Momo lie Suku a ecelelela okuti omanu vakuete unene va talisa ohali vana ka va kuete unene?

Embimbiliya li lombolola ovolandu amue a sumuisa a lekisa ndomo omanu vana ka va kuete unene va siata oku talisiwa ohali la vana va kuete unene. Umue pokati kovolandu aco, wowu wa pita la Navote.a Ahava osoma yimue ya vialele ofeka yo Isareli Kocita cekũi O.Y.K., wa ecelela okuti ukãi waye Isevele o ponda Navote kumue lomãla vaye oco ulume waye soma a piñale ocumbo ca Navote cayuva. (1 Olosoma 21:1-16; 2 Olosoma 9:26) Momo lie Suku a ecelela evĩho liaco?

Tu kũlĩhĩsi esunga limue lia velapo: Suku, lalimue eteke a kemba. (Tito 1:2) Ondaka eyi yi kuete esilivilo lie lohali yomanu? Kefetikilo Suku wa lomboluile okuti oku sinĩla ovihandeleko viaye, ci nena olofa. Ondaka ya Suku ya tẽlisiwa, momo tunde eci omanu va sinĩla ocihandeleko ca Suku vocumbo Cendene, va siata oku liyaka lovitangi violofa. Ocitangi catete colofa ca tunda kelinga limue liekangiso, eci Kaini a ponda manjaye Havele.​—Efetikilo 2:16, 17; 4:8.

Catiamẽla kulandu womanu, Ondaka ya Suku yi lombolola ndoco: “Omunu poku kangisa ukuavo o lilinga eye muẽle cĩvi.” (Ukundi 8:9) Anga hẽ olondaka evi viocili? Yehova wa sapuilile omanu vaye va Isareli okuti va ka vialiwa lolosoma vi ka va talisa ohali, kuenje va ka sandiliya ekuatiso Kokuaye. (1 Samuele 8:11-18) Ndaño muẽle soma Salomone wa kangisavo omanu lelisimu limue lia tĩla. (1 Olosoma 11:43; 12:3, 4) Olosoma vimue vĩvi ndeci soma Ahava, va talisa omanu ohali. Kaliye sokolola ndoco: Nda Suku ka ecelele uviali waco wolongangala, anga hẽ ondaka yaye nda ya kala yocili?

Ivalukavo okuti, Satana wa popele hati omanu va vumba lika Suku omo liocipululu covokuasi. (Yovi 1:9, 10; 2:4) Suku nda wa teyuilile omanu kohali yosi, nda ka lekisile hẽ okuti Satana wa vangula ocili? Nda Suku wa teyuilile omanu kovina vĩvi, nda ka lekisile hẽ okuti eye ohembi? Handi vali, omanu valua nda va kuata ovisimilo viokuti va pondola oku liviala ovo muẽle ndaño ka va kuatisiwile la Suku. Pole Ondaka ya Suku yi lekisa​—okuti omunu ka tẽla oku liviala eye muẽle. (Yeremiya 10:23) Tu sukila okuti Usoma wa Suku wiya, loku malako ekambo liesunga.

Anga hẽ eci ci lomboloka okuti Suku lacimue a pondola oku linga oco a maleko ohali? Sio, hacoko. Kũlĩhĩsa ovina vivali eye a linga: Catete, eye o situlula eci ci lomboloka ohali. Ondaka yaye, ya lombolola ovina viosi via kongela vusuanji Isevele a lingila Navote. Embimbiliya li tu sapuila okuti ovilinga viaco vĩvi via kokiwa losoma yimue yĩvi okuti ka yi yongola oku li situlula. (Yoano 14:30; 2 Va Korindo 11:14) Pole, Embimbiliya lio tukula hati Satana Eliapu. Suku poku situlula ũvi kuenda ungangala loku kua tunda ovina viaco, o tu teyuila kũvi waco. Eye o teyuilavo elavoko lietu lioku kala otembo ka yi pui.

Cavali, Suku wa likuminyavo oku malako ohali. Onjila Yehova a kuama poku situlula, loku sombisa, kuenda oku yambula Ahava la Isevele, kuenda omanu vakuavo, yi tu ĩha ekolelo liokuti olohuminyo viaye vioku yambula olondingãivi viosi vi ka tẽlisiwa. (Osamo 52:1-5) Suku wa ecavo ku vana vo sole elavoko lioku malako ovina viosi via kokiwa lũvi kuenda ungangala.b Omo liaco, Navote ulume una ukuekolelo kumue lomãla vaye va ka kuata esanju lioku kala otembo ka yi pui vofeka yelau palo posi muna ka mu ka kala vali ekambo liesunga.​—Osamo 37:34.