Apulilo Embimbiliya a Tambuluiwa

Nye ca vetiya omanu valua oku tava okuti kuli Ululiki?

Ci soka 3.000 kanyamo konyima, ulume umue wa soneha ndoco: “Ovopange ove a komohisa.” (Osamo 139:14) Poku sokolola ndomo oñaña yi fetika oku kula oku upisa kombuto yimue yitito, ange hẽ ka ci ku komohisa? Omanu valua va tava okuti oviendalomuenyo viosi vi kuete Ululiki.​—Tanga Osamo 139:13-17; Va Heveru 3:4.

Una wa lulika ilu kuenda ongongo, wa lulikavo omuenyo. (Osamo 36:9) Eye wa siata oku vangula lomanu kuenda o tu sapuila eci catiamẽla kokuaye.​—Tanga Isaya 45:18.

Etu hẽ tua tunda kovinyama?

Kolonepa vimue, etimba lietu lia li soka leli liovinyama. Momo ci kale omanu kuenda ovinyama, Ululiki wa va sokiyila oku kala palo posi. Eye poku panga omunu watete ko upile kocinyama, pole wo panga leve.​—Tanga Efetikilo 1:24; 2:7.

Omanu va litepa lovinyama kovina vivali vi kuete esilivilo. Catete, omanu va kuete epondolo lioku kũlĩha, oku sola kuenda oku sumbila Ululiki. Cavali, ovinyama ka via lulikiwile oco vi kale otembo ka yi pui, pole omanu va lulikiwa lelavoko liaco. Pole cilo, omanu vosi va piñala olofa omo okuti, ulume watete wa siapo oku pokola konumbi Yululiki.​—Tanga Efetikilo 1:27; 2:15-17.