Eca Uvangi Lekolelo Vocikanjo Colomĩlu
1. Momo lie ka tu sukilila oku sumua nda tua limbuka okuti tu kuete usumba woku kundila vocikanjo colomĩlu?
1 Wa siata hẽ oku kuata usumba poku kundila vocikanjo colomĩlu? Nda oco, ku ka sumue, momo ndaño Paulu ka kuatele usumba, lopo wa sukulile oku ‘lekisa utõi’ oco a kunde. (1 Va Tes. 2:2) Ovinimbu vi kuãimo vi lekisa ovitangi vimue via siata kuenda olonumbi vi pondola oku tu kuatisa.
2. Momo lie ka tu sukilila oku sima okuti tu ka temisa olonalavayi?
2 Anga hẽ o ka Tateka Olonalavayi Loku vi Temisa? Olonalavayi vialua kovitumalo violomĩlu, vi talavayela owiñi kuenda vi lavoka oku tatekiwa. Ovo va ka ku tenda ndomunu o yongola oku landa cimue. Nda wa loña kokuavo lesumbilo, locisola kuenda lukamba ovo va ka lekisavo esumbilo kokuove.
3. Tu yuvula ndati oku temisa omanu veya Vovenda?
3 Ndi Pondola hẽ Oku Kundila Kovaso Yomanu Veya Oku Landa? Nda ci tava nola epuluvi lina okuti olovenda ka via fetikila handi oku landisa, ale poku yulula apito. O pondolavo oku ci linga nda cime ale onalavayi yovenda o kasi lika liaye. Poku vangula teta onimbu.
4. Nye tu sukila oku popia poku talavaya kovitumãlo violomĩlu?
4 Nye Ndi Sukila Oku Popia? Nda vovenda muli olonãlavayi vialua, vangula tete lacime covenda. O pondola oku popia ndoco: “Ca tĩla calua oku sanga omanu vakualomĩlu konjo, omo liaco tu kasi oku ku pasuisi kovitumãlo viene viupange. Nda kũlĩha okuti o kasi oku talavaya pole, ndi teta onimbu.” Oco ka tu ka tendiwe ndavakualomĩlu, tu yuvuli oku tukula ombanjaile, pole nda citava tu pulisa omunu waco nda wa kũlĩha ndomo alivulu etu a fetiwa. Eci o pitĩla povenda yimue, pinga ku cime nda ci tava oku vangulapo kamue lolonalavayi. Pitulula lavo olondaka viove vioku fetika ombangulo. Nda onalavayi yimue ka yi kuete otembo yoku ku yevelela teta onimbu poku vangula, noke u sila otratadu. Nda ka ci tava oku vangula lolonalavayi, pamue va ku ecelela oku sia alivulu vohondo va siata oku puyukila.
5. Esunga li pi tu kuete lioku eca uvangi lekolelo kovitumãlo violomĩlu?
5 Yesu kuenda Paulu va kundila omanu kovitumãlo viavo violomĩlu lekolelo kuenda ove o pondolavo oku ci linga. (Mat. 4:18-21; 9:9; Ovil. 17:17) Pinga ku Yehova oco a ku kuatise oku tula utima kuenda oku kuata utõi. (Ovil. 4:29) Omo okuti omanu va sangiwa kovitumãlo violomĩlu vana ka va sangiwa kolonjo viavo, momo lie ku setekela oku eca uvangi lonjila eyi yeca onima?