Uhukui, Ocitangi Cimue Okuti ka ci Yuliwa?

Olo Nações Unidas vo Lupale luo Nova York via linga limue epasu kuenje, va kulihisa ekalo lasukila omanu vombonge yi tata asukila owiñi. Omo liaco, ya linga ocindekaise colo tupu kuenda ovikuata vi kuete apangu oku pitila ovava okuti via kapiwa volusoka luonjo yowiñi yoku lekisa komanu ovopange kuenda ovoloño. Ukuacikele coku lekisa ovina viosi, wa lombolola hati: “Olusoka ‘ka luapuile’ lua siata oku muiwa ndo ndimbukiso yivaluisa okuti upange woku potolola ovitangi viuhukui kuenda ekalo liomanu lilingiwa lolo Nações Unidas lalimue eteke uka tẽlisiwa; olonjanja viosi kuka kala ovina vi sukila oku lingiwa okuti oku mioñolola lika ekalo liwa liomanu voluali ci sule.”

Ndaño okuti Ocisoko ci tata asukila owiñi oco ci kuete ocikele coku vetiya elikolisilo liekalo liomuenyo wa velapo liomanu vosi, haimo ci mõleha okuti upange umue ka ukuete esulilo. Ciwa oku limbuka okuti, vokuenda kupange woku kunda palo posi kocita catete K. K., Yesu Kristu wa popia hati: “Espiritu lia Yehova lia mbuila, momo lia mbuaveka. Lia numa oku kundila olosuke ondaka yiwa.” (Luka 4:18) “Olondaka viwa” eye a lombolola anga hẽ via kala vie? Via kala esapulo liatiamẽla Kusoma wa Yehova Suku una wa linga “ocikolo cu wa suka lohali,” u ka tumbikiwa Losoma Yesu kristu. Oco hẽ Usoma waco uka linga nye? Isaya wa vangula ocitumasuku hati: “Yehova Ukualohoka o lingilamo olofeka viosi ofesta yovina via lẽla, ofesta yovinyu viale, yovina via lẽla haivio vie yuka upuma, ofesta yovinyu viale haivio via kenjiwa ciwa. O takisa olumue okufa, kuenje Ñala Yehova o puenya asuẽlẽla kovipala viosi.”−Isaya 25:4–6, 8.

O yongola oku kuliha vali ndomo Usoma wa Suku uka “mioñolola ekalo liwa liomanu vosi voluali,” toke eci ka kuka kala vali lalimue esukila? Vanja vemẽhi lilo oco o kulihe ndomo o pondola oku kuata epasu liulongisi umue wasuapo oka ku lekisa vali ca lua eci Embimbiliya li vangula catiamẽla kovolandu aeco.