Apulilo Vatambuluiwa

◼ Volonepa Vipi tu Kuatisa Akundi Votembo Yosi?

Vokuenda kunyamo wupange wo 2009, ci soka 800.000 ya vamanji voluali luosi, va talavaya ndakundi va velapo kuenda va likasi. Vamanji vaco, va pesela otembo yavo, ongusu, kuenda ovipako viavo oco va kunde olondaka viwa Viusoma. (Olosap. 3:9) Hesanjukuolio Yehova a yeva omo lialikolisilo avo! Volonepa vipi tu lekisa ovisimĩlo ndevi via Yehova poku kuatisa vamanji vaco oku kuata esanju kuenda epandi kupange waco?

Oku nõla olondaka vielembeleko, ci va vetiya oku amamako kupange wakundi votembo yosi. (Olosap. 25:11) Anga hẽ, tu pondola oku pongolola esokiyo lietu liosemana, oco tu talavaye la vamanji vaco kupange woku kunda? Poku talavaya lavo, citava okuti tu va pinga oco va endele vocendelo cetu, okuti cavo hacoko. Pole, nda tu endela vocendelo cavo, citava okuti tu eca ombanjaile yi ka va kuatisa oku feta ovina vimue vi sukiliwa vocendelo caco. (1 Va Kor. 13:5; Va Fil. 2:4) Tu pondolavo oku lekisa ocisola cetu poku laleka akundi vaco kolonjo vietu kalivala oku lia.—1 Pet. 4:8, 9.

Ovisonehua vi lekisa okuti vana va pitisa kovaso Usoma, Yehova o ka va ĩha eci va sukila. (Osa. 37:25; Mat. 6:33) Eye o ci linga, lekuatiso lia vamanji vakuacisola voluali luosi. (1 Yoa. 3:16-18) Ocili okuti akundi votembo yosi ka va lavoka okuti vakuavo va va fetelako ovina viosi va sukila. Kuendavo eci va sukila cimue ka va sakalaisa vakuavo. Pole nda tua kala vakuakulavulula, tu pondola oku kuatisa akundi votembo yosi nda “ovo va kamba” cimue.—2 Va Kor. 8:14, 15.

Febe ukundi umue ukuambili wo kocita catete wa kala Vekongelo lio Kengerai, osimbu ka pitilile ko Roma, Paulu wa vetiya vamanji vo ko Roma hati: “U [tambuili] vonduko ya Ñala, ndeci ca sesamela olosandu, loku u kuatisa ndeci a sukila.” (Va Rom. 16:1, 2) Tu sukilavo oku lekisa ocisola cimuamue, poku sanda apuluvi oku kuatisa vamanji va kasi vekongelo lietu okuti va likolisilako oku kunda olondaka viwa, oku kongelamo akundi va velapo kuenda va likasi.—Ovil. 5:42.