Kuatisa Omãla Vove Oku Linga Akundi
1. Osamo 148:12, 13, yi vetiya olonjali Akristão oku linga nye?
1 Yehova o laleka amalẽhe oco vo sivaye. (Osa. 148:12, 13) Olonjali Akristão ka vi longisa lika omãla vavo ocili Cembimbiliya kuenda ovihandeleko via Suku. Pole, vi va kuatisavo oku linga akundi volondaka viwa. Nye va sukila oku linga oco va kuate onima yiwa?
2. Ongangu yiwa yolonjali yi kuatisa ndati omãla?
2 Ongangu Yiwa: Nganji Gedeone wa sapuila kueci ci soka 300 kalume hati: “Vanji kokuange, lingi ndomo ndinga.” (Olong. 7:17) Omãla va kuete ocituwa coku vanja kuenda oku setukula ovina olonjali viavo vi linga. Onjali yimue yulume yi talavaya luteke, eci yi pitila konjo Casapalo komẽle ndaño lekavo lialua, ka yi pekela pole, ambata omãla vaye kupange woku kunda. Eye ka longisa amãla vaye lolondaka, puãi eca ongangu yokuti upange woku kunda owo wa velapo. (Mat. 6:33) Anga hẽ omãla vove va siata oku mola esanju o kuetele ovina viatiamẽla kefendelo ndeci, olohutililo, oku tanga Embimbiliya, oku eca atambululo kolohongele kuenda upange woku kunda? Ocili okuti ove ku ka eca ongangu ya velapo. Pole, nda wa lekisa ombili koku vumba Yehova, omãla va ka tambuluiya ciwa alikolisilo ove oku va longisa oku fendela Yehova.—Esin. 6:6, 7; Va Rom. 2:21, 22.
3. Ovimãho vipi viespiritu olonjali vi kuatisa omãla vavo oku litumbikila loku vi tẽlisa?
3 Oku Kuata Ovimãho: Olonjali vi likolisilako oku kuatisa omãla vavo kovina ndeci: oku enda, oku vangula, oku wala ovo muẽle, kuenda ovina vikuavo. Osimbu omãla va kula, va kuata ovimãho viokaliye. Nda okuti olonjali viaco Akristão, vi va kuatisavo oku litumbikila ovimãho viespiritu loku vi tẽlisa ndomo ci likuata lutunga wavo kuenda oku loñoloha kuavo. (1 Va Kor. 9:26) Wa siata hẽ oku longisa omãla vove oku eca atambululo volondaka viavo muẽle, loku pongiya olohundo viavo Kosikola Yupange Wakristão? (Osa. 35:18) O kasi hẽ oku va kuatisa kolonepa vikuavo viupange woku kunda? O kasi hẽ oku va tumbikila ocimãho coku papatisiwa kuenda oku iñila kupange wakundi votembo yosi? Anga hẽ o kasi oku va kuatisa oku kuata ukamba lakundi vakuavo okuti va va vetiya oku kuatavo ovimãho viaco?—Olosap. 13:20.
4. Omãla va kuatisiwa ndati omo lioku kuata olonjali vi va pindisa kupange woku kunda tunde vutila?
4 Ukualosamo wa popia hati: “A Suku, wa ndonga ndonga tunde kutila wange. Lame nda lombolola ovikomo viove toke cilo.” (Osa. 71:17) Kuatisa omãla vove oku linga akundi tunde vutila. Ociseveto cespiritu o tumbikila omãla, ci ka va kuatisa eci va linga akulu!—Olosap. 22:6.