Olonumbi Vitãlo vi ku Kuatisa Oku Longisa Omanu Embimbiliya
1. Nda ka ca lelukile kokuove oku sanga omunu umue oco u longise Embimbiliya, nye o sukila oku linga, kuenda momo lie?
1 Anga hẽ ka ca lelukile kokuove oku sanga omunu umue oco u longise Embimbiliya? Ku ka liwekepo oku sandiliya. Yehova o sumũlũisa vana va likolisilako oku linga ocipango caye. (Va Gal. 6:9) Ovinimbu vi kuãimo, vi lekisa olonumbi vitãlo vi pondola oku ku kuatisa.
2. Oku pulisa omunu ci tu kuatisa ndati oku fetika oku u longisa Embimbiliya?
2 Linga Epulilo Liteta Onimbu: Omanu valua va kũlĩha okuti tua siata oku eca Utala Wondavululi lo Despertai!, pole, ka va kũlĩhĩle okuti tua siata oku longisa omanu Embimbiliya. Momo lie poku enda konjo lanjo ku pulisila omanu vaco? O sukila oku pulisa omanu vana wa siata oku pasuisa, nda va yongola oku lilongisa Embimbiliya. Nda ka va yongola, amamako oku va ĩha alivulu etu loku va vetiya oku kuata onjongole. Manji umue wa enda oku nyula olohueli vimue vokuenda kuanyamo alua, loku eca kokuavo olorevista. Onjanja ya sulako yoku eca olorevista kokuavo, wa va pulisa ndoco: “Vu yongola hẽ oku lilogisa Embimbiliya?” kuenje olohueli viaco, vio tambulula viti, oco. Cilo olohueli viaco via papatisiwa ale.
3. Momo lie tu sukilila oku yuvula oku sima okuti omanu vana va siata oku iya kolohongele va kasi ale oku lilongisa Embimbiliya? Tukula ulandu umue.
3 Oku Kala Kolohongele: Ku ka sime okuti omanu vana va siata oku endaenda kolohongele pole, hakundiko va kasi ale oku lilongisa Embimbiliya. Manji umue wa popia hati: “Omanu valua nda longisa Embimbiliya, nda fetika oku vangula lavo kolohongele.” Manji umue ukãi wa nõlapo oku sapela lukãi umue wa kuatele osõi yalua okuti, omãla vaye vafeko va papatisiwile ale. Tunde eci ukãi waco a fetika oku endaenda kolohongele, pa pitile ale 15 kanyamo, kuenda olonjanja vimue wa enda oku pitĩla Vonjango Yusoma okuti ohongele yi panda kesulilo. Ukãi waco wa tava oku longisiwa Embimbiliya kuenje, wa papatisiwa. Manji wo longisa wa popia hati: “Ndi livela calua omo lioku kevelela 15 kanyamo okuti, sia u pulisile nda o yongola oku lilongisa Embimbiliya!”
4. Nye ci pondola oku tu kuatisa oku sanga omunu umue tu yongola oku longisa Embimbiliya?
4 Oku Pulisa Ondonge: Manji umue ukãi wa enda oku kuama vamanji vakuavo va kuata olondonge viavo. Kesulilo lielilongiso, nda manji a enda laye wo wecelela, eye o pulisa ondonge nda ya kũlĩha omunu umue o yongola oku lilongisa Embimbiliya. Omo liaco, eci ove eca elivulu Embimbiliya li Longisa Nye, komunu umue, poku linga epasu, o sukila oku u pulisa ndoco: “Wa kũlĩha omunu umue o yongolavo oku tambula elivulu eli?” Olonjanja vimue vamanji kuenda akundi vamue votembo yosi ka va pondola oku longisa Embimbiliya omunu umue va sanga vocikanjo. Omo liaco, va sapuila okuti, o yongola oku longisa Embimbiliya omunu umue.
5. Momo lie tu sukilila oku pulisa vamanji vana okuti olohueli viavo havakuetavoko nda vi yongola oku lilongisa Embimbiliya?
5 Olohueli Vina Okuti Havakuetavoko: Vekongelo liene muli hẽ manji umue okuti ohueli yaye hokuetavoko? Omanu vana okuti havakuetavoko, ndaño ka va siatele oku sapela ovina viatiamẽla Kembimbiliya lolohueli viavo okuti Olombangi Via Yehova, pole, eci manji umue ka tiamẽla kepata liaye o vetiya oku lilongisa Embimbiliya o tava. Omo liaco, tu sukila oku pulisa manji una okuti ohueli yaye hokuetavoko oco tu sapele lohueli yaco nda yi yongola oku lilongisa Embimbiliya.
6. Nda manji umue o yongola oku longisa omunu Embimbiliya momo lie ci kuetele esilivilo oku likutilila?
6 Olohutililo: Ku ka tombe unene wolohutililo. (Tia. 5:16) Yehova wa likuminya oku tambulula olohutililo vietu vina vi litava locipango caye. (1 Yoa. 5:14) Manji umue okuti ka kuatele otembo omo liasakalalo alua, wa fetika oku likutilila oco a longise omunu umue Embimbiliya. Ukãi waye wa lipula nda ulume waye wa ponduile oku kuatisa ondonge, eci yi kuata ovitangi. Omo liaco, wa likutilila ku Yehova oco a kuatise ulume waye oku sanga omunu umue o yongola oku lilongisa Embimbiliya. Olohutililo viavo via tambuluiwa noke yolosemana vivali, eci manji umue ukundi wotembo yosi a sanga ulume umue wa yonguile oku lilongisa Embimbiliya, kuenje wo weca ku manji yaco. Noke ukãi waye wa soneha ndoco: “Ku vamanji vana okuti poku longisa omanu Embimbiliya, va sima vati ka va kasi oku ci linga ciwa, ndi va sapuila siti: Va sukila oku amamako oku likutilila loku tukula ocitangi caco. Etu cilo tu kuete esanju lialua.” Omo liaco, nda wa pandikisa, o ka tẽla oku longisa omunu umue Embimbiliya, kuenda o ka kuata esanju omo lioku kuatisa omanu oku ‘sanga onjila yi tuala komuenyo ko pui.’—Mat. 7:13, 14.