Kũlĩhĩsi Ekalo Liene Kespiritu

“Liseteki ene muẽle nda . . . vu kasi ocili vekolelo. Linyiki muẽle.”​—⁠2 VA KORINDO 13:⁠5.

1, 2. (a) Oku kuata atatahãi atiamẽla ketavo lietu ku pondola ndati oku tu yapula? (b) Akristão vo kocita catate ko Korindo va liyakele locitangi cipi?

ETEKE limue ulume umue wa kala oku enda kimbo limue. Eci a pitila panyãha, ka kũlĩhĩle onjila a sukilile oku kuama. Noke wa pinga onumbi komanu va kala oku pita konjila yikuavo. Pole, vo wimba onumbi yimue ka ya sungulukile. Ndaño okuti wa kala latatahãi, pole, wamamako oku enda lonjila yaco. Cimuamue haico ci pita letu nda tu kuete atatahãi atiamẽla ketavo lietu. Ocili okuti, atatahãi a pondola oku tu tateka oku nõla onjila ya sunguluka.

² Kocita catete, Akristão vamue vekongelo lio Korindo va liyakelevo locitangi caco. Momo ‘ovapostolo vesanda,’ va enda loku tatamisa omoko yupostolo Paulu yoku songuila ekongelo. Kuenje va popia hati: ‘Ovikanda viaye via tatama haivio via tua, puãi, eye oku u mola, etimba liaye lia pekengua, kuenda ka kuete uloño woku popia kovaso amanu.’ (2 Va Korindo 10:​7-12; 11:​5, 6) Olondaka evi vieya oku tatamisa Akristão oku kũlĩha ndomo va pondola oku endela vonjila ya Yehova.

3, 4. Elungulo Paulu a eca ku vamanji va Korindo li kuete esilivilo lie kokuetu?

³ Upostolo Paulu wa sokiya ekongelo lio ko Korindo kunyamo wa 50. Eye wa kala ko Korindo ci soka “unyamo lolosãi epandu, kuenje wa longisa ondaka ya Suku pokati kavo. Valua va yeva ondaka [yaco] va tava kuenje va papatisiwa.” (Ovilinga 18:​5-​11) Paulu wa kuatele ombili yoku va kuatisa konepa yespiritu. Handi vali, ovo va enda loku u sonehelavo catiamẽla kovitangi viavo oco va tambule ekuatiso. (1 Va Korindo 7:⁠1) Kuenje Paulu wa eca kokuavo olonumbi viwa.

⁴ Paulu wa va sapuila hati: “Liseteki ene muẽle nda . . . vu kasi ocili vekolelo. Linyiki muelẽ.” (2 Va Korindo 13:⁠5) Akristão va sukilile oku pokola konumbi eyi oco ka vaka kuate atatahãi atiamẽla konjila va sukilile oku kuama. Cimuamue haico ci pita letu koloneke vilo. Oco hẽ ndamupi tu pokola kelungulu lia Paulu? Tu tẽla ndati oku liseteka nda tu kasi ocili vekolelo? Nye ca kongela voku liseteka etu muẽle?

“Liseteki Ene Muẽle Nda u Kasi Ocili Vekolelo”

5, 6. Olonumbi vipi vi tu kuatisa oku seteka ekolelo lietu? Momo lie tu sukilila oku setekiwa lolonumbi via Yehova?

⁵ Omunu nda oyongola oku seteka ocikuata cimue, o kuete onumbi a pondola oku kuama. Cimuamue haico catiamẽla kekalo lietu Tuakristão. Etu ka tu seteka ukũlĩhĩso Wondaka ya Suku. Pole, tu liseteka etu muẽle oco tu kũlĩhe ndomo ekolelo lietu li kasi. Kuenda tu kuete onumbi yi tu kuatisa oku cilinga. Daviti vocisungo caye wa popia hati: “Ovihandeleko via Yehova via sunguluka, vi kavuluisa utima. Uvangi wa Yehova wocili u muisa olondunge ava va wulua. Ovisila via Yehova via sunguluka, vi sanjuisa utima. Ocihandeleko ca Yehova ca pua eko, ci yelisa ovaso.” (Osamo 19:​7, 8) Ovihandeleko via Yehova lolonumbi viaye, vi sangiwa Vembimbiliya. Olonumbi viaco ovio vi tu kuatisa oku linga oseteko yaco.

⁶ Catiamẽla kondaka ya Suku, upostolo Paulu wa popia hati: “Ondaka ya Suku yi kasi lomuenyo, haiyo yi kasi loku talavaya, haiyo ya tua enene, [okuti] omoko ya tua nelembali yi sule. Ondaka yaco yi toma toke yi tepa omuenyo . . . kuenda asokoluilo lupuma, haiyo yi limbuka ovisimĩlo lovipango viutima.” (Va Heveru 4:​12) Ocili okuti, ondaka ya Suku yi tẽla oku limbuka ovina viosi vi kasi vutima wetu. Oco hẽ, ndamupi tu pondola oku kapako ondaka yaco? Ukualosamo wa popia hati: “Wa sumũlũha omunu . . . [una] o sanjukila ovihandeleko via Yehova. O sokolola ovihandeleko viaye utanya luteke.” (Osamo 1:​1, 2) Etu tua kũlĩha okuti, ‘ovihandeleko via Yehova’ vi sangiwa Vembimbiliya. Omo liaco, tu sukila oku kuata ombili yoku tanga Embimbiliya kuenda oku sokolola ndomo tu kapako olonumbi viaco. Osimbu tuamamako oku cilinga, tu sukila oku ecelela okuti Ondaka ya Suku yi situlula ovina vi kasi vutima wetu.

7. Yipi onjila yimue yoku liseteka nda tu kasi ocili vekolelo?

⁷ Onjila yimue yoku liseteka nda tu kasi ocili vekolelo, oku tanga Ondaka ya Suku loku sokolola ovina tua siata oku lilongisa. Kuenda oku kũlĩhĩsa nda ovituwa vietu vi eca uvangi wovina tua siata oku lilongisa. Omo liaco, tu eca olopandu ku Suku omo a siata oku tu kuatisa oco tu kuate elomboloko Liondaka yaye.

8. Alivulu a sandekiwa ‘lukuenje wa lunguka,’ a tu kuatisa ndati oku liseteka nda tu kasi ocili vekolelo?

⁸ Yehova wa siata oku linga eliangiliyo lioku tu longisa lekuatisa lialivulu a sandekiwa ‘lukuenje wa lunguka.’ Alivulu aco a lombolola olonumbi vialua vi sangiwa Vembimbiliya. (Mateo 24:​45) Kũlĩhĩsa okakasia losapi ya linga hati: “Apulilo Oku Sokolola.” Okakasia kaco ka sangiwa kesulilo liovipama vielivulu Kuata Ukamba Wocili la Yehova.a Apulilo aco a tu kuatisa oku sokolola ovina tua lilongisa. Handi vali, Vutala Wondavululi kuenda vo Despertai!, mu sangiwavo ovipama vialua vi tu kuatisa oku liseteka nda tu kasi ocili vekolelo. Manji umue ukãi, wa tanga ovipama vimue Vutala Wondavululi vi lombolola elivulu Liolosapo. Eye wa popia hati: ‘Ovipama viaco via ndi kuatisa calua. Momo via ndi vetiya oku kũlĩhĩsa nda olombangulo viange lovituwa viange vi eca uvangi woku pokola kolonumbi via Yehova.’

9, 10. Aliangiliyo api a Yehova a tu kuatisa oku liseteka nda tu kasi vekolelo?

⁹ Etu tua siatavo oku tambula olonumbi via Yehova kuenda elembeleko liaye ndeci: vekongelo, kolohongele vimbo kuenda kolohongele viofeka. Aliangiliyo aco a kasi oku tẽlisa ocitumasuku ci sangiwa kelivulu lia Isaya ci popia hati: “Koloneke viesulilo omunda yonjo ya Yehova yi velapo koku lepa pokati kolomunda viosi, yi pitahãla ovivulu; kuenje omanu volofeka viosi volumũhĩlako. Olofeka via lua vi popia viti: Enjui, tu lamani komunda ya Yehova, . . . okuti o tu longisa ovituwa viaye ha tu endela volonjila viaye.” (Isaya 2:​2, 3) Tu kuete esumũlũho lialua omo lioku longisiwa olonumbi via Yehova.

¹⁰ Onjila yikuavo yoku liseteka etu muẽle, oku pokola kolonumbi via vamanji va loñoloha kespiritu kuenda kakulu vekongelo. Catiamẽla kokuavo, Embimbiliya li popia hati: “A vamanji, nda umue wa kuatiwa lokulueya . . . , ene [wa loñolohi kespiritu] u tiuli lutima womboka loku lunguka sanga lenevo u yonjiwa.” (Va Galatia 6:⁠1) Tu eca olopandu ku Yehova omo liekuatiso liaco.

11. Voku liseteka etu muẽle nda tu kasi vekolelo mua kongela nye?

¹¹ Alivulu etu lolohongele vietu, kuenda akulu vekongelo, aliangiliyo amue a tunda ku Yehova. Oku liseteka etu muẽle nda tu kasi vekolelo, ka ca lelukile. Pole, tu sukila oku likolisilako oku cilinga. Eci tu tanga alivulu a sandekiwa lukuenje wa lunguka, leci tu yeva onumbi yimue Yembimbiliya kolohongele, tu sukila oku lipula ndoco: Anga hẽ ovina evi vi tiamisiwila kokuange? Nda siata hẽ oku cilinga? Nda siata hẽ oku pokola kolonumbi via Yehova? Oku pokola kuetu kolonumbi via Yehova, ku situlula ekalo lietu kespiritu. Embimbiliya li popia hati: ‘Omunu una wa tiamisila utima kovina vietimba ka tambula oviali viespiritu lia Suku, momo kokuaye vi linga nduveke. Pole, omunu wa tiamisila utima kovina viespiritu, o tẽla oku kũlĩhĩsa ovina viosi.’ (1 Va Korindo 2:​14, 15) Omo liaco, tu sukila oku likolisilako oku pokola kovina viosi tu tanga valivulu etu. Tu sukilavo oku pokola kovina tu yeva kolohongele kuenda kolonumbi viakulu vekongelo.

‘Linyiki Ene Muẽle’

12. Voku linyika etu muẽle mua kongela nye?

¹² Voku linyika etu muẽle, mua kongela oku konomuisa ekalo lietu. Citava okuti, pamue tu kasi ale vocisoko ca Yehova vokuenda kuanyamo alua. Oco hẽ lipi ekalo lietu kespiritu? Voku linyika etu muẽle mua kongela oku eca uvangi woku loñoloha konepa yespiritu. Mua kongelavo oku lekisa ombili kaliangiliyo a Yehova.

13. Ndomo ca lekisiwa kelivulu lia Va Heveru 5:​14, tu eca ndati uvangi woku loñoloha kuetu kespiritu?

¹³ Ndamupi tu lekisa uvangi woku loñoloha kuetu kespiritu? Upostolo Paulu wa popia hati: “Okulia kua kola kuakulu, okuti kuava va tẽla oku tepisa pokati keci ciwa leci cĩvi, momo olondunge viavo via pindisua.” (Va Heveru 5:​14) Oku loñoloha kuetu ku lekisiwa poku pindisa olondunge vietu. Omunu una okuti ukualomapalo vioku yoloka, wa siata oku pokuisa etimba liaye osimbu handi ka endele kolomapalo viaco. Cimuamue haico tu sukila oku linga poku pokuisa olondunge vietu lolonumbi Viondaka ya Suku.

14, 15. Momo lie tu sukilila oku lilongisa ovina via longa vi sangiwa vondaka ya Suku?

¹⁴ Osimbu handi ka tua pindisile olondunge vietu, tu sukila oku kuata ukũlĩhĩso Wembimbiliya. Pole, oco tu kuate ukũlĩhĩso waco, tu sukila oku linga elilongiso lio pokolika. Nda tua kuata ocituwa coku lilongisa ovina via longa vi sangiwa Vondaka ya Suku, tuka pindisa olondunge vietu vioku tepisa eci ciwa leci cĩvi. Utala Wondavululi wa siata oku sandeka ovipama vialua via longa. Nye tu sukila oku linga poku tanga ovipama viaco? Anga hẽ tu liwekapo oku tanga omo okuti, ‘ka ca lelukile oku kuata elomboloko liaco?’ (2 Petulu 3:​16) Sio hacoko. Tu sukila oku likolisilako oku sanda elomboloko liaco.​—⁠Va Efeso 3:⁠18.

¹⁵ Citava okuti, pamue ka tu kuete ombili yoku linga elilongiso liopokolika. Oco hẽ, nye tu sukila oku linga? Tu sukila oku likolisilako oku kuata ocituwa caco.b (1 Petulu 2:⁠2) Oco tu loñolohe kespiritu, tu sukila oku lilongisa ovina via longa vi sangiwa Vondaka ya Suku. Nda ka tua ci lingile, ka tuka tẽla oku pindisa olondunge vietu. Pole, voku kula kespiritu ka mua kongelele lika oku pindisa olondunge vietu. Mua kongelavo oku kapako ukũlĩhĩso wa Yehova komuenyo wetu.

16, 17. Elungulo lipi ndonge Tiago a eca liatiamẽla ‘koku pokola kondaka ya Suku’?

¹⁶ Tu pondolavo oku linyika etu muẽle, poku lekisa ovilinga viekolelo lietu. Ndonge Tiago poku lekisa ndomo tu ci linga, wa popia hati: “Lingi [vakuakupokola kondaka,] vakuakuyeva lika, haivo va likembisa ño, hacoko. Momo u o yeva ño ondaka puãi ka yi [pokola,] wa lisoka lomunu wa livanjela volumuilo ocipala a citiwa laco, omo o livanjelamo, kuenje enda. Tuli a tunda, ndeci a kala co limba. Puãi, u o vanja vanja sui vocihandeleko ca kanguka, haico ceca umãmãle, kuenje o pandikisa laco okuti ka lingi ukuakuyeva lika loku ivala, o linga puãi [ukuakupokola,] eye o sumũlũisua.”​—⁠Tiago 1:​22-25.

¹⁷ Elungulo lia Tiago li lomboloka ndoco: ‘Kũlĩhĩsa Ondaka ya Suku oco o limbuke ekalo liomuenyo wove. Amamako oku lilongisa ondaka ya Suku oco o kũlĩhe ndomo wa tuwa. Limbuka ovituwa viove vĩvi. Noke, likolisilako oku vi siapo.’ Ocili okuti, olonjanja vimue ka ca lelukile oku pokola kelungulo eli.

18. Momo lie ka ca lelukilile oku pokola kelungulo lia Tiago?

¹⁸ Kũlĩhĩsa ondaka yatiamẽla kupange woku kunda Usoma. Upostolo Paulu wa popia hati: “Eci omunu a kolela lutima waye, oco a tendiwa ndukuesunga, leci a likekembela akandu aye lomẽla, oco a popeliwa.” (Va Roma 10:​10) Oco tu litumbike kupange woku kunda, tu sukila oku linga apongoloko alua komuenyo wetu. Valua pokati ketu, ka ca lelukile oku linga upange woku kunda. Momo, voku lekisa ombili loku pitisa kovaso upange waco, mua kongela oku likolisilako calua. (Mateo 6:​33) Pole, nda tua ci linga, tuka kuata esanju komuenyo. Momo upange woku kunda weca esivayo ku Yehova. Anga hẽ tua siata oku lekisa ombili kupange waco?

19. Nye ca kongela vovilinga vietu viekolelo?

¹⁹ Ndamupi tu lekisa ovilinga viekolelo? Upostolo Paulu wa popia hati: “Eci wa lilongisi, leci wa tambuli, leci wa yevi, kuenda eci wa moli kokuange, ci lingi. Kuenje Suku yombembua o kala lene.” (Va Filipoi 4:⁠9) Etu tu pondola oku lekisa oku amamako kuetu kespiritu poku pokola kovina tua lilongisa, evi tua tava, levi tua yeva kuenda evi tua mola. Momo ovina viaco ovio vi tu kuatisa oku litumbika ku Yehova loku linga afendeli vaye. Vonduko yuprofeto Isaya Yehova o tu sapuila hati: “Eyi oyo onjila, endelimo.”​—⁠Isaya 30:⁠21.

20. Omanu vapi va nena esumũlũho vekongelo?

²⁰ Vocisoko ca Yehova muli vamanji valua va siata oku kuata ombili kupange woku kunda. Kuenda va siata oku pandikisa kovitangi. Oku kala pokati kavo, cinena esanju lialua. Momo ulandu womuenyo wavo u pamisa ekolelo lietu. Capiãla enene ku vamanji vana va kasi otembo yitito vocisoko ca Yehova. Nda tua pokola kelungulo lia Paulu lioku, ‘liseteka etu muẽle’ tuka kuatavo epuluvi lioku kuatisa vakuetu.

Kuata Esanju Lioku Linga Ocipango ca Suku

21, 22. Ndamupi tu sanjukila oku linga ocipango ca Suku?

²¹ Soma Daviti wa imba ocisungo hati: “Oku linga ocipango cove, a Suku yange, oco [ndi] sanjukila. Ovihandeleko viove vi kasi vutima wange.” (Osamo 40:⁠8) Daviti wa solele calua oku linga ocipango ca Suku. Momo lie? Momo ovihandeleko via Yehova via kala vutima waye. Eye ka kuatele atatahãi atiamẽla konjila a sukilile oku kuama.

²² Nda ovihandeleko via Yehova tua vi kapa vutima wetu, ka tuka kuata atatahãi atiamẽla konjila tu sukila oku kuama. Tuka sanjukila oku linga ocipango ca Suku. Omo liaco, tu likolisiliko oku vumba Yehova lutima wosi.​—⁠Luka 13:⁠24.

[Atosi pombuelo yamẽla]

Ivaluka Eci Tua Lilongisa?

• Ndamupi tu tẽla oku liseteka nda tu kasi ocili vekolelo?

• Nye ca kongela voku liseteka etu muẽle?

• Ndamupi tu lekisa uvangi woku kula kuetu kespiritu?

• Ovilinga vietu viekolelo vi tu kuatisa ndati oku kũlĩha ekalo lietu kespiritu?

[Elitalatu kemẽla 9]

Ove hẽ wa kũlĩha eci ci ku kuatisa oku liseteka nda o kasi vekolelo?

[Elitalatu kemẽla 10]

Poku pindisa olondunge vietu londaka ya Suku, tu eca uvangi woku kula kespiritu

[Elitalatu kemẽla 11]

Poku pokola kovina tu yeva Vondaka ya Suku, tu lekisa ekalo lietu kespiritu