Ku ka Tepulule Ombili Yove Loku Sima Okuti Kua Loñolohele
1. Momo lie vamanji vamue va kuetele ohele yoku longisa omanu Embimbiliya?
1 Wa siata hẽ oku kuata ohele yoku longisa omunu umue Embimbiliya, omo lioku sima okuti, kua loñolohele? Afendeli va Suku kosimbu ndeci, Mose, kuenda Yeremiya, olonjanja vimue, va simĩle okuti, ka va pondola oku tẽlisa ocikele cavo omo ka va loñolohele. (Etu. 3:10, 11; 4:10; Yer. 1:4-6) Valua pokati kafendeli va Suku va kuatelevo ovisimĩlo ka via sungulukile. Pole veya oku yula ndati ocitangi caco?
2. Momo lie tu sukilila oku yuvula oku linga lika upange woku kundila konjo lanjo, loku sima okuti vamanji vakuavo ovo va pondola oku longisa omanu Embimbiliya?
2 Tu ivaluki okuti, Yehova lalimue eteke a tu kisika oku linga upange umue ka tu tẽla. (Osa. 103:14) Ocili okuti, tu pondola oku tẽlisa ciwa ocikundi tua tambula coku kuatisa omanu oco “va linge olondonge” poku va ‘longisa.’ (Mat. 28:19, 20) Esumũlũho liaco, Yehova ka li ecele lika komanu vana va loñoloha calua pokati ketu. (1 Va Kor. 1:26, 27) Omo liaco, ka tu ka lingi lika upange woku kundila konjo lanjo, loku ecelela okuti vamanji vakuavo, ovo va longisa omanu Embimbiliya.
3. Yehova wa siata oku tu kuatisa ndati oco tu tẽle oku longisa ciwa omanu Embimbiliya?
3 Yehova o tu Ĩha Uloño: Yehova eye wa siata oku tu ĩha uloño woku longisa omanu oco va linge olondonge. (2 Va Kor. 3:5) Eye wa tu longisa oku kũlĩha ocili ci sangiwa Vembimbiliya lekuatiso liocisoko caye. Pole, omanu valua voluali ka va kũlĩhĩle ocili caco. (1 Va Kor. 2:7, 8) Wa ecelela okuti ovolandu a tiamẽla koku longisa kua Yesu, a kala Vembimbiliya oco tu tẽle oku u setukula, kuenda wa siata oku tu pindisa lekuatiso liekongelo. Handi vali, Yehova ka ecelela okuti, omunu lomunu pokati ketu, eye o sokiya ndomo a longisa omanu Embimbiliya. Momo wa tu ĩha ovimalẽho vialua ndeci: Elivulu Embimbiliya li Longisa Nye, mu sangiwa alongiso a leluka a kuatisa oku kuata elomboloko lia suapo. Omo liaco, oku longisa omanu Embimbiliya hacina cimueko ca tatama, ndomo tua siata oku sima.
4. Momo lie tu kuetele ekolelo liokuti, Yehova o tu kuatisa oku longisa omanu?
4 Mose kuenda Yeremiya, va tẽlisa upange wavo lekuatiso lia Yehova. (Etu. 4:11, 12; Yer. 1:7, 8) Tu pondolavo oku pinga ekuatiso ku Yehova oco tu tẽlise ciwa upange wetu. Handi vali, poku longisa omunu umue, tu sanjuisa Yehova Suku, momo tu kasi oku u kuatisa oku kũlĩha ovina viatiamẽla kokuaye, kuenda kocili ci sangiwa Vembimbiliya. (1 Yoa. 3:22) Omo liaco, kuata ocimãho coku longisa omanu Embimbiliya okuti, olio esumũlũho lia velapo kupange woku kunda.