Ove Hẽ Wa Lipongiya Oco O Teyuile Ekolelo Liove?

OVE hẽ, wa pitile ale locitangi cimue ca ku vetiya oku teyuila ekolelo liove? Kũlĩhĩsa ulandu wa pita la manji Susana wo kofeka yo Paraguai eci a kuata ci soka 16 kanyamo. Eci a tangela kosikola ya velapo, onjanja yimue va kala oku lilongisa ocipama catiamẽla kovituwa viwa, kuenje vamue pokati kolondonge va votola ondaka yokuti, Olombangi Via Yehova ka vi tava “Kotestamento Yale,” ku Yesu Kristu, ale ku Maria. Vakuavo va popiavo hati, Olombangi Via Yehova nda vi vela, ka vi tava oku sakuiwa lovihemba, pole, vi nõlapo oku fa. Nye o sukila oku linga nda wa pita locitangi caco?

Manji Susana wa votola eka liaye, kuenje wa likutilila ku Yehova. Kesulilo liocipama caco, wa pinga kulongisi wavo oco a lombolole esunga lieci a tavela oku kala Ombangi ya Yehova. Omo liaco, ulongisi wa tava kepingilo liaye. Vokuenda kuolosemana vivali, Susana wa pongiya olonepa vi sangiwa vokalivulu losapi hati: Testemunhas de Jeová​—⁠Quem São? Em Que Crêem?

Manji Susana eci eteke lioku lekisa ocipama caye lia pitila, wa lombolola oku kua tunda onduko Olombangi Via Yehova. Eye wa lombololavo elavoko tu kuete, kuenda esunga lieci ka tu tavela oku sakuiwa losonde. Noke wa pinga ku vakuavo oco va linge apulilo atiamẽla kondaka yaco. Valua pokati kolondonge va votola ovaka loku linga apulilo. Omo liaco, ulongisi wavo wa komoha calua eci a limbuka ndomo Susana a eca atambulula lekuatiso Liovisonehua.

Umue pokati kolondonge, wa popia hati: “Eteke limue eci nda endele Vonjango Yusoma, sia sangelemo oviñumañuma.” Noke ulongisi wa lekisa onjongole yoku kũlĩha esunga liaco. Kuenje, manji Susana wa tanga elivulu Liosamo 115:​4-8, kuenda Etundilo 20:⁠4. Omo liaco, ulongisi wa komoha calua noke wa popia hati: “Momo lie vonembele yetu mueyukila oviñumañuma, osimbu okuti Embimbiliya li pisa ovina viaco?”

Ombangulo yaco ya pita eci ci soka 40 kakukutu. Manji Susana eci a pula vakuavo nda va yongola oku tala ovideo losapi hati: Sem Sangue​—⁠A Medicina Encarou o Desafio, vosi va tambulula hati, tu yongola. Kuenje, ulongisi wa linga esokiyo lioku amamako lombangulo yaco keteke likuavo. Noke yoku tala ovideo yaco, manji Susana wa lombolola esunga lieci Olombangi Via Yehova poku sakuiwa ka vi tavela oku kapiwa osonde. Omo liaco, ulongisi wavo wa popia hati: “Sia kũlĩhĩle okuti, kuli olonjila vialua vioku sakuiwa okuti, omunu ka kapiwa osonde. Pole, cilo nda kũlĩha esilivilo liaco. Anga hẽ, Olombangi Via Yehova ovio lika via siata oku sakuiwa loku kuama onjila yaco?” Eci umue pokati kolondonge a limbuka okuti, Olombangi Via Yehova havioko lika via siata oku ci linga, etambululo liaye lia vetiya ulongisi oku popia hati: “Onjanja yikuavo eci Olombangi Via Yehova viya konjo yange, ndi tava oku vangula lavo.”

Manji Susana wa sokiyile oku lombolola lika ci soka 20 kakukutu, pole, ombangulo yaco ya pita olowola vitatu. Osemana ya kuamamo, olondonge vikuavo via lombololavo catiamẽla ketavo liavo. Poku malusula ulandu wavo, vakuavo va linga apulilo alua, pole, olondonge viaco ka via tẽlele oku teyuila etavo liavo. Omo liaco, ulongisi wa va pula hati: “Momo lie ka wa tẽleli oku teyuila etavo liene ndeci [Susana] Ombangi ya Yehova a linga?”

Ovo va tambulula hati: “[Olombangi Via Yehova] via siata oku lilongisa Embimbiliya. Pole, etu ka tua siatele oku ci linga.”

Noke ulongisi wa sapuila Susana hati: “Ene wa siati oku lilongisa Embimbiliya, loku kapako eci li longisa. Omo liaco, vu sesamẽla epandiyo.”

Manji Susana ka ecele etambululo. Pole, poku kembulula alundi a votuiwile, wa kuama ongangu ya kafeko woko Isareli, una wa kala kupika ko Suria. Kafeko waco, wa endele konjo ya Namana wa kala kesongo kolohoka via va Suria, una wa kuatele uvei umue ka u kuete ovihemba. Noke wa sapuila ukãi wa Namana hati: “Nda cime cange wa kaile kumue luprofeto wo ko Samaria, nda hĩse! Momo nda wo kayisa ovilundu viaye!” Kafeko ka kuatele ohele yoku eca uvangi watiamẽla ku Suku yocili. Kuenda uvangi waco wa kuatisa Namana oku linga ufendeli wa Yehova.​—⁠2 Olos. 5:​3, 17.

Cimuamue haico Susana a linga okuti, ka kuatele ohele yoku eca uvangi watiamẽla ku Yehova kuenda kafendeli vaye. Susana eci vo lundila poku teyuila ekolelo liaye, wa pokola kolonumbi Viovisonehua vi popia hati: “Vovitima viene Sumbili Kristu nda Ñala. Olonjanja viosi lipongiyi okuti vu tẽla oku kumbulula komunu wosi o pula oku kũlĩhĩsa elavoko vu kasi lalio. Ci lingi puãi lumbombe kuenda lesumbilo.” (1 Pet. 3:​15) Anga hẽ, wa li pongiya oco o teyuile ekolelo liove kuenda wa siata oku ci linga eci o sanga epuluvi liaco?

[Elitalatu kemẽla 17]

Okalivulu aka kuenda ovideo, vi pondola oku ku kuatisa oku teyuila ekolelo liove