Ove hẽ o Sukila Oku Tiamẽla Ketavo Limue?
OMANU vamue va siata oku popia hati: ‘Si sukila oku tiamẽla ketavo limue oco ndi tave ku Suku.’ Vakuavo va siata oku popia hati, eci va enda konembele ka va lilongisako lacimue catiamẽla ku Suku. Ovo va limbuka lika okuti kuli Suku eci vaka ñuala ñuala oku tala ovina Eye a lulika. Koloneke vilo, omanu va siatavo oku sima hati, ka va sukila okutiamẽla ketavo limue oco va tave ku Suku.
Omanu vamue va kuetevo ovisimĩlo via litepa. Ovo va siata oku popia hati, omunu wosi o yongola oku taviwa la Suku, o sukila oku tiamẽla ketavo limue. Kuenda o sukilavo oku endaenda konembele. Pole, oku tiamẽla ketavo, ondaka yimue okuti ka yi kasi lika peka liava va yongola oku konomuisa atavo. Nye Suku a sima catiamẽla komunu o tiamẽla ketavo limue? Nye tu pondola oku lilongisa Vembimbiliya catiamẽla kondaka eyi?
Suku wa Sokiyile Ndati Omanu Vaye Kosimbu?
Eci pa pita 4.400 kanyamo tunde kotembo Suku a lulika oluali, kueya etande. Koloneke vilo, omanu va siata oku ivaluka ulandu waco. Eci etande lieya, kulo kilu lieve kua supile lika omanu ecelãla kuenda ovinyama vimue.
Anga hẽ omanu vana va puluka Ketande Suku wa vanguile lavo omunu lomunu? Embimbiliya li lekisa okuti, hacoko. Suku ka lunguile omunu lomunu eci catiamẽla kokuiya Kuetande. Pole, ondaka yaco wa yi sapuila lika Noha.—Efetikilo 6:13-16; 2 Petulu 2:5.
Oco omanu va puluke Ketande, va sukilile oku tiamẽla kocimunga comanu vana va pokuile ku Suku. Kuenda oku tava kolonumbi Suku a ecele ku Noha. Ovinyama via kala vocimbaluku ovio lika via puluka Ketande. Noha wa tambuile olonumbi vioku angiliya okulia kuomanu kuenda kuovinyama.—Efetikilo 6:17–7:8.
Noke yanyamo alua, ocitumbulukila ca Semi omõla wa Noha, ca kala kupika Kegito. Yehova wa yonguile oku nena epata liaco vofeka yina a likuminyile ku Avirahama. Olondaka viaco Suku ka vi sapuilile komunu lomunu. Pole, eye wa nõla Mose la Arone oco va kale ovitunda pokati kavo. (Etundilo 3:7-10; 4:27-31) Eci va Isareli va yovuiwa kupika Kegito, va enda toke Komunda Sinai kuenje va linga epata. Noke Yehova wa va ĩha olonumbi via va kuatisa oku kala vofeka Yohuminyo.—Etundilo 19:1-6.
Omunu lomunu pokati ka va Isareli wa yovuiwa omo okuti wa tava oku li kongela lomanu vana va nõliwile la Suku. Kuenda va kuama olonumbi viasongui va nõliwile la Suku. Kua kala eliangiliyo lioku kuatisa omanu va tunda Kegito oco va kale ciwa la va Isareli. Eci va Isareli va tunda Kegito, kua kala owiñi walua wa va kuama. Kuenje va tambula ekuatiso lia Suku.—Etundilo 12:37, 38.
Eci Yesu a kala palo posi, tete wa kundila omanu vana veya oku linga olondonge viaye. Eye wa solele calua ocimunga colondonge viaye ekũi la yimosi. Kuenda wa ecele ekuatiso komunu lomunu pokati kavo. Eye wa vi sapuila hati: “Ene, ene wa pandakaisi lame eci nda nyikaiwa. Oco, ndeci Tate a nukuila usoma haico ndu tukuili usoma.” (Luka 22:28, 29) Noke, olondonge vieya oku tambula espiritu lia Suku.—Ovilinga 2:1-4.
Ovolandu ava va lekisa okuti, Suku wa tata ciwa ocimunga comanu vaye kosimbu. Eye wa tumĩle Noha, Mose kuenda Yesu oco va ece olonumbi vioku songuila omanu. Koloneke vilo Suku o kuãivo onjila yimuamue. Omo liaco, ku votuiwa epulilo liokuti: Ca sunguluka hẽ okuti omunu o nõla etavo a yongola oku kuama? Epulilo lilo lika tambuluiwa vocipama ci kuãimo.
[Elitalatu kemẽla 4]
Suku wa tatele ciwa ocimunga comanu vaye