Apulilo Vatambuluiwa
◼ Anga hẽ, Olombangi Via Yehova vi kuete omoko yoku eca ku vakuavo olohundo via ngalavaliwa?
Tua siata oku vetiyiwa kuenda oku pamisiwa lolohundo viopiwa Vembimbiliya. (Ovil. 15:32) Omo liaco, ca sunguluka oku sapela la vana ka va endele kohongele catiamẽla kolohundo viaco. Omo okuti koloneke vilo kuli olomakina vialua vioku ngalavala, ca leluka oku ngalavala ohundo, kuenda oku yeca ku vakuetu. Vamue va siata oku seleka olohundo vialua via ngalavaliwa oku kongelamo vina okuti, via lingiwa ale osimbu, kuenje va viundika, pamue va ngalavalelako akamba vavo. Vakuavo va siata oku vi kapa vonumbi yavo yo Internet, oco vi yeviwe la vana va kuete onjongole yaco.
Ca sunguluka nda tu ngalavala ohundo oco tu yi yevelele etu muẽle, ale epata lietu. Handi vali, akulu vekongelo citava okuti, va linga esokiyo lioku ngalavalelako vana va vela okuti, ka va pondola oku enda kolohongele. Pole, kuli esunga lieci tu sukilila oku yuvula oku ngalavala olohundo oco vieciwe ku vakuetu.
Ocili okuti olonjanja vimue olohundo via siata oku lingiwa locimãho coku kuatisa ekongelo. Omo liaco, nda tua tambula ohundo ya ngalavaliwa, pamue ka tu kuata elomboloko lia suapo liatosi amue a tukuiwa, momo ka tua kũlĩhĩle esunga lieci ohundo yaco ya lingiwila. Handi vali, ka tu limbuka manji wa linga ohundo yaco lotembo a yi linga, kuenda ka tu kũlĩha nda wa kuama olonumbi viokaliye, haivio via suapo. (Luka 1:1-4) Oku eca ohundo ya ngalavaliwa, ci pondola oku vetiya vamue oku eca epandiyo kuenda esivayo ka lia sungulukile.—1 Va Kor. 3:5-7.
Ukuenje wa kolelua haeye wa lunguka, wa siata oku likolisilako oku eca okulia kuespiritu ‘vonjongo yasuapo,’ kuenda ‘kueteke liaco.’ (Luka 12:42) Vokulia kuaco, mua kongela olohundo via siata oku lingiwa vakongelo Olombangi Via Yehova, kuenda ovina via ngalavaliwa okuti vi sangiwa vonumbi yetu yo Internet okuti, jw.org. Tua kolela okuti, ukuenje wa kolelua haeye wa lunguka, kuenda Osungu Yakulu Yolombangi Via Yehova, va amamako oku tu ĩha ovina tu sukila oco tu pamise ekolelo lietu.—Ovil. 16:4, 5.