“Ndunge o Tendiwa Ndukuesunga Mekonda Liovilinga Viaye”
1. Omanu vamue va siata oku tenda ndati upange wetu woku kunda?
1 Olonjanja vimue tua siata oku sanga omanu valua va tu tambulula lãvi omo okuti, ka va kuete elomboloko liatiamẽla kokuetu, ale va yeva ovina via litepa lekalo Liolombangi Via Yehova. Citava okuti, va vetiyiwa lovina va yeva vovingungu viasapulo. Kolofeka vimue, omanu va siata oku tu lundila hati, tua tiamẽla ‘kocisoko cimue cohele.’ Ocituwa cipi tu sukila oku lekisa kalundi aco?
2. Nye ci tu kuatisa oku yuvula esumuo eci tu lundiliwa?
2 Kuata Ocituwa ca Sunguluka: Kocita catete Yesu kumue lafendeli vakuavo va Yehova olonjanja vimue va enda oku popiwa lãvi kuenda oku lundiliwa. (Ovil. 28:22) Pole, ka va ecelele okuti va kuata osõi kupange woku kunda omo lialundi aco. Yesu wa popia hati: “Ndunge o tendiwa ndukuesunga mekonda liovilinga viaye.” (Mat. 11:18, 19) Eye wa lekisa ombili koku linga ocipango ca Isiaye, kuenda wa kolelele okuti, omanu vana va yongola oku kũlĩha ocili, va pondola oku limbuka esilivilo liolondaka viwa. Omo liaco, tu yuvuli oku sumua poku ivaluka okuti, Omõla wa Suku wa liyakavo lovitangi viaco.
3. Momo lie ka tu komohẽla omo liasapulo vuhembi kuenda alambalalo?
3 Yesu wa popele hati, oluali lu ka suvuka olondonge viaye ndeci ca pita laye. (Yoa. 15:18-20) Omo liaco, asapulo vuhembi kuenda alambalalo a siata koloneke vilo, ka va tu komohĩsa. Omo okuti tu kasi koloneke via sulako, onyeño ya Satana ya livokiya calua, kuenje tu lavoka oku pita lovitangi viaco. (Esit. 12:12) Pole, tu pondola oku sanjuka poku kũlĩha okuti oluali lua Satana ndopo lu nyõliwa.
4. Nda va tu ĩha etambululo limue ka lia sungulukile, tu sukila oku tambulula ndati?
4 Eca Etambululo Lumbombe: Nda va tu ĩha etambululo limue ka lia sungulukile, tu sukila oku lekisa umbombe lesunguluko poku eca etambululo. (Olosap. 15:1; Va Kol. 4:5, 6) Nda ekalo liaco li ecelela, tu pondola oku lomboluila komunu waco okuti, kuli ovina vialua vamue va siata oku lundila Olombangi Via Yehova, ale tu pula esunga lieci a kuetele ovisimĩlo viaco. Etambululo tu eca lumbombe komunu waco, li pondola oku u kuatisa oku lombolola ovina a siata oku yeva viatiamẽla Kolombangi Via Yehova. Nda tua ci linga, ci kuatisa omunu waco oku tu yevelela vali onjanja yikuavo. Pole, nda omunu waco wa tema calua, tu sukila oku u sia lombembua. Tu sukila oku ivaluka okuti, ndaño omanu va tu popia lãvi, pole, tua kolela okuti, Yehova wakapako upange wetu woku kunda.—Isa. 52:7.