OCISELEKO CALIVULU VO INTERNET Colombangi Via Yehova
Olombangi Via Yehova
OCISELEKO CALIVULU VO INTERNET
Umbundu
Ũ
  • Ñ
  • ñ
  • õ
  • Õ
  • ũ
  • Ũ
  • ĩ
  • Ĩ
  • ã
  • Ã
  • ẽ
  • Ẽ
  • EMBIMBILIYA
  • ALIVULU
  • OLOHONGELE
  • w13 1/12 kam. 8-10
  • Nda Velisapo Upange Wa Yehova Komuenyo Wange

Vonepa eyi ka mu sangiwa ovideo layimue.

Tu ecele, kua pita ocitangi cimue poku lekisa ovideo.

  • Nda Velisapo Upange Wa Yehova Komuenyo Wange
  • Utala Wondavululi—2013
  • Otulosapi
  • Ocipama ci Likuata
  • OTEMBO YOKU NÕLA ONJILA NDI KUAMA
  • OMUENYO WANGE VOKAYIKE
  • OKU TUNDA KUANGE VOKAYIKE KUENDA UPANGE WUMISIONALIU
  • OKU TẼLISA OVIKELE VEPATA
  • APONGOLOKO AKUAVO KUPANGE U SANJUISA
  • Oku Vumba Yehova ca Ndi Nenela Asumũlũho Alua
    Utala Wondavululi Wusapula Usoma wa Yehova (Welilongiso)—2024
Utala Wondavululi—2013
w13 1/12 kam. 8-10

ULANDU WOMUENYO

Nda Velisapo Upange wa Yehova Komuenyo Wange

Ulandu wa Lomboluiwa la Bill Walden

Noke yoku mala oku tanga kosikola ya pita pokati, kosãi ya Susu kunyamo wo 1937, nda iñila kosikola ya velapo yi tukuiwa hati (Universidade Estadual Iowa,) ocipepi loku tua kala konano yo Estados Unidos. Omo lioku tanga kuenda oku talavaya oco ndi sange olombongo vioku landa ovina ndi sukila, sia kuatele vali otembo yoku linga ovina vikuavo. Tunde vutila, nda kuata onjongole yoku lilongisa umesele woku tunga olosapalalo kuenda ayau.

Kefetikilo liunyamo wo 1942, eci ofeka yo Estados Unidos ya likongela Vuyaki Wavali wa pita Voluali, oco nda tẽlisa ulima watãlo kosikola ya velapo, okuti otembo yaco papitile lika olosãi vimue tunde eci nda tambula ocicapa cange coku mala elilongiso liumesele. Nda kala vonjo yimue lakamba vavali. Umue pokati kavo wa ndi vetiya oco ndi sapele lomunu wa siata “oku nyula akuenje vamue va kala vohondo yovombuelo yosapalalo.” Noke nda li sanga la John O. (Johnny) Brehmer okuti Ombangi ya Yehova. Eci nda mola ndomo atambulula apulilo ange lekuatiso Liembimbiliya, nda komoha calua. Noke nda pinga oco ndi lilongise Embimbiliya la Johnny kuenda oku u kuama kupange woku kunda eci otembo yi ngecelela.

Otto, isia ya Johnny, wa linga Ombangi ya Yehova eci a kala usongui wombango ko Walnut, Iowa. Otto, wa siapo upange waye oco a litumbeke kupange wotembo yosi. Vokuenda kuotembo, ongangu yaye yiwa kuenda yepata liaye, ya mbetiya oku nõla onjila ya sunguluka.

OTEMBO YOKU NÕLA ONJILA NDI KUAMA

Eteke limue, ulongisi umue kosikola wa ndi sapuila okuti ku tambula vali ocicapa ci lekisa okuti wa mala oku lilongisa uloño woku tunga, momo kua lilongisile calua. Ndi ivaluka okuti nda likutilila ku Yehova Suku oco a njimbe onumbi ndi kuama. Noke yoloneke vimue, nda lalekiwa oco ndi li sange lulongisi wange wuloño woku tunga. Eye wa ndi sapuila okuti wa tambula ondaka yo kupange umue ku sukila omesele ya loñoloha kuenda nda tambulula okuti omunu waco o tava kepingilo eli. Nda eca olopandu kulongisi wange pole, nda lombolola esunga lieci nda nõlelapo oku velisapo upange wa Yehova. Kunyamo wo 1942 keteke 17 yosãi Yevambi, nda papatisiwa kuenda nda lisonehisa kupange wakundi votembo yosi.

Noke kunyamo waco wo 1942, va mbilikiya oco ndi ñile kupange wusualãli, kuenje nda lombolola esunga lieci si endela kuyaki. Alongisi vange vo kosikola va soneha ulandu watiamẽla kovituwa viange viwa kuenda kuloño wange woku tunga olosapalalo kuenda ovina vikuavo. Ndaño luvangi waco uwa, nda kisikiwa oku feta $10.000 kolondolare kuenda oku kala anyamo atãlo vokayike ko Leavenworth, Kansas.

OMUENYO WANGE VOKAYIKE

Ci pitãhala 230 kamalẽhe Olombangi via Yehova va kapiwa kupange woku lima kokayike ko ko Leavenworth. Vepia liaco tua enda oku laviwa ­lolondavululi vimue via temẽle calua. Vamue omo lioku kũlĩha okuti Akristão ka va litengi vopulitika, va enda oku tu tata ciwa.

Olondavululi vimue via tu kuatisa oco tu amameko locituwa cetu coku lilongisa kumuamue Embimbiliya. Va tu kuatisavo oku tambula alivulu vokayike. Usongui wo kayike, wa endavo oku tambula orevista Consolação (okuti cilo o Despertai!)

OKU TUNDA KUANGE VOKAYIKE KUENDA UPANGE WUMISIONALIU

Ndaño va ndi sapuilile okuti ndi kala vokayike anyamo atãlo, pole keteke 16 ya Kayovo wo 1946 noke yanyamo atatu, va njupa vokayike. Otembo yaco papitile ño olosãi vimue tunde eci Uyaki Wavali Voluali wa pua. Noke nda litumbika vali kupange wotembo yosi. Nda tumiwa kolupale luo Leavenworth, Kansas. Nda kala lusumba woku tiukila kolupale luaco momo Olombangi via Yehova via suvukiwile calua. Oku sanga upange woku sanda eteku kuenda onjo yoku kala ca tĩlile calua.

Ndi ivaluka onjanja yimue eci ondavululi yimue ya kaluka lame loku popia hati: “Tunda ponjo yange!” Eci nda mola ombueti peka liaye, nda saluka kuenje nda tila. Konjo yikuavo, ukãi umue wa ndi sapuila hati “Talamẽlapo kamue” kuenje wa yika epito. Osimbu nda kala oku u talamẽla, wa yulula onjanela kuenda wa mesila ovava a sukula lavo a longa. Pole, ndaño lovitangi viaco, nda kuata asumulũho kupange woku kunda. Noke nda limbuka okuti omanu vamue va tambuile alivulu kokuange, va linga Olombangi Via Yehova.

Kunyamo wo 1943 kua sokiyiwa osikola yoku pindisa olomisionariu ko Nova Yorke. Nda lalekiwa oku enda kosikola yaco, kuenje nda pindisiwa kocisoko cekũi ca malusuiwa keteke 8 ya Kayovo wo 1948. Osikola yaco yeya oku tukuiwa okuti, Osikola yo Gileada yo Torre de Vigia. Noke yoku pindisiwa kosikola yaco, nda tumiwa ko Costa do Ouro, cilo ya kũlĩhiwa hati, Gana.

Eci nda pitĩla kofeka yo Costa do Ouro, ocikele cange ca kala oku kundila apalanga vombiali kuenda vana va tunda ko Europa. Kesulilo liosemana nda enda oku kuatisa vamanji kupange woku kundila konjo lanjo. Nda endavo oku nyula vamanji va kala kovitumãlo vi kasi ocipãla kuenda oku va pindisa kupange woku kunda. Noke nda tambula ocikele coku nyula akongelo a kasi ocipepi lo Costa do Marfim, kuna cilo ku tukuiwa hati, Côte d’Ivoire.

Osimbu nda kala oku talavaya kovitumãlo viaco, nda lilongisa ovituwa viomanu vo vo Afrika ndeci, oku lala vonjo yowangu, oku lia lovoko, oku tundisila “kusenge,” ndeci va Isareli va enda oku linga. (Esinumuĩlo 23:12-14) Oku ci linga ca ñuatisa calua kuenje olomisionaliu vikuavo vieya oku kuata oluhimo luwa. Akãi vamue volombiali, va tava oku lilongisa Embimbiliya letu. Eci vamue va fetika oku tu suvuka vofeka loku seteka oku nyõla opapelo yetu yuvangi woku kala vofeka, akãi vaco va enda oku vetiya alume vavo oco ka va ka tẽlise ocimãho caco!

Ndeci ca siata oku lipita lolomisionariu vikuavo vo Afrika, nda kuatiwavo lomalária. Nda kuatiwa lombambi yalua kuenje etimba liange lia honguele. Olonjanja vimue nda sukilile oku likuata volombandu oco si ka lulume calua. Ndaño lovitangi, pole nda kuata esanju lialua omo liupange wange.

Vokuenda kuanyamo ange akuãla vo Afrika, nda enda oku sapela la Eva Hallquist, una nda kũlĩhĩla ko Estados Unidos. Nda limbuka okuti eye wa pindisiwa kocisoko ca 21 Kosikola yo Gileada yo Torre de Vigia, ya malusuiwa keteke 19 Yevambi Linene wo 1953, kohongele yolofeka Yolombangi via Yehova ya lingiwila ko Nova Yorke kocila ci tukuiwa hati, Ianque. Nda sapela lu songui wonaviyu oco ndu kuatise kovopange amue kuenje ofeto yange oku ngambata toke ko Estados Unidos.

Noke lia 22 koloneke, okuti olonjanja vimue lakimba alua vokalunga, nda pitĩla kuenje haico nda enda oku ka lisanga la Eva ko Brooklyn kombala Yolombangi via Yehova. Kilu lio sapalalo tua kala, ca tavele oku mola eposo liolupale luo Nova Yorke kuenda ilu lia posoka kuenje ndopinga oco tu kuele. Noke Eva weya ko Costa do Ouro oco tu talavaye kumosi.

OKU TẼLISA OVIKELE VEPATA

Noke yoku talavaya anyamo alua la Eva vo Afrika, ina yange wa numisa ukanda loku popia okuti Isia yange wa kuatiwa luvei wo kanser. Noke yoku tambula ukanda woku siapo upange wumisionaliu, ame la Eva tua tiukila ko Estados Unidos. Isia yange wa vela calua kuenje wa fa.

Noke yoku tiukila ko Gana kuna tua kala ci panda anyamo akuãla, tua tambula esapulo liokuti ina yange o vela calua. Akamba vamue va tu vetiya oco ame la Eva tu tiukile konjo oku ka tata ina yange. Oku nõlapo onjila yaco, ca tĩlile calua kokuetu. Noke yoku pita 15 kanyamo kupange wumisionaliu kuenda 11 kanyamo tua talavayela kumosi, tua tiukila ko Estados Unidos.

Vokuenda kuanyamo alua, tua tata Ina yange loku u kuatisa oku enda kolohongele eci uhayele waye u wecelela. Kunyamo wo 1976 keteke 17 ya Susu oco Ina yange a fa okuti otembo yaco wa kala leci ci soka 86 kanyamo. Pole, esumuo liange lia piãla lieya noke yanyamo ecea. Eva wa kuatiwa luvei wo kanser. Tua linga cosi citava, pole kunyamo wo 1985 keteke 4 kosãi Yevambi linene wa fa, okuti otembo yaco wa kala leci ci soka 70 kanyamo.

APONGOLOKO AKUAVO KUPANGE U SANJUISA

Kunyamo wo 1988, nda lalekiwa kohongele yoku tumbika o filiale yo kofeka yo Gana. Lia kala epuluvi limue liesanju! Ci soka 40 kanyamo konyima eci nda pitila kofeka yo Gana noke yoku pindisiwa kosikola yo Gileada, kua kala entendelo litito Liolombangi Via Yehova. Pole kunyamo wo 1988, kua kala eci cisoka 34.000, kuenda cilo kuli eci ci panda 114.000 Kolombangi Via Yehova!

Noke lianyamo avali tunde eci nda nyula ofeka yo Gana, keteke 6 kosãi Yenyenye wo 1990 nda kuela la Betty Miller, una wa kala ekamba lia Eva. Kavali ketu tu kasi oku amamako oku velisapo upange wa Yehova komuenyo wetu. Tu lavoka eteke tu ka lisanga la va kukululu yetu, olonjali vietu kuenda Eva noke yepinduko voluali luo Kaliye.—Ovilinga 24:15.

Eci ndi sokolola esumuluho lioku linga upange wa Yehova vokuenda kueci ci pitahãla 70 kanyamo, ndi lolula asuelẽla. Nda siata oku eca olopandu kokuaye omo lioku ndi songuila poku linga upange waye. Ndaño okuti cilo ndi kuete ci pitahãla 90 kanyamo, pole Yehova onoño ya velapo, o kasi oku nyĩha ongusu kuenda epandi lioku amamako oku velisapo upange waye komuenyo wange.

    Alivulu Wumbundu (1993-2025)
    Tunda
    Iñila
    • Umbundu
    • Tumisa o link
    • Ceci o yongola
    • Copyright © 2025 Watch Tower Bible and Tract Society of Pennsylvania
    • Alungulo Onumbi
    • Onumbi Yoku Liteyuila
    • Ndomo o Liteyuila
    • JW.ORG
    • Iñila
    Tumisa o link