Ndeci Kilu Haico Palo Posi’

Elivulu limue lia sonehiwa la George Brantl, lia popia hati: ‘Elongiso Lietavo Liokatolika, liatiamẽla Kovina Vikuãla ndeci: Olofa, Esombiso, Ondalu Yifelu, loku enda Kilu.’

VOVINA vikuãla via tukuiwa ndeti, ka mua kongelele elavoko liomanu lioku kala palo posi. Eye o kuete esunga lioku popia olondaka evi. Momo Etavo Liokatolika kuenda atavo akuavo, a siata oku longisa okuti ongongo yika kunduiwa. Elivulu limue Lietavo Liokatolika lia popia hati: ‘Etavo Liokatolika li longisa okuti, oluali lulo, ndomo lua lulikiwa la Suku, ka lu kala otembo ka yi pui.’ Olondaka evi, vi sangiwa vokasapi ka popia hati: ‘Esulilo Lioluali.’ Elivulu limue Liokatesisimu Yokatolika lia lombololavo hati: ‘Oluali lulo ndopo lu takata.’ Nda ongongo yilo yika nyoliwa, momo lie Embimbiliya li popela catiamẽla koluali luokaliye?

Embimbiliya li lombolola eci catiamẽla koluali luokaliye palo posi. Uprofeto Isaya poku lombolola eci catiamẽla kongongo kuenda kolonungi viaco, wa popia hati: ‘Vaka tunga olonjo kuenje va kalamo, vaka kũla oviumbo viayuva kuenje va lia epako liavio. Ka va tungi okuti umue wiñi o kalamo. Ka va kũli okuti umue wiñi o liako. Momo oloneke viomanu vange vika linga ndoloneke vioviti, lava va nõlĩwa lame va lialia ño hũ kupange wovaka avo.’ (Isaya 65:21, 22) Va Yudea vana Suku a ĩhile ohuminyo yaco, va kũlĩhĩle okuti ofeka yavo yika kala ciwa. Kuenda va kũlĩhĩlevo okuti eteke limue oluali luosi luka kala luokaliye. Kuenje omanu vaka tungamo otembo ka yi pui.

Osamo 37 yi lombolola elavoko liaco hati: ‘Ambombe vaka piñala ofeka kuenje va sanjukila oku salala kualua.’ (Osamo 37:11) Ocinimbu eci Cembimbiliya, ka ci lombolola lika catiamẽla koku tumbulula Ofeka Yohuminyo yina Suku a ecele ku va Isareli. Momo Osamo yaco, yamisako hati: ‘Olondingesunga vika piñala ofeka, kuenje vi tungamo oloneke ka vi pui.’ (Osamo 37:29) Osamo eyi yi lekisa okuti, “ambombe,” vaka tambula onima yomuenyo ko pui palo posi.’ Embimbiliya limue poku lombolola ocinimbu eci, lia popia hati: Ondaka “ambombe,” yi kuete alomboloko alua. Momo ‘vondaka yaco mua kongela olohũkũi, la vana va lambalaliwa omo lionduko ya Yehova, kuenda omanu vakuavitima via sunguluka va pokola Kovihandeleko Viaye.’

Ambimbiliya amue ondaka yo Heveru ya tukuiwa vovinimbu Viosamo 37:11, 29, va yi tiamisila lika ‘kofeka’ ndeyi Suku a ecele ku va Isareli. Pole, ovinimbu evi, ka vi tiamisiwila lika kofeka yimosi. Elivulu limue lia lombolola okuti, ondaka ‘ofeka’ ka yi lomboloka lika kovitumãlo kuna kua tunga omanu. Pole, yi lombolokavo kuna ka kuli omanu. Omo liaco, ondaka ‘ofeka’ ndomo ya tukuiwa tete kelimi lia va Herevu, yi lomboloka oluali luosi.—Tanga Utala Wondavululi, 1 wosãi ya Susu wunyamo wo 1986, kemẽla 31.

Anga hẽ Posi Ale Kilu?

Vohundo Yesu a lingila Komunda, wa tukula ovinimbu Viembimbiliya vi sangiwa kefetikilo liocipama cilo. Eye wa popia hati: ‘Ava vomboka vutima va sumũlũha, momo vaka piñala ofeka.’ (Mateo 5:5) Olondaka evi vi lekisa okuti, omanu vosi vomboka, vaka kala otembo ka yi pui voluali. Yesu wa sapuila olondonge viaye hati, oka vi pongiyila ocitumãlo ‘vonjo ya Isiaye.’ Kuenje vika kala kumue laye kilu. (Yoano 14:1, 2; Luka 12:32; 1 Petulu 1:3, 4) Oco hẽ tu kuata ndati elomboloko liohuminyo yoku tambula asumũlũho palo posi? Anga hẽ ohuminyo yaco yi kuete esilivilo koloneke vilo? Ohuminyo yaco yi tiamisiwila kulie?

Olonoño vimue vi sole oku konomuisa Embimbiliya, via siata oku popia hati, ‘ofeka’ Yesu a tukula Vohundo a lingila Komunda, kuenda olondaka vi sangiwa Vosamo 37, vi lomboloka ofeka yocindekaise. Onoño yimue ya lombolola okuti, ovinimbu evi Viembimbiliya via tukula ilu liocindekaise kuenda Onembele. Onoño yikuavo ya lombolola okuti, ‘ohuminyo eyi ka yi lekisa okuti, ambombe vaka piñala oluali lulo va kasi ndeti, ale oluali lukuavo luokaliye. Pole, yi lomboloka oku piñala ocitumãlo cikuavo okuti, usoma wokilu.’ Handi vali, ukuavo wa lombolola okuti, ‘Embimbiliya poku tukula ilu, lia li sokisa lovina viwa vi sangiwa palo posi.’ Olonoño vikuavo via lombolola okuti, ‘ofeka yohuminyo okuti ofeka Yokanana, ya kala ocindekaise cusoma wa Suku okuti owo ocipiñalo cambombe. Usoma waco owo wa tukuiwa kelivulu Liosamo 37 kuenda kovinimbu vikuavo Viembimbiliya.’ Anga hẽ ongongo yilo ka yatiamẽlele kolohuminyo via Suku?

Ocipango ca Yehova Catiamẽla Kongongo

Tunde osimbu, ocipango ca Yehova ceci okuti omanu va tunga vongongo. Ukualosamo wa popia hati: “Ilu lia Yehova, ongongo puãi wa yeca komãla vomanu.” (Osamo 115:16) Yehova ka lulikile omanu oco va ende kilu. Eye wa ecele ku Adama la Heva ocikele coku talavaya oco ongongo yosi yi linge oluali luokaliye. (Efetikilo 1:28) Eye ka sokiyile okuti, onjongole yaco yi tẽlisiwa lika vokatembo kamue katito. Yehova vondaka yaye, wa likuminya hati ongongo yika kala otembo ka yi pui. Embimbiliya li popia hati: “Ocitumbulukila eci cenda, ocitumbulukila cikuavo ciya, puãi ongongo yi kala [otembo] ka yi pui.”—Ukundi 1:4; 1 Asapulo 16:30; Isaya 45:18.

Olohuminyo via Suku vika tẽlisiwa. Omo okuti Suku eye Tõlo, wa likuminya oku tẽlisa ovina viosi a popia. Embimbiliya poku lekisa ndomo Yehova a tẽlisa ocipango caye, lia tukula ocindekaise combela. Uprofeto Isaya wa lombolola okuti, lomue o tẽla oku tateka oku tẽlisiwa kuocipango ca Suku. Eye wa popia hati: “Ndeci ombela [locikokoto] vi tunda kilu, kuenje ka vi tiukilako, puãi vi tapela ongongo loku yi yovisa, . . . haico ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlĩsa, leci nda yi tumĩla.” (Isaya 55:10, 11) Ndomo Embimbiliya li lekisa, Yehova wa likuminya ovina vialua komanu. Osimbu ovina viaco ka vi tẽlisile, citava okuti papita otembo yalua. Pole vika tẽlisiwa. Olohuminyo via Yehova ‘vi tiukila’ lika kokuaye noke yoku tẽlisa cosi a yongola.

Yehova wa sanjukila oluali a lulikila omanu. Kesulilo lieteke liepandu, eye wa popia hati, ovina viosi a lulika “via posoka.” (Efetikilo 1:31) Yehova ka tẽlisile handi ocipango caye coku pongolola ilu lieve voluali luokaliye. Olohuminyo via Suku ‘ka vi tiukila kokuaye’ okuti, ka via tẽlisiwile. Eye oka tẽlisa ovina viosi a likuminya komanu ndeci: Omuenyo ko pui palo posi kuenda ombembua ka yi pui.—Osamo 135:6; Isaya 46:10.

Ocipango ca Suku Cika Tẽlisiwa

Ekandu lia Adama la Heva, lia tateka ocipango ca Suku coku pongolola ongongo oco yi linge oluali luokaliye. Eci va linga ekandu, Yehova wa va tundisa vocumbo Cendene. Ovo va pumba esumũlũho lioku tẽlisa ocipango ca Suku coku yukisa ongongo lomanu va lipua okuti, va kala otembo ka yi pui vocumbo celau palo posi. Pole, Yehova wa linga eliangiliyo likuavo lioku tẽlisa ocipango caye. Ndamupi?—Efetikilo 3:17-19, 23.

Ocitangi ca pita Vocumbo Cendene, ci sokisiwa lulume umue wa fetika oku tungila onjo pocitumãlo cimue ca fina. Noke yoku tumbika ociseveto, kuiya unyali umue, kuenje o ci teya. Pole, ndaño ociseveto caco va ci teya, muẽliaco o fetika cikuavo. Momo o yongola oku malusula onjo yaye. Ndaño okuti oku tunga onjo yaco ci pesela olombongo vialua, eye ka liwekapo oku linga upange waye a fetikile.

Cimuamue haico Yehova a linga. Oco a tẽlise ocipango caye, wa kuama olonjila vialua. Eci Adama la Heva va linga ekandu, Yehova wa lekisa elavoko omãla vavo va pondola oku kuata. Eye wa tukula “ombuto” yimue yika nyõla elinga liavo. Poku tẽlisiwa kuocitumasuku caco, Yesu Kristu wa molẽha palo posi. Kuenje wa linga ombuto yatete Yehova a tukula vocitumasuku caco. Noke wa eca omuenyo waye ndocilumba oco a yovole omanu. (Va Galatia 3:16; Mateo 20:28) Eci Yesu a pinduiwa wa enda kilu, kuenje wa linga Osoma Yuviali wa Suku. Yesu eye embombe liatete lika piñala oluali kumue la vana a nõla oco va viale laye Vusoma wokilu. (Osamo 2:6-9) Uviali waco, ndopo uka tẽlisa ocipango ca Suku. Kuenje ongongo yika linga oluali luokaliye. Owiñi womanu ka va tendiwa vana okuti, ambombe, vaka piñala oluali. Momo vaka tambula asumũlũho a tunda Kuviali u kasi peka lia Kristu kumue lolombuavekua viaye.—Efetikilo 3:15; Daniele 2:44; Ovilinga 2:32, 33; Esituluilo 20:5, 6.

“Ndeci Kilu Haico Palo Posi”

Vocinjonde Yoano a kuata, wa mõla ovisoko vivali viomanu vaka popeliwa, okuti va kuete alavoko a litepa. Vamue vaka kala kilu, vakuavo vaka kala palo posi. Eye wa mõla olosoma via tumãla kovialo viokilu vina via nõliwa pokati kovapostolo va Yesu. Embimbiliya poku lombolola ava vaka viala la Kristu, li popia hati, ‘va linga vakuosoma kuenje va viala kilu lieve.’ (Esituluilo 5:9, 10) Voku tẽlisiwa kuocipango ca Suku, mua kongela oku tumbulula oluali vonduko ya Kristu kumue lolosoma viaye. Eliangiliyo liaco, lika ecelela oku tumbuluiwa kuoluali, kuenje, lu linga Luokaliye ndeci Yehova a yonguile kefetikilo.

Yesu wa vetiya olondonge viaye oku likutilila oco ocipango ca Yehova ‘ci lingiwe posi ndeci ci kasi oku lingiwa kilu.’ (Mateo 6:9, 10) Anga hẽ olondaka evi vi kuete esilivilo nda ongongo yi lomboloka ocindekaise coku enda kilu? Nda olondingesunga vi enda kilu, olondaka viaco ka vi kuete esilivilo. Ocipango ca Yehova catiamẽla koluali lulo, ca lekisiwa Vembimbiliya tunde kelivulu Liefetikilo li lombolola ulandu woku lulikiwa kuoluali, toke kelivulu Liesituluilo. Eye o yongola okuti oluali lu linga luokaliye. Ohuminyo yaco yika tẽlisiwa muẽle. Omo liaco, omanu vosi va kolela Yehova, va kasi oku likutilila oco ocipango caye ci tẽlisiwe.

Yehova Ululiki woluali okuti, ‘ka pongoloka,’ wa likuminya oku eca omuenyo ko pui komanu. Momo oco ocipango caye tunde kefetikilo. (Malakiya 3:6; Yoano 17:3; Tiago 1:17) Utala Wondavululi, u kasi oku sandekiwa vokuenda kuanyamo alua, u lombolola ovina vioku tẽlisiwa kuocipango ca Yehova. Ovina viaco, vi tu kuatisa oku kuata elomboloko liohuminyo yoku tumbulula oluali, ndomo yi sangiwa Vembimbiliya. Omo liaco, tu ku laleka okuti o sandiliya Olombangi via Yehova, oco vi ku lomboluile eci catiamẽla kondaka eyi.—Yoano 17:3.

[Elitalatu kemẽla 4]

Embimbiliya li lombolola okuti, ongongo yika linga oluali Luokaliye

[Elitalatu kemẽla 7]

Anga hẽ ohutililo Yesu a linga yi kuata esilivilo nda ongongo