APULILO EMBIMBILIYA A TAMBULUIWA

Anga hẽ Embimbiliya Ondaka ya Suku?

Ove o lavoka okuti Ondaka ya Suku Embimbiliya, li litepa lalivulu osi. Embimbiliya lia siata oku sandekiwa kalimi alua. Ukũlĩhiso Wembimbiliya u kuete unene woku pongolola ovituwa viomanu oco va kuate ekalo liwa.​—Tanga 1 Va Tesalonike 2:13; 2 Timoteo 3:16.

Tua kũlĩha okuti, Embimbiliya li tunda ku Suku, momo li tu sapuila ocili catiamẽla kovina vi keya kovaso yoloneke. Lomue omunu o pondola oku ci linga. Kũlĩhĩsa ulandu u sangiwa kelivulu lia Isaya. Cimue pokati kociña celivulu liaco, okuti ca sonehiwa eci pakambele ocita canyamo osimbu Yesu ka citiwile, ca sangiwa veleva limue ocipepi Lokalunga ka Kakuete Akimba. Ulandu wociña caco wa lomboluile okuti o Bavulono yi ka siala elunda. Ondaka yaco ya tẽlisiwa eci pa pita anyamo alua noke liupange wa Yesu woku kunda palo posi.​—Tanga Isaya 13:19, 20; 2 Petulu 1:20, 21.

Embimbiliya lia sonehiwa ndati?

Embimbiliya lia sonehiwa vokuenda kueci ci soka 1.600 kanyamo. Citava okuti alume 40 va soneha Embimbiliya, va kuama ovisimilo vimuamue kuenda lomue wa soneha eci ca litepa lukuavo. Oco hẽ ca tẽlisiwa ndati? Suku eye wa va songuila.​—Tanga 2 Samuele 23:2.

Olonjanja vimue Suku wa enda oku vangula lasonehi Vembimbiliya lekuatiso liovangelo, vovinjonde kuenda volonjoi. Suku wa kapa ovisimĩlo viaye vovitima viasonehi kuenje wa ecelela okuti va nõla olondaka oco va sonehe esapulo Liaye.​—Tanga Esituluilo 1:1; 21:3-5.