Nye o Sima Okuti Cecelela Oku Kuata Ekalo Liwa?

ULUME umue o tukuiwa hati, Jese Livermore ko Nova Yorke, wa tendiwile ndu okuti, o kuete ekalo liwa pokati komanu vosi. Eye wa kemãlele calua omo lioku linga olomĩlu viwa, kuenje wa kuata ovokuasi alua. Eye wa kuata uwalo unina haiwo wa kemãla. Wa kala vonjo yi kuete 29 kolohondo. Wa kuata ekãlu limue lia kemãla, kuenda wa kuatele omunu o liendisa.

Ulume ukuavo o tukuiwa hati Daviti,a wa kuamẽlevo onjila yaco. Omo okuti, wa kala oñuatisi ya mitavaso yocisoko cimue cupange wa kemãla, wa kala vonjila yoku tambula ocikele coku kala mitavaso yupange waco. Ukuasi waye lekemalo vieya oku livokiya. Noke, wa nola onjila yoku siapo ocikele caco. Eye wa popia hati: ‘Nda kũlĩha okuti, lalimue eteke ndika kuata vali ocikele cupange wa velapo.’ Ove hẽ o sima okuti Daviti ka nolele onjila ya sunguluka?

Valua va siata oku sima okuti, vekalo liwa, mua kongela oku kuata ukuasi kuenda ekemãlo. Pole, omanu vana va kuete ovokuasi, va siatavo oku sumua omo liovitangi. Kuenje ka va sanjukila vali ekalo liomuenyo. Eci oco ca pita la Livermore. Ndaño okuti wa kuata ukuasi walua, wa pita lovitangi vialua komuenyo waye. Eye wa sumuile calua omo liovitangi vimue ndeci: Oku pesela ovina a kuatele, oku litepa lukãi waye, kuenda ekambo lioku kuata ukamba lomãla vaye. Noke lioku pesela ukuasi waye wosi, wa enda vowotele yimue ya kemala, kuenje wa lisiõsiõla ovitangi viaye. Noke, wa pinga cimue coku nyua. Osimbu a kala oku nyua, wopa okalivulu kaye koku soneha, kuenje wa sonehela ukãi waye ukanda woku liusika. Eci amala okunyua, wa iñila vohondo yimue yoku seleka uwalo, kuenje wa liponda.

Ocili okuti, kuli ovitangi vialua via siata oku tuala omanu koku li ponda. Pole, ulandu owu, weca uvangi weci Embimbiliya li popia hati: “Ava va yongola oku linga olohuasi, . . . va litoma lohali ya lua.”​—⁠1 Timoteo 6:​9, 10.

Anga hẽ, eci ci lekisa okuti, omanu vana va sanda ekalo liwa kovokuasi lekemãlo, ka va kasi oku nõla onjila ya sunguluka? Ove hẽ, wa litenda okuti o kuete ekalo liwa? Nda oco, momo lie? Nye ca ku vetiya oku kuata ovisimĩlo viaco? Eci o sokolola eci catiamẽla kekalo liwa, pi o tiamisila utima wove? Vocipama cikuãimo, tuka konomuisa elungulo lia siata oku kuatisa omanu valua oku kuata ekalo liwa. Omo liaco, tu konomuisi ndomo ove o pondolavo oku kuata ekalo liwa.

[Etosi pombuelo yemẽla]