‘Olondaka Viwa vi Kundiwa’!
1. Tua kũlĩha ndati okuti lacimue ci pondola oku tateka upange woku kunda?
1 Lacimue ci pondola oku tateka oku tẽlisiwa kuocipango ca Yehova. (Isa. 14:24) Gideone una wa kala Onganji kumue lolohoka viaye vi soka 300, va simĩle okuti ka va tẽla oku yula cisoka 135.000 kovanyali va Midiane, pole Yehova wo sapuila hati: “Kuende longusu o kuete ndeti. Popela Isareli peka lia va Midiane. Hameko hẽ nda ku tuma?” (Olong. 6:14) Upange upi Yehova a siata oku kuatisa koloneke vilo? Yesu wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi.” (Mat. 24:14) Lomue o pondola oku tateka oku tẽlisiwa kupange waco!
2. Momo lie tu kolelela okuti Yehova o pondola oku kuatisa omunu lomunu kupange woku kunda?
2 Yehova o Kuatisa Omunu Lomunu: Ndaño tua kolela okuti Yehova wa siata oku kuatisa Olombangi viaye viosi, anga hẽ tu lavoka okuti o kuatisa omunu lomunu? Eci upostolo Paulu a liyaka lovitangi, wa limbuka ekuatiso lia Yehova, vonduko Yomõlaye Yesu. (2 Tim. 4:17) Tu sukilavo oku kolela okuti, Yehova o sumũlũisa alikosilo etu oku linga ocipango caye.—1 Yoa. 5:14.
3. Kovina vipi Yehova a pondola oku tu kuatisa?
3 Anga hẽ, ovopange eteke leteke a siata oku tepulula ongusu yove yoku linga upange woku kunda? “[Yehova] o kolisa ava va lenda.” (Isa. 40:29-31) Anga hẽ wa siata oku liyaka lelambalalo? “Tuika Yehova ocitele cove kuenje eye o ku kuatisa.” (Osa. 55:22) Anga hẽ o kuete ohele? Yehova hati: “Kuende. Ame ñala omẽla wove siu ku longisa eci o popia.” (Etu. 4:11, 12) Anga hẽ ekambo liuhayele li ku tateka oku pesila otembo yalua kupange woku kunda? Yehova wa ku kapako kuenda o sanjukila alikolisilo o linga lutima wosi, ndaño upange o linga ka wa luile.—1 Va Kor. 3:6, 9.
4. Oku kolela ku Yehova ci tu kuatisa ndati?
4 Eka lia Yehova ‘lia nyanyumuĩwa, kuenje u o li tiula helie?’ (Isa. 14:27) Tua kolela okuti, Yehova o sumũlũisa upange wetu woku kunda. Omo liaco, tu amamiko oku kunda ‘lutõi ondaka ya Yehova.’—Ovil. 14:3.