Olohutililo Viove Vi Situlula Nye Catiamẽla Kukamba Wove La Yehova?
“Ove, okuakuyeva ohutililo, kokuove ku kokela omanu vosi.”—OSA. 65:2.
1, 2. Momo lie afendeli va Yehova va siatela oku lekisa ekolelo poku likutilila kokuaye?
YEHOVA wa siata oku yevelela olohutililo viafendeli vaye vo kolela. Tua kolela okuti, o yeva olohutililo vietu. Ndaño Olombangi vialua Via Yehova via likutilila ku Suku vonjanja yimuamue, eye o pondola oku yevelela omunu lomunu pokati kavo.
2 Daviti wa kũlĩhĩle okuti, Suku o yevelela olohutililo viaye, kuenje, wa imba ocisungo hati: “Ove, okuakuyeva ohutililo, kokuove ku kokela omanu vosi.” (Osa. 65:2) Yehova wa tambulula olohutililo via Daviti, momo wa kala ufendeli wa pokola kokuaye. Tu sukila oku lipula ndoco: ‘Anga hẽ, olohutililo viange vi lekisa okuti, nda kolela ku Yehova, kuenda nda pitisa kovaso efendelo liocili? Olohutililo nda siata oku linga, vi lekisa nye catiamẽla kokuange?’
Lekisa Umbombe Poku Likutilila ku Yehova
3, 4. (a) Ocituwa cipi tu sukila oku lekisa poku likutilila ku Suku? (b) Nye tu sukila oku linga, nda tu kuete ‘ovisimĩlo ka via sungulukile’ omo liakandu anene tua linga?
3 Nda tu yongola okuti, Suku o tambulula olohutililo vietu, tu sukila oku lekisa umbombe poku likutilila kokuaye. (Osa. 138:6) Tu sukilavo oku pinga ku Yehova oco a kũlĩhĩse utima wetu, ndeci Daviti a linga poku popia hati: “Ñulĩhise, a Suku. Kũlĩha utima wange. Seteke. Kũlĩha ovisimĩlo viange, hu vanji nda ñasi lovituwa vievĩho. Songuile vonjila ka yi pui.” (Osa. 139:23, 24) Tu sukila oku likutilila ku Suku loku ecelela okuti, o kũlĩhĩsa utima wetu, oco tu pokole kalungulo a sangiwa Vondaka yaye. Yehova o pondola oku tu kuatisa oku endela “vonjila ka yi pui” yi tuala komuenyo ko pui.
4 Nye tu sukila oku linga, nda tu kuete ‘ovisimĩlo ka via sungulukile’ omo liakandu anene tua linga? (Tanga Osamo 32:1-5.) Oku amamako oku livetela evelo omo liekandu limue tua linga, ci nena ehonguo li sokisiwa nduti wa kambela ovava kotembo yowuya. Daviti wa sumuile calua omo liekandu a lingile, kuenda wa vela omo liesumuo liaco. Pole, wa kuata esanju noke yoku likekembela ekandu liaye ku Suku! Daviti wa kuata esanju lialua eci a limbuka okuti, Yehova ‘wa ecela ekandu liaye.’ Omo liaco, oku litavela akundu etu ku Suku ci nena esanju, momo akulu vekongelo va pondola oku kuatisa omunu wa lueya oco a pame kespiritu.—Olosap. 28:13; Tia. 5:13-16.
Likutilila ku Suku Loku Eca Olopandu Kokuaye
5. Oku likutilila, ku Yehova ci lomboloka nye?
5 Nda tua sumua omo liocina cimue cĩvi tua linga, tu sukila oku kapako elungulo lia Paulu wa popia hati: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene.” (Va Fil. 4:6) Oku likutilila, ci lomboloka “oku lekisa umbombe” ku Suku oco a tu kuatise. Nda tu kasi oku lambalaliwa, tu sukila oku likutilila ku Yehova oco a tu kuatise loku tu songuila.
6, 7. Ovina vipi tu sukila oku kongela volohutililo vietu vioku eca olopandu?
6 Nda tu likutilila lika eci tu sukila ekuatiso, ocituwa caco ci situlula nye catiamẽla kukamba wetu la Yehova? Paulu wa popia hati, tu sukila oku eca ku Suku apingilo etu, kumue “lolopandu.” Tu kuete esunga lioku eca olopandu ku Suku ndeci Daviti a linga poku popia hati: “A Yehova, ekemalo liove! Unene wove, kuenda ulamba leyulo lunumbu, cosi cove, momo cosi ci kasi kilu leci ci kasi kilu lieve, cove! Usoma wove, a Yehova, kuenda ove wa kemãla, wa tulamela vosi, haive Fu! . . . A Suku yetu, tu ku imbila olopandu, tu sivaya onduko yove ya kemãla.”—1 Asa. 29:11-13.
7 Yesu wa eca olopandu ku Suku omo liokulia, kuenda wa ecavo olopandu omo liombolo, lovinyu valia Pocipito Condalelo yaye. (Mat. 15:36; Mark. 14:22, 23) Tu sukila oku kuama ongangu ya Yesu, yoku eca ‘olopandu ku Yehova’ omo ‘liovikomo a lingila omãla vomanu,’ vana va siata oku pokola ‘kolonumbi viaye viesunga.’ Tu sukilavo oku eca olopandu omo lioku lilongisa ondaka yaye yi sangiwa Vembimbiliya.—Osa. 107:15; 119:62, 105.
Kongela Vakuene Volohutililo Viove
8, 9. Momo lie tu sukilila oku kongela vamanji volohutililo vietu?
8 Volohutililo vietu, tua siata oku tukula ovina viatiamẽla kokuetu, pole, tu sukila oku kongelamo vamanji vosi ndaño vana ka tua kũlĩhĩle olonduko viavo. Ndaño upostolo Paulu ka kũlĩhĩle Akristão vosi va kala vekongelo lia va Kolosai, pole wa va sonehela ndoco: “Olonjanja viosi eci tu vu likutilila tu imba olopandu ku Suku Isia ya Ñala yetu Yesu Kristu. Momo tua yeva ekolelo liene vu Kristu Yesu, locisola cene coku sola olosandu [viosi].” (Va Kol. 1:3, 4) Paulu volohutililo viaye, wa kongelamo vamanji vo ko Tesalonike. (2 Va Tes. 1:11, 12) Nda volohutililo vietu tua kongelamo vamanji, ci lekisa okuti, tu kuete ukamba lavo.
9 Oku kongela volohutililo vietu Akristão olombuavekua kuenda “olomeme vikuavo,” ci lekisa okuti, tua kapako ocisoko ca Yehova. (Yoa. 10:16) Paulu wa pinga ku vamanjaye, oco okuti, poku likutilila, va ‘kuata uloño woku sapula elumbu liondaka yiwa.’ (Va Efe. 6:17-20) Anga hẽ, volohutililo vietu tua siata oku kongelamo vamanji?
10. Oku kongela vakuetu volohutililo vietu, ci tu kuatisa ndati?
10 Oku kongela vamanji volohutililo, ci tu vetiya oku kuata ovisimĩlo via sungulukuka viatiamẽla kokuavo. Ndaño ka tu sole omunu umue, tu pondola oku lekisa ocisola kokuaye poku u kongela volohutililo vietu. (1 Yoa. 4:20, 21) Olohutililo viaco, vi pamisa ukamba wetu la vamanji, kuenda vi nena ombembua pokati ketu. Nda tua ci linga, tu lekisa okuti, tu kuete ocisola ndeci ca Kristu. (Yoa. 13:34, 35) Ocituwa caco, catiamẽla kapako espiritu lia Suku. Anga hẽ, tua siata oku likutilila ku Yehova loku pinga espiritu sandu liaye oco li tu kuatise oku lekisa apako espiritu ndeci: ocisola, esanju, ombembua, epandi, unu, esunga, ekolelo, lumbombe, kuenda esuluviko? (Luka 11:13; Va Gal. 5:22, 23) Nda tua ci linga, olondaka vietu lovilinga vietu, vi eca uvangi wokuti, tu kasi oku songuiwa lespiritu.—Tanga Va Galatia 5:16, 25.
11. Momo lie tu popela okuti, ca sunguluka oku pinga ku vakuetu oco va tu kongele volohutililo viavo?
11 Nda tua limbuka okuti, omãla vetu va kasi oku lambalaliwa kosikola, tu sukila oku va kongela volohutililo vietu, loku tanga Ovisonehua vi va kuatisa oku amamako oku kala vakuacili, kuenda oku yuvula ovina ka via sungulukile. Paulu, wa sapuila Akristão ko Korindo hati: “Tu likutilila ku Suku okuti ene ko lingi cĩvi.” (2 Va Kor. 13:7) Olohutililo vioku eca olopandu vi lingiwa lumbombe, vi sanjuisa Yehova, kuenda vi eca uvangi wekalo lietu. (Tanga Olosapo 15:8.) Tu pondola oku pinga oco vakuetu va tu kongele volohutililo viavo, ndeci upostolo Paulu a linga. Eye wa soneha hati: “Tu pinga okuti vu tu likutilila momo tua soka tuti, Tu kasi lutima wa pua episo, omo tu yongola oku linga esunga [kovina] viosi.”—Va Hev. 13:18.
Olohutililo tu Linga vi Situlula Ekalo Lietu
12. Ovina vipi tu sukila oku kongela volohutililo vietu?
12 Anga hẽ, etu Tulombangi Via Yehova, olohutililo vietu vi lekisa okuti, tua sanjuka kuenda tu kuete ombili kupange woku kunda? Volohutililo vietu, tua siata hẽ oku kongelamo ocipango ca Yehova Suku coku kunda esapulo Liusoma, loku kemãlisa uviali waye, kuenda oku sivaya onduko yaye? Tu sukila oku tukula ovina evi volohutililo vietu ndeci Yesu a linga vohutililo yi fetika lolondaka vi popia hati: “A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.”—Mat. 6:9, 10.
13, 14. Olohutililo vietu vi situlula nye catiamẽla kokuetu?
13 Olohutililo vietu, vi situlula ocisola tu kuetele Yehova Suku kuenda olonjongole vietu. Eye, wa kũlĩha ovisimĩlo vietu. Elivulu Liolosapo 17:3, li popia hati: “Opalata oku yeveya, ulu oku totala, kuenje Yehova o pataisa itima.” Suku olete ovina viosi vi kasi vutima wetu. (1 Sam. 16:7) Eye wa kũlĩha ndomo tua siata oku tenda olohongele vietu, upange woku kunda, kuenda vamanjetu kespiritu. Yehova wa kũlĩhavo ndomo tua siata oku tenda ‘vamanji’ ya Kristu. (Mat. 25:40) Eye wa kũlĩha onjongole yutima wetu, kuenda o limbuka nda poku likutilila tua siata oku pitolola olondaka vimuamue, ale sio. Omo liaco, Yesu wa popia hati: “Eci vu likutilila ko ka pitololi ño-o olondaka vioku patekela ndeci vakualofeka va lingainga, momo va soka vati, Tu yeviwa omo olondaka vietu via lua.”—Mat. 6:7.
14 Olondaka violohutililo vietu, vi situlula ekolelo tu kuetele Suku. Daviti wa popia hati: “[A Yehova,] vucitililo cange, haive vumbonge ya kola yoku puluka kunyali. Tava okuti ñala vombalaka yove oloneke ka vi pui. Ndi livela oku wunda velolo liavava ove.” (Osa. 61:3, 4) Upopi umue wocindekaise u lekisa okuti, nda Suku wa ‘kapa ombindikiyo yaye, tu kolapo, kuenda tu tatiwa ciwa laye. (Esit. 7:15) Tu sanjuka calua poku kuata ukamba la Yehova lekuatiso liolohutililo, lelavoko liokuti, o pondola oku tu kuatisa poku liyaka lovitangi vi seteka ekolelo lietu!—Tanga Osamo 118:5-9.
15, 16. Olohutililo vi tu kuatisa ndati oku tẽlisa onjongole yetu yoku tambula ovikele vekongelo?
15 Olohutililo tu linga lutima wosi ku Yehova, vi tu kuatisa oku limbuka ocili catiamẽla kokuaye. Anga hẽ, tu kuete onjongole yoku tambula ovikele vocisoko ca Yehova, oco tu kuatise kovopange vekongelo kuenda kupange woku kunda Usoma? Nda tua tambula ovikele viaco, ci lekisa hẽ okuti, tu sukila “oku likapa kunene,” ale tu ‘viala vakuetu’? Afendeli va Yehova, va sukila oku yuvula ovisimĩlo viaco. (Tanga 3 Yoano 9, 10; Luka 22:24-27.) Nda tu kuete ovisimĩlo ka via sungulukile, tu sukila oku likutilila ku Yehova Suku, oco a tu kuatise, osimbu ka via tu yapuisile.
16 Vamanji akãi, pamue va kuata onjongole yokuti, alume vavo, va linga oloñuatisi viakulu vekongelo, ale akulu vekongelo. Volohutililo viavo, ci tava okuti, va tukula onjongole yavo yoku lekisa ongangu yiwa. Ovituwa epata li lekisa poku sapela, kuenda ovilinga viavo, ovio vi eca uvangi ndomo vamanji vekongelo va tenda ulume waco.
Ceci tu Nõliwa Oku Linga Ohutililo
17. Poku likutilila, momo lie ci kuetele esilivilo oku sandiliya ocitumãlo cimue ka pali omanu?
17 Olonjanja vimue, Yesu wa enda oku siapo omanu oco a ende kocitumãlo cimue oku likutilila ku Isiaye. (Mat. 14:13; Luka 5:16; 6:12) Tu sukila oku kuama ongangu yaye yoku enda pocitumãlo cimue ka pali omanu. Nda tua ci linga, tu likutilila ciwa, loku nõla ovina vi sanjuisa Yehova, kuenda ci tu kuatisa oku pamisa ekalo lietu kespiritu. Yesu wa likutilila powiñi. Omo liaco, tu sukila oku konomuisa ndomo tu pondola oku ci linga, lonjila yimue ya sunguluka.
18. Ovina vipi vamanji va kuete ocikele coku likutilila powiñi va sukila oku ivaluka poku linga ohutililo?
18 Vamanji vamue, va siata oku tambula ocikele coku likutilila kolohongele. (1 Tim. 2:8) Kesulilo liohutililo, vosi va kasi vohongele, va sukila oku tambulula hati, “amene.” Ondaka eyi, yi lomboloka okuti, omanu “va tava” kovina via tukuiwa vohutililo. Vohutililo Yesu a linga, ka tukuile ovina vi sumuisa omanu. (Luka 11:2-4) Poku likutilila, ka tukuile ovitangi viomunu lomunu wa kala kohongele. Tu sukila oku yuvula oku tukula ocitangi comunu lomunu poku likutilila powiñi. Pole, tu pondola oku vi kongela volohutililo tu lingila pokolika. Poku likutilila kolohongele, tu yuvuli oku tukula ovina ka vi sukila oku yeviwa lomanu vosi.
19. Ovituwa vipi tu sukila oku yuvula poku likutilila powiñi?
19 Nda tua tambula ocikele coku likutilila powiñi, tu lekisi ‘esumbilo ku Suku.’ (1 Pet. 2:17) Kuli ovina vimue okuti, tu sukila oku vi linga vepuluvi lia sunguluka, kuenda kuli vikuavo okuti, ka ci tava oku vi lingila kolohongele. (Uku. 3:1) Pamue manji umue o yongola okuti, vosi va votola ovoko poku likutilila, ale va likuata povaka. Ocituwa caco ci pondola oku kokela ocilondokua vamanji, oku kongelamo vana veya onjanja yatete kohongele okuti, Halombangiko Via Yehova. Ndaño ca sunguluka okuti olohueli vi likuata peka poku likutilila, pole, vi sukila oku ci linga lutate, oco ka vika lingile ocilondokua vana va kasi ponele yavo. Momo va pondola oku sima okuti, olohueli viaco, via velisapo lika ocisola cavo colohuela, kuenda ka via kapeleko esumbilo va sukila oku lekisa ku Yehova poku likutilila. Ocisola tu kuetele Suku, ci tu vetiya oku linga ‘ovina viosi vi eca esivayo kokuaye,’ kuenda oku yuvula oku kapela ocilondokua vakuetu.—1 Va Kor. 10:31, 32; 2 Va Kor. 6:3.
Ovina Vipi tu Sukila Oku Pinga Volohutililo?
20. O lombolola ndati olondaka vielivulu lia Va Roma 8:26, 27?
20 Olonjanja vimue, ka tu kũlĩha ovina tu yongola oku tukula volohutililo vietu. Paulu wa soneha hati: ‘Ka tua kũlĩhĩle oku likutilila ndeci ca tu sesamẽla, pole, espiritu li tu livondelelako laleñoleño ka a popiwa. Suku o seteka ovitima viomanu, kuenda wa kũlĩha ovisimĩlo viespiritu.’ (Va Rom. 8:26, 27) Yehova wa ecelela okuti, olohutililo vialua, vi sonehiwa Vembimbiliya. Eye, o tava olohutililo viaco, loku vi tenda ndu okuti, etu tu vi linga, kuenda o vi tẽlisa. Suku wa tu kũlĩha ciwa, kuenda espiritu liaye li tu kuatisa oku kuata elomboloko liovina via sonehiwa Vembimbiliya. Yehova wa siata oku tambulula olohutililo vietu, ‘lekuatiso’ liespiritu liaye. Osimbu tu amamako oku kuata ukũlĩhĩso Wondaka Yaye, tu kuatisiwa oku ivaluka ovina tu yongola oku pinga volohutililo.
21. Nye tuka konomuisa vocipama cikuãimo?
21 Ndomo tua ci konomuisa vocipama cilo, olohutililo tu linga vi situlula ekalo lietu. Ovio, vi eca uvangi wukamba tu kuete la Yehova, kuenda vi lekisa ukũlĩhĩso tu kuete Wondaka yaye. (Tia. 4:8) Vocipama cikuãimo, tuka konomuisa olohutililo vimue, kuenda olondaka violohutililo via tukuiwa Vembimbiliya. Oku konomuisa Ovisonehua, ci tu kuatisa ndati oku amẽla ku Suku vohutililo?
O Tambulula Ndati?
• Ovituwa vipi tu sukila oku lekisa poku amẽla ku Yehova vohutililo?
• Momo lie tu sukilila oku kongela va manjetu volohutililo?
• Olohutililo vietu vi situlula nye catiamẽla kokuetu kuenda kovisimĩlo vietu?
• Nda tua nõliwa oco tu likutilile powiñi, ovituwa vipi tu sukila oku lekisa?
[Elitalatu kemẽla 4]
Ove hẽ, wa siata oku eca olopandu ku Yehova loku u sivaya?
[Elitalatu kemẽla 6]
Poku likutilila powiñi, tu sukila oku lekisa ovituwa vi eca esivayo ku Yehova