Ocipama 18

Kala Ekamba Lia Suku Otembo Yenda Hũ!

Cisukila oku likolisilako poku kuata ekamba; haicovo cisukila okulikolisilako oco okale ekamba. Epandi liove lioku pongoloka kuenda lioku amamako loku kala ekamba lia Suku likala esumũlũho limue kalitendiwa ko kuove. Yesu wavangula lavana vosi vatava kokuaye hati: “Ocili cu yovola.” (Yoano 8:32) Eci hẽ cilomboloka nye?

Ove opondola oku kuata eyovo cilo muele. Oyovoka kalilongiso esanda kuenda kovohembi ana asandekiwa la Satana. Handi vali oku tuluiwavo kasipato añi añi alitangeleka vovimuenyo violohuluwa viomanu vana ka va yongola oku kulĩha Yehova. (Va Roma 8:22) Okuamisako vali akamba va Suku vakuata epopelo kueci catiamẽla ‘kusumba wokufa.’​—⁠Va Heveru 2:​14, 15.

Ove opondola oku kuata eyovo volondaka viwa via Suku. Hesanjukuolio ove oka pondola oku kuata omo lieyovo likeya kotembo yaco! Vofeka Yelau palo posi, lalimue eteke muka kala vali ovoyaki, ovoveyi, kuenda ungangala. Epopelo kuhukũi kumosi lonjala. Epopelo koku kuka kuenda ko lofa. Epopelo kusumba, kasiliya kuenda ovina viosi kaviasungulukile. Embimbiliya lilombolola eci catiamẽla ku Suku liti: “O nyanyumula eka liove, kuenje o kutisa viosi vi kasi lomuenyo.”​—⁠Olosamo 145:⁠16.

Akamba va Suku vaka kuata omuenyo ko pui. Omuenyo ko pui ombanjaile yimue okuti oyo Suku akaeca komanu vosi vana vasandiliya ukamba laye. (Va Roma 6:23) Sokolola handi eci cikalomboloka oku kuata omuenyo ko pui!

Ove oka kuata otembo yoku linga ovina vialua. Pamue oyongola calua oku lilongisa ndomo opondola okusika vimue ovikete viovisikilo. Pamue ove oyongola oku lilongisa umesele woku taya oviluvialuvia vovimano kuenda volopapelo ale oku kala omesele yoku panga olomangu kuenda ovikuata vikuavo viovonjo. Ale pamue oyongola oku lilongisa eci catiamẽla kovinyama kuenda kovikũla. Handi vali, citava okuti oyongola okuñualañuala kuenda oku kulĩha olofeka vikuavo loku kũlĩha omanu vaco. Voku kuata omuenyo ko pui cika kuecelela oku linga ovina evi viosi!

Ove oka kuata otembo yoku linga ukamba walua. Omuenyo wenda hũ uka kuecelela oku kũlĩha omanu valua vana okuti vapongoloka akamba va Suku. Oka kũlĩhisa ciwa ovoloño vavo kuenda ovituwa viavo viwa, loku kalavo akamba vove. Oka vakuatela ocisola calua, osimbu ovo vaka kukuatelavo ocisola. (1 Va Korindo 13:⁠8) Loku kuata omuenyo ka ukuete esulilo cika kuiha epuluvi lioku kala ekamba liavosi palo posi! Cimue cavelapo vali ceci okuti, ukamba wove la Yehova uka amamako lokupama vokuenda ale vokupita kuovita vianyamo. Citava okuti ove okala ekamba lia Suku otembo yenda hũ!