Oku Citiwa Kumue tu Sukila Oku Sokolola

‘Etaili kuo citiwili Upopeli, Kristu Ñala.’ ​—⁠Luka 2:⁠11.

CIMUE cenda olohulukãi vivali kanyamo konyima, ukãi umue woko Beteleme wa citile omõla ulume. Omanu valua ka va kapeleko oku citiwa kuomõla waco. Pole, angombo vamue va kala vusenge lovinyama viavo, va mõla ovangelo va kala loku imba hati: “Kilu, ulamba ku Suku. Kilu lieve, ombembua pokati komanu Suku a sanjukila.”​—⁠Luka 2:​8-14.

Noke, agombo va sandiliya Maria kuenda ulume waye Yosefe. Kuenje va va sanga muẽle kocimanga colongombe ndeci angelo va va sapuilile. Maria weya oku luka omõlaco hati, Yesu. Kuenda wo pekelisile pocililo colongombe. (Luka 1:31; 2:​12) Cilo, okuti pa pita ale olohulukãi vivali kanyamo, onepa yalua yomanu ya siata oku popia okuti, vakuãi volomãi via Yesu Kristu. Ocili okuti, ulandu woku citiwa kuaye, wa kemãla calua tunde osimbu okuti ovolandu akuavo ci sule.

Kofeka yo Espanha onepa yalua yomanu, yatiamẽla ketavo lio Katolika. Kuenda va sole calua oku linga ovipito. Omo liaco, ocipito coku citiwa kua Yesu, va siata oku ci linga volonepa viñi viñi.

Ocipito Conatale Kofeka yo Espanha

Kofeka yo Espanha tunde kocita 13 ocipito coku citiwa kua Yesu, oco ca kemãla vali pokati kovipito viosi. Kotembo yocipito conataile apata alua a siata oku panga ocina cimue ca setãhala ocunda colongombe muna va pekelisile Yesu eci a citiwa. Va siatavo oku panga oviñumañuma viotuma vi lekisa angombo, olonoño, Yosefe la Maria, kuenda Yesu. Kotembo Yonatale, oviñumañuma viaco va vi kapa kolonepa vialua violupale. Ulume umue o tukuiwa hati, Francisco de Assis, eye wa fetika ocituwa caco kofeka yo Italia. Eye wa yonguile oku tiamisila ovitima viomanu Kevanjeliu li lombolola oku citiwa kua Yesu. Noke omanu vana vatiamẽlele kokuaye, veya oku tuala ocituwa caco ko Espanha kuenda kolofeka vikuavo.

Ponatale kofeka yo Espanha, omanu va siata oku velisapo calua olonoño, ndeci va velisapo osandu yimue yi tukuiwa hati, Claus kolofeka vikuavo. Ovo va popia okuti, keteke 6 kosãi ya Susu, kofeka yo Espanha omãla va siata oku tambula olombajaile kolonoño. Eteke liaco va litukula hati Eteke Liolosoma. Momo hati, oco ca lingiwilevo eci Yesu a citiwa okuti, olonoño via eca kokuaye olombanjaile. Pole, omanu valua ka va kũlĩhile okuti Evanjeliu ka li tukula etendelo Liolonoño via endele oku ka nyula Yesu eci a citiwa. Embimbiliya li lombolola okuti, olonoño viaco via kala omanu vakuakutãha olombungululu. Ka va kaile olosoma.a Eci olonoño via tunda koku nyula Yesu, soma Herode weya oku tuma oku ponda omãla vosi valume vo vo Beteleme, ‘tunde koloñaña toke kuava va kuete anyamo avali.’ Eye wa ci lingila oku sanda evelo lioku ponda Yesu. Eci ci lekisa okuti, tunde eci Yesu a citiwa toke eci olonoño via endele oku konyula, papitile ale otembo yimue.​—⁠Mateo 2:​11, 16.

Tunde kocita 12, alupale amue kofeka yo Espanha, a siata oku linga olomapalo viatiamẽla koku citiwa kua Yesu. Volomapalo viaco va siata oku kongelamo angombo vana vaka nyulile Yesu ko Beteleme, kuenda Olonoño. Kofeka yo Espanha unyamo lunyamo keteke 5 kosãi ya Susu, va siata oku linga ocipito coku sivaya ‘olonoño viaco vitatu.’ Keteke liaco, ovo va ñuala ñuala vokati kolupale lekãlu limue lia posuisiwa. Kuenje va eca komanu ovina vimue ndeci, olombusatu, olombolu kuenda ovina vikuavo vi sõsa. Ovina viaco vioku posuisa kuenda ovisungo, ovio via siata oku votisa ovipito Vionatale.

Apata alua kofeka yo Espanha a siata oku lingila kumue ocipito Conatale keteke 24 kosãi ya Cembanima. Ovo va pongiya okulia kumue kua pangiwa lamendua kuenda owiki. Va liavo apako amue a kukutisiwa, lokameme ka yokiwa, kuenda ovina vimue vio vokalunga. Apata ana a kasi kupãla, alikolisilako oku iya kuvakuavo pocipito caco. Keteke likuavo liocipito, okuti keteke 6 kosãi ya Susu, apata alila kumosi ekende limue li tukuiwa hati, Bolo Rei. Vokati kekende liaco va siata oku kapamo oviñumañuma vimue vi lekisa olonoño. Kosimbu va Roma haico va lingailevo. Keteke liocipito caco, upika wosi wa sanga vekende liaco okaciñumañuma ka selekiwamo, o kala “osoma” vokuenda kueteke limosi.

‘Oloneke Viesanju Kuenda Viupange Walua’

Koloneke vilo ocipito Conataile ca kemãla calua kolonepa vialua violuali. Elivulu limue lia lombolola okuti, ‘oloneke Vionatale via siata oku nena esanju kuenda upange walua komanu. Ci kale komanu vana va litukula okuti Akristão, ci kale vana okuti Hakristãoko.’ Anga hẽ ocipito caco ci kuete muẽle esilivilo?

Ocili okuti, oku citiwa kua Yesu kua kũlĩhĩwa voluali luosi. Eci Yesu a citiwa ovangelo va lombolola okuti, “kilu lieve, ombembua pokati komanu Suku a sanjukila.” Olondaka evi vi lekisa esilivilo lioku citiwa kua Yesu.

Ulume umue ukuasapulo kofeka yo Espanha o tukuiwa hati, Juan Arias, wa lombolola okuti, Akristão vatete ka va lingaile ocipito Conatale. Oco hẽ ocipito caco ca tunda pi? Yipi onjila ya sunguluka yoku ivaluka oku citiwa kua Yesu lomuenyo waye? Vocipama cikuãimo oka sanga atambululo atiamẽla kapulilo ava.

[Etosi pombuelo yemẽla]