oyo osonde yocisila Suku o handeleki oku tẽlisa.”+ 21 Eye wa nyĩlavo osonde kombalaka kuenda kovikuata viosi viupange u kola.*+ 22 Ocili, ndomo ci likuata Locihandeleko ovina viosi vi yelisiwa losonde,+ pole, nda osonde ka yi pesiwa ka kuli ongecelo.+
23 Omo liaco, ca sukilile ocindekaise+ cokuti ovina vio kovailu vi yelisiwa lonjila eyi,+ pole, ovina vio kovailu via sukilile oku yelisiwa lovilumba via velapo okuti, evi vi sule. 24 Momo Kristu ka iñilile vocitumãlo ci kola ca tungiwa lovaka+ okuti, okopia yimue yeci cocili,+ pole, wa iñila kilu+ okuti cilo o molẽha kovaso a Suku oco tu kuatisiwe.+ 25 Eci ka ca lingiwile okuti, o li lumba olonjanja vialua ndeci ocitunda cinene ca enda oku iñila vocitumãlo ci kola unyamo lunyamo+ losonde okuti hayayeko. 26 Nda oco, nda wa tala ohali olonjanja vialua tunde koku sevetiwa kuoluali. Pole, cilo kesulilo lioluali* wa li molẽhisa onjanja yimosi lika oco a imũle akandu pocakati cocilumba caye muẽle.+ 27 Ndeci omanu vosi va fa onjanja yimosi lika kuenje noke va tambula esombiso, 28 cimuamue haico okuti, Kristu wa eciwavo onjanja yimosi lika oco ambate akandu omanu valua;+ kuenje o molẽha vali onjanja yavali halokuimũlako ekandu, puãi o molẽha oco a popele vana va lavoka kokuaye.+
10 Ocihandeleko ci kasi ndulembo+ wovina viwa vi laika oku iya,+ pole, oco ka ci lekisa ovina viaco, momo oco* ka ci tẽla locilumba cimuamue cecaiwa unyamo lunyamo oku kanguisa vana va fendela Suku.+ 2 Handi vali, siti nda ka ca sukilile oku eca vali ovilumba nda vana va linga upange u kola va yelisiwile ale okuti, ka va kuata vali utima wekandu? 3 Pole, ovilumba viaco via kala onjivaluko yakandu unyamo lunyamo,+ 4 momo osonde yolongombe kuenda yolohombo ka yi imũla akandu.
5 Kuenje eci eye eya voluali, wa sapuila Suku hati: “‘Ove kua yonguile ovilumba kuenda olombanjaile, pole, wa ndi pongiyila etimba limue. 6 Kua tavele ovilumba viosi vioku pia elisi ndaño ovilumba viekandu.’+ 7 Kuenje nda popia siti: ‘Tala! Ndeya (vociña* mua sonehiwa eci catiamẽla kokuange) oku linga ocipango cove, A Suku.’”+ 8 Tete wa popia hati: “Kua yonguile ndaño oku tava ovilumba lolombanjaile kuenda ovilumba viosi vioku pia elisi ndaño ovilumba viekandu” okuti, ovilumba vi eciwa ndomo ci likuata Locihandeleko, 9 noke wa popia hati: “Tala! Ndeya oku linga ocipango cove.”+ Eye imũla eci catete oco a tumbike eci cavali. 10 Omo “liocipango”+ caco, tua kolisiwa mekonda liocilumba cetimba lia Yesu Kristu ca eciwa onjanja yimosi lika.+
11 Handi vali, ocitunda cosi ci linga upange u kola*+ eteke leteke kuenda oku eca ovilumba vimuamue+ vina okuti, lalimue eteke vi tẽla oku imũla olumue akandu.+ 12 Pole, Yesu wa eca ocilumba cakandu otembo yosi kuenda wa tumãla kondio ya Suku,+ 13 tunde opo, o kasi oku talamẽla toke eci ovanyãli vaye va kapiwa ndociliatelo colomãhi viaye.+ 14 Omo liocilumba cimosi eye wa lingisa okuti, vana va kolisiwa va lipua+ otembo yosi. 15 Handi vali, espiritu sandu li tu imbilavo uvangi, poku popia hati: 16 “‘Momo eci oco ocisila ndi ka linga lavo noke yoloneke viaco,’ oco Yehova* a popia. ‘Ndi ka kapa ovihandeleko viange vovitima viavo kuenda ndi ka vi soneha vovisimĩlo viavo.”’+ 17 Noke lia popia vali hati: “Si ka ivaluka vali akandu avo ndaño ovina vĩvi ovo va linga.”+ 18 Omo liaco, apa pali ongecelo yakandu aco, ka ci sukila vali oku eca ocilumba cekandu.
19 Omo liaco, a vamanji, omo okuti tu kuete utõi* woku iñila vonjila yocitumãlo ci kola+ omo liosonde ya Yesu, 20 yina eye a tu ikuilako* okuti onjila yokaliye, haiyo yomuenyo pocakati congumbo+ okuti etimba liaye, 21 kuenda omo okuti tu kuete ocitunda cinene ci songuila onjo ya Suku,+ 22 tu ameli lovitima via sunguluka kuenda lekolelo omo ovitima vietu via yelisiwa kowanji ũvi wutima+ kuenda etimba lietu lia sukuiwa lovava a yela.+ 23 Tu kakateli kepuluvi tu kuete lioku sapula kowiñi elavoko lietu okuti ka tu tatãla,+ momo una wa likuminya wa koleliwa. 24 Tu likapiko* pokati oco tu livetiyi locisola kuenda lovilinga viwa,+ 25 ka tu ka liwekipo oku liongolola kolohongele vietu+ ndeci vamue va lingainga, pole, tu li pamisi pokati,+ ca piãla enene omo vu lete okuti eteke li kasi ocipepi.+
26 Momo nda tu lingainga ekandu ocipango noke yoku tambula ukũlĩhĩso wa suapo wocili,+ ka ku kala vali ocilumba ci imũla akandu,+ 27 pole, ku kala lika usumba welavoko lioku sombisiwa kuenda onyeño iya ndondalu oku nyõla ovanyãli.+ 28 Wosi o tomba Ocihandeleko ca eciwa ku Mose, o fa okuti ka ku lekisiwa ohenda vuvangi wolombangi vivali ale vitatu.+ 29 Nye vu sima? Nda omunu o liatela Omõla a Suku, loku pembula osonde yocisila+ yina eye a kolisiwa layo kuenda wa fũkĩlisa espiritu liohenda ya piãla loku li sepula, omunu waco ka sesamẽla hẽ eyambulo lia piãla?+ 30 Momo tua kũlĩha Una wa popia hati: “Efetuluinyo liange; ame ndi ka fetuluinya.” Kuenda vali hati: “Yehova* o ka sombisa omanu vaye.”+ 31 Oku kupukila peka lia Suku o kasi lomuenyo, ocina cimue ci koka usumba.
32 Omo liaco, ko ka ivaliko ndomo noke lioku mola ocinyi,+ wa pandikisi kovina vialua ndaño lohali yene. 33 Olonjanja vialua wa lundiliwi loku talisiwa ohali kovaso yowiñi* kuenje olonjanja vimue wa kuatisi vana va pitavo lovitangi viaco. 34 Wa lekisi ohenda ku vana va kala vokayike, wa tavi lesanju oku pundiwa kuovina viene,+ loku kũlĩha okuti vu kuete eci ca velapo, haico ka ci pui.+
35 Omo liaco, ko ka sipo utõi wene,* una u ka nena onima yalua.+ 36 Momo ene vu sukila oku kuata epandi+ oco okuti, noke yoku linga ocipango ca Suku, vu tambula eci eye a likuminya. 37 Momo “okasimbu kaño”+ kuenda “una o laika oku iya, iya muẽle ka cilua.”+ 38 “Pole, ukuesunga wange o ka mola omuenyo omo liekolelo”+ kuenje “nda o tokoka siu sanjukila.”+ 39 Etu hatuakuakutokokako oco tu nyõliwe,+ pole, tu kuete ekolelo oco tu popele ovimuenyo vietu.
11 Ekolelo ociseveto ca pama covina vi lavokaiwa,+ hailio uvangi* wovina ka vi letiwe. 2 Omo liekolelo liaco, omanu vo kosimbu* va tambula uvangi wokuti Suku wa va tava.
3 Omo liekolelo, tu limbuka okuti oluali* lua tumbikiwa londaka ya Suku kuenje Suku wa talavaya lovina ka tu pondola oku mola oco a linge ovina tu pondola oku mola.
4 Omo liekolelo, Abele wa eca ku Suku ocilumba ca velapo okuti, ca Kaini ci sule+ kuenje pocakati cekolelo liaco, wa tambula uvangi wokuti ukuesunga, momo Suku wa tava* olombanjaile viaye+ okuti, ndaño wa fa, lopo o vangula+ pocakati cekolelo liaye.
5 Omo liekolelo, Enoke+ wa sondoluiwa oco ka ka mole oku fa kuenje ka sangiwile lakumue omo Suku wo sondolola;+ momo osimbu ka sondoluiwile wa tambula uvangi wokuti, wa sanjuisa Suku. 6 Handi vali, oku sanjuisa Suku ka ku tẽliwa te lekolelo, momo wosi amela ku Suku loku u fendela o sukila oku kolela okuti, eye o kasi lomuenyo kuenda eca onima kuava vo sanda lutima wosi.+
7 Omo liekolelo, Noha+ noke yoku tambula elungulo lia Suku liovina ka vi letiwe handi,+ wa lekisa esumbilo ku Suku kuenda wa tunga ocimbaluku+ oco a popele vakuanjo yaye; kuenda pocakati cekolelo liaco eye wa pisa oluali+ kuenje wa linga kapiñala kesunga li tunda kekolelo.
8 Omo liekolelo, Avirahama+ eci a kovongiwa wa pokola poku enda kocitumãlo a laikele oku tambula ndocipiñalo; eye wa enda ndaño ka kũlĩhĩle oku a kala oku enda.+ 9 Omo liekolelo, eye wa kala ndocingendeleyi vofeka yohuminyo ndu okuti vofeka yamãle,+ wa kala volombalaka+ la Isake kuenda Yakoba, vakapiñala kumue laye kohuminyo yimuamue.+ 10 Momo eye wa kala oku lavoka olupale lu kuete oviseveto viocili okuti, usovoli* walio kuenda utungi walio, Suku.+
11 Omo liekolelo Sara wemina* ndaño wa pitahãla anyamo,+ momo eye wa tendele okuti Una wa linga ohuminyo yaco wa koleliwa. 12 Omo liaco, kulume umosi una wa molẽhele ndu okuti ka ponduile vali oku kuata omãla,*+ kokuaye kua tunda omãla+ valua okuti ndolombungululu vio kilu kuenda ndeseke kohulo yokalunga okuti, ka li tendiwa.+
13 Vosi yavo va fa lekolelo, ndaño ka va tambuile oku tẽlisiwa kuolohuminyo;+ pole, va vi muila ocipãla,+ loku vi tambula lesanju, haivo va sapula kowiñi okuti, va kala akombe kuenda ovingendeleyi vofeka. 14 Momo vana va vangula ndoco va lekisa okuti, va kasi oku likolisilako oku sanda ocitumãlo oco ci linge onjo yavo. 15 Nda ovo vamameleko oku ivaluka ocitumãlo kuna va tunda,+ nda va kuata evelo lioku tiukila. 16 Pole, ovo va sanda ocitumãlo ca velapo okuti, cina ca tiamẽla kilu. Omo liaco, Suku ka kuete osõi yoku tukuiwa hati, Suku yavo,+ momo eye wa va pongiyila olupale lumue.+
17 Omo liekolelo, Avirahama eci a setekiwa,+ ca kala ndu okuti wa lumba Isake kuenje ulume una wa tambula lesanju olohuminyo, wa seteka oku lumba omõlaye wongunga,+ 18 ndaño co sapuiwile hati: “Eci ci ka tukuiwa ocitumbulukila* cove, ci keyilila pocakati ca Isake.”+ 19 Pole, eye wa kũlĩhĩle okuti, Suku o tẽla oku u pindula kuava va fa kuenje wo tambula ndocindekaise.+
20 Omo liekolelo, Isake wa sumũlũisa Yakoba+ kuenda Esau,+ catiamẽla kovina via laikele oku iya.
21 Omo liekolelo, Yakoba eci a pandele koku fa+ wa sumũlũisa omãla va Yosefe,+ omõla lomõla kuenje wa fendela Suku osimbu a kuatelela kombueti yaye.+
22 Omo liekolelo, Yosefe eci a laikele oku fa, wa tukula oku tunda kuomãla va Isareli Kegito kuenda wa eca onumbi* yatiamẽla kakepa* aye.+
23 Omo liekolelo, Mose noke yoku citiwa, wa selekiwa lolonjali viaye olosãi vitatu,+ momo ovo va mola okuti okamõla ka finile calua+ kuenda ka va kuatelele usumba ocihandeleko ca soma.+ 24 Omo liekolelo, Mose eci a kula,+ wa likala oku tukuiwa omõla womõla ufeko wa Fareo,+ 25 wa nõlapo oku talisiwa ohali kumue lomanu va Suku okuti, oku sanjukila asanju ekandu ana a pua pua hacoko, 26 omo a tendele esepu lia Kristu ndukuasi wa velapo okuti, ovokuasi o Kegito a sule, momo wa luluvalele koku tambula onima. 27 Omo liekolelo, eye wa siapo o Egito,+ pole, ka kuatelele usumba onyeño ya soma,+ momo wamamako oku pandikisa ndu okuti, o lete Suku una okuti lomue o pondola oku u mola.+ 28 Omo liekolelo, eye wa linga o Paskoa kuenje wa nyĩla osonde oco okuti, unyõli ka lemẽha* olonuñulu viavo.+
29 Omo liekolelo, ovo va yoka Okalunga Kakusuka ndo kongongo ya kukuta,+ pole, eci va Egito va setekavo oku ci linga, va kunduiwa lovava.+
30 Omo liekolelo, ovimbaka vio Yeriko via kupuka noke yomanu oku vi ñuala oloneke epanduvali.+ 31 Omo liekolelo, Rahava ocipuepue ka filile kumue la vakuesino, momo wa tambula olondavululi lombembua.+
32 Mopia vali nye? Momo si moli otembo yoku lombolola eci catiamẽla ku Gideone,+ la Baraka,+ la Samisone,+ Yefita,+ Daviti,+ Samuele+ kuenda ovaprofeto vakuavo. 33 Omo liekolelo, ovo va yula olosoma,+ va tumbika esunga, va tambula olohuminyo,+ va munĩhisa ovimẽla violohosi,+ 34 va imũla ongusu yondalu,+ va puluka kosipata,+ kehonguo liavo va lingisua ava va pama,+ va linga vakuonene kuyaki,+ va lundula olohoka viovanyãli.+ 35 Akãi va tambula vangandiavo va pinduka,+ pole, alume vakuavo va kangisiwa toke kolofa omo ka va tavele oku yovuiwa locisembi cimue oco okuti, va kuata epinduko lia velapo. 36 Ocili, vakuavo va talisiwa ohali lesepu, loku tipuiwa ocili, handi vali va kutiwa lalienge+ loku kapiwa volokayike.+ 37 Va sosũiwa lovawe,+ va setekiwa, va selaliwa volonepa vivali,* va pondiwa losipata,+ va ñuala ñuala okuti va wala ovipa violomeme lovipa violohombo,+ va sukile, va talisiwa ohali,+ va tatiwa lãvi;+ 38 kuenda oluali ka lua sesamẽlele oku kuata omanu vaco. Va tungayala vakalasoko, volomunda, valeva+ kuenda valungi o kilu lieve.
39 Kuenje vosi ava ndaño va imbiwila uvangi uwa omo liekolelo liavo, pole, ka va tambuile oku tẽlisiwa kuohuminyo, 40 momo Suku wa sokolola oku tu ĩha cimue ca velapo+ oco okuti, ovo ka va lipui lika liavo, te kumue letu.
12 Omo okuti tua ñualiwa lelende linene liolombangi, tu liupivo ocilemo cosi lekandu li tu tanga tanga+ kuenda tu lupuki lepandi oku lupuka kua tu kapiwila,+ 2 osimbu tu luluvalela Kusongui wa Velapo haeye Ukuakukanguisa ekolelo lietu okuti, Yesu.+ Omo liesanju lio kapiwila, wa pandikisa kuti wekangiso,* wa pembula osõi kuenje wa tumãla kondio yocalo ca Suku.+ 3 Sokololi una wa pandikisa lombangulo yaco yesepu ya vakuakandu+ yina yi va pisa ovo muẽle okuti, ka vu kavi ndaño oku liwekapo.+
4 Kuyaki wene lekandu, ene handi lalimue eteke wa tamalãleli toke eci osonde yene yi pesiwa. 5 Ene wa ivaliko muẽle elungulo Suku a eca kokuene ndomãla vaye liokuti: “Amõlange, ku ka pembule epindiso lia Yehova,* ndaño oku liwekapo eci o lunguiwa laye; 6 momo Yehova* o pindisa vana eye a sole, ocili, eye o tipula* wosi una eye a tambula ndomõlaye.”+
7 Ohali yosi vu pandikisa layo, yi tendi ndepindiso. Suku o vu tati ndomãla.+ Omo liaco, omõla upi ka pindisiwa la isiaye?+ 8 Pole, nda ene ka vu pindisiwa lepindiso vosi va tambula, vumãla voku lumbula kuenda havumãlako vocili. 9 Handi vali, va isietu palo posi* va enda oku tu pindisa kuenje tua enda oku va sumbila. Isietu hẽ una o songuila omuenyo wetu lunene waye u kola, siti tu sukila oku u sumbila vali enene?+ 10 Momo va isietu palo posi va tu pindisa vokatembo kamue ndomo ca va sungulukilile, pole, isietu una o songuila omuenyo wetu o ci lingila oku tu kuatisa oco okuti, tu kola ndeci eye a kola.+ 11 Ocili okuti, lalimue epindiso li sanjuisa vepuluvi liaco, pole, olio li koka evalo,* puãi vana va pindisiwa lalio, noke li va nenela ombembua yi tunda kesunga.
12 Omo liaco, pamisi ovaka a leñela kuenda olongolo via hongua,+ 13 loku amamako oku suñamisa olonjila violomãhi viene+ oco okuti, ocimatamata ca lemẽhiwa ka ci livokiya, pole, ci sakuiwa. 14 Amamiko oku kala lombembua lomanu vosi+ kuenda oku kola,+ momo omunu nda ka koli ka moli Ñala. 15 Lunguki oco lomue ka ka pumbe oku tambula ohenda ya piãla ya Suku oco okuti, laumue olumbombo lu kuete inenu lu yova pokati kene oku vu kokeli ovitangi kuenda valua va vĩhisua laluo;+ 16 kuenda lavululi okuti lomue pokati kene o kala ukuevĩho liukahonga,* ale umue ka kapeleko ovina vi kola nda Esau wa eca unuñulu waye omo lielonga limosi liokulia.+ 17 Momo wa kũlĩhi okuti noke, eci eye a yonguile oku piñala esumũlũho, ka taviwile; kuenje ndaño wa likolisilako oku seteka oku pongolola ovisimĩlo* lasuẽlẽla,+ ka ca tavele.*
18 Momo ene ka wameleli komunda yimue okuti yi tava oku lambiwa,+ haiyo yi kuete ondalu yi taima,+ lelende li tekãva, pamue owelema, ale ehunguhungu,+ 19 kuenda ocileñi columbeta,+ lolondaka via yeviwa oku upisa kilu+ okuti, omanu poku vi yeva va pinga okuti, lacimue ci popiwa vali kokuavo.+ 20 Momo ovo ka va tẽlele oku linga eci ca handelekiwa okuti: “Ndaño ocinyama ca tema, nda ci lamba komunda ci sosũiwa lovawe.”+ 21 Handi vali, ulandu waco wa koka usumba calua okuti, Mose wa popia hati: “Ñasi lusumba loku luluma.”+ 22 Pole, ene wameli Komunda Siono+ olupale lua Suku o kasi lomuenyo okuti, o Yerusalãi yo kilu+ kuenda kovangelo ka va tendiwa,* 23 haene wa liongololi+ kekongelo liolonuñulu via sonehisiwa kovailu kuenda ku Suku Onganji ya vosi,+ koviluvo viespiritu+ okuti, vakuesunga haivo va lipua,+ 24 kuenda ku Yesu mitakati+ yocisila cokaliye+ kuenda yosonde ya nyĩliwa yina yi vangula lonjila yimue ya velapo okuti, osonde ya Abele yi sule.+
25 Lunguki oco ka vu ka likali oku yeva* una o kasi oku vangula. Momo nda vana va likala oku yeva una eca elungulo lia Suku palo posi ka va pulukile, ca piãla enene etu, ka tu ka puluka nda tua yanduluka una o vangula tunde kovailu!+ 26 Votembo yaco, ondaka yaye ya tuñunya ongongo,+ pole, cilo eye wa likuminya hati: “Yimue vali onjanja, si ka tuñunya lika ongongo, pole, ndi ka tuñunyavo ilu.”+ 27 Ondaka yokuti “yimue vali onjanja,” yi lekisa okuti, Suku o ka imũla ovina vi lulumisiwa vina okuti, ka via lulikiwile la Suku, pole, ovina ka vi lulumisiwa vi amamako. 28 Omo okuti tu ka tambula Usoma umue ka u lulumisiwa, tu amamiko oku tambula ohenda ya piãla yina okuti, pocakati calio tu linga upange u kola okuti u taviwa la Suku, loku sumbila Suku kuenda oku liketisa. 29 Momo Suku yetu eye ondalu yi nyõla elisi.+
13 A vamanji, ocisola cene coku sola vamanji camameko.+ 2 Ko ka ivaliko oku yekisa akombe,*+ momo vamue poku ci linga va yekisa ovangelo ndaño ka va ci kũlĩhĩle.+ 3 Amamiko oku ivaluka vana va kasi vokayike*+ ndu okuti, vu kasivo vokayike kumue lavo+ kuenda vana va kasi oku tatiwa lãvi, momo ene muẽle vu kasivo vetimba.* 4 Olohuela vi sumbiwe pokati ka vosi kuenda olohuela ka vi ka vĩhisue,+ momo Suku o ka sombisa vakuevĩho liukahonga* la vakahokolo.+ 5 Ko ka soli olombongo,+ pole, sanjukili ovina vu kuete cilo.+ Momo Suku wa popia hati: “Ame lalimue eteke hu sia, ale oku ku yanduluka.”+ 6 Oco tu kuate utõi walua loku popia hati: “Yehova* eye oñuatisi yange; si ka kuata usumba. Omunu hẽ o ndinga nye?”+
7 Ivaluki vana va songola pokati kene,+ haivo vo sapuili ondaka ya Suku kuenda osimbu vu mola ovituwa viavo viwa, setukuli ekolelo liavo.+
8 Yesu Kristu ka pongolokele tunde hẽla, toke etali kuenda otembo ka yi pui.
9 Ko ka yapuisiwi lalongiso aiñi aiñi hao a tunda kuiñi kuiñi, momo ca sunguluka nda utima u pamisiwa lohenda ya piãla okuti, ovilia* vi sule, vina ka vi kuatisa vana va sakalala lavio.+
10 Tu kuete utala umue okuti, vana va linga upange u kola vombalaka, ka va kuete omoko yoku liako.+ 11 Momo atimba ovinyama vina okuti, osonde yavio yambatiwa kocitumãlo ci kola ndocilumba cakandu okuti, yeciwa locitunda cinene, a timĩhiwila kosamua yocilombo.+ 12 Omo liaco, Yesu wa talisiwilavo ohali kosamua yombundi yolupale+ oco a kolise omanu losonde yaye muẽle.+ 13 Tu endi kokuaye kosamua yocilombo, oco tu sepuiwe ndeci eye a sepuiwa,+ 14 momo kulo ka tu kuete olupale lu tumãla otembo yalua, pole, tu kasi oku lavoka lutima wosi olupale lu laika oku iya kovaso yoloneke.+ 15 Pocakati caye, tu eci ocilumba cesivayo ku Suku+ olonjanja viosi okuti, epako liovimẽla vietu+ vina vi sapula onduko yaye ku vakuetu.+ 16 Handi vali, ko ka ivaliko oku linga eci ciwa loku kuatisa vakuene lovina vu kuete,+ momo Suku o sanjukila ovilumba viaco.+
17 Pokoli ku vana va songola pokati kene+ loku tava kokuavo,+ momo va kasi oku amamako oku vu lavi ndava va ka sombisiwa+ ndomo ci likuata lovilinga viavo, oco va ci linge lesanju halokulisiõsiõlako, momo eci nda ka cu kuatisi.
18 Amamiko oku tu likutililako, omo tua kolela okuti tu kuete owanji wutima wa yela,* osimbu tu likolisilako oku kala vakuacili kovina viosi.+ 19 Pole, ndi vu vetiyi okuti, vu likutilila oco okuti niuliwa kokuene lonjanga.
20 Kaliye Suku yombembua una wa pindula kuava va fa ungombo wa velapo+ wolomeme okuti, Ñala yetu Yesu, losonde yocisila ka ci pui, 21 a vu malẽhi lovina viosi viwa oco vu lingi ocipango caye okuti, pocakati ca Yesu Kristu eye o tu vetiya oku linga eci cu sanjuisa, kokuaye ku kale ulamba otembo ka yi pui. Amene.
22 A vamanji, ndu pingi oco vu yeveleli lepandi ondaka eyi yelembeleko, momo ndo soneheli okokanda kamue. 23 Ndi yongola oco vu kũlĩhi okuti, manjetu Timoteo vo weca. Nda eye weya ndopo, tu iyilila kumosi oco tu vu moli.
24 Eci ovilamo viange ku vosi vana va kasi oku songola pokati kene kuenda kolosandu viosi. Vana va kasi vo Italia+ vo tumisi ovilamo.
25 Ohenda ya piãla yi kale lene vosi.
Ale “olotembo.” Tala Elomboluilo.
Ale “vakuakulingila upange omanu.”
Ale “liesunga.”
Ale “oku talavayela owiñi.”
Ale “ovilimbu.”
Tala Alombo. A5.
Lit., “ombuto.”
Ale “elaleko.”
Okuti, Yesu.
Ale “oku kala vomunga kumue la.”
Lit., “oku kala lusumba.”
Ale “ohenda; esunguluko.”
Ale “vakuesino.”
Lit., “Eci a kala vetimba liositu.”
Lit., “omo liotembo.”
Ale “uloño wavo woku sokolola.”
Lit., “ovilinga via fa.”
Ale “oloneke viya.” Tala Elomboluilo.
Ale “elungulo.”
Ale “oku tundila olunda.” Lit., “oku livondela.”
Lit., “oku tepela.”
Ale “otembo yenda ño hũ.”
Ale “usongui wepata.”
Lit., “oku tunda koviongo.
Lit., “voviongo.”
Ale “etimba.”
Tala Alombo. A5.
Ale “ka liveli.”
Ale “una wa eciwa ndonjeke.”
Ale “ukuakulingila upange omanu.”
Tala Alombo. A5.
Ale “upange woku kuatisa omanu.”
Tala Alombo. A5.
Tala Alombo. A5.
Tala Alombo. A5.
Tala Alombo. A5.
Ale “ombolo ya taliwa.”
Ale “onuviko yoku linalisa; ocitumãlo coku tuvika akandu.”
Lit., “apapatiso alua.”
Ale “onãle.”
Lit., “oku tumbikiwa.”
Ale “ociña.”
Ale “oku lingila upange omanu.”
Ale “olotembo.” Tala Elomboluilo.
Ale pamue, “omanu.”
Lit., “vociña celivulu.”
Ale “oku lingila upange omanu.”
Tala Alombo. A5.
Ale “oku kolela.”
Lit., “oku tumbika.”
Ale “oku sakalala; oku sokolola.”
Tala Alombo. A5.
Lit., “wa kapiwi ndetalula.”
Lit., “oku lianja koku vangula.”
Ale “uvangi wa koleliwa.”
Ale “vakukululu yetu.”
Ale “olotembo.” Tala Elomboluilo.
Ale “oku eca uvangi poku limbuka.”
Ale “omesele.”
Ale “wa tambula unene woku mina lombuto.”
Ale “wa molẽhele okuti, wa fa ale.”
Lit., “ombuto.”
Ale “ocihandeleko cimue.”
Ale “oku kendiwa.”
Lit., “oku lamba.”
Ale “oku soyuiwa pokati.”
Tala Elomboluilo.
Tala Alombo. A5.
Tala Alombo. A5.
Ale “oku kangisa.”
Lit., “va isietu ketimba.”
Ale “esumuo.”
Tala Elomboluilo, “Evĩho liukahonga.”
Okuti, ocisimĩlo ca isiaye.
Lit., “ka sangele evelo.”
Ale “akũi kolohuluwa liolohuluwa.”
Ale “oku lisandela esunga; oku pembula.”
Ale “oku lekisa ohenda kocingendeleyi.”
Lit., “vana va kapiwa kalienge.”
Ale pamue, “ndu vu talisiwa ohali kumosi lavo.”
Tala Elomboluilo, “Evĩho liukahonga.”
Tala Alombo. A5.
Okuti, oviholo viatiamẽla kokulia.
Lit., “uwa.”