Ocipama 17
Oco Ove Okale Ekamba, Te Wakuatavo Ukamba
Ukamba umue okuti ukuete ociseveto vocisola. Ocili ceci okuti, osimbu handi wamamako oku kũlĩha eci catiamẽla ku Yehova, haicovo ocisola cove leye camamakovo okuti cilua. Poku kula kuocisola cove la Suku, haimovo onjongole yove yoku u vumba yikulila. Eci cika ku kuatisa oku kala ondonge ya Yesu Kristu. (Mateo 28:19) Voku linga onepa yepata liasanjuka Liolombangi via Yehova, cika kulelukila oku amamako ku kamba wove la Suku otembo yenda hũ. Nye ove osukila okulinga?
Ove osukila okulekisa ocisola cove ku Suku poku pokola kovihandeleko viaye. “Oku sola Suku kua lomboloka oku pokola kovihandeleko viaye. Ovihandeleko viaye ka vi lemi.”—1 Yoano 5:3.
Kapako ovina viosi ove walilongisa. Yesu pokulombolola ondaka eyi waeca olusapo hati. Ulume umue waloñoloha watungila onjo yaye kilu liewe. Osimbu okuti ulume ukuavo eveke watungila onjo yaye kilu lieseke. Vokuiya kuocipepe cimue cilingisa usumba kumosi lovava, onjo yina yatungiwila kilu liewe kayakupukile, osimbu okuti onjo yina yatungiwila kilu lieseke haico muele yakupuka olumue vonjanja yimosi. Yesu walinga hati wosi una oyevelela lutate eci eye alongisa kuenda ocilinga poku cikapako walisoka ndulume una waloñoloha watungila onjo yaye kilu liewe. Osimbu okuti wosi una oyevelela kuenda ka kapiko okulinga eci ayeva walisoka ndulume eveke watungila onjo yaye kilu lieseke. Pokati kava va vali ulume upi hẽ ove oyongola okuti eye olisokisa laye?—Mateo 7:24-27.
Okulitumbika. Eci cilomboloka oku lieca ku Yehova vohutililo kuenda oku vangula laye okuti ove oyongola oku linga onjongole yaye otembo yenda hũ. Loku linga ocipango ca Suku eci cilekisa okuti ove u ndonge ya Yesu Kristu.—Mateo 11:29.
Epapatiso. “Papatisiwa. Vilikiya onduko yaye okuti o yelisua kakandu ove.”—Ovilinga 22:16.
Vokulieca olumue muakongelavo oku vumba Suku. “Upange wene, nda we, nda we, u lingi ciwa ndava va vumba Yehova, ndava va vumba omanu hacoko (NW ).”—Va Kolosai 3:23.