EPULILO 5

Nye Ndi Sukila Oku Linga Nda Akamba vo Kosikola va Ndi Sanumula?

ESUNGA LIECI OKU SOKOLOLA EPULILO ELI CI KUETELE ESILIVILO

Ocituwa o lekisa poku tambulula omunu umue, ci tulumula ovitangi, ale vi livokiya.

NYE O SUKILA OKU LINGA?

Sokolola ulandu u kuãimo ndoco: Umalẽhe umue o tukuiwa hati Leonardo, etaili ale hẽla, ka yongola oku enda kosikola, kuenda o kuete ocisimĩlo coku liwekapo oku tanga. Momo, pa pita ale olosãi vitatu tunde eci akamba vaye vo kosikola va fetika oku u sanumula. Tete, akamba vaco, va sandeka komanu vakuavo ovina ka via sungulukile viatiamẽla kokuaye. Noke, vo luka olonduko ka via sungulukile oco vo sanumule. Olonjanja vimue pokati kakamba vaye pa kala umue o kupuila posi alivulu aye, kuenje o likembisa ndu okuti, ka ci lingile ocipango. Olonjanja vikuavo pokati kakamba vaye pa tunda umue u leñula, kuenje eci a votoka, ka tẽla oku limbuka omunu wo leñula. Koloneke vilo, ocituwa coku sanumula ca li vokiya calua. Momo eteke limue omunu umue wa sapuila Leonardo vo Internet olondaka vimue vio sumuisa calua . . .

Nda ove wa kalele Leonardo nye nda wa linga?

SOKOLOLA LUTATE!

Lekisa ocituwa cimue okuti, nda va ku sanumula, o yuvula oku yaka! O pondola oku kuama olonjila via litepa.

KU KA YAKE. Embimbiliya li popia hati: “Eveke li lekisa onyeño yaye yosi, ukualondunge puãi o yi likandangiya.” (Olosapo 29:11) Seteka oku likandangiya. Nda wa ci linga, citava okuti, omunu o yongola oku ku sanumula, o liwekapo oku ci linga.
KU KA FETULUINYE. Embimbiliya li popia hati: “Ko ka fetuluinyi umue cĩvi leci cĩvi.” (Va Roma 12:17) Oku fetuluinya ku vokiya ovitangi.
YUVULA OVINA VI KOKA OVITANGI. Embimbiliya li popia hati: “Omunu wa lunguka o mõla ũvi kuenje o lisalamisa.” (Olosapo 22:3) Yuvula oku kala lomanu vana okuti, va pondola oku ku kokela ovitangi. Yuvulavo ovina vi vetiya omunu oku ku sanumula.
POPIA ONDAKA YI KOMÕHISA OMUNU O YONGOLA OKU KU SANUMULA. Embimbiliya li popia hati: “Etambululo liombembua li tulumũla ocikumbiti.” (Olosapo 15:1) O pondola oku popia ovina vi sanjuisa omanu. Nda omunu umue oku sanumula, kuenje oku sapuila hati, ove wa lẽla calua, u tambulula lesanju poku popia ndoco: “Omo okuti nda lẽla, ndi sukila oku pokuisa etimba liange, oco ndi tepuluke olokilu vimue.”
KUENDE, POLE KU KA POPIE CIMUE. Ufeko umue o tukuiwa hati Nádia, o kuete 19 kanyamo wa popia hati: “Nda omunu o yongola oku ku sanumula wa limbuka okuti ku eci etambululo limue, o sima okuti, ove o kuete olondunge, kuenda wa pama calua okuti, eye ci sule. Momo, ceca uvangi wokuti, ove o tẽla oku likandangiya, kuenda o kuete ovituwa via litepa levi viaye.”—2 Timoteo 2:24.
KUATA UTÕI. Omanu vana va sole oku sanumula vakuavo, va siata oku limbuka vana ka va kuete utõi. Kuenje, va sima okuti, nda va sanumula umue, ka kuata utõi woku liteyuila. Pole, nda va limbuka okuti, ka va tẽla oku sanumula omunu waco, va liwekapo oku ci linga.
SAPELA LOMUNU UMUE CATIAMẼLA KOCITANGI CACO. Ukãi umue wa kala ulongisi wo kosikola wa popia hati: “Nda siata oku vetiya amalẽhe vana va sanumuiwa, oco va sapuile ocitangi caco komunu umue va kolela. Nda va ci linga, ci kuatisa omanu vakuavo oku yuvula oku pita lovitangi viaco.”

Umalẽhe umue o lekisa utõi osimbu a kasi oku sanumuiwa — Oku likolela ove muẽle, ci ku kuatisa oku kuata utõi okuti, ka u sokisiwa lowu womunu una o yongola oku ku sanumula

Wa Ci Kũli̇̃ha?

Voku sanumuiwa ka mua kongelele lika oku tipuiwa. Pole, mua kongelavo ovina vikuavo ndeci:

Olondaka vĩvi. Ufeko umue o tukuiwa hati Celine, o kuete 20 kanyamo wa popia hati: “Lalimue eteke ndivalako olondaka vĩvi akamba vange vo kosikola va ndi popele, kuenda olonduko vĩvi va ndi luka. Nda kala ndomunu umue ka kuete esilivilo, kuenda nda simĩle okuti, lomue o ndi sole. Nda va ndi vetele, nda sia kuatele evalo lialua ndolondaka nda yeva.”
Oku yuvuiwa lakamba. Ufeko umue o tukuiwa hati Helen, o kuete 18 kanyamo wa popia hati: “Akamba vange vo kosikola va fetika oku ndi tila. Nda ndi yongola oku tumala komesa yimuamue lavo velivala liepuyuko kosikola, va ndi sapuila vati, ku kuete apa o tumala. Ndaenda oku lila calua omo lioku lia onanya likaliange vokuenda kunyamo wosi.”
Onjila yikuavo yoku sanumuiwa. Umalẽhe umue o tukuiwa hati Daniel, o kuete 14 kanyamo wa popia hati: “O sukila lika oku tumisa esapulo limue lĩvi komunu umue okuti, eci a li tanga, li nyola ekalo liaye, ale liu tuala kolofa. Esapulo eli li moleha ndu okuti liuhembi. Pole, omanu va siata oku pita lovitangi via tukuiwa ndeti!”

**Nye Wa Kũli̇̃ha Catiamẽla Koku Sanumula**
KŨLĨHĨSA OLONDAKA VIOCILI LEVI VIUHEMBI	ATAMBULULO
1 Pa pita ale anyamo alua tunde eci ocituwa coku sanumula ca fetika mulo voluali.	1 Ocili. Momo, Embimbiliya li tukula omanu vamue va kala olongangala okuti, va tukuiwa vati, ovindululu. Onduko yavo yi lomboloka “omanu vana va kuete ocituwa coku tipula vakuavo.”—Efetikilo 6:4.
2 Oku sanumula omapalo yimue ya sunguluka, kuenda ka yi koki ovitangi.	2 Uhembi. Amalẽhe vamue va siata oku liponda omo lioku va sanumula.
3 Oco o tile omunu umue o yongola oku ku sanumula, o sukila oku u fetuluinya.	3 Uhembi. Olonjanja vimue omunu ukuakusanumula vakuavo o kuete ongusu yalua okuti, ya una o sanumuiwa yi sule. Ndaño eye wa seteka oku fetuluinya, pole, ka yuli.
4 Nda wa mola omunu umue o kasi oku sanumuiwa, kala ndu okuti kuomuile.	4 Uhembi. Nda ove wa mola omunu o kasi oku sanumuiwa, ku kuata utõi woku kala ndu okuti kuo muile. Nda wa mola omunu umue o kasi oku sanumula ukuavo, kuenje ku sapula ocitangi caco komunu ukuavo, ci lekisa okuti, wa sanjukila ovina viaco vĩvi, kuenda ku yongola oku kuatisa omunu va kasi oku sanumula.
5 Ndaño okuti omanu vamue vakuakusanumula vakuavo va siata oku lipanda, pole, ka va kuete utõi.	5 Ocili. Omanu vamue vakuakusanumula vakuavo va siata oku sima okuti, va kuete ongusu yalua. Omo okuti ka va kuete utõi, va siata oku linga ovina vĩvi komanu, oco va sime okuti, va velapo vakuavo.
6 Omanu vana va kuete ocituwa coku sanumula vakuavo, va pondola oku pongoloka.	6 Ocili. Omanu vana va siata oku sanumula vakuavo, va pondola oku linga apongoloko nda va kuatisiwa.