Olondaka Vioku Fetika

Elivulu losapi Ovisonehua vi Songuila Omuenyo Wukristão, li ka ku kuatisa oku sanga lonjila yimue ya leluka ovinimbu Viembimbiliya kuenda ovolandu a ku kuatisa oku liyaka lovitangi komuenyo wove. Olio li ka ku kuatisavo oku sanga ovolandu Embimbiliya a suapo, oco o vetiye lao vakuene, loku va kuatisa oku nõla olonjila vi eca esivayo ku Yehova. (Tala okakasia losapi “Ndomo o Linga Akonomuiso Velivulu Eli.”) Ove o ka sangamovo ovisonehuwa vialua vialungulo, violonumbi kuenda vielembeleko ove o sukila Viondaka ya Suku. O pondolavo oku sangamo ovinimbu vimue Viembimbiliya oco o kuatise loku vetiya lavio vakuene.

Ndomo o Talavaya Lelivulu Eli

Oco o sange osapi yimue, kũlĩhĩsa pokakasia koku konomuisa ale oku konomuisa olonepa viaco. Elivulu losapi Ovisonehua vi Songuila Omuenyo Wukristão, lia tepiwa volonepa epanduvali: Ovitangi, Ekalo, Ekongelo, Omuenyo Weteke Leteke, Epata, Konepa Yespiritu kuenda Ovituwa. Otulosapi tualua, tu sangiwa vemẽhi lionepa lonepa. Nõla osapi o kasi oku sandiliya. Nda ove o kuete atatahãi atiamẽla konepa o yongola oku konomuisa, taya ondaka Viosi oco o sange osapi o yongola oku konomuisa velivulu liaco. Pokasapi lokasapi o ka sangapo ulala wotulosapi tuolondaka vi tekãva. Olondaka vimue asapulo; vikuavo apulilo. Poku tanga ovinimbu via tukuiwa okuti vi tekãva, vi likuãi losapi, sokolola ndomo ovio vi kuatisa poku tambulula epulilo. Otulosapi tumue, tua tepiwa vovilala oco vi ku kuatise oku sanga olonumbi ove o kasi oku sanda lonjanga. Olonjanja vimue, ovinimbu viokuti “Talavo,” via kongeliwamovo. Ovio vi eca ovisimĩlo vi likuata losapi. Olonjanja vimue, o ka sangavo osapi “Ovolandu Embimbiliya a kuete Esilivilo lialua.” Olondaka vimue vi situlula etosi lia velapo ale ulandu wocisonehua ca tukuiwa. Olondaka viaco, vi ka ku kuatisa oku kũlĩha eci o yongola poku tanga vovinimbu viaco.

Ocili okuti, kuli ovinimbu vialua Viembimbiliya vi tiamisiwila konepa lonepa okuti, evi via tukuiwa Velivulu eli vi sule. Pole, eli efetikilo liwa li ku kuatisa oku linga akonomuiso. (Olo 2:1-6) Oco o lilongise ondongosi, kuama ovisonehua vikuavo kuenda atosi elilongiso Vembimbiliya li Kola-Epongoluilo Lioluali Luokaliye. Talavaya Lelivulu Lioku Konomuisa Liolombangi Via Yehova ale lo Índice das Publicações da Torre de Vigia, oco o lilongise ovina vikuavo viatiamẽla kocisonehua caco ale ndomo ci kapiwako. Konomuisa ovimalẽho viokaliye via sandekiwa oco o kuate elomboloko lia suapo liocili Cembimbiliya.

Elivulu losapi Ovisonehua vi Songuila Omuenyo Wukristão, li ku kuatisa oku limbuka olondunge, ukũlĩhĩso kuenda elomboloko vi sangiwa Vovisobehua vi Kola. Osimbu o talavaya lelivulu eli, o ka limbuka okuti “ondaka ya Suku yi kasi lomuenyo kuenda yi kuete unene.”—Hev 4:12.