Kolela Kespiritu Lia Suku Eci O Liyaka Lovitangi

“Kolisako oku lilekisa ku Suku ndu we lipua.”​—⁠2 TIMOTEO 2:⁠15.

1. Ovitangi vipi vi pondola oku tepulula ombili yetu kupange wa Yehova?

KOLONEKE vilo, ovina vi kasi oku pongoloka lonjanga. Tu lete okuti ovoloño oluali a kasi oku amamako. Pole, ovituwa viwa pokati komanu vi kasi oku tepuluka. Vocipama ca sulako tua lilongisa eci catiamẽla koku yuvula espiritu lioluali. Oluali lu kasi oku pongoloka. Etu tu kasivo oku pita vapongoloko alua komuenyo wetu. Etu tu tunda vumõla kuenje tu linga akulu. Ci tava okuti tu kala olohuasi ale pamue tu pesela ukuasi waco. Olonjanja vimue, tu fisa umue vepata lietu. Ovitangi evi vi sumuisa calua. Kuenda vi pondola oku tepulula ombili yetu kupange wa Yehova.

2. Ovitangi vipi Daviti a pita lavio?

² Kavaluile omanu va kasi lovitangi ndevi via pita la Daviti. Daviti weya oku tila. Eci a kala komangu yusoma, wa lingile ekandu linene. Noke epata liaye lieya oku litepa. Wa kala ohuasi kuenda omo lioku kuka wa vela calua. Ovitangi a liyaka lavio ka via tepuluile ekolelo liaye ku Yehova. Eye wa ‘lilekisile ku Suku ndomunu walipua.’ Kuenje, Yehova wo sumũlũisa. (2 Timoteo 2:​15) Lomue pokati ketu wa pitile lovitangi ndevi via Daviti. Pole, tu pondola oku kuama ongangu yaye. Eci tu liyaka lovitangi, tu pingi ekuatiso liespiritu lia Suku.

Daviti wa Kala Embombe

3, 4. Daviti wa siapo ndati upange woku lisa olomeme? Kuenda momo lie omanu va lekisila esumbilo kokuaye?

³ Eci Daviti a kala omõla kakapiwileko lomanu. Kuenda epata liaye ka lio kapelekovo. Eci uprofeto Samuele a endele Kombeteleme, Jese wo lekisile omãla vaye ecelãla. Pole kua kambele Daviti wa kala oku lisa olomeme. Noke Yehova eye a nõla oco a linge osoma ya va Isareli. Embimbiliya li popia hati: “Samuele wa nyañula ombinga yulela, wo wavekela pokati ka vahuvaye. Espiritu lia Yehova lia wila Daviti lunene walua tunde keteke liaco.” (1 Samuele 16:​12, 13) Daviti wa kolelele kespiritu lia Yehova.

⁴ Noke, Daviti weya oku velisiwapo lomanu vofeka. Eye wa loñolohele calua koku sika ohalupa. Eteke limue, Soma Saulu wa tumĩle oku u vilikiya oco o sikileko ohalupa. Noke, Daviti wa pondele Goliata una asualali voko Isareli va kuatelele usumba. Kuenje wa yula olohoka via va Filisiti. Omanu va solele calua Daviti, kuenje vo wimbila ocisungo. Omo liaco, ukuenje wa soma wa lombolola hati, Daviti ‘wa loñolohele’ koku sika ohalupa. Eye wa kalavo ‘onõi haeye esualali, ukuotate koku vangula kuenda wa finile calua.’​—⁠1 Samuele 16:18; 17:​23, 24, 45-51; 18:​5-7.

5. Nye nda ca vetiya Daviti oku likapako? Kuenda tua kũlĩha ndati okuti ka lekisile ocituwa caco?

⁵ Daviti wa kemalẽle kuenda wa kala umalẽhe umue wa fina calua. Eye wa loñolohele koku vangula kuenda koku sika ohalupa. Wa kalavo esualali limue liapama kuenda wa taviwile la Suku. Pole, ka likapeleko. Soma Saulu wa yonguile okuti Daviti o kuela omõlaye ufeko. Pole Daviti wa lekisile umbombe kokuaye poku popia hati: “Ame nga elie, pamue vakuepata liange velie ndeci epata lia tate vi Isareli, okuti ame ndinga ondatembo yosoma?” (1 Samuele 18:​18) Ulume umue wa popia hati: ‘Daviti wa yonguile oku lombolola okuti, ndaño wa loñolohele kovina viosi kuenda wa kapiwileko lomanu, pole eye ka likapeleko okuti o kala ndatembo ya soma.’

6. Momo lie tu sukilila oku lekisa umbombe?

⁶ Daviti wa kũlĩhĩle okuti Yehova eye wa velapo kovina viosi. Kuenje eci cokuatisa oku lekisa umbombe. Eye wa sanjukile calua eci a limbuka okuti Yehova omanu wa va kapako. (Osamo 144:⁠3) Eye wa kũlĩhĩlevo okuti ekemãlo liaye lia tunda ku Yehova. Momo eye lika o tẽla oku u kuatisa kuenda oku u popela. (Osamo 18:​35) Daviti wa tu sila ongangu yiwa. Valua pokati ketu tua loñoloha kupange tu kasi oku linga. Pole, eci ka ci lekisa okuti tua velapo vakuetu. Upostolo Paulu wa popia hati: “O kuete nye okuti kua ci tambuile ocali? Nda wa ci tambula ocali o lipandela nye, ndu kua ci tambuile ocali?” (1 Va  Korindo 4:⁠7) Omo liaco, tu lekisi umbombe oco tu taviwe lespiritu lia Suku.​—⁠Tiago 4:⁠6.

‘Ka tu ka Fetuluinyi’

7. Epuluvi lipi Daviti a kuata lioku ponda Soma Saulu?

⁷ Espiritu lia Suku lia kala ku Saulu lieya oku enda ku Daviti. Pole Daviti ka livelisilepo. Noke soma Saulu wo kuatelele ukuse. Kuenje, wa fetika oku u sandiliya oco o ponde. Daviti weya oku tilila vekango. Eteke limue, Soma Saulu wa iñilile veleva mua kala Daviti. Pole, ka limbukile okuti Daviti wa kala veleva liaco lalume vaye. Noke, Daviti alume vaye vo vetiya oco a ponde Saulu. Ovo va popia hati: “Lilo olio eteke Suku a sokolola eci a popia love hati, Unyali wove ndu weca peka liove, love o linga laye cosi wa sima.”​—⁠1 Samuele 24:​2-6.

8. Momo lie Daviti a yuvuila oku fetuluinya?

⁸ Daviti wa kala lekolelo kuenda epandi. Kuenje, ka tavele oku ponda Saulu. Eci Saulu a tunda veleva, Daviti wo sapuila hati: “Yehova a linge onganji pokati kange love. Yehova a ku fetuluinyile, ame eka liange puãi ka li ku olohela.” (1 Samuele 24:​12) Daviti wa kũlĩhĩle okuti Saulu wo lueyela. Pole, ko lingile eci cĩvi kuenda wa lekisa esumbilo kokuaye. Kuenje, ovitangi viaco wa vi eca peka lia Yehova.​—⁠1 Samuele 25:​32-34; 26:​10, 11.

9. Momo lie tu yuvuila oku fetuluinya eci tu lambalaliwa?

⁹ Ci tava okuti ove o pitavo lovitangi ndevi Daviti a liyaka lavio. Koloneke vilo, kuli elambalalo li tunda ku vakuene kosikola, ku vana o talavaya lavo kupange, kuenda vakuepata liove. Yuvula oku fetuluinya. Pinga ku Yehova oco aku kuatise lespiritu liaye. Kuenje, ovituwa viove viwa vika komohĩsa vana va ku suvukile. Noke vaka fetikavo oku lilongisa Embimbiliya. (1 Petulu 3:⁠1) Kolela lika Yehova momo eye wa kũlĩha ciwa ovitangi viove. Kuenje oka ku kuatisa. Upostolo Paulu wa popia hati: “Akuetu wa soliwi, ko ka lifetuluinyi, Efetuluinyo li kale konyeño ya Suku, momo ca sonehiwa citi, efetuluinyo liange. Ame [ndi] fetuluinya. Oco ca popia Ñala [Yehova].”​—⁠Va Roma 12:⁠19.

‘Tu Tavi Kalungulo’

10. Daviti wa wila ndati vekandu? Kuenda momo lie a limbikila ekandu liaco?

¹⁰ Daviti wa kala osoma yimue ya kemãla kuenda wa sumbiwile lomanu. Eye wa soneha alivulu amue Olosamo, vioku sivaya Yehova. Kuenje, lomue wa simĩle okuti eye oka wila vekandu linene. Pole, eteke limue eci a kala kosapalalo yonjo yaye wa mõla Batisieva wa kala oku lisukula. Eye wa kũlĩhĩle okuti ulume waye Uriya wa endele kusualali. Omo liaco, wa tuma oku vilikiya Batisieva, kuenje wa pekela laye. Eci a limbuka okuti wa mina, wa kala lusumba. Momo ka yonguile okuti omanu va yeva ocitangi caco ci koka osõi. Kotembo ya Mose kua kalavo ocihandeleko cokuti, nda umue wa pekela lukãi wamãle o pondiwa. Kuenje, Daviti wa yonguile oku limbika ekandu liaye. Eye wa tuma ukanda ku Yoava oco Uriya wa kala kusualali a tiuke ko Yerusalãi. Eye wa simĩle okuti, eci Uriya eya, o pekela lukãi waye Batisieva. Pole, eci Daviti a limbuka okuti Uriya ka pekelele lukãi waye, wa sumuile calua. Kuenje wa sonehela Yoava ukanda ukuavo oco Uriya a pondiwile kuyaki. Eci Batisieva a yeva okuti ulume waye wa pondiwa, wa linga onambi. Noke, Batisieva wa linga ukãi wa Daviti.​—⁠2 Samuele 11:​1-27.

11. Olusapo lupi Natana a lomboluila Daviti? Kuenda eci Daviti a yeva olusapo luaco wa popia nye?

¹¹ Daviti wa simĩle okuti, uhembi waye ka u limbukiwa. Pole, Yehova wa kũlĩhĩle ovitangi viosi. (Va Heveru 4:​13) Pa pita lika olosãi vimue kuenje Batisieva wa cita. Noke, Suku wa tuma uprofeto Natana oco a vangule la Daviti. Natana, wo lomboluila olusapo lualume vavali. Umue ohuasi wa kala loviunda vialua violomeme. Ukuavo ohukũi wa kuata lika omeme yimosi. Eci ohuasi ya tambula ukombe, ka ya tavele okupa vocunda caye omeme yoku telekela ukombe waye. Eye wa ponda omeme yimosi yohukũi. Pole, Daviti ka limbukile okuti olusapo luaco lu kuete elomboloko likuavo. Eye wa temẽla eci ohuasi ya linga. Kuenje, wa sapuila Natana hati: ‘Ulume waco o sesamẽla okufa.’​—⁠2 Samuele 12:​1-6.

12. Yehova wa sombisa ndati Daviti?

¹² Daviti wa lipisa eye muẽle, momo noke uprofeto wo sapuila hati, ulume wa tukuiwa volusapo ‘ove muẽle.’ Kuenje, eye wa kala losõi kuenda esumuo lialua. Noke, wa yevelela kolondaka vikuavo via Yehova vieyambulo Natana o lomboluila. Daviti wa tombele ondaka ya Yehova, kuenje wa linga eci cĩvi. Eye ka pondele Uriya losipata. Pole wambata ukãi wa Uriya luyombeki. Ekandu eye a lingila vuyombeki noke lia yevala komanu vosi.​—⁠2 Samuele 12:​7-12.

13. Nye Daviti a linga eci a pindisiwa la Yehova?

¹³ Daviti noke wa litavela ekandu liaye. Eye ka temẽlele Natana kuenda ka vetelele evelo vakuavo. Pole, wa litavela hati: “Nda linga ekandu kovaso a Yehova.” (2 Samuele 12:​13) Osamo 51 yi lekisa ndomo Daviti a likekembela. Eye wa pinga ongecelo ku Yehova hati: “Ku ka nundise kovaso ove. Ku ka njupe espiritu liove li kola.” Eye wa kũlĩhĩle okuti, Yehova o tava omunu wosi ‘ukuotima wa teka’ lekandu. (Osamo 51:​11, 17) Daviti wamamako loku kolela espiritu lia Suku. Yehova ka teyuilile Daviti kovitangi a pita lavio. Pole, wo wecela ekandu liaye.

14. Nye tu sukila oku linga eci tu pindisiwa la Yehova?

¹⁴ Vosi yetu ka tualipuile. Kuenje, ci tava okuti tu wila vekandu ndeli lia Daviti. (Va Roma 3:​23) Onjali yi kuete ocisola yi pindisa omõlaye. Cimuamue haico Yehova a siata oku linga. Eye o kuatisa omanu vosi va yongola oku u vumba. Epindiso li kuatisa calua. Pole, olonjanja vimue eci tu pindisiwa tu ‘sumua.’ (Va Heveru 12:​6, 11) Nda tua pokola “kalungulo,” a Yehova, tu taviwa vali ciwa laye. (Olosapo 8:​33) Omo liaco, tu amamiko oku tava kalungulo a Yehova, oco tu kuatisiwe lespiritu liaye.

Ka Tuka Koleli Kukuasi Woluali Lulo

15. (a) Nye omanu vamue va siata oku linga lovokuasi avo? (b) Pi Daviti a pesila ukuasi waye?

¹⁵ Kakuli uvangi u lekisa okuti, olonjali via Daviti via kala olohuasi. Pole, Daviti weya oku kuata ukuasi eci a vialekiwa komangu yusoma. Koloneke vilo, kuli olohuasi vimue okuti vi seleka ovokuasi avo. Vikuavo vi sandiliya oku linga olomĩlu oco ukuasi wavo u livokiye. Handi vali, vamue va pesila ukuasi wavo kovina ka vi kuete esilivilo oco va pandiyiwe lomanu. (Mateo 6:⁠2) Daviti wa pesila ukuasi waye kupange wa Yehova. Eye weya oku limbuka okuti ocikasia ca Yehova “ci kasi vombalaka.” Noke, wa vangula la Natana hati, ndi tunga onembele okuti omo ci kapiwa. Yehova wa sanjukila ocisimĩlo ca Daviti. Pole, wo sapuila hati, onembele yi tungiwa lomõlaye Salomone.​—⁠2 Samuele 7:​1, 2, 12, 13.

16. Nye Daviti a ecela ovikuata vioku tunga onembele ya Yehova?

¹⁶ Daviti wa ecele ovikuata vioku tunga onembele. Eye wa sapuila Salomone hati: “Kaliye tala, ndaño lasakalalo alua, haimo nda angiliyila onjo ya Yehova ocita colohũlũkãi violotalendo viulu kuenda ohuluwa yolotalendo viopalata, kuendavo osipi lutale, haivio ka via pesalelue, momo vialua enene. Nda angiliyavo oviti lovawe love hu vokiyakovo.” Eye wa eca ombanjaile ya soka 3.000 kolotalendo viulu. Kuenda 7.000 kolotalendo viopalata.a (1 Asapulo 22:14; 29:​3, 4) Olombanjaile evi wa vieca lekolelo a kuatela Yehova Suku. Kuenje, wa popia ku Yehova hati: “Ovina viosi vi tunda kokuove, kuenje tua ku iha ño eci cove ale.” (1 Asapulo 29:​14) Daviti wa eca ekuatiso lioku amisako efendelo lia Yehova.

17. Elungulo lia 1 Timoteo 6:​17-19 li pondola ndati oku kuatisa olohuasi lolohukũi?

¹⁷ Etu tu pondolavo oku eca ovokuasi etu kupange wa Yehova. Poku sandiliya ovokuasi, tu kuami onjila yi taviwa la Suku. Upostolo Paulu wa popia hati: “Lungula olohuasi viovina violuali lulo okuti ka vi lipandiya loku kolela ukuasi u pua pua, vi kolele puãi Suku u o tu ihaiha ovina viosi ha tu sanjuka lavio. Vi lungula okuti vi linga ohenda ha vi kuata ukuasi wovilinga viwa. Vi ecaece lombili ku vakuavo loku va kuatisa, ha vi liangiliyila ociseveto ciwa cokotembo yi laika oku iya oco vi kuate omuenyo wocili.” (1 Timoteo 6:​17-​19) Vamue pokati ketu olohuasi, vakuavo olohukũi. Pole, vosi yetu tu koleli lika espiritu lia Suku. Kuenda tu sandiliyi onjila ‘yukuasi wa Suku.’ (Luka 12:​21) Tu lingi eci ca sunguluka oco tu taviwe la Yehova.

Tu Lilekisi ku Suku Ndomanu Valipua

18. Ongangu yipi Daviti a sila Akristão koloneke vilo?

¹⁸ Daviti wa sandiliya oku taviwa la Yehova. Kuenje wa imba ocisungo hati: “Njelise lovisapa viohisope si yeli ocili. Sukule si piãla ocikokoto oku yela.” (Osamo 57:⁠1) Daviti wa ‘kala oloneke vialua komuenyo.’ (1 Asapulo 23:⁠1) Eye wa wilile vekandu linene. Pole, wa kala ombangi yiwa omo liekolelo a lekisa.​—⁠Va Heveru 11:⁠32.

19. Tu lilekisa ndati ku Suku ndomanu va lipua?

¹⁹ Yehova wa kuatisa Daviti eci a liyaka lovitangi. Kuenje, o pondolavo oku ku kuatisa nda tua lekisa ekolelo kokuaye. Upostolo Paulu wa pitavo lovitangi vialua ndevi via Daviti. Pole, wa pandikisa loku kolela espiritu lia Suku. Eye wa popia hati: “Nẽla ovina viosi vu Kristu u o ñolaisa.” (Va Filipoi 4:​12, 13) Nda tua kolela ku Yehova loku pokola kokuaye, oka tu kuatisa oco tu linge ocipango caye. Omo liaco, tu amamiko loku pokola kespiritu lia Suku. Kuenda otembo yosi tu ‘lilekisi ku Suku ndomanu va lipua.’​—⁠2 Timoteo 2:⁠15.

[Atosi pombuelo yamẽla]

O Tambulula Ndati?

• Tu sukila ndati oku lilava oco ka tuka livelisepo?

• Momo lie tu yuvuila oku fetuluinya?

• Nye tu sukila oku linga eci tu pindisiwa?

• Momo lie tu sukilila oku kolela lika Suku okuti ovokuasi havoko?

[Elitalatu kemẽla 28]

Daviti wa kolelele kespiritu lia Suku kuenje wa kuatisiwa. Ove hẽ o kasi oku kuama ongangu yaye?

[Elitalatu kemẽla 30]

“Ovina viosi vi tunda kokuove, kuenje tua ku iha ño eci cove ale”