Ongangu Yipi Vakuene va Pondola Oku Lilongisa Kokuove?
1. Nye olondonge via lilongisa kongangu ya Yesu?
1 Yesu wa popia hati: “Likapi okanga yange kuenda lilongisi kokuange.” (Mat. 11:29) Eye ka longisile lika lolondaka, pole, wa ecavo ongangu yiwa ku vakuavo. Sokolola ovina olondonge via Yesu via lilongisa kongangu yaye. Eye wa kala omunu umue uwa, wa sungulukile, kuenda wa kala ukuacisola. (Mat. 8:1-3; Mar. 6:30-34) Eye wa lekisile umbombe. (Yoa. 13:2-5) Eci olondonge via enda oku kuama Yesu kupange woku kunda, via limbuka okuti, wa enda oku talavaya calua koku longisa ocili komanu. (Luka 8:1; 21:37, 38) Omanu va pondola oku kuatisiwa ndati poku mola ongangu yetu yiwa kupange woku kunda?
2. Uwalo wa sunguluka, lovituwa vietu viwa, vi pondola oku vetiya ndati omanu tu kundila?
2 Omanu tu Kundila Kolonjo: Uwalo wa sunguluka, lovituwa vietu viwa, kuenda onjongole tu lekisa, vi pondola oku vetiya omanu tu kundila. (2 Va Kor. 6:3; Va Fil. 1:27) Ovo va limbuka okuti tua siata oku kuama Embimbiliya. Vakuavo va komoha calua omo okuti tua siata oku va yevelela lesumbilo eci va vangula letu. Tu sukila oku ivaluka okuti, nda tua lekisa ongangu yiwa kovina evi, ci vetiya omanu oku tava kesapulo Liusoma.
3. Ovina vipi tu pondola oku vetiya lavio vamanjetu?
3 Vamanjetu: Ivaluka okuti, ovituwa vietu viwa vi vetiya vamanji. Ombili yetu kupange woku kunda, yi pondola oku va vetiya oku kuatavo ombili yaco. Ndeci utale u lepika utale, nda tua loñoloha kupange woku kunda, ci kuatisa vamanji oku loñolohavo kupange waco. (Olosap. 27:17) Nda tua soneha onumbi ya vana va lekisa onjongole kuenda oku linga epasu lonjanga, ci vetiya vamanji oku kuama ongangu yetu. Tu lekisa ongangu yiwa ku vamanji poku tẽlisa ciwa ocikundi cetu cupange woku kunda.—2 Tim. 4:5.
4. Momo lie olonjanja vimue tu sukilila oku kũlĩhĩsa ovina tua siata oku linga?
4 Momo lie ku kũlĩhĩsila ovina wa siata oku linga levi o popia, kuenda ongangu yove yi pondola oku vetiya ndati vakuene? Ongangu yetu yiwa, yi sanjuisa Yehova, kuenda yi tu kuatisa oku kapako olondaka via Paulu wa popia hati: “Lingi muẽle olosetukuli viange ndomo ame ndisetukuli ya Kristu.”—1 Va Kor. 11:1.