Pi Ove Opondola Oku Sanga Ombembua Yovutima?

Calitepa calua pokati kotembo yilo lotembo ya Thoreau, una wa tukuiwa vonepa yo konyima. Elitepiso lialua likasipo lieli okuti etaili alungulo ka a titoko, ndomo ku sangiwa ombembua yovutima. Vakuoloño woku sima, la vakuakusoneha alivulu avo ana ekuatiso, ndeci ukanda wasapulo, vaeca ovisimilo viavo. Elungulo liavo citava okuti likala la kamue okakuatiso; momo oku ci potolola cambata otembo yalua, pole, kuli vali cimue okuti ci sukiliwa calua. Eci oco ca vangula omunu lomunu vonepa ya lomboluiwa konyima.

ANTONIO, la Marcos, la Gerson, la Vania, kuenda Marcelo, va tundilila kalongiso ovituwa a litepa calua, kuenda va kuata ovitangi viñi viñi. Pole ovo va kuata lika okavina ka tatu katito ka siata. Tete, kuakala otembo yimue okuti ovo ‘ka va kaile lelavoko, kuenje omo va kala voluali, ka va kulihile Suku.’ (Va Efeso 2:12) Cavali, ovo vakala loku sanda ombembua yovutima otembo yalua. Kuenda tatu, vosi yavo va sanga lika ombembua yovutima noke, eci va tava elilongiso Liembimbiliya Lolombangi via Yehova. Eci ovo vamamako, noke va limbuka okuti Suku wa va kuatela onjongole. Oku vokiyako, ndomo Paulu a lomboluila va Atenasi vokoloneke viaye, hati Suku “ka kasi ocipãla letu vosi omunu omunu.” (Ovilinga 17:27) Oku limbuka eci locili oco onjila ya velapo yoku kuata ombembua yovutima.

Momo Lie Kukasilili Ombembua Yitito?

Embimbiliya li tu iha asunga avali a lekisa momo lie ku kasilili ekambo liombembua voluali, ndeci ombembua yovutima ale ombembua pokati komanu. Lia tete lia lomboluiwa ko Yeremiya 10:23 okuti: “Omunu enda ka tela eye muele oku suñamisa okuenda kuaye.” Omunu ka kuete elomboloko liasuapo ndaño uloño woku liviala eye muele okuti lekuatiso lakamue, puãi ekuatiso liocili litunda lika ku Suku. Omanu vana okuti ka va kasi loku kuama onumbi ya Suku kava ka kuata ombembua yenda hu. Esunga lia vali liekambo liombembua li mõlehela volondaka viupostolo Yoano okuti: “Oluali luosi lukasi povaka Eliapu.” (1 Yoano 5:19) Nda kakua kaile okuendisiwa la Suku, alikolisilo omanu aco ku sangiwe ombembua olonjanja viosi, ci ka ponya mekonda liovilinga viayu ka muiwa pole eye okasiko muele ocili kuenda lunene walua ‘wondingaivi,’ Satana.

Vasunga avali ndeti okuti omanu ka va sandiliya oku songuiwa la Suku, kuenda okuti Satana wa pama calua voluali lulo, epata liosi liomanu likasi vekalo limue lilingisa ohenda. Upostolo Paulu wa ci lombolola ciwa, hati: “Momo tua kuliha okuti, toke cilo, ovina viosi via lulikiwa vi yavalela kumuamue olongembia.” (Va Roma 8:22) Helie o patãla olondaka evi? Volofeka vina okuti muli ovokuasi kuendavo muna okuti muli ovohukui, ovitangi viepata, lundululu, leci hesungako, lovoyaki omunu lukuavo omo lioku litepa kovituwa, lakambo ovikulia, loku lisuvuka kuapata, onya, ovoveyi, kuenda vali vikuavo, vi nyana ombembua vutima.

Papa Pasangiwa Ombembua Yovutima

Eci Antonio, la Marcos, la Gerson, la Vania, kuenda Marcelo, eci va fetika oku lilongisa Ondaka ya Suku, Embimbiliya, va limbuka okuti ovimuenyo viavo via pongoloka. Va lilongisavo okuti ekalo lioluali eteke limue li ka pongoloka. Eli elavoko liañoko okuti ovina viosi oku sulako vika pongoluiwa. Eci ocili mekonda Suku omanu o va kuetele ocisimilo, kuenda ndaño otembo yilo tu pondola oku kuata asumuluho a tiamela kocipango caco nda tulinga onjongole yaye. Ovo eci va lilongisa Vembimbiliya vaci kapako muele kovimuenyo viavo, kuenda ovina via va mioñolola. Ovo va sanga esanju kuenda ombembua yina okuti ka va simile okuti va ka vi kuata.

Antonio ka litengele vali vokulitepa kuenda oku liyakela upange. Eye wa limbuka okuti apongoloko a tiamela konepa oyo a sulila kuenda hao okatembo kamue ño. Pole a sulila. Omitavaso eyi yupange yosimbo ya lilongisa eci catiamela Kusoma wa Suku. Owo owo usoma omanu vosi vakasi loku likutilila, poku tukola Ohutililo ya Ñala (ale, Isietu) kuenda oku popia ku Suku hati: “Usoma wove wiye.” (Mateo 6:10a) Antonio wa lilongisa okuti Usoma wa Suku uviali muele wokilu, okuti owo u ka nena ombembua yiwa komanu.

Marcos wa lilongisa oku kapako elungulo Liembimbiliya konepa yolohuela. Oku sulako, ulume u wakala ndeti ukuapulitika kaliye wa litiukila lukãi waye. Eyevo okasi loku sokolola kotembo ndopo eci Usoma wa Suku u ka pongolola usisiame wulo, oku piñanyapo oluali luokaliye lua velapo. Eye okuete elomboloko liasuapo Vohutililo ya Ñala a tanga hati: “Ocipango cove ci lingiwe posi ndeci ci lingiwa kilu.” (Mateo 6:10b) Eci ocipango ca Suku ci ka lingiwa palo posi, omanu va ka kuata omuenyo umue wulikasi okuti ka wa la muiwa.

Nye ci popiwa ku Gerson? Eye hukuakulupokako vali kuenda ha kaminyoko. Omuenyo waye wuna wosimbo woku kala omõla wovoluwa kaliye ukuete elomboloko, omo okuti ongusu yaye oyi lingila oku kuatisa vakuavo oco va sange ombembua yovutima. Ndomo ovolandu a–a a lekisa, oku lilongisa Embimbiliya kuenda oku kapako eci li popia cipondola oku pongolola omuenyo womunu oco u kale ciwa.

Ombembua Yovutima Voluali Luovitangi Ocakati cesapulo vocipango ca Suku, Yesu Kristu, kuenda nda omanu va yongola oku lilongisa Embimbiliya Lolombangi via Yehova, ovo va lilongisa calua catiamela kokuaye. Vuteke eci a citiwa ovangelo vaimba ovisungo ku Suku vati: “Kilu, ulamba ku Suku. Kilu lieve, obembembua pokati komanu Suku a sanjukila.” (Luka 2:14) Eci Yesu a kula, eye wa tiamelele vali enene koku mioñolola ovimuenyo viomanu. Eye wa kuata elomboloko lieci va yeva ketimba kuenda wa lekisa ohenda yalua kuava va vela. Ndomo ca popia ovangelo, eye waeca ombembua kambombe. Kesulilo liupange waye, wa popia kolondonge viaye hati: “Ndu sili ombembua, ndu wihi ombembua yange, ndeci ci ihaiha oluali hacoko ndu wihi. Ovitima viene ka vi ka tokotelue, ka vi ka kale lusumba.”−Yoano 14:27.

Yesu wa velelepo vali okuti ohongele yi kuatisa omanu yi sule. Eye wa lisokisa lungombo, kuenda wa solele calua olondonge viaye ambombe ndoku va lisa hati: “Ame ndeyilila okuti va kuata omuenyo, kuenda okuti omuenyo waco u supoka. Ame ndungombo uwa. Ungombo uwa o pesila olomeme omuenyo waye.” (Yoano 10:10,11) Calitepa calua lasongui valua okuti va likapako lika ovo muele, pole Yesu omuenyo waye wa wecela olomeme.

Etu tupa ndati esilivilo kueci Yesu a linga? Valua va kuliha olondaka evi, okuti: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puai omola omuenyo ko pui.” (Yoano 3:16) Oku kolela Yesu ci sukila tete ukulihiso wa tiamela kokuaye kuenda ku Isiaye Yehova. Ukulihiso wa Suku wa Yesu Kristu upondola oku tu tuala kukamba umue wasuapo la Yehova Suku okuti u tu kuatisa oku sanga ombembua yovutima.

Yesu hati: “Olomeme viange vi yeva ondaka yange. Nda vi kuliha, kuenje vi ñuama. Ndi viha omuenyo ko pui kuenje lalimue eteke vi nyõleha. Lomue o vi kotosola peka liange.” (Yoano 10:27,28) Helungulokuolio, liolondaka vi kuatisa! Ocili Yesu wa va sapuilile eci okuti kuakambele lika ohulukãi yalima konyima, pole kaliye ovo vakuete vali ongusu ndeyi va kuatele konyima. Lalimue eteke ku ka ivaleko okuti Yesu Kristu okasi lomuenyo wapama, kaliye wa vialekiwa okuti Osoma Yusoma wa Suku kilu. Eci a kala mulo vilu lieve alima a pita ndoto konyima, eye wa kuatela ocikembe ambombe vana va kala loku sanda ombembua yovutima tunde osimbu. Eye handi wa kala ungombo wocunda caye. Nda tuokuama, eye oka tu kuatisa oco tu sange ombembua yovutima, muna mua kongela ekolelo lioku ka mõla ombembua ka yi pui kovaso yoloneke, kuendavo oku pua kueviho, luyaki, kuenda undululu.

Asumuluho a tunda koku kuliha kuenda koku tava okuti Yehova pokati ka Yesu, oka tu kuatisa. Ivaluka Vania, una okuti ufeko, vosilile ocikele cilema kuenda wa popele hati Suku wo yandulukile? Vania kaliye wa limbuka okuti puãi Suku ko wivalele. Eye hati: “Ame nda lilongisa okuti Suku omunu umue okuete ovituwa viwa. Ocisola caye co vetiya oku tuma Omõlaye palo posi oco a tu ihe omuenyo. Eci ci silivila calua oku ci kuliha.”

Marcelo imba uvangi wokuti ukamba waye la Suku ukasi vali ciwa. Una ukuavipito kosimbo hati: “Amalehe olonjanja vialua ka va kulihile eci va linga, kuenje va sulila oku linyõla ovo muele. Vamue va iñila velaviso liepangue, ndeci ame nda kala. Ñuete ekolelo okuti valua vali vaka sumuluisiwa ndeci ame, poku lilongisa ocili catiamela ku Suku Lomõlaye.”

Poku lilongisa lutate Embimbiliya, Vania la Marcelo va kuatela ekolelo Suku kuenda va pondola oku potolola ovitangi viavo. Nda tu linga eci ovo valingavo, te tu lilongisa Embimbiliya loku kapako eci olio li popia oco tu kulihe usõvi wombembua yovutima ndeci ovo va linga. Evetiyo liupostolo Paulu li ka kapiwako kokuetu okuti: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene. Kuenje ombembua ya Suku, yina ya piãla olondunge viosi, yi lava ovitima viene lovisimilo viene vu Kristu Yesu.”−Va Filipoi 4:6,7.

Oku Amamako Oku Kuata Ombembua Yocili Etaili

Yesu Kristu okasi lokuendisa omanu va yevite onjala yocili lonjila yokuti va tualiwa komuenyo kopui voluali luokaliye palo posi. Osimbu a vaendisila vefendelo lia lipua lia Suku, ovo va kuata ombembua ndeyi ya sonehiwa Vembimbiliya okuti: “Omanu vange va kala volonjo viombembua, kuenda vovitungilo via koka, lo vovitumãlo viepuyuko.” (Isaya 32:18) Kuenje oyo lika ombembua yiwa va ka kuata kovaso yoloneke. Etu tu tanga: “Ambombe puãi va piñala ofeka, kuenje va sanjukila okusalala kualua. Olondingesunga vi piñala ofeka, vi tungamo oloneke ka vi pui.”−Osamo 37:11,29.

Tu pondola oku kuata ombembua etaili? Tupondola. Handi vali, tua kolela eci okuti kovaso ndopo muele, Suku oka sumuluisa omanu va pokola oku vaiha ombembua okuti lalimue eteke ya muiwile. Momo lie puãi, vohutililo ove ku pingila kokuaye ombembua oco a ku yihe? Nda okuete ovitangi viu ku nyana ombembua, likutilila ndeci Soma Daviti a linga hati: “Ohali yutima wange ya lua. Mopele kohali yange. Sokolola ongongo yange lelamba liange. Ngecele akandu ange osi.” (Osamo 25:17,18) Kuata ekolelo okuti Suku o yeva kolohutililo viaco. Eye õlola eka liaye lia pama kuenje eca ombembua ku vosi va yi sandiliya lutima wosi. Etu locisola tua likuminyiwa okuti: “Yehova okasi ocipepi la vosi vo vilikiya, okuti vo vilikiya ocili. O muisa vosi vo sumbila evi va yongola. O yeva uteto wavo, o va popela.”−Osamo 145:18,19.

[Etosi liavelapo kemela 5]

Omunu ka kuete elomboloko liasuapo ndaño uloño woku liviala eye muele okuti lekuatiso lakamue, puãi ekuatiso liocili litunda lika ku Suku.

[Etosi liavelapo kemela 6]

Ukulihiso wa Suku kuenda wa Yesu Kristu upondola oku tu tuala kukamba umue wa suapo la Yehova Suku okuti u tu kuatisa oku sanga ombembua yovutima.

[Elitalatu kemela 7]

Oku kuama elungulo Liembimbiliya ci kuatisa oku sanga ombembua vomuenyo wepatalife