Omãla Vove va Lipongiya Ale?
1. Momo lie ci kuetele esilivilo oku pongiya omãla va kasi oku tanga kosikola?
1 Oloneke vioku tanga kosikola vi panda vokati kunyamo. Ocili okuti omãla vove va kasi oku liyaka lovitangi kuenda alambalalo. Ovo va kuetevo epuluvi lioku ‘imba uvangi wocili.’ (Yoa. 18:37) Omãla vove hẽ, va lipongiya ale?
2. Catiamẽla koku lipongiya, nye omãla vove va Sukila oku kulĩha?
2 Omãla vove va kũlĩha hẽ okuti oku panga onepa kovipito viofeka kuenda kateke o wusa ka ca sungulukile? Ovo va lipongiyila ale oku liyaka loseteko yoku lisonehisa kosikola ya velapo, oku namulala, oku nyua evi vi koluisa kuenda olodroga? Va tẽla lika oku tambulula okuti etavo liavo li pisa elinga liaco, ale va tẽla oku lombolola ovina va kolela?—1 Pet. 3:15.
3. Kefendelo Liepata koñolosi olonjali vi kuatisa ndati omãla vavo oku lipongiya?
3 Kefendelo Liepata Koñolosi: Oku likolisilako oku konomuisa ovina vi pita lomãla vene kosikola osimbu ka va malele oku tanga, ci pondola oku va kuatisa. Momo lie ka vu ci lingila olonjanja viosi Kefendelo Liepata koñolosi? Oco o kuatisiwe oku kũlĩha eci o sukila oku vangula, pulisa omãla vove ovitangi va kasi oku liyaka lavio kosikola. Ovina wa konomuisi kanyamo apita, vi pondola oku va kuatisa cilo okuti va linga ale akulu, kuenda ci vokiya olondunge viavo. (Osa. 119:95) Kongelamo ovindekaise viovitangi via siata kosikola, okuti ove unjali o linga ocikele culongisi, ale condonge yikuavo kosikola. Longisa omãla vove ndomo va tambulula lekuatiso Liembimbiliya, ale alivulu akuavo ndeci Raciocínios kuenda Os Jovens Perguntam. Umue pokati kolonjali a linge ocindekaise coku pongiya omõla ndomo a ka vangula lulongisi waye wokaliye eci osikola yi fetika loku lombolola okuti eye Ombangi ya Yehova.—Tanga Utala Wondavululi wa 15 ya Cembanima wo 2010, kamẽla 3-5.
4. Olonjali vi kuete olondunge, nye vi ka linga?
4 Ovitangi amalẽhe Akristão va siata oku liyaka lavio vi kasi oku livokiya koloneke vilo via sulako ‘yotembo yohali.’ (2 Tim. 3:1) Olonjali vi kuete olondunge vi pongiya selo omãla vavo. (Olosap. 22:3) Vosi yene vu sukila oku kuatisa omãla vene oku lipongiya.