Yehova O Sanjukila Epokolo Liove
“Kuata olondunge amõlange, sanjuisa utima wange.”—OLOSAPO 27:11.
1. Koloneke vilo ocituwa cipi ca siata pokati komanu?
KOLONEKE vilo, esino lia livokiya calua pokati komanu. Upostolo Paulu, wa lombolola esunga liaco eci a sonehela Akristão vo ko Efeso. Eye wa va sapuila hati: “Wa . . . endaili [lesino] eci wa kuami ovituwa violuali lulo loku pokola ku soma yolondele, ene muẽle Kristu u wihi vali omuenyo. Soma yolondele haeye Eliapu, lopo o kasi loku linga upange waye vovitima via vakuesino.” (Va Efeso 2:1, 2) Satana Eliapu, “soma yolondele,” eye wa siata oku vetiya omanu vosi oku lekisa esino. Eye wa vetiya esino liaco kocita catete, kuenje, esino liaco lia li vokiya calua tunde eci a tundisiwa kilu, eci voluali mua pita Uyaki Watete.—Esituluilo 12:9.
2, 3. Nye ci tu vetiya oku pokola ku Yehova?
2 Etu Tuakristão, tua kũlĩha okuti, Yehova o sesamẽla epokolo lietu. Momo Eye Ululiki wetu haeye wa siata oku Tata omuenyo wetu, kuenda Ombiali yoluali luosi haeye Onjovoli yetu. (Osamo 148:5, 6; Ovilinga 4:24; Va Kolosai 1:13; Esituluilo 4:11) Koloneke via Mose, va Isareli va kũlĩhĩle okuti, Yehova eye Ono Yomuenyo, haeye Upopeli wavo. Omo liaco, Mose wa va sapuila hati: “Ci kapeli vutima oku linga ndeci Yehova Suku yene o handeleki.” (Esinumuĩlo 5:32) Ovo va sukilile oku pokola ku Yehova, pole, va linga vakuesino.
3 Momo lie oku pokola Kululiki woluali luosi ci kuetele esilivilo? Yehova wa vetiya uprofeto Samuele oku sapuila Soma Saulu hati: “Oku pokola kua velapo, oku lumba ku sule.” (1 Samuele 15:22, 23) Momo lie?
Ndomo Oku Pokola ‘Kua Velapo Ovilumba’
4. Nye tu pondola oku eca ku Yehova?
4 Yehova omo okuti eye Ululiki wetu, ovina viosi tu kuete via tunda kokuaye. Anga hẽ kuli ocina cimue tu pondola oku eca kokuaye? Ocili okuti tu kuete ocina cimue ca velapo. Ocina caco nye? Etambululo, li sangiwa kolondaka via popia hati: “Kuata olondunge amõlange, sanjuisa utima wange, oco nambulule u o njimbula.” (Olosapo 27:11) Tu pondola oku eca ku Suku epokolo lietu. Ocili okuti, vosi yetu tu kuete ovitangi via litepa kuenda tua tunda kapata a litepa. Pole, nda tua pokola ku Yehova, tu eca etambululo kuhembi wa Satana wa popia hati, eci omanu va liyaka lovitangi, va liwekapo oku fendela Yehova. Omo liaco, tu kuete esumũlũho lioku situlula uhembi waco.
5. Yehova o kala ndati eci omanu ka va pokola kolonumbi viaye? Lombolola ulandu waco.
5 Yehova wa kapako olonjila viosi tu nõla komuenyo wetu. Nda tua nõlapo esino Eye o sumua. Momo lie? Momo ka sanjukila oku mola omunu o nola onjila yimue ka ya sungulukile. (Osamo 78:40, 41) Sokolola ndeci okuti, omunu umue okuete uvei wo diabete, ka kuama olonumbi via Ndotolo vina viu kuatisa oku kuata uhayele. Pole amamako okulia ovina vo sapuila hati, ka ci tava oku vilia. Eci ndotolo a limbuka esino liombeyi yaco, o yeva nye vutima? Tu sukilavo oku ivaluka okuti, Yehova o sumua eci omanu va lekisa esino kokuaye. Momo Eye wa kũlĩha ovitangi vi pita la vana ka va pokola kolonumbi viaye.
6. Nye ci tu kuatisa oku pokola ku Yehova?
6 Nye ci tu kuatisa oku pokola ku Yehova? Tu sukila oku pinga ku Yehova “utima wolondunge” vioku pokola kokuaye ndeci Soma Salomone a linga. Eye wa pinga oku kuata utima waco oco a tẽle “oku tepisa pokati keci ciwa leci cĩvi,” poku tetulula ovitangi pokati ka va Isareli. (1 Olosoma 3:9) Etu tu sukilavo “utima wolondunge” vioku pokola ku Yehova oco tu tẽle oku tepisa pokati kovina viwa levi vĩvi via siata voluali lulo luesino. Yehova wa tu angiliyila ovina vialua vi tu kuatisa oku kuata “utima wolondunge” ndeci: Embimbiliya, alivulu a situlula olonumbi Viembimbiliya, olohongele, kuenda akulu vekongelo. Anga hẽ, tua siata oku kuatisiwa leliangiliyo liaco?
7. Momo lie Yehova a velisilapo epokolo okuti ovilumba vi sule?
7 Ivaluka okuti, Yehova kosimbu, wa sapuilile omanu vaye hati, epokolo lia velapo ovilumba viovinyama. (Olosapo 21:3, 27; Hosea 6:6; Mateo 12:7) Momo lie Yehova a popela olondaka viaco, nda eye wa tumile omanu vaye oku eca ovilumba? Momo lie omanu va sukilile oku eca ovilumba? Anga hẽ va cilingila oku sanjuisa Suku? Ale wa ci lingila omo lioku pokola ño kocisila caco? Nda umue o yongola oku sanjuisa Yehova lutima waye wosi, o sukila oku pokola kovihandeleko viaye. Yehova ka sukila ovilumba viovinyama. Pole, epokolo lietu, olio lia velapo kokuaye.
Ongangu Yelungulo
8. Momo lie Yehova a tundisila Saulu komangu yusoma?
8 Ulandu wa Soma Saulu ndomo wa sonehiwa Vembimbiliya, u lekisa esilivo liepokolo. Saulu kefetikilo liusoma waye, wa liketisile calua kuenda wa kala o soma yimue yomboka, kuenje ‘wa litendele okuti o sule.’ Pole, vokuenda kuotembo, epela kuenda ovisimilo vĩvi, vio vetiya oku li nolela onjila yaye muẽle. (1 Samuele 10:21, 22; 15:17) Onjanja yimue, Saulu wa kala oku lavoka oku linga uyaki la va Filisiti. Noke Samuele wo handelekele oku u kevelela toke eci a tiuka koku eca ocilumba ku Yehova loku u lekisa onjila a sukila oku kuama. Pole, omo okuti Samuele wa kala oku cilua, omanu va fetika oku lisandola. Eci Saulu a ci mola, wa nõlapo oku eca “ocilumba coku pia elisi.” Esino liaye lia sumuisa Yehova. Eci Samuele a pitila, Saulu ka tavele oku limbuka oku lueya kuaye. Kuenje, wa popia hati, omo okuti Samuele wa kala oku cilua, eye wa nolapo oku eca ocilumba ku Yehova oco a kuatisiwe lohenda yaye. Saulu wa simile okuti, oku eca ocilumba oco ocina ca velapo okuti oku pokola konumbi ya Samuele yoku u talamẽla toke eci a tiuka koku eca ocilumba caco, ku sule. Pole, Samuele wo sapuila hati: “Wa linga cĩvi. Kua pokuile kocihandeleko ca Yehova, Suku yove, cina a ku handeleka.” Omo liaco, wa tundisiwa komangu yusoma omo liesino liaye.—1 Samuele 10:8; 13:5-13.
9. Saulu wa lekisa ndati esino ku Yehova?
9 Anga hẽ, ocitangi Saulu a pita laco co wiha elungulo? Sio ka co wĩhile elungulo. Noke, Yehova wa tuma Saulu oku lundula epata lia va Amaleke lina lia yakele la va Isareli ndaño ka va va lingile cimue cĩvi. Pole, Saulu ka kunduile ovinyama viavo. Eye wa pokola ku Yehova poku “yula va Amaleke tunde ko Havila toke ko Siuri.” Eci Samuele a lisanga laye, Saulu wa yeva esanju lia piãla, kuenje wa popia hati: “Suku a ku sumũluĩse. Nda linga cosi ca popia Suku.” Pole, eye kumue lomanu vaye, ka va pokuile kolonumbi va tambuile ku Samuele. Momo, ka va pondele Soma Agage. Handi vali, ‘va supisapo olomeme via velapo, lolongombe lovinyama viosi via lẽla kuenda cosi ci kuete esilivilo.’ Noke, soma Saulu, wa lekisa esunga liaco poku popia hati: “Omanu va popela olomeme lolongombe via velapo via va Amaleke. Va vi nena kulo ha va vi lumbi ku Yehova, Suku yove.”—1 Samuele 15:1-15.
10. Saulu wa sukilile oku lilongisa nye kesino liaye?
10 Samuele wa sapuila Saulu hati: “Yehova nga o sanjukila ovilumba vioku yoka levi vioku pia elisi ndeci a sanjukila oku pokola kondaka [Yaye]? Tala, oku pokola kua velapo, oku lumba ku sule. Oku yevelela kua velapo. ulela wolomeme u sule.” (1 Samuele 15:22) Omo okuti Yehova wa tumile oku ponda ovinyama viavo viosi, ka tavele oku vieca kokuaye ndovilumba.
Lekisa Epokolo Kovina Viosi
11, 12. (a) Yehova o tenda ndati alikolisilo etu oku u sanjuisa poku u fendela? (b) Omunu o likemba ndati eye muẽle poku sima hati, o kasi oku linga ocipango ca Yehova, ndaño ka pokola kokuaye?
11 Yehova o sanjuka calua poku mola afendeli vaye va pandikisa kelambalalo, loku kunda olondaka viwa Viusoma ndaño omanu ka va tava kondaka yaco. Eye o sanjukavo poku mola omanu vaye va likolisilako oku endaenda kolohongele, ndaño lasakalalo omuenyo. Epokolo lietu kovina viaco viespiritu li sanjuisa utima wa Yehova. Eye o sanjukila elikolisilo lietu lioku u fendela lutima wosi. Ndaño okuti omanu ka va kapeleko upange wetu, pole Yehova wa kapako ovilumba viosi tu eca kokuaye lutima wosi, kuenje o tu sumũlũisa.—Mateo 6:4.
12 Oco tu sanjuise Yehova, tu sukila oku pokola kokuaye kovina viosi tu linga. Ka tuka kuati ovisimĩlo viokuti, tu tẽla oku sanjuisa Yehova osimbu tu amamako oku lueya ovihandeleko viaye. Omunu pamue o sima okuti, nda wa vokiya upange waye ku Yehova, ndaño wamamako oku linga ukahonga ale ekandu likuavo linene, Yehova u wecela. Ovisimĩlo viaco viuveke.—Va Galatia 6:7, 8.
13. Epokolo lietu ku Yehova li pita ndati voseteko eci tu kasi lika lietu?
13 Tu sukila oku lipula ndoco: ‘Anga hẽ, nda siata oku lekisa epokolo ku Yehova kovina viosi ndi linga, ndaño ceci ndi kasi pokolika?’ Yesu wa popia hati: “U o linga esunga leci citito, eye o linga esunga leci ca lua. Puãi u ka lingi esunga leci citito, eye ka lingi esunga leci ca lua.” (Luka 16:10) Anga hẽ, tua siata oku ‘endaenda lesunguluko liovutima’ ndaño tu kasi ‘vonjo yetu’ okuti lomue o tu lete? (Osamo 101:2) Osimbu tu kasi vonjo, esunguluko lietu ci tava okuti li setekiwa. Kolofeka vina okuti omanu va kuete o televisãu volonjo viavo, ca leluka oku tala oviluvialuvia viomanu va kasi epõlola. Kosimbu, omanu va enda oku tala lika oviluvialuvia viaco, nda va enda volonjo violomapalo vina va lekisa ovina viaco. Anga hẽ, ka tu sukila oku pokola kelungulo lia Yesu wa popia hati, wosi “wa vanja ukãi ho liveli, vutima waye wo pekelisa ale”? Ocili okuti, tu sukila oku yuvula oku tala oviluvialuvia viomanu va linga evĩho. (Mateo 5:28; Yovi 31:1, 9, 10; Osamo 119:37; Olosapo 6:24, 25; Va Efeso 5:3-5) Anga hẽ, tu kuete ocituwa coku tala vo televisãu omanu va kasi oku liponda? Tu kuãi hẽ, ongangu ya Suku yetu una onyale omanu ‘va sole ungangala’? (Osamo 11:5) Ca sunguluka hẽ, Ukristão oku nyuila pokolika toke eci a kolua? Embimbiliya, li pisa uholua kuenda li lungulavo Akristão oku yuvula oku kala ‘apika vovinyu.’—Tito 2:3; Luka 21:34, 35; 1 Timoteo 3:3.
14. Catiamẽla kolombongo, kolonepa vipi tu sukila oku lekisa epokolo ku Suku?
14 Konepa yikuavo tu sukila oku lunguka, kocitangi colombongo. Anga hẽ tua litenga volomĩlu vimue ka via sungulukile oco tu kale lonjanga ohuasi? Anga hẽ tua siata oku tila poku feta elisimu? Ale tua siata oku pokola kocihandeleko ci popia hati: “Eci komanu vosi eci ca va sesamẽla, ulambu [ale elisimu ku lia] sesamela”?—Va Roma 13:7.
Epokolo li Vetiyiwa Locisola
15. Momo lie o pokuila kolonumbi via Yehova?
15 Oku pokola kovihandeleko via Suku, ci nena asumũlũho alua. Nda tua yuvula oku sipa, okuti tu ambata omuenyo uwa, loku pokola kovihandeleko via Suku via tiamẽla kosonde, ci tu teyuila kovoveyi alua. Olonumbi Viembimbiliya vi tu teyuila koku pesila olombongo vietu kovina ka vi kuete esilivilo. Handi vali, tu kala ciwa lomanu kuenda oku kuata esanju vepata. (Isaya 48:17) Ekuatiso liaco, li kasi ndesumũlũho litunda koku pokola kovihandeleko via Yehova. Handi vali, ocisola tu kuetele Yehova, oco ci tu vetiya oku pokola kokuaye. Ka tu vumbi Yehova omo lioku tẽlisa olonjongole vietu muẽle. (Yovi 1:9-11; 2:4, 5) Suku wa tu ĩha epondolo lelianjo lioku nõla u tu yongola oku pokola. Pole, tu pokola kokuaye, momo tu yongola oku linga eci ca sunguluka okuti ci sanjuisa utima waye.—Va Roma 6:16, 17; 1 Yoano 5:3.
16, 17. (a) Yesu wa lekisa ndati epokolo ku Suku lutima waye wosi? (b) Tu kuama ndati ongangu ya Yesu?
16 Yesu wa tu sila ongangu yiwa yoku pokola ku Yehova omo liocisola a lekisa Kokuaye. (Yoano 8:28, 29) Yesu eci a kala palo posi, ‘wa lilongisa epokolo kohali a tala.’ (Va Heveru 5:8, 9) Wa ci linga ndati? Eye ‘wa ci linga poku liketisa, loku pokola toke kolofa poku valeliwa kuti.’ (Va Filipoi 2:7, 8) Yesu, ndaño okuti, eci a kala kilu wa lekisile epokolo, eci eya palo posi, epokolo liaye lia pita voseteko. Omo liaco, tu sukila oku kolela okuti, Yesu wa noliwa ciwa poku linga Ocitunda Cavelapo colombuavekua kuenda comanu vakuavo vakuekolelo.—Va Heveru 4:15; 1 Yoano 2:1, 2.
17 Nye ci popiwa catiamẽla kokuetu? Tu sukila oku kuama ongangu ya Yesu poku pitisa kovaso ocipango ca Suku. (1 Petulu 2:21) Tu kuata lika esanju nda ocisola tu kuetele Yehova ci tu vetiya oku pokola kovihandeleko viaye ndaño tu liyaka lovitangi, ale ayonjo akuavo. (Va Roma 7:18-20) Vepokolo liaco, mua kongelavo oku tava kolonumbi vieciwa la vamanji va kasi oku songuila efendelo lia Yehova, ndaño ka va lipuile. (Va Heveru 13:17) Epokolo lietu kolonumbi via Yehova, eci tu kasi pokolika, li nena esanju kokuaye.
18, 19. Nye ciyilila kepokolo tu lekisa ku Suku lutima wosi?
18 Koloneke vilo, vepokolo lietu ku Yehova, mua kongela oku pandikisa kelambalalo oco tu amameko oku linga ocipango caye. (Ovilinga 5:29) Voku pokola kocikundi ca Yehova coku kundila omanu loku va longisa ondaka Yaye toke kesulilo lioluali lulo, mua kongela oku lekisa epandi. (Mateo 24:13, 14; 28:19, 20) Tu sukila oku pandikisa oco tu amameko oku likongela la vamanji, ndaño lovitangi violuali lulo. Yehova Suku yetu ukuacisola, wa kapako alikolisilo etu oku lekisa epokolo kokuaye. Oco, tu lekisa epokolo liaco, tu sukila oku yaka loloñei vietimba lietu omo liekambo lioku lipua, loku yuvula ovina vĩvi kuenda oku pamisa onjongole yetu yoku linga eci ciwa.—Va Roma 12:9.
19 Nda tua vumba Yehova lutima wetu wosi, eye ‘o tu ĩha onima omo lioku u sanda.’ (Va Heveru 11:6) Ocili okuti, oku eca ovilumba ku Yehova ku kuete esilivilo. Pole, Eye o sanjukila vali calua epokolo lieciwa Kokuaye locisola.—Olosapo 3:1, 2.
O Tambulula Ndati?
• Momo lie tu popela tuti, tu kuete cimue tu pondola oku eca ku Yehova?
• Ekandu lipi Saulu a lingile?
• O lekisa ndati ku Yehova okuti, epokolo lia velapo ovilumba?
• Nye ci ku vetiya oku pokola ku Yehova?
[Elitalatu kemẽla 22]
Ove hẽ, wa siata oku pokola kolonumbi via Yehova eci o kala lika liove konjo?