Osikola Yupange Wakristão
Purpose: Ocimãho: Yi pindisa akundi oco va loñolohe koku kunda kuenda koku longisa omanu olondaka viwa.
Otembo yi Tumãla: Ka yi sulila.
Ocitumãlo: Vonjango Yusoma.
Ceci ci Kisikiwa: Vava lika va endaenda kolohongele okuti, va tava kalongiso Embimbiliya, kuenda va kapako olonumbi viaco komuenyo wavo.
Ndomo va Lisonehisa: Usongui Wosikola eye o soneha olondonge.
Manji Sharon o kuete uvei wociteyateya wa popia hati: “Osikola Yupange Wakristão, ya siata oku ndi kuatisa oku linga akonomuiso oco ndi linge ciwa olonepa viange. Nda lilongisavo oku kapako omanu oco ndi va kuatise oku pamisa ekolelo liavo.”
Manji Arnie, okuti o kasi oku nyula akongelo vokuenda kuanyamo alua, wa popia hati: “Eci nda kala oku kula, nda kuata ocitangi coku kokoma, kuenda poku vangula lomanu sia tẽlele oku vanja kovipala viavo. Osikola yaco ya ndi kuatisa oku yuvula ohele, kuenda oku limbuka okuti, ndi kuete esilivilo. Lekuatiso liepindiso lia Yehova, nda lilongisa uloño wokuti, poku vangula si sukila omuenyo kuenda ndi tula utima. Ngeca olopandu ku Yehova Suku omo lioku ndi longisa oku u sivaya vekongelo kuenda kupange woku kunda.”
Osikola ya Vamanji va Iñila Ndopo ko Betele
Ocimãho: Yi kuatisa vamanji va iñila ndopo ko Betele, oco va tẽlise ciwa upange waco.
Otembo yi Tumãla: 45 kakukutu, osemana losemana, vokuenda kueci ci soka 16 kolosemana.
Ocitumãlo: Vo Betele.
Ceci ci Kisikiwa: Va sukila oku tiamẽla kepata lio Betele ale vana va lieca kupange waco vokuenda kuotembo yimue okuti, va kasi unyamo ko Betele ale anyamo alua.
Ndomo va Lisonehisa: Vamanji vana va iñila ndopo ko Betele va pondola oku lisonehisa vepuluvi liaco.
Manji Demetrius, okuti wa pindisiwa kosikola yaco noke liunyamo wo 1980, wa popia hati: “Epindiso liaco, lia mioñolola ocituwa cange coku linga elilongiso kuenda lia ndi pongiya oku kala otembo yalua ko Betele. Alongisi, ovipama, kuenda alungulo nda tambula, a ndi kuatisa oku limbuka okuti, Yehova o ndi kuetele ocisola kuenda o yongola oku ndi kuatisa oco ndi tẽlise ciwa upange wange ko Betele.”
Manji Kaitlyn, wa popia hati: “Nda kuatisiwa oku tiamisila utima kovina vi kuete esilivilo okuti, via ndi kuatisa oku pamisa ekolelo liange. Oku iñila Kosikola yaco, ca vokiya onjongole yange yoku pandula Yehova, oku sola onjo yaye kuenda ocisoko caye.”
Osikola Yupange Wusoma
Ocimãho: Yi pindisa olomitavaso vi nyula akongelo, akulu vekongelo, kuenda oloñuatisi viekongelo oco va tẽlise ciwa ovikele viavo. (Ovil. 20:28) Kuenje, ovitangi via siata oku pita la vamanji vakongelo vi tetuluiwa lonjanga. Osikola yaco ya lingiwa vokuenda kuanyamo amue ndomo ya sokiyiwile Losungu Yolombangi Via Yehova.
Otembo yi Tumãla: Vanyamo amue, osikola yaco ya sokiyiwile okuti, olomitavaso vi nyula akongelo vi pindisiwa vokuenda kuoloneke vivali kuenda onepa yeteke, akulu vekongelo va pindisiwa veteke limosi lonepa yimue yeteke. Oloñuatisi viekongelo vi pindisiwa vokuenda kueteke limosi.
Ocitumãlo: Vonjango Yusoma ale Vonjango Yolohongele Vinene.
Ceci ci Kisikiwa: Va sukila oku kala olomitavaso vi nyula akongelo, akulu vekongelo ale oloñuatisi viekongelo.
Ndomo va Lisonehisa: Akulu vekongelo loloñuatisi viekongelo va tambula elaleko lia mitavaso o nyula akongelo. Ofiliale oyo yi laleka olomitavaso vi nyula akongelo.
“Manji Quinn (o kasi konele yombuelo) wa popia hati: “Osikola yaco, yi longisa ovina vialua kakulu vekongelo votembo yimue yitito, kuenda yi va kuatisiwa oku amamako lesanju poku ‘tẽlisa ovikele viavo’ kupange wa Yehova.’”
“Manji Michael wa popia hati: “Epindiso liaco, lia tu kuatisa oku sanjukila alongiso a Suku loku limbuka ovina vi koka ohele, kuenda lia tu ĩha olonumbi viwa viatiamẽla koku lava ocunda. Yehova o tu kuetele ohenda yalua.
Osikola Yakundiva Velapo
Ocimãho: Yi kuatisa akundi votembo yosi oku tẽlisa ciwa ocikundi cavo cupange woku kunda.’—2 Tim. 4:5.
Otembo yi Tumãla: Olosemana vivali.
Ocitumãlo: Ofiliale oyo yi sokiya ocitumãlo caco, pole olonjanja vialua yi lingiwila Vonjango Yusoma.
Ceci ci Kisikiwa: Akundi va velapo okuti, va kasi ale kupange waco unyamo umosi ale vokuenda kuanyamo alua.
Ndomo va Lisonehisa: Olomitavaso vi nyula akongelo, ovio vi laleka akundi va velapo oco va pindisiwe.
“Manji Lily (o kasi kondio), wa popia hati: “Osikola yaco ya ndi kuatisa oku liyaka lovitangi nda siata oku sanga kupange woku kunda, levi viomuenyo wange. Ya ndi kuatisavo oku mioñolola ocituwa cange coku lilongisa, oku longisa omanu kuenda oku talavaya ciwa Lembimbiliya. Omo liaco, nda lipongiya ciwa oku kuatisa omanu, akulu vekongelo, kuenda oku eca ekuatiso oco akongelo a li vokiye.”
Manji Brenda okuti, wa pindisiwa olonjanja vivali kosikola yaco, wa popia hati: “Osikola yaco, ya ndi kuatisa oku velisapo alongiso a Suku, oku pamisa utima wange, kuenda oku lekisa onjongole yoku kuatisa omanu. Ocili okuti, Yehova ukuacali!”
Osikola Yakulu Vekongelo
Ocimãho: Yi kuatisa akulu vekongelo oku tẽlisa ovikele viavo oco va kuate elomboloko liovina via longa Viondaka ya Suku.
Otembo yi Tumãla: Oloneke vitãlo.
Ocitumãlo: Ofiliale oyo yi linga esokiyo liocitumãlo caco. Olonjanja vialua, yi lingiwila Vonjango Yusoma ale Vonjango Yolohongele Vinene.
Ceci ci Kisikiwa: Oku kala ukulu wekongelo.
Ndomo va Lisonehisa: Valalekiwa lofiliale.
Kũlĩhĩsa olondaka via vamanji va pindisiwa kocisoko 92 kofeka yo Estados Unidos:
“Osikola yaco, ya ndi kuatisa oku kũlĩhĩsa ekalo liange loku limbuka ndomo ndi sukila oku lava olomeme via Yehova.”
“Osikola yaco ya ndi pongiya oku kuatisa vamanji lolonumbi via velapo Viovisonehua.”
“Otembo yosi yomuenyo wange ndi kapako epindiso nda tambula kosila yaco.”
Osikola Yolomitavaso vi Nyula Akongelo Kumue Lakãi Vavo
Ocimãho: Oku kuatisa olomitavaso viosi vi nyula akongelo oco vi tẽlise ciwa upange wavo ‘woku kunda loku longisa’ omanu.—1 Tim. 5:17; 1 Pet. 5:2, 3.
Otembo yi Tumãla: Olosãi vivali.
Ocitumãlo: Ofiliale oyo yi nõla ocitumãlo caco.
Ceci ci Kisikiwa: Va sukila oku kala olomitavaso vi nyula akongelo.
Ndomo va Lisonehisa: Ofiliale yeca elaleko kokuavo kumue lakãi vavo.
“Manji Joel okuti, wa pindisiwa kocisoko 1 kunyamo wo 1999, wa popia hati: “Tua vokiya elomboloko lietu liokuti, Yesu eye usongui wekongelo. Tua limbukavo esilivilo lioku kuatisa vamanji kuenda oku pamisa omunu lomunu vekongelo. Epindiso liaco, lia tu ivaluisa okuti, osimbu tu nyula akongelo, tu sukila oku eca alungulo loku lemẽla vana va lueya, pole, ocimãho cetu oku kuatisa vamanji oku limbuka okuti, Yehova o va sole calua.
Osikola Yembimbiliya ya Vamanji Alume ka va Kuelele
Ocimãho: Yi pongiya vamanji ka va kuelele okuti akulu vekongelo kuenda oloñuatisi viekongelo, oco va tẽlise ciwa ovikele viavo vocisoko ca Yehova. Vamanji valua va pindisiwa kosikola yaco, va tumiwa vakongelo a kasi vofeka yavo ale kovitumãlo vina ka kuli akundi. Vamanji vakuavo nda va yongola, va tumiwa kolofeka vikuavo. Vakuavo, va kala kupange wakundi valikasi vokuenda kuotembo yimue oco va vokiye upange woku kunda kovitumãlo vi kasi ocipãla.
Otembo yi Tumãla: Olosãi vivali.
Ocitumãlo: Ofiliale oyo yi linga esokiyo liocitumãlo caco. Olonjanja vialua, yi lingiwila Vonjango Yusoma ale Vonjango Yolohongele Vinene.
Ceci ci Kisikiwa: Vamanji ka vakuelele va kuete oku upisa 23 toke 62 kanyamo okuti, va kuete uhayele haivo va yongola oku kundila kovikanjo kuna ka kuli akundi. (Mar. 10:29, 30) Vamanji yaco va sukila oku kala akundi va velapo vokuenda kuanyamo avali okuti, tunde eci va nõliwa oku kala akulu vekongelo ale oloñuatisi viekongelo pa pita ale anyamo avali.
Ndomo va Lisonehisa: Va lisonehisa konjango yi lingiwa kohongele yimbo kuna va sukila oku tambula olonumbi viatiamẽla kosikola yaco.
“Manji Rick wa pindisiwa kocisoko 23 kofeka yo Estados Unidos wa popia hati: “Epindiso nda tambula, lia ndi kuatisa oku ecelela okuti espiritu lia Yehova li pongolola ekalo liange. Nda tu tambula ocikele cimue ku Yehova, o tu ĩha ongusu yoku ci tẽlisa. Nda limbuka okuti, oku tiamisila utima koku tẽlisa ocipange ca Suku, loku yuvula oku pitisa kovaso olonjongole viange, ci pamisa ekolelo liange.”
Manji Andreas o kasi oku talavaya kofeka yo Alemanya wa popia hati: “Nda limbuka okuti, ndomo ocisoko ca Yehova ci talavaya koloneke vilo, ci kasi ndocikomo. Epindiso liaco, lia ndi kuatisa oku lipongiya oku tambula ovikele vikuavo. Ovolandu alua a sangiwa Vembimbiliya, a ndi longisa ovina via velapo ndeci: Oku kuatisa vamanji, kuenda oku limbuka okuti, Yehova eye lika o tu ĩha esanju liocili.”
Osikola Yembimbiliya ya Vamanji va Kuele
Ocimãho: Yi pindisa olohueli oco, vi kuatise oku linga upange vocisoko ca Yehova. Vamanji valua va pindisiwa kosikola yaco, va tumiwa kovikanjo vina ka kuli akundi vofeka yavo. Vamanji vamue va tumiwa kolofeka vikuavo, nda va yongola. Vakuavo, va kala kupange wakundi valikasi vokuenda kuotembo yimue oco va vokiye upange woku kunda kovitumãlo vi kasi ocipãla.
Otembo yi Tumãla: Olosãi vivali.
Ocitumãlo: Osikola yaco yi lingiwila ko Estados Unidos, kuenda yi ka fetika kosãi Yenyenye Linene yunyamo wo 2012. Oyo, yi ka lingiwilavo Volonjango vimue Viusoma, ale Volonjango Violohongele Vinene via nõliwa lofiliale.
Ceci ci Kisikiwa: Olohueli vina vi kuete oku upisa 25 toke 50 kanyamo, okuti vi kuete uhayele kuenda ekalo liavo li va ecelela oku talavaya kovikanjo kuna ka kuli akundi. Ovio, vi sukila oku lekisa ocituwa coku lieca olumue poku popia hati: “Ame ulo, va nume ño.” (Isa. 6:8) Vamanji yaco, va sukila oku kala olohueli vina okuti, tunde eci va kuela pa pita ale anyamo avali kuenda va kasi kupange wakundi va velapo anyamo avali. Vamanji yaco, va sukila oku kala akulu vekongelo ale oloñuatisi viekongelo okuti, tunde eci va nõliwa pa pita ale anyamo avali.
Ndomo va Lisonehisa: Va lisonehisa konjango yi lingiwa kohongele yofeka kuna va sukila oku tambula olonumbi vikuavo. Nda kohongele yofeka kuna ove o ka kala ka ku lingiwa onjango yaco, citava oku sonehela kofiliale oco o tambule olonumbi vikuavo.
Manji Eric lukãi waye Corina (va kasi konele yombuelo) okuti va pindisiwa kocisoko catete, kunyamo wo 2011, va popia vati: “Vokuenda kuolosemana ecelãla, olohueli via linga apongoloko alua kuenda via kuata apuluvi awa! Tua likuminya oku leluisa omuenyo, loku kũlĩhĩsa lutate kovina tu pesila otembo yetu.
Osikola yo Gileada yo Torre de Vigia
Ocimãho: Yi pindisa vamanji oco va ende kupange wumisionaliu kolofeka vina kuli omanu valua, okuti va nyula akongelo ale va kala ko Betele. Ocimãho cosikola yaco, oku pamisa ovikanjo kuenda oku sokiya ciwa olofiliale.
Otembo yi Tumãla: Olosãi vitãlo.
Ocitumãlo: Kombala Yoku Pindisa Vamanji ko Patterson, ko Nova Yorke.
Ceci ci Kisikiwa: Vamanji olohueli okuti, va kasi kupange wotembo yosi ndeci, olomisionaliu vina ka via pindisiwile Kosikola yo Gileada, akundi valikasi, vamanji va nyula akongelo, ale vana va kasi ko Betele. Ku lalekiwa lika vamanji vana va kasi kupange waco anyamo atatu. Pole, va sukila oku vangula loku tanga, kuenda oku soneha ciwa elimi Liongelesi.
Ndomo va Lisonehisa: Ofiliale oyo yi laleka vamanji yaco.
Manji Lade lukãi waye Monique, va tunda ko Estados Unidos okuti, cilo va kasi vo Afrika va popia vati: “Osikola yo Gileada ya tu pongiya oku enda kolonepa viosi violuali oku talavaya la vamanji.
Manji Monique wa amisako hati: “Osimbu ndi kapako ovina ndi lilongisa Vondaka ya Suku ndi kuata esanju lialua kupange wange. Nda limbuka okuti esanju liaco, olio uvangi wocisola Yehova a tu kuetele.”
Osikola Yocisoko Cakulu vo Filiale Kumue Lakãi Vavo
Ocimãho: Yi kuatisa Ocisoko Colofiliale oku songuila ovopange osi a lingiwa ko Betele, oku kuatisa akongelo, kuenda oku songuila upange woku kunda vovikanjo. Va lilongisavo ovina viatiamẽla koku pongoluila kalimi akuavo, koku panga alivulu kuenda oku a tumisa kakongelo.
Otembo yi Tumãla: Olosãi vivali.
Ocitumãlo: Kombala Yoku Pindisa Vamanji ko Patterson, ko Nova Yorke.
Ceci ci Kisikiwa: Va sukila oku tiamẽla Kocisoko Casongui Volofiliale vofeka.
Ndomo va Lisonehisa: Osungu Yolombangi Via Yehova oyo yi laleka vamanji yaco kumue lakãi vavo.
Manji Lowell kumue lukãi waye Cara va pindisiwa kocisoko 25 okuti cilo va kasi kofeka yo Nigeria wa popia hati: “Eci tua kala kosikola va tu sapuila hati, ndaño tu kuete upange walua, tu sukila oku u linga lonjila yimue yi sanjuisa Yehova. Epindiso liaco, lia tu longisa oku lekisa ocisola komanu, ndeci Yehova a siata oku ci lekisa kafendeli vaye.
“Manji Cara wa amisako hati: “Ndi sokolola elungulo limue tua tambula, liokuti, nda si tẽla oku lombolola ciwa ondaka yimue, ndi sukila oku yi konomuisa lutate osimbu sia fetikile oku yi longisa komanu..”