Momo Lie ku Lingiwila Epulilo Eli?

“Ove hẽ o tavavo okuti ka kuli Suku? Omanu valua va kuete ocisimĩlo caco.” Kũlĩhĩsa esapulo limue liokaliye lia sonehiwa lomanu vana ka va tava okuti kuli Suku. Ovo va sima okuti ka va sukila ekuatiso lia Suku.

Kuli omanu valua va tava okuti kuli Suku, pole ovilinga viavo ka vi eci uvangi waco. Bisipu umue wetavo lio Katolika o tukuiwa hati, Salvatore Fisichella wa sapuila omanu vo ketavo liaye hati: “Koloneke vilo nda tua li kũlĩhisa ciwa, omanu ka tava okuti Tuakristão momo ekalo liomuenyo wetu lia lisoka la vana ka va kuete etavo.”

Valua va sakalala loku tẽlisa olonjongole viavo kuenje va ivalako okuti kuli Suku. Ovo vo tenda ndu okuti o kasi ocipãla kuenda ka pondola oku va kuatisa. Vo sandiliya lika eci va liyaka lovitangi, ale ceci va sukila cimue kuenje kokuavo Suku o kasi ndupika wavo o va nenela cosi va pinga.

Vakuavo ka va kapeleko ovina va lilongisa ketavo liavo, momo va sima okuti alongiso aco ka a kuete esilivilo. Ndeci, ulandu umue wa lekisa okuti, kofeka yo Alemanya 76 porsendu yomanu va katolika va popia hati ca sunguluka ulume lukãi oku tunga vonjo yimuamue ndaño ka va tokekisile olohuela. Pole etavo liavo kuenda Embimbiliya, vi pisa ocisimĩlo caco. (1 Va Korindo 6:18; Va Heveru 13:4) Pole, va katolika havoko lika va limbuka okuti ovina va lilongisa ketavo liavo ka vi likuata lekalo liomuenyo wavo. Asongui vatavo alua va siatavo oku liyeya okuti omanu vo ketavo liavo, va lekisavo ovituwa ndevi viomanu vana ka va “tava ku Suku.”

Ovolandu ava a votola epulilo eli: Anga hẽ tu sukila muẽle ekuatiso lia Suku? Epulilo eli haliokaliyeko. Momo lia votuiwa kovipama viatete Viembimbiliya. Oco tu sange etambululo liepulilo liaco, tu kũlĩhĩsi apulilo a katuiwa Vembimbiliya kelivulu Liefetikilo.