‘Kali Vakuambembua Lomanu Vosi’
1. Elungulo lipi Liembimbiliya tu sukila oku kapako eci tu sanga omanu vana va tema?
1 Afendeli va Yehova va sole ombembua, kuenda upange wetu woku kundila omanu esapulo liwa, wombembua. (Isa. 52:7) Pole, olonjanja vimue eci tu totola kapito olonjo vimue, omanu tu sangako va tema. Ndaño lovitangi viaco, nye ci tu kuatisa oku kala vakuambembua?—Rom. 12:18.
2. Momo lie ci kuetele esilivilo oku kuata olondunge?
2 Lekisa Utate: Omanu vamue ka va sole esapulo tu va kundila, vakuavo va siata oku tema calua omo ka va kuete elomboloko liesapulo liaco. Pamue, tu enda kolonjo viomanu vepuluvi limue ka lia sungulukile, ale tu sanga omunu umue o liyaka locitangi. Ndaño okuti olondaka viwa via siata oku temisa omanu, pole, tu sukila oku ivaluka okuti, ovo va lekisa ocituwa caco, momo va kasi vonumbi. (2 Va Kor. 4:4) Omo liaco, oku kuata olondunge ci tu kuatisa oku tula utima loku limbuka okuti, omunu waco ka kasi oku lekisa onyeño kokuetu.—Olosap. 19:11.
3. Tu lekisa ndati esumbilo komanu tu sanga?
3 Lekisa Esumbilo: Omanu valua tua siata oku sanga vocikanjo, va tiamisila ekolelo liavo kalongiso esanda. (2 Va Kor. 10:4) Ndaño ndoco, omanu vaco va kuete omoko yoku nõla nda va yongola oku tu yevelela, ale sio. Omo liaco, ka tu ka sepuli omanu tu sanga loku sima okuti, etu tu kuete ukũlĩhĩso wa velapo wa tiamẽla Kembimbiliya okuti ovo ci sule. Nda omunu umue o pinga kokuetu oco tu tunde konjo yaye, tu sukila oku ci linga lesumbilo.
4. Oku vangula lumbombe ku lomboloka nye?
4 Vangula Lumbombe: Nda omanu va tu pembula, tu sukila oku vangula lavo lumbombe. (Va Kol. 4:6; 1 Pet. 2:23) Ndaño olonjanja vimue omanu ka va tava kesapulo tu va kundila, tu sukila oku tukula ocina cimue okuti, vosi yetu tua ci kolela. Citava okuti tu pulisa omunu esunga lieci a likalela oku vangula letu. Oco ka tu ko tatamise vepuluvi liaco, ca sunguluka okuti tu liwekapo ombangulo.—Olosap. 9:7; 17:14.
5. Onima yipi yi tunda koku kala vakuambembua kupange woku kunda?
5 Nda tu kala vakuambembua, omanu tu sanga vocikanjo va ka ivaluka ocituwa caco, kuenje, kepuluvi likuavo eci umue a ka seteka oku va kundila va ko yevelela. (Va Rom. 12:20, 21) Olonjanja vimue, omunu una o moleha ndu okuti ka tava oku u kundila, eteke limue o ka linga manjetu. (Va Gal. 1:13, 14) Ci kale okuti omanu va tava oku va kundila, ale sio, nda tua amamako oku lekisa esunguluko loku kala vakuambembua, tu ka sivaya Yehova, kuenda tu ka mioñolola elongiso lietu.—2 Va Kor. 6:3.