Ci Tava Handi Oku Kuata—Ekolelo Liocili?

“Ekolelo lioku kolela lundongosi kohenda ya Suku likasiko muẽle, okuti omunu weca muẽle omuenyo waye ci soka ohulukãi yolonjanja kueci a tava.”—MARTIN LUTHER, 1522.

“Tu kasi voluali lumue okuti ovisimilo viomanu kuenda ocipango cosi catiamẽla kekolelo kuenda kovilinga Viakristão via linga ocina cimue okuti ka ca kapiwileko vali.”—LUDOVIC KENNEDY, 1999.

OVISIMiLO viomanu viatiamẽla kekolelo via litepa calua. Otembo yo konyima, ekolelo ku Suku lia siatele. Koloneke vilo, voluali luasinyanyeho kuenda luohali, ekolelo liocili ku Suku kuenda Kembimbiliya li kasi loku takata lonjanga yalua.

Ekolelo Liocili

“Ekolelo”, komanu valua li lomboloka lika oku kuatela ekolelo kovina vietavo ale oku kuama efendelo limue. Pole, “ekolelo” ndomo lia lomboluiwa Vembimbiliya li lomboloka oku tava kuocili, okuti ekolelo liotembo yosi ku Suku kuenda kolohuminyo viaye. Eci oco ocituwa ci limbukisa olondonge via Yesu Kristu.

Onjanja yimue, Yesu Kristu wa vangula eci catiamẽla kesukila lioku lingainga ohutililo okuti oku ci “tokoka hacoko.” Omo liaco, eye wa votola epulilo nda ekolelo liocili ci tava oku kalako toke muẽle koloneke vietu. Eye wa pula hati: “Eci Mõlomanu eya, o sanga ekolelo kilu lieve?” Momo lie eye a lingila epulilo liaco?—Luka 18:1, 8.

Ekambo Liekolelo

Ovina vialua vi pondola oku takisa ekolelo liosi li kuete omanu. Pokati kovina viaco pa kongela ovitangi loloseteko viomuenyo weteke leteke. Ndeci, ulongisi umue haeye onoño Michael Goulder eci a kala o patele ko Manchester, Inglaterra kunyamo wo 1958, ko Munique, Alemanya kua kupuka ombalãu kuenje omanu vosi vakuakutasula ombunje va kala vombalau yaco va fa. Vocipama co Televisão ci tukuiwa okuti BBC, ukãi umue ukuakuvangula vovingungu viesapulo, Joan Bakewell, wa lombolola hati Goulder wa “yeva upongo eci eye a mõla esumuo lialua liomanu.” Omo liaco “ekolelo liaye ku Suku ukuakupotolola ovitangi viomanu, lia pua.” Goulder wa lombolola eci catiamẽla kekolelo liaye hati, “Embimbiliya handakako . . . ya Suku okuti ka yi lueya, pole ondaka yomanu yi lueya, lolondaka vimue via tunda ku Suku apa lopo.”

Ekolelo olonjanja vimue lia siata oku pua. Eci oco ca lipita lusonehi kuenda ukuakuvanguila vovingungu viesapulo Ludovic Kennedy. Eye wa popia hati tunde eci a kala omõla “atatahãi ange atiamẽla ku Suku amamako oku livokiya kuenje ovisimilo [viaye] viatiamẽla katatahãi aco via livokiya.” Ci molẽha okuti lomue nda o pondola oku eca etambululo a sunguluka kapulilo aye. Olofa via isiaye vokalunga okuti eye ka ci lavokaile, via honguisa vali calua ekolelo liaye. Olohutililo ku Suku “oco a tulave kolohele vio vokalunga kuenda kungangala wanyali”, ka via sangele etambululo eci ombaluku yoku ambata omanu okuti isiaye omo a kala, kuenje ya yokiwa lasualali vofeka yoko Alemanya vokuenda Kuyaki Wavali Woluali Luosi.—All in the Mind—A Farewell to God.

Ovolandu nda–a a siata. Paulu wa popia hati “havosiko va kuete ekolelo.” (2 Va Tesalonike 3:2) Nye ove o sima? Anga hẽ kuli handi ekolelo ku Suku kuenda Kondaka yaye voluali lulo luomanu va kasi loku amamako latatahãi? Kulihisa eci ci lomboluiwa vocipama ci kuayimo catiamẽla kondaka eyi.