O Tenda Ndati Embimbiliya?
O pondola hẽ oku popia hati . . .
elivulu limue liolondunge viomanu?
elivulu limue liovohembi kuenda lialusapo esanda?
Ondaka ya Suku?
CECI EMBIMBILIYA LI POPIA
“Ovisonehua viosi vi Kola, vi tunda ku Suku.”—2 Timoteo 3:16, Embimbiliya li Kola—Epongoluilo Lioluali Luokaliye.
CECI CI PONDOLA OKU LOMBOLOKA KOKUOVE
Embimbiliya li tambulula apulilo a kuete esilivilo komuenyo.—Olosapo 2:1-5.
Li tu ĩha olonumbi via koleliwa okuti vi tu songuila eteke leteke.—Olosamo 119:105.
Li eca elavoko liocili lio kovaso yoloneke.—Va Roma 15:4.
TU SUKILA MUẼLE OKU TAVA KUECI EMBIMBILIYA LI POPIA?
Oco, omo liasunga atatu a kuãimo ndeci:
Elitokeko li komõhisa. Embimbiliya lia sonehiwa leci ci soka 40 komanu va litepa, vokuenda kueci ci soka 1.600 kanyamo. Valua pokati komanu vaco, lalimue eteke va li kũlĩhĩle. Pole, ndaño ndoco, Embimbiliya liosi li kuete elitokeko kuenda li kuete osapi yimuamue!
Ovolandu aco ocili. Vakuovolandu oluali, ka va siatele oku situlula akulueya vomanu vavo. Pole, asonehi Vembimbiliya, va soneha akulueya avo kuenda vomanu vo vofeka yavo.—2 Asapulo 36:15, 16; Olosamo 51:1-4.
Ovitumasuku via koleliwa. Embimbiliya lia tukuile ale oku nyõliwa kuolupale luo Bavulono, eci kua kambele 200 kanyamo. (Isaya 13:17-22) Olio lia situlula ndomo o Bavulono ya laikele oku nyõliwa kuenda onduko yomunu wa laikele oku yi yula!—Isaya 45:1-3.
Vialua pokati kovitumasuku Viembimbiliya, via tẽlisiwa. Pole, haicoko hẽ ci lavokaiwa Kondaka ya Suku?—2 Petulu 1:21.
SOKOLOLA EPULILO ELI
Ondaka ya Suku yi ku kuatisa ndati komuenyo wove?
Embimbiliya li tambulula epulilo eli kelivulu lia ISAYA 48:17, 18 kuenda 2 TIMOTEO 3:16, 17.