Ove o Pondola Oku Kuata

Ekolelo Liocili

Eci Sarah Jayne a kala lanyamo 19 wa limbuka okuti o kuete uveyi wo cancer kocilangalo. Wa enda kosipitali oco olondotolo vo yupe kuenje wa liyeva ciwa kuenda wa kala lelavoko liwa liotembo yo kovaso. Kuenda, wa kala lelavoko liocili okuti eci a kuata 20 kanyamo wa fetikile oku linga aliangiliyo olohuela viaye. Vunyamo waco owu uveyi wo cancer wa tiuka vali kuenje eye wa limbuka okuti o kuete lika olosemana viñamiñami vioku kala lomuenyo. Sarah jayne wa fa kosãi Yevambi wo 2000, eci handi ka tẽlisile 21 kanyamo.

Eci ca komohisa omanu va konyulaile vohama yaye kosipitali, elavoko liaye liotembo yo kovaso lekolelo liaye ku Suku kuenda Kondaka yaye Embimbiliya. Ndaño locitangi eci, eye wa tẽla oku linala laco mekonda wa kuatela elavoko kepinduko okuti oka mõla vali akamba vaye vosi. (Yoano 5:28, 29) Eye wa popia hati: “Ame ndiko mõli vali vosi yene Voluali Luokaliye lua Suku.”

Omanu vamue ka va tava kekolelo liaco mekonda kokuavo ci va kasilili ño nduhembi. Ludovic Kennedy wa pula okuti: “Oco hẽ omuenyo owo nye noke yoku fa nda haku kolelako kovina vi koka atatahãi, ndeci okuti kolumbeta luasulako kuka kala ovikulia lovinyua viwa kuenda ovisikilo violumbeta okuti omanu vaka kala vofeka yimue yi sokisiwa lo Edene; oku kala olowola vimue lesanju lomanu vana okuti va fa ale osimbu kuenda lava va fa noke yoku fa kuavo?” Locisimilo eci, tu pondola oku lipula ndoco: Ci pi ca leluka vali oku ci tava, ceci okuti “omuenyo owo lika ulo kuenda tu kuete okupako esilivilo liosi,” ndomo mua vangula Kennedy ale ca leluka oku tava kohuminyo ya Suku yepinduko? Sarah Jayne wa nõlapo oku kolela kepinduko. Ndamupi eye amamako lekolelo liaco?

‘Sanda Suku . . . Kuenda U Sanga Muẽle Ocili.’

Oco o kale lelavoko kuenda o kolele omunu umue, ove o sukila oku u kuliha kuenda oku kulihisa ovisimilo viaye kumosi lovilinga viaye. Voku kulihisa kuaco mua kongela utima kuenda ovisimilo. Cimuamue haico ci lingiwa catiamẽla koku kuatela ekolelo liocili ku Suku. Ove o sukila oku u kuliha, oku lilongisa eci catiamẽla kovituwa viaye kuenda ekalo liaye, oku limbuka ndomo ci tava oku kolela kuenda ndomo eye a lekisa okuti ukuacili kovina viosi a vangula levi a linga.−Osamo 9:10; 145:1–21.

Omanu vamue va sima okuti eci ocina cimue ka ci tẽliwa oku ci linga. Ovo vakuakuvangula okuti Suku o kasi ocipãla calua kuenda ka ca lelukile oku kuata elomboloko nda eye o kasiko muẽle ocili. Omanu vakuakutatãla va siata oku pula hati: “Nda Suku o kasiko muẽle ocili ndomo a tendiwa Lakristão ndeci Sarah Jayne, momo lie eye ka tukulukila kuvosi yetu? Oco hẽ, Suku o kasi muẽle ocili ocipãla okuti ka sangiwa? Upostolo Paulu ko Atenai wa sapuila vakuoloño wesanda kuenda omanu va tanga calua okuti “Suku u wa lulika oluali lovina viosi vi kasimo” wa eca ovina viosi va sukila oco ‘vo sande . . . loku u sanga muẽle ocili.’ Omo liaco, Paulu wa popia hati: “[Eye] ka kasi ocipãla letu vosi omunu [l]omunu.”−Ovilinga 17:24–27.

Oco hẽ, ndamupi ove o pondola oku ‘sanda Suku . . . loku U sanga muẽle ocili’? Vamue va ci lingainga poku vanja lika oluali lua vañuala. Kuenje, komanu vamue oku vanja oluali lua va ñuala ca va iha esunga lialua lioku limbuka ovo muẽle okuti kuli muẽle Ululiki.a (Osamo 19:1; Isaya 40:26; Ovilinga 14:16, 17) Ovo va sima ndeci upostolo Paulu a simaele okuti “Tunde kokululikiwa kuoluali, unu [wa Suku] una ko muiwa muiwa lovaso, okuti unene waye ko pui, kuenda okukola kuaye, u molehela ciwa vovina a lulika.”−Va Roma 1:20; Osamo 104:24.

Ove o Sukula Embimbiliya

Omo liaco, oco o kuatele ekolelo liocili Kululiki o sukila vali cimue okuti eye wa siata oku ceca. Ocina caco hẽ nye? Embimbiliya, Ondaka ya tunda ku Suku, omu eye a situluila ocipango caye kuenda ocimãho caye. (2 Timoteo 3:16, 17) Vamue vaka vangula okuti: “sinjapo handi, ndamupi ove o pondola oku tava kueci Embimbiliya li vangula osimbu o vanja alinga avi a lingiwa la vakuakuvangula okuti va kuãi eci ci sangiwa Vembimbiliya?” Handi vali, Atavo Esanda a kuete ovolandu a sumuisa atiamẽla kombambe, kunjaki kuenda keviho. Pole, omunu wosi okuti ukuesunga pamue o pondola oku limbuka okuti Atavo esanda a yongola lika oku kuama olonumbi Viembimbiliya.−Mateo 15:8.

Embimbiliya liaco muẽle lia lungula okuti omanu valua vaka vangola okuti va fendela Suku osimbu okuti “va likala ndaño Ñala yavo.” Upostolo Petulu wa popia hati, “mekonda liavo, onjila yocili yi sepuiwa.” (2 Petulu 2:1, 2) Yesu Kristu wa popia hati omanu vaco ava ‘olondingaivi’ okuti ca lelukile calua oku va limbuka mekonda liovilinga viavo viatiamẽla keviho. (Mateo 7:15–23) Oku likala Ondaka ya Suku mekonda lieci ca lingiwa Latavo esanda ca lisoka loku inasi ukanda wa tumiwa lekamba lia koleliwa calua omo ño okuti omunu wa nena ukanda waco ka kuete oluhimo luwa.

Oku kuata ekolelo liocili te lika Londaka ya Suku. Ocili okuti oku sanga ovisimilo via Yehova viatiamẽla kovina alombolola te lika pokati kamẽla Embimbiliya. Eye weca atambululo apulilo a siata oku lingiwa calua ndeci esunga lieci a ecelela ohali levalo kuenda eci eye aka linga catiamela kovina viaco evi. (1 Va Tesalonike 2:13; 2 Petulu 1:19–21) Oco hẽ ndamupi? Hesungako lika lieci olonjali viaye vio sapuila, pole momo okuti eye wa kuatavo otembo yoku kulihisa lesunga ovovangi osi a lekisa okuti Embimbiliya esituluilo limue li tunda ku Suku okuti ka lisokisiwa lacimue cikuavo. (Va Roma 12:2) Ndeci, eye wa limbuka okuti unene Wembimbiliya u vetiya ovimuenyo viomanu vana va kuama olonumbi viaco. Omo liekuatiso lialivulu ndeci A Bíblia–Palavra de Deus oku de Homem?b, eye wa kulihisavo lutate walua ovovangi otembo ka yi pui a lekisa evetiyo liovisimilo via Suku.

“Ekolelo li Tunda Kueci ci Yeviwa”

Omo liaco, ha kukuatako lika Embimbiliya ale pamue oku tava lika okuti Embimbiliya ondaka ya Suku. Upostolo Paulu wa soneha hati: “Ekolelo li tunda kueci ci yeviwa.” (Va Roma 10:17) Oku yeva Embimbiliya ka ci lomboloka okuti oku kuata Embimbiliya oco ci pamisa ekolelo. Ove o pondola oku “yeva” eci Suku a vangula poku tanga loku lilongisa Ondaka yave. Ndaño muẽle omãla va pondolavo oku ci linga. Paulu wa popia hati, Timoteo wa longisiwa “tunde kuñaña . . . ovisonehua vi kola” la inaye kuenda inakulu yaye. Ange eci ci lomboloka okuti mua tengele oku kisikiwa? Sio! Timoteo ka kisikiwile ale oku yonjiwa lonjila yimue. Eye vo wivaluisa ‘oku kolela’ eci a yeva leci a tanga.−2 Timoteo 1:5; 3:14, 15.

Sarah Jayne weya oku ivaluisiwavo lonjila ndeyi. Ndomanu voko Berea kocita catete, eye wa “yeva ondaka [yolonjali viaye kuenda yalongisi vakuavo] lombili yutima.” Ka kuli atatahãi okuti tunde vutila wa kolelele calua eci olonjali viaye vio sapuila. Noke, osimbu a kala loku kula eye ka tavele lika ndomunu umue ka lete ale ka sokolola okuti o kuama ño cosi volongisa. Eye ‘oloneke viosi, wa tanga tanga Ovisonehua loku kulihisa nda hẽ ovina viaco viocili nda ndati.’−Ovilinga 17:11.

Ove o Pondola Oku Kuata Ekolelo Liocili

Ove o pondolavo oku kuata ekolelo liocili, ndeli lia lomboluiwa lupostolo Paulu vukanda waye a sonehela Akristão voko Heveru. Eye wa popia hati ekolelo liaco “olio ociseveto covina vi lavokaiwa, hailio ombangi yovina ka vi molaiha.” (Va Heveru 11:1) Oku kuata ekolelo liaco, oka kulihisa ciwa okuti cosi o lavoka oku kongelamo ohuminyo ya Suku yepinduko yika tẽlisiwa muẽle ocili. Ove oka limbuka okuti cosi o lavoka cocili muẽle okuti havisimiloko viesanda. Oka kuliha okuti Yehova lalimue eteke a lueyele kueci catiamẽla koku tẽlisa olohuminyo viaye. (Yehosua 21:45; 23:14; Isaya 55:10, 11; Va Heveru 6:18) Ohuminyo ya Suku yoluali luokaliye yika kala vali ocili kokuove ndacimue ceya ale. (2 Petulu 3:13) Kuenje, oka limbuka vali ciwa lovaso ekolelo okuti Yehova Suku cosi eci ocili muẽle, hacesandako.

Ove Kuka li polepo koku pamisa ekolelo liove liocili. Handi vali, oco Ondaka yaye yi pitile komanu vosi Yehova wa lingavo eliangiliyo liakongelo Akristão voluali luosi okuti a litumbika koku kuatisa omanu vakuotima wa sunguluka oco va pamise ekolelo liavo ku Suku. (Yoano 17:20; Va Roma 10:14, 15) Tava akuatiso osi Yehova a siata oku eca omo liocisoko caco. (Ovilinga 8:30, 31) Kuenje, omo okuti ekolelo liaco olio epako liespiritu li kola lia Suku, lingainga olohutililo olonjanja viosi oku pinga ekuatiso liespiritu liaco oco okuate ekolelo liocili.−Va Galatia 5:22.

Ku ka liwekepo omo liatatahãi a vana va sepula u wosi o kuete ekolelo ku Suku lo Kondaka yaye. (1 Va Korindo 1:18–21; 2 Petulu 3:3, 4) Omo liaco, ekolelo liocili li kuete esilivilo lialua koku pandikisa kuove lasipato. (Va Efeso 6:16) Sarah Jayne wa limbukile eci ndocili, kuenda eci olonjanja vialua ca vetaya ava vako nyulaile kosipitali oco va pamise ekolelo liavo muẽle. Eye wa vangola hati: “Linga ocili ndomuenyo wove muẽle. Lilongisa Ondaka ya Suku. Litokeka locisoko ca Suku. Likutilila olonjanja viosi. Kala omunu ukuambili kupange wa Yehova.”−Tiago 2:17, 26.

Umue cifulumela caye eci a limbuka ekolelo liaye ku Suku kuenda kepinduko wa vangula hati: “Ove o tava muẽle ocili kueci, siti.” Eci vo pula okuti nye co wiha utõi wocisimilo caco ndaño muẽle lakatanga, eye wa tambulula hati: “Mekonda lioku kuata ekolelo ku Yehova. Eye ekamba limue liocili kokuange kuenda ame ndusole calua.”

[Atosi pombuelo yemẽla]

[Elitalatu kemẽla 6]

Timoteo wa longisiwa “tunde kuñaña . . . ovisonehua vi kola” la inaye kuenda inakulu yaye.

[Elitalatu kemẽla 6]

Va Berea va pandiyiwa omo lioku tanga tanga Ovisonehua oloneke viosi

[Elitalatu kemẽla 7]

“Ame ndika ku mõli vosi yene voluali luokaliye lua Suku”

[Elitalatu kemẽla 7]

Oku yeva kuenda oku kapako lutate Embimbiliya hacoko lika ci pamisa ekolelo