Eliapu li Yonja Yesu

Yesu noke yoku papatisiwa, espiritu sandu lio songuila vekalasoko. Eye ka lile lacimue vokuenda kueci ci soka 40 koloneke kuenje wa yeva onjala yalua. Noke Eliapu lieya oco liuyonje kuenje lio sapuila hati: ‘Nda ove Vumõla a Suku, sapuila ovawe a-a oco a pongoloke olombolo.’ Pole, Yesu wa tambulula poku tukula Ovisonehua hati: ‘Ca sonehiwa okuti ku sukila lika okulia oco o kale lomuenyo. O sukilavo oku yevelela olondaka viosi Yehova a popia.’

Noke Eliapu lia sapuila Yesu hati: ‘Nda ove Vumõla a Suku, tẽha kilu liocimbaka ca lepa conembele. Momo ca sonehiwa okuti Suku o tuma ovangelo vaye oco va ku kuate.’ Pole, Yesu wa tukula vali Ovisonehua hati: ‘Ca sonehiwa okuti ku ka seteke Yehova.’

Noke Satana wa lekisa ku Yesu ovosoma osi oluali, lovokuasi alio kuenda ulamba walio kuenje wa popia hati: ‘Ndu ku ĩha ovosoma aco osi kuenda ulamba walio, nda wa ndi fendela ño onjanja yimosi.’ Pole, Yesu wa tambulula hati: ‘A Satana, nunde! Momo ca sonehiwa okuti fendela lika Yehova.’

Omo liaco, Eliapu lio siapo kuenje ovangelo veya, va eca ku Yesu okulia oco a lie. Tunde vepuluvi liaco, Yesu wa kunda olondaka viwa Viusoma. Upange waco owo a tumiwa oku linga palo posi. Omanu va solaile ovina Yesu a enda oku va longisa kuenje ovo va enda oku u kuama kuosi a siatele oku enda.